មន្ត្រីសុខាភិបាល និងគ្រូពេទ្យអះអាងថា សម្រាប់អ្នកដែលបានចាក់វ៉ាក់សាំងបង្ការជំងឺកូវីដ-១៩ ទាំង២ដូសរួច និងថែមទាំងបានឆ្លងជំងឺកូវីដ-១៩ ក្រោយចាក់វ៉ាក់សាំងនោះ គឺមិនចាំបាច់ចាក់វ៉ាក់សាំងដូសទី៣ ឬដូសជំរុញភ្លាមៗ ដើម្បីការពារការឆ្លងជំងឺកូវីដ-១៩ទៀតនោះទេ។ ការបញ្ជាក់ដូច្នេះ ព្រោះអ្នកវេជ្ជសាស្ត្រយល់ថា អ្នកដែលបានជាពីជំងឺនេះ គឺមានប្រព័ន្ធភាពសាំរួចទៅហើយ។
អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ អ្នកស្រី ឱ វណ្ណឌីន អះអាងថា តាមការសង្កេតរបស់ក្រុមគ្រូពេទ្យជំនាញ បានធ្វើតេស្តសាកល្បងលើអ្នកជំងឺដែលបានឆ្លងជំងឺកូវីដ-១៩រួច ហើយបានជាសះស្បើយឡើងវិញបានបង្ហាញថា ប្រព័ន្ធការពារជំងឺកូវីដ-១៩ ក្នុងរាងកាយអ្នកទាំងនោះ លើសពីកម្រិតដែលកំណត់ទៅទៀត។
អ្នកស្រីថ្លែងប្រាប់សារព័ត៌មានក្នុងស្រុកនៅខេត្តរតនគីរី កាលពីថ្ងៃទី៧ ខែសីហាថា សម្រាប់អ្នកដែលបានចាក់វ៉ាក់សាំងបង្ការជំងឺកូវីដ-១៩ ស៊ីណូវ៉ាក់ និងស៊ីណូហ្វាម បានចំនួន ២ដូសរួច ហើយបានឆ្លងជំងឺកូវីដ-១៩នោះ គឺមិនមានភាពចាំបាច់ណាមួយ ត្រូវមកចាក់វ៉ាក់សាំងអាស្រ្តាហ្សេណេកា (Astra Zeneca) ដូសទី៣ ឬដូសជំរុញភ្លាមៗនោះទេ ព្រោះអ្នកដែលបានជាពីជំងឺ គឺមានប្រព័ន្ធភាពសាំរួចហើយ៖ « ទោះបីជាមានការរាតត្បាតខ្លាំងបែបណាក៏ដោយក៏យើងអត់ទាន់ឃើញថា មានអ្នកដដែលៗដែលគាត់ឈឺហើយត្រឡប់មកវិញដដែលៗហ្នឹងអត់ទាន់ឃើញមានទេ។ អីចឹងនេះបង្ហាញថា គាត់មានភាពសាំក្នុងខ្លួនគាត់ហើយ អត់មានភាពចាំបាច់អីត្រូវចាក់វ៉ាក់សាំងទេ បើយើងមានទៅហើយយើងទៅចាក់ធ្វើអី ? បើតាមបច្ចេកទេសតាមការណែនាំរបស់អង្គការសុខភាពពិភពលោកអ្នកទាំងនោះអត់មានភាពចាំបាច់អីត្រូវចាក់ទេ ប៉ុន្តែក្រោយហ្នឹងចន្លោះពី៦ ខែ ទៅ៨ខែ គឺគាត់អាចទទួលការចាក់វ៉ាក់សាំងបាន ប៉ុន្តែភ្លាមៗអត់មានភាពចាំបាច់ទេ។ កន្លែងនេះសូមឲ្យបងប្អូនមានភាពច្បាស់លាស់កុំឲ្យមានការព្រួយបារម្ភថា ឥឡូវនេះជាហើយតែខ្ញុំអត់បានចាក់វ៉ាក់សាំង ពីព្រោះទើបចាក់ពេលជាភ្លាមអ៊ីចឹងក៏អត់ប្រយោជន៍ដែរ ទុកវ៉ាក់សាំងហ្នឹងចាក់ជូនបងប្អូនយើងដែលគាត់មិនទាន់មានភាពសាំជាការល្អ » ។
ទាក់ទងរឿងនេះ ប្រធានសមាគមគ្រូពេទ្យគុណធម៌កម្ពុជាលោក អ៊ូច វុឌ្ឍី យល់ស្របការលើកឡើងនេះ។ លោកពន្យល់បន្ថែមអំពីការចាក់វ៉ាក់សាំងដូសទី៣ ឬដូសជំរុញនេះដូច្នេះ៖ « ព្រោះការចាក់វ៉ាក់សាំងគេចែកចេញជាបីសណ្ឋានបើសិនជាយកគាត់ទៅចាក់លើកទី៣។ ដូសទី៣ហ្នឹងគេត្រូវការប្រុងប្រយ័ត្នខ្លាំង ទី១វាត្រូវរង់ចាំពី៣ខែ ទៅ៦ខែ ឬក៏អាចទៅមួយឆ្នាំ នោះបើតាមក្បួនវា ដើម្បីចង់ដឹងថា គាត់មានប្រព័ន្ធភាពសាំឬអត់ ? បើអត់ទាន់មានមានន័យថា គាត់ត្រូវចាក់ដូសទី៣បានហើយ។ យើងចង់មើលអង់ទីគ័រ ឬអង់ទីហ្សែនមួយណា តើមួយណាវិជ្ជមាន បើអង់ទីហ្សែន វិជ្ជមានមានន័យថា គាត់កំពុងតែឈឺហើយ ២ដូសហ្នឹងអត់បានការស្មើនឹងសូន្យអ៊ីចឹងអត់ចាក់បានទេដូសទី៣ ហ្នឹង ចាំព្យាបាលឲ្យគាត់ជា។ ជាហើយគាត់អាចមានប្រព័ន្ធការពារ ចឹងអត់អាចចាក់ទេ»។
ទាក់ទងនឹងការឆ្លងរាលដាលជំងឺកូវីដ-១៩នេះ អ្នកស្លាប់ដោយសារជំងឺកូវីដ-១៩ កើនឡើងដល់ជាង ១ពាន់ ៥រយ នាក់ហើយ បន្ទាប់ពីអ្នកជំងឺ១១នាក់ទៀតបានស្លាប់។ ចំពោះករណីឆ្លងថ្មីវិញ មានជាង ៥រយនាក់ (៥២២) នៅថ្ងៃដដែលនេះ ក្នុងនោះជាង ១រយនាក់ (១៣៥) ជាករណីនាំចូលពីក្រៅប្រទេស។
គិតត្រឹមព្រឹកថ្ងៃទី៧ ខែសីហា កម្ពុជាមានអ្នកកើតជំងឺកូវីដ-១៩ ជាង ៨ម៉ឺននាក់ (៨១.៣៣៥) ក្នុងនោះ អ្នកជាសះស្បើយមានជាង ៧ម៉ឺននាក់ (៧៤.៧៤៥)។
ក្រសួងសុខាភិបាលប្រកាសថា គិតត្រឹមថ្ងៃទី៦ ខែសីហា រដ្ឋាភិបាលបានចាក់វ៉ាក់សាំងបង្ការជំងឺកូវីដ-១៩ ជូនពលរដ្ឋបាន ៧៧% ក្នុងចំណោមពលរដ្ឋដែលត្រូវចាក់វ៉ាក់សាំងចំនួន ១០លាននាក់។ ចំណែកកុមារ និងយុវជនអាយុចន្លោះពី ១២ឆ្នាំ ដល់ ១៧ឆ្នាំវិញ ក្រសួងបញ្ជាក់ថា មន្ត្រីសុខាភិបាលចាក់វ៉ាក់សាំងបានជាង ២សែននាក់ហើយ ក្នុងចំណោមអ្នកដែលត្រូវចាក់វ៉ាក់សាំងសរុបជិត ២លាននាក់។
ជាមួយគ្នានេះ ក្រសួងប្រកាសថា ការចាក់វ៉ាក់សាំង អាស្រ្តា ហ្សេណេកា (Astra Zeneca) ដែលជាដូសទី៣ សម្រាប់ក្រុមគ្រូពេទ្យ មន្ត្រីរាជការក្នុងខេត្តទាំង៧ ជាប់ព្រំដែនថៃ និងគ្រួសារកងកម្លាំងប្រដាប់អាវុធ នឹងត្រូវចាប់ផ្ដើមពីថ្ងៃទី៨ ខែសីហា តទៅ។ ចំណែកអ្នកដែលសេសសល់មិនទាន់បានចាក់វ៉ាក់សាំងនៅរាជធានីភ្នំពេញ ក្រសួងណែនាំឱ្យទៅចាក់វ៉ាក់សាំង ចាប់ពីថ្ងៃទី៩ ខែសីហា ដល់ថ្ងៃទី៨ ខែកញ្ញា នៅមន្ទីរពេទ្យព្រះអង្គឌួង និងមជ្ឈមណ្ឌលជាតិគាំពារមាតា និងទារក ឬហៅថាមន្ទីរពេទ្យជប៉ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។