ពលករ​ខ្មែរលើ​ទូក​នេសាទ​ម៉ាឡេស៊ី​ថា ស្ថានទូត​មិន​ឆ្លើយតប​ចំពោះ​សំណើ​សុំ​ជួយ​បញ្ជូន​ពួកគេ​មក​ស្រុក​វិញ

ដោយ មួង ណារ៉េត
2020-04-04
អ៊ីម៉ែល
មតិ
Share
បោះពុម្ព
រូប​ពលករ​លើ​ទូក​នេសាទ​ម្នាក់ គឺ​លោក ជា វណ្ណៈ កាល​នៅ​ស្រុក​ខ្មែរ។
រូប​ពលករ​លើ​ទូក​នេសាទ​ម្នាក់ គឺ​លោក ជា វណ្ណៈ កាល​នៅ​ស្រុក​ខ្មែរ។
photo provided

ពលករ​ខ្មែរ​ជាង​ដប់​នាក់ ដែល​ធ្វើការ​នៅ​លើ​ទូក​នេសាទ​នៅ​ក្នុង​ប្រទេស​ម៉ាឡេស៊ី បន្ត​អំពាវនាវ​ដល់​អាជ្ញាធរ​កម្ពុជា ជួយ​សម្របសម្រួល​បញ្ជូន​ពួកគេ​មក​កម្ពុជា​វិញ ដោយសារតែ​ថៅកែ​ទូក​នេសាទ បាន​ផ្អាក​ការងារ​មួយ​រយៈ​ហើយ ក្រោយ​ផ្ទុះ​រីក​រាលដាល​ជំងឺ​កូវីដ​-១៩​នៅ​ក្នុង​ប្រទេស​ម៉ាឡេស៊ី​។ មន្ត្រី​សង្គម​ស៊ីវិល យល់ថា រដ្ឋាភិបាល​គួរតែ​ពិនិត្យ និង​ឆ្លើយតប​ចំពោះ​សំណើ​របស់​ពលករ​ទាំង​នេះ។

ពលករ​១២​នាក់ អះអាង​ថា ពួកគេ​បាន​ព្យាយាម​ទូរស័ព្ទ​ទៅ​មន្ត្រី​ស្ថានទូត​កម្ពុជា​ប្រចាំ​ប្រទេស​ម៉ាឡេស៊ី​ជាច្រើន​ថ្ងៃ​មក​ហើយ ដើម្បី​ស្នើសុំ​ឱ្យ​ជួយ​អន្តរាគមន៍​បញ្ជូន​ពួកគេ​មក​កម្ពុជា​វិញ ប៉ុន្តែ​មន្ត្រី​ទាំងនោះ ពុំ​ទទួល​ទូរស័ព្ទ​របស់​ពួកគេ​នោះ​ឡើយ។

ពលករ​លើ​ទូក​នេសាទ​ម្នាក់ គឺ​លោក ជា វណ្ណៈ អាយុ​៣៥ ឆ្នាំ រៀបរាប់​ថា ពួក​លោក នៅតែ​ចង់​ឱ្យ​អាជ្ញាធរ​កម្ពុជា ជួយ​សម្របសម្រួល​ឱ្យ​ពួក​លោក​បាន​វិលត្រឡប់​ទៅ​កម្ពុជា​វិញ ព្រោះ​ថៅកែ​ទូក​នេសាទ បាន​ផ្អាក​ការងារ​មួយ​រយៈ​ហើយ ដោយ​មិន​ដឹង​ថា ថៅកែ​នឹង​បើក​ដំណើរការ​វិញ​ពេលណា​នោះ​ទេ​។ លោក​បន្ត​ថា សព្វថ្ងៃ ថៅកែ​បាន​ឱ្យ​ពួក​លោក​រស់នៅ​លើ​ទូក និង​បាន​ជួយ​ផ្គត់ផ្គង់​បាយទឹក​ខ្លះ​ដែរ ប៉ុន្តែ​ពួក​ពុំ​មាន​ការងារ​ធ្វើ ដើម្បី​បាន​ប្រាក់ខែ​សម្រាប់​ផ្គត់ផ្គង់​គ្រួសារ​ដូច​មុន​ឡើយ​។ ពលករ​លើ​ទូក​នេសាទ​រូប​នេះ បន្ត​ថា លោក​នឹង​ព្យាយាម​ទូរស័ព្ទ​ទៅ​សុំ​អន្តរាគមន៍​ពី​ស្ថានទូត​តទៅ​ទៀត៖ «ខ្ញុំ​លឺ​តែ​គេ​ថា​ដែរ​តាំង​ពី​ដើម​មក គឺ​ពិបាក​រហូត តែ​បើ​ថា យើង​មាន​លុយ​ឱ្យ​គេ គឺ​គេ​ទាក់ទង​ឱ្យ​លឿន​ណាស់​។ ខ្ញុំ​ឆ្ងល់​ថា ធ្វើ​ដល់​ស្ថានទូត ប្រៀប​ដូចជា​សមាគម​មួយ​សម្រាប់​ជួយ​ពលរដ្ឋ ចុះ​ហេតុ​អី​ចាំបាច់​តែ​យក​លុយ​អ៊ីចឹង។ តែ​ខ្ញុំ​មិនដែល​ជួបប្រទះ​ខ្លួនឯង​ទេ រឿង​ស្ថានទូត​យក​លុយ​នេះ គ្រាន់តែ​ពេលនេះ​ជួបប្រទះ​ករណី​ខល​ទៅ​មិន​លើក»

ស្ថាន​ឯកអគ្គរាជទូត​កម្ពុជា​ប្រទេស​ម៉ាឡេស៊ី បាន​ដាក់​លេខ​ទូរស័ព្ទ​បី​ខ្សែ (​គឺ​លេខ (+60)017 79 45 066 ) សម្រាប់​កិច្ចការ​ពលករ និង​(​លេខ (+60)034 25 711 50 /017 79 42 368 ) សម្រាប់​កិច្ចការ​កុងស៊ុល​។ ប៉ុន្តែ​អាស៊ីសេរី បាន​ព្យាយាម​ទាក់ទង​លេខ​ទូរស័ព្ទ​ទាំងនេះ​ជាច្រើនលើក​ដែរ ហើយ​ពុំ​មាន​អ្នកទទួល​នោះ​ទេ​។ ចំណែក​អ្នកនាំពាក្យ​ក្រសួងការបរទេស លោក កុយ គួង ក៏​មិន​ទទួល​ទូរស័ព្ទ​ដែរ។

ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព លោក យង់ គិមអេង មានប្រសាសន៍ថា ស្ថានទូត​កម្ពុជា​នៅ​ក្រៅ​ប្រទេស គឺ​តំណាង​ឱ្យ​រដ្ឋាភិបាល ដើម្បី​បម្រើ​ផលប្រយោជន៍​ជូន​ប្រជាពលរដ្ឋ ដូច្នេះ​គួរតែ​ធ្វើ​យ៉ាងណា​អាច​ឱ្យ​ពលរដ្ឋ​ទាក់ទង​បាន ហើយ​ផ្តល់​ព័ត៌មាន​អំពី​លទ្ធភាព និង​ជម្រើស​ផ្សេងៗ​សម្រាប់​ជួយ​ដល់​ពលករ​ខ្មែរ៖ «ត្រូវ​តែ​ផ្តល់​ព័ត៌មាន​ឬ​ទាក់ទង​ជាមួយ​គាត់​ដើម្បី​ផ្តល់​នូវ​ជម្រើស​សម្រាប់​គាត់​ពី​រដ្ឋាភិបាល ជាពិសេស​គឺ​ស្ថានទូត​នៅ​ម៉ាឡេស៊ី​នោះ ដែល​ត្រូវ​មាន​អ្នកទទួល ទូរស័ព្ទ​ជាប្រចាំ ដើម្បី​អាច​ពួកគាត់​ទាក់ទង​បាន​គឺជា​រឿង​មួយ​សំខាន់​។​ទោះបីជា​យ៉ាងណាក៏ដោយ ការដែល​ទំនាក់ទំនង​នេះ​គឺ​អាច​ជា​ការ​ផ្តល់​ព័ត៌មាន​ផ្សេងៗ​ទៀត ឬ​ប្រាប់​ពី​លទ្ធភាព​របស់ រដ្ឋ​ក្នុង​ការ​ជួយ​គាត់​ដើម្បី​ឱ្យ​គាត់​ត្រឡប់​មក​កម្ពុជា​វិញ ឬក៏​នៅ​ក្នុង​កិច្ចសហការ​ណាមួយ​ជាមួយ​ម៉ាឡេស៊ី​គឺជា​រឿង​មួយ​សំខាន់»

ពលករ​ខ្មែរ​ទាំង​១២ នាក់ គឺជា​អ្នក​រស់នៅ​ឃុំ​ព្រៃ​ព្នៅ ស្រុក​ពារាំង ខេត្ត​ព្រៃវែង​។ ពួកគេ គឺជា​អ្នករក ចំណូល​ដ៏​សំខាន់​សម្រាប់​ជួយ​គ្រូ​សារ​ក្រីក្រ​របស់​ពួកគេ​នៅ​ឯ​ស្រុកកំណើត​។ ពួកគេ​ថា ខំ​ចំណាកស្រុក ប៉ុន្តែ​គ្មាន​ការងារ​ធ្វើ​ដដែល គឺ​កាន់តែ​ធ្វើ​ឱ្យ​ជួប​ការ​លំបាក​ក្នុង​ជីវភាព​បន្ថែម​ទៀត ដូច្នេះ​ហើយ​ទើប​ចង់​វិល​ទៅ​ស្រុក​វិញ ដើម្បី​រក​ការងារ​ធ្វើ ក្រែង​បាន​ប្រាក់ចំណូល​ខ្លះៗ​សម្រាប់​ជួយ​គ្រួសារ។

ការ​ស្នើ​សុំ​ឱ្យ​រដ្ឋាភិបាល​ជួយ​សម្របសម្រួល​បញ្ជូន​ពួកគេ វិលត្រឡប់​ទៅ​កម្ពុជា​នេះ ដោយសារ រដ្ឋាភិបាល​ម៉ាឡេស៊ី បាន​បិទ​ប្រទេស​មិន​ឱ្យ​មានការ​ចេញចូល​ចាប់ពី​ថ្ងៃ​ទី​១៨ ខែ​មីនា ដល់​ថ្ងៃ​ទី​១៤ ខែ​មេសា ដើម្បី​ទប់ស្កាត់​ការ​ឆ្លង​រាលដាល​នៃ​ជំងឺ​កូវីដ​-១៩។

មាត្រា​៣៣​នៃ​រដ្ឋធម្មនុញ្ញ ចែងថា ប្រជាពលរដ្ឋ​ខ្មែរ​ដែល​កំពុង​រស់នៅ​នៅ​ឯ​បរទេស ត្រូវ​បាន​រដ្ឋ​គាំពារ​។​ចំណែក​មាត្រា​៣៥ ចែង​ថា សេចក្ដី​ស្នើ​ទាំងឡាយ​របស់​ប្រជាពលរដ្ឋ ត្រូវ​បាន​ទទួល​ការពិនិត្យ និង​ដោះស្រាយ​ដោយ​ហ្មត់ចត់​ដោយ​អង្គការ​រដ្ឋ៕

ព័ត៌មាន (0)
Share
គេហទំព័រ​ទាំងមូល