ធនាគារអេប៊ីអេ (ABA Bank) បានរារាំងការផ្ទេរប្រាក់ឧបត្ថម្ភចំនួនជាង ១ម៉ឺន ៥ពាន់ដុល្លារ ចូលគណនីធនាគាររបស់បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) ៣នាក់ ពីអង្គការក្រៅរដ្ឋាភិបាលមួយនៅប្រទេសអូស្ត្រាលី ឈ្មោះ មូលនិធិសង្គ្រោះបន្ទាន់ (Urgent Action Fund) ដើម្បីគាំទ្រដល់ក្រុមស្ត្រីសហជីពក្រីក្រនៅកម្ពុជា។
អនុប្រធានសហជីពក្រុមហ៊ុនណាហ្គាវើលដ៍ លោកស្រី ឈឹម សុខន ប្រាប់វិទ្យុអាស៊ីសេរី កាលពីយប់ថ្ងៃទី២៧ ខែមករាថា ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូណាហ្គាវើលដ៍ កញ្ញា ឈឹម ស៊ីថរ គឺជាអ្នកប្រាស្រ័យទាក់ទងដោយផ្ទាល់ទៅអង្គការមួយនេះ ដើម្បីស្នើសុំថវិកាផ្តល់ដល់បុគ្គលិកនិងកម្មការិនី ដែលទីទាល់ក្រ រួមមានស្ត្រីមានផ្ទៃពោះ និងមានកូនតូចៗក្នុងបន្ទុក។ ប៉ុន្តែដោយសារកញ្ញា ឈឹម ស៊ីថរ ត្រូវបានអាជ្ញាធរចាប់ដាក់ពន្ធនាគារម្តងទៀត លោកស្រីមិនអាចទាក់ទងដោយផ្ទាល់ទៅមន្ត្រីនៃមូលនិធិសង្គ្រោះបន្ទាន់នោះបានទេ។
លោកស្រី ឈឹម សុខន៖ «យើងសុំទៅ ដោយត្រូវលក្ខខណ្ឌគេ គេក៏យល់ព្រមឱ្យ។ ជាក់ស្តែងលុយហ្នឹងពេលផ្ញើមកមានចំនួនទឹកប្រាក់ ១ម៉ឺន ៥ពាន់ ១៥០ដុល្លារ ហើយបានផ្ញើចូលគណនីធនាគារ៣នាក់ គឺឈ្មោះខ្ញុំ ឈឹម សុខន ឃ្លាំង សុបិន្ត និង ឈឹម ស៊ីថរ។ ពេលផ្ញើមកដល់ ខាងបុគ្គលិកធនាគារ បានទូរស័ព្ទមកខ្ញុំ មានលុយផ្ញើមកពីក្រៅប្រទេស ចំនួន ៥ពាន់ ៥០ដុល្លារ ហើយធនាគារត្រូវការសួរព័ត៌មានពីប្រភពលុយ...»។
លោកស្រី ឈឹម សុខន ឲ្យដឹងដែរថា ប្រាក់នោះផ្ញើមកក្នុងអំឡុងខែតុលា ឆ្នាំ២០២២ ក៏ប៉ុន្តែត្រូវបានធនាគារផ្អឹបទុកដោយមិនព្រមបើកឲ្យនោះឡើយ។ លោកស្រីបានពន្យល់ទៅមន្ត្រីធនាគារថា ប្រាក់ទាំងនេះគឺសំរាប់ជួយឧបត្ថម្ភដល់សមាជិកខ្វះខាត គឺមិនមែនសំរាប់យកទៅជួយឧបត្ថម្ភដល់ក្រុមបុគ្គលិកបន្តធ្វើកូដកម្មទាមទារសិទ្ធិចូលធ្វើការវិញ ដូចការចោទប្រកាន់នោះឡើយ។
ទោះបីជាមានការពន្យល់បែបណាក៏ដោយ ក៏ធនាគារអេប៊ីអេ ប្រាប់ថា មិនអាចបើកប្រាក់នោះឲ្យបានទេ ក៏ប៉ុន្តែត្រូវបញ្ជូនត្រឡប់ទៅម្ចាស់ដើមវិញ។
វិទ្យុអាស៊ីសេរីនៅមិនទាន់អាចទាក់ទងមន្ត្រីធនាគារអេប៊ីអេ ដើម្បីសុំការបញ្ជាក់រឿងនេះបាននៅឡើយទេ កាលពីយប់ថ្ងៃទី ២៧ ខែមករា។ លោកស្រី ឈឹម សុខន ថា ខាងមូលនិធិប្រាប់មកវិញថា គេនៅមិនទាន់ទទួលបានប្រាក់នោះ នៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។