សម្ព័ន្ធអង្គការប្រចាំតំបន់អាស៊ានដើម្បីបញ្ឈប់ការគ្រប់គ្រងបែបផ្ដាច់ការនៅលើប្រព័ន្ធឌីជីថល ចំនួន១០ស្ថាប័ន អំពាវនាវដល់រដ្ឋាភិបាលកម្ពុជាឱ្យលុបចោលបទបញ្ជាមុនពេលបោះឆ្នោតឱ្យបិទខ្ទប់គេហទំព័ររបស់សារព័ត៌មានឯករាជ្យ ដូចជា វិទ្យុអាស៊ីសេរី កាសែត ឌឹ ខេមបូឌា ដេលី (The Cambodia Daily) និងប្រព័ន្ធមូលដ្ឋានទិន្នន័យឈ្មោះ កំណត់ត្រា។ ការអំពាវនាវនេះ ធ្វើឡើងក្នុងសេចក្តីថ្លែងការណ៍រួមមួយរបស់សម្ព័ន្ធអង្គការទាំងនេះ ផ្សាយកាលពីថ្ងៃទី២៥ ខែកក្កដា។
សម្ព័ន្ធអង្គការប្រចាំតំបន់អាស៊ាន ដែលក្នុងនោះក៏រួមមានមជ្ឈមណ្ឌលសិទ្ធិមនុស្សកម្ពុជា (CCHR) ផង ថ្កោលទោសការរឹតបន្តឹងរបស់រដ្ឋាភិបាលកម្ពុជាមកលើគេហទំព័រប្រព័ន្ធផ្សព្វផ្សាយព័ត៌មានសំខាន់ៗដែលផ្តល់ព័ត៌មានសាធារណៈ។ ក្រុមអង្គការទាំងនេះ ថ្កោលទោសការបន្តគ្រប់គ្រងបែបផ្ដាច់ការរបស់រដ្ឋាភិបាលកម្ពុជានៅលើប្រព័ន្ធឌីជីថល។ ពួកគេលើកឡើងថា ចំណាត់ការរបស់រដ្ឋាភិបាលកម្ពុជាយ៉ាងដូច្នេះ ធ្វើឱ្យទន់ខ្សោយដល់សារព័ត៌មានសេរី និងរារាំងលំហូរព័ត៌មាន។ ក្រុមអង្គការទាំងនេះ សង្កត់ធ្ងន់ថា ការគ្រប់គ្រងដ៏តឹងរ៉ឹងលើការផ្សព្វផ្សាយព័ត៌មាន មានគោលបំណងបង្ក្រាបរាល់ការរិះគន់នានាមកលើរដ្ឋាភិបាល និងរឹតត្បិតលទ្ធភាពនៃការទទួលបានសំឡេងប្រឆាំង សម្រាប់ប្រជាជនកម្ពុជា។ ពួកគេថា ការណ៍នេះបង្កឱ្យមានការព្រួយបារម្ភជុំវិញតម្លាភាព និងភាពត្រឹមត្រូវនៃដំណើរការបោះឆ្នោតនៅកម្ពុជា។
សម្ព័ន្ធអង្គការប្រចាំតំបន់អាស៊ានទាំងនេះ ជំរុញឱ្យរដ្ឋាភិបាលកម្ពុជាលើកកម្ពស់បទដ្ឋានសិទ្ធិមនុស្សអន្តរជាតិ តាមរយៈការការពារសេរីភាពនៃការបញ្ចេញមតិ និងព័ត៌មានដូចដែលមានចែងក្នុងមាត្រា១៩ នៃសេចក្តីប្រកាសជាសាកលស្ដីពីសិទ្ធិមនុស្ស និងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ។ បទប្បញ្ញត្តិទាំងនេះ ការពារសិទ្ធិបុគ្គលក្នុងការបញ្ចេញមតិដោយសេរី សិទ្ធិទទួលបានព័ត៌មាន និងចែករំលែកចំណេះដឹង ទាំងនៅលើអនឡាញ និងនៅក្នុងសង្គមជាក់ស្តែង។
ទន្ទឹមគ្នានេះ សម្ព័ន្ធអង្គការប្រចាំតំបន់អាស៊ាន ក៏អំពាវនាវដល់រដ្ឋាភិបាលកម្ពុជាឱ្យលើកកម្ពស់ទិដ្ឋភាពនយោបាយ និងសង្គមមួយ ដែលសារព័ត៌មានឯករាជ្យត្រូវបានអនុញ្ញាតឱ្យរីកចម្រើន។ ក្រុមអង្គការទាំងនេះ ក៏ជំរុញឱ្យរដ្ឋាភិបាលកម្ពុជាលុបចោលអនុក្រឹត្យច្រកទ្វារអ៊ីនធឺណិតជាតិ ដែលត្រូវបានបង្កើតឡើងក្នុងគោលដៅតាមដានសកម្មភាពរបស់ពលរដ្ឋនៅលើអនឡាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។