អ្នកប្រើប្រាស់បណ្ដាញសង្គមមួយចំនួនលើបណ្ដាញសង្គមបង្ហាញក្តីបារម្ភចំពោះសុវត្ថិភាពសង្គម ក្រោយមានជនមិនស្គាល់អត្តសញ្ញាណមួយក្រុមប្រើហិង្សាព្រួតវាយ លោក នី ណាក់ ឱ្យរបួសធ្ងន់កាលពីពេលថ្មីនេះ។
អ្នកខ្លះថា ករណីនេះ ជាការសបញ្ជាក់ថា រដ្ឋាភិបាលថ្មីរបស់នាយករដ្ឋមន្ត្រី ហ៊ុន ម៉ាណែត គឺគ្មានអ្វីចម្រើនថ្មី និងមិនខុសពីរដ្ឋាភិបាលចាស់ដែលដឹកនាំដោយឪពុករបស់លោកជិត ៤០ឆ្នាំមកហើយនោះទេ។
ទោះបីមានការអំពាវនាវពីក្រុមគ្រួសាររបស់អ្នកជំនាញកសិកម្ម ដែលធ្លាប់ជាប់ទោសរឿងត្រៀមទិញម៉ាស់ពាក់ឱ្យកូនមាន់ និងអ្នកការពារសិទ្ធិមនុស្ស ទាមទារឲ្យសមត្ថកិច្ចឱ្យស៊ើបអង្កេតរកអ្នកប្រព្រឹត្តមកផ្ដន្ទាទោស និងបិទបញ្ចប់សំណុំរឿងលបវាយធ្វើបាបអ្នកសកម្មការងារសង្គមនេះម្តងហើយម្តងទៀតក្តី ក៏រហូតមកដល់ពេលនេះ មិនទាន់ការឆ្លើយតបពីមន្ត្រីរដ្ឋាភិបាលថា យ៉ាងនៅឡើយ។
អ្នកប្រើប្រាស់បណ្ដាញសង្គម និងជាយុវតីការពារបរិស្ថាន គឺកញ្ញា ភួន កែវរស្មី បានសរសេរនៅលើទំព័រហ្វេសប៊ុកថា «ករណីហិង្សាក្រៅប្រព័ន្ធច្បាប់មកលើប្រជាជនដែលបញ្ចេញមតិរិះគន់ដើម្បីស្ថាបនារដ្ឋាភិបាលជារឿងដែលអាក្រក់បំផុត»។
កញ្ញាចាត់ទុកទង្វើបែបនេះ បានគម្រាមកំហែងសុវត្ថិភាពក្នុងការរស់នៅយ៉ាងធ្ងន់ធ្ងរមកលើពួកយើង ដែលជាសកម្មជនបរិស្ថាន និងសកម្មជនវិស័យផ្សេងៗទៀត ជាពិសេសស្មារតីរបស់ប្រជាពលរដ្ឋទូទាំងប្រទេស។
កញ្ញាផ្តល់ជាទស្សនៈថា ដើម្បីបង្ហាញភាពស្អាតស្អំ រដ្ឋាភិបាលត្រូវតែស្វែងរកជនដៃដល់ជាបន្ទាន់ និងផ្តល់យុត្តិធម៌ដល់លោក នី ណាក់ ព្រមទាំងជនរងគ្រោះកន្លងមកដែលមិនទាន់ទទួលបានយុត្តិធម៌។
ចំណែកអ្នកប្រើប្រាស់បណ្ដាញសង្គមផ្សេងមួយទៀតឈ្មោះ តុ ដារា (Tok Dara) ក៏បានបញ្ចេញមតិជុំវិញរឿងនេះដែរថា៖ បើអស់លោកខ្លាចការរិះគន់ពីសំណាក់ប្រជាពលរដ្ឋសូមលាឈប់ពីតំណែងទៅគេឈប់រិះគន់ហើយ។
ដោយឡែកអ្នកប្រើប្រាស់បណ្ដាញសង្គមឈ្មោះ ភីធើ ហួរ (Peter Hor) ក៏បានបញ្ចេញទស្សនៈដែរថា៖ ឱ្យប្រជាពលរដ្ឋមានសន្តិភាពផ្លូវចិត្តយ៉ាងម៉េចទៅ បើសកម្មភាពអនាធិបតេយ្យពាសពេញប្រទេសយ៉ាងនេះ។
អ្នកប្រើប្រាស់បណ្ដាញសង្គម ឈ្មោះ សុត សូនេត (Sot Soknet) បានប្រៀបធៀប សម័យនេះទៅនឹងសម័យខ្មែរក្រហម។
កាលពីសម័យ ពុល ពត អ្នកចេះត្រូវគល់អាសី សម័យនេះនៃត្រូវបំពង់ទីប។ ចំណែកអ្នកប្រើប្រាស់បណ្ដាញសង្គមម្នាក់ទៀត ឈ្មោះ ហ្វាស្ស៊ីន អ៊ែល (Fazin El) បញ្ចេញទស្សនៈជុំវិញនេះដែរថា៖ រឿងលបលួចវាយធ្វើបាបអ្នករិះគន់គឺជាសកម្មភាពដដែលៗ គឺជាពួកជនពាលស្របច្បាប់ដែលតែងតែធ្វើបាបរាស្ត្រ។
ទាក់ទងនឹងករណីប្រើហិង្សាលើអ្នកជំនាញកសិកម្ម នេះដែរ អ្នកសិក្សាស្រាវជ្រាវ និងអភិវឌ្ឍសង្គម លោក បណ្ឌិត មាស នី (Meas Nee) ក៏បានចាប់អារម្មណ៍លើរឿងនេះដែរ។ លោកបានសរសេរនៅលើទំព័រហ្វេសប៊ុករបស់លោកថា អំពើហិង្សាលើលោក នី ណាក់ កំពុងក្លាយជាការធ្វើពិសោធនកម្មដ៏សំខាន់មួយ ដើម្បីបង្ហាញ ថាតើវានឹងអាចមានការប្រែប្រួលដែរទេ សម្រាប់រាជរដ្ឋាភិបាលថ្មី ក្នុងការលើកម្ពស់យុត្តិធម៌សង្គម?
ចំណែកអ្នកប្រើប្រាស់បណ្ដាញសង្គម ឈ្មោះ រីតា ឈីន (Rita Chin) បានបញ្ចេញទស្សនៈថា រដ្ឋាភិបាលថ្មី របស់ លោក ហ៊ុន ណែត នឹងគ្មានអ្វីផ្លាស់ប្ដូរ ខុសពីរដ្ឋាភិបាលចាស់របស់ឪពុករបស់លោកនោះទេ។ លោកបន្តថា៖ ជាការពិតគ្មានអីប្រែប្រួលទេ គឺក្លាយជាប្រពៃណីនៃពួកពូជផ្ដាច់ការ ដែលយកច្បាប់ ហិង្សាគម្រាម វ៉ៃកាប់ចាក់សម្លាប់អ្នកហ៊ានបញ្ចេញមតិ ដើម្បីទាមទារឱ្យមានសមភាព ឬយុត្តិធម៌ឱ្យសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។