អាជ្ញាធរខេត្តពោធិ៍សាត់រារាំងក្បួនធម្មយាត្រាក្រោមហេតុផលលើសចំនួនកំណត់
2023.02.06
ទិដ្ឋភាពអាជ្ញាធរខេត្តពោធិ៍សាត់រារាំងក្បួនធម្មយាត្រាដែលដឹកនាំដោយសមាគមគ្រូបង្រៀនកម្ពុជាឯករាជ្យ នៅចំណុចភូមិស្វាយអាត់ ឃុំស្នាមព្រះ ស្រុកបាកាន នៅព្រឹកថ្ងៃទី៧ កុម្ភៈ ២០២៣។
រូប៖ ពលរដ្ឋផ្ដល់ឱ្យ
ក្បួនធម្មយាត្រាលើកកម្ពស់សីលធម៌សង្គម ដែលដឹកនាំដោយសមាគមគ្រូបង្រៀនកម្ពុជាឯករាជ្យ នៅថ្ងៃចុងក្រោយនេះ មិនបានធ្វើឡើងដោយរលូននោះឡើយ ព្រោះក្រុមអាជ្ញាធរខេត្តពោធិ៍សាត់ បានរារាំងមិនឱ្យប្រជាពលរដ្ឋចូលរួមដង្ហែធម្មយាត្រានេះ។ សមាគមគ្រូបង្រៀនកម្ពុជាឯករាជ្យចាត់ទុកការរារាំងប្រជាពលរដ្ឋមិនឱ្យចូលរួមដង្ហែធម្មយាត្រានេះ គឺជាការរំលោភសិទ្ធិសេរីភាពបញ្ចេញមតិ និងមានចេតនាបង្កភាពភ័យខ្លាចដល់ប្រជាពលរដ្ឋដែលចង់ចូលរួមការងារសង្គម។
អាជ្ញាធរខេត្តពោធិ៍សាត់ ប្រមាណ ១០០នាក់ បានពង្រាយគ្នាឈតាមដងផ្លូវ និងព្យាយាមទប់ស្កាត់ក្បួនដង្ហែធម្មយាត្រាមួយកំណាត់ខាងក្រោយ មិនឱ្យបន្តដង្ហែទៅកាន់រូបសំណាក់អ្នកតាឃ្លាំងមឿង នៅខាងមុខសាលាបឋមសិក្សាឃ្លាំងមឿង ក្នុងភូមិស្វាយអាត់ ឃុំស្នាមព្រះ ស្រុកបាកាន។ អាជ្ញាធរលើកហេតុផលថា ការឃាត់ឃាំងនេះ ដោយសារចំនួនអ្នកចូលរួមហែក្បួនធម្មយាត្រាលើកកម្ពស់សីលធម៌សង្គម នៅថ្ងៃចុងក្រោយនេះមានចំនួនច្រើន លើសពីការអនុញ្ញាតរបស់ក្រសួងមហាផ្ទៃ ដែលតម្រូវឲ្យមានអ្នកចូលរួមត្រឹមចំនួន ៥០នាក់។ ទោះជាយ៉ាងណា មិនមានការប៉ះទង្គិចគ្នាដោយហិង្សានោះទេ ហើយក្បួនធម្មយាត្រាដែលមានប្រជាពលរដ្ឋជាង ២០០នាក់ បានជម្នះបន្តដំណើរធម្មយាត្រារហូតទៅដល់រូបសំណាកអ្នកតាឃ្លាំងមឿង។ ក្រោយពីក្បួនដង្ហែបានទៅដល់រូបសំណាកអ្នកតាឃ្លាំងមឿង មន្ត្រីនគរបាលនៅតែបន្តឃាត់ មិនឱ្យប្រជាពលរដ្ឋមួយចំនួនបន្តចូលបរិវេណ បូជនីយដ្ឋានអ្នកតាឃ្លាំងមឿង ដើម្បីប្រារព្ធពិធីសាសនាឡើយ។ បន្ថែមពីនេះ ក្រុមអាជ្ញាធរបានបិទផ្លូវមិនឱ្យអ្នកយកបាយសម្ល មកឱ្យអ្នកធ្វើធម្មយាត្រាដែលកំពុងហេវហត់នោះទេ លុះត្រាតែមានការតវ៉ាពីប្រជាពលរដ្ឋច្រើន ទើបភាគីអាជ្ញាធរយល់ព្រមឱ្យយកបាយសម្ល ឱ្យអ្នកធ្វើធម្មយាត្រាពិសាអាហារជុំគ្នា។
ពលរដ្ឋម្នាក់ដែលបានចូលរួមដង្ហែធម្មយាត្រានេះ គឺលោក ចាន់ សុផល យល់ឃើញថា ក្រុមអាជ្ញាធរហាក់ដូចជាមិនយល់តម្លៃនៃការងារសង្គមនោះឡើយ ទើបរារាំងប្រជាពលរដ្ឋមិនឱ្យចូលរួមដង្ហែក្បួនធម្មយាត្រាបែបនេះ។
«ខ្ញុំអត់ដឹងថាពួកគាត់ជាមន្ត្រីរាជការ គាត់យកអ្វីយកមកគិតទេ មិនដឹងថាគាត់ធ្វើការងាររាល់ថ្ងៃ សម្រាប់បុគ្គលណាម្នាក់ទេ ព្រោះខ្ញុំគិតថាពួកគាត់មានចំណេះដឹង មានការងារធ្វើ សព្វថ្ងៃដោយសារតែប្រជាពលរដ្ឋយើង។ យើងអត់ចង់ឱ្យពួកគាត់ធ្វើការបម្រើបុគ្គលណាម្នាក់នោះទេ ពួកគាត់ត្រូវតែបម្រើប្រជាពលរដ្ឋ»។
អ្នកចូលរួមហែក្បួនធម្មយាត្រាលើកកម្ពស់សីលធម៌សង្គមនេះ មានដូចជាព្រះសង្ឃ គ្រូបង្រៀន សកម្មជនសង្គម សកម្មជននយោបាយ សកម្មជនសិទ្ធិមនុស្ស និងប្រជាពលរដ្ឋទូទៅ។
ព្រះសង្ឃមួយអង្គ ដែលបានដើរដង្ហែធម្មយាត្រាគ្រប់ទាំង៧ថ្ងៃ ចាប់ពីរូបសំណាកដូនពេញ ក្នុងរាជធានីភ្នំពេញ មកដល់រូបសំណាកអ្នកតាឃ្លាំងមឿង ក្នុងខេត្តពោធិ៍សាត់ គឺព្រះតេជព្រះគុណ សយ សាត មានថេរដីកាថា ព្រះអង្គចូលរួមដង្ហែធម្មយាត្រានេះ ព្រោះចង់ឱ្យអ្នកនយោបាយចេះអធ្យាស្រ័យឱ្យគ្នា និងបញ្ឈប់ការប្រើប្រាស់ពាក្យសម្ដីមិនសមរម្យលើគ្នាទៅវិញទៅមក។ ព្រះតេជគុណបន្ថែមថា នៅពេលដែលអ្នកនយោបាយស្អប់ខ្ពើមគ្នា មិនចេះសាមគ្គីគ្នា នោះ នឹងមិនត្រឹមតែធ្វើឱ្យអ្នកនយោបាយបាត់បង់ក្ដីសុខខាងក្នុងផ្ទាល់ខ្លួននោះទេ ប៉ុន្តែប្រជាពលរដ្ឋរាប់លាននាក់ក៏រងគ្រោះពីការធ្វើនយោបាយដោយយកគ្នាធ្វើជាសត្រូវនេះផងដែរ។
«ការសន្ទនាគ្នា ការមិនយកគ្នាជាសត្រូវនេះ ជាទង្វើល្អបំផុត ជាផ្នត់គំនិតល្អបំផុតរបស់អ្នកនយោបាយ ម្ល៉ោះហើយល្មម ល្មមអ្នកនយោបាយយល់ថា ពេលដែលមានប៉ះទង្គិចនូវបញ្ហាអ្វីមួយ មិនមែនអ្នកនយោបាយកំពូលៗ រងគ្រោះថ្នាក់ទេ ប្រជាពលរដ្ឋរាប់លាននាក់ដែលត្រូវគ្រោះថ្នាក់ នូវរាល់បញ្ហា ការវិវាទ ការបែកបាក់ ដោយសារតែអ្នកនយោបាយ។ ចំណុចទាំងអស់ហ្នឹងល្មមកែប្រែ ល្មមបន្ទន់ឥរិយាបថដើម្បីដឹកនាំជាតិ»។
ប្រជាពលរដ្ឋផ្សេងទៀត ក៏សុទ្ធតែមើលឃើញថា សីលធម៌ក្នុងសង្គមកម្ពុជា កំពុងធ្លាក់ចុះដុនដាបខ្លាំងរហូតធ្វើឲ្យបែកបាក់សាមគ្គីជាតិ ដោយសារតែអ្នកនយោបាយកំពុង កាន់អំណាច តែងប្រើភាសាអសុរោះ គំរាមកំហែង និងតែងធ្វើទុក្ខបុកម្នេញតាមរូបភាពផ្សេងៗ ទៅលើអ្នកដែលមាននិន្នាការផ្ទុយ។ អ្នកចូលរួមធម្មយាត្រា ផ្ញើសារដូចគ្នាទាមទារឲ្យរដ្ឋាភិបាលសព្វថ្ងៃ ស្ដារប្រជាធិបតេយ្យ និងការគោរពសិទ្ធិមនុស្ស ឲ្យស្របតាមរដ្ឋធម្មនុញ្ញ ហើយដោះលែងអ្នកជាប់ឃុំដោយសាររឿងនយោបាយ ឲ្យមានសេរីភាពឡើងវិញ។
ទីប្រឹក្សាសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ថ្លែងសារបិទបញ្ចប់ធម្មយាត្រាថា លោកសោកស្ដាយ ចំពោះសកម្មភាពរារាំងមិនឱ្យប្រជាពលរដ្ឋចូលរួមដង្ហែធម្មយាត្រាលើកកម្ពស់សីលធម៌សង្គម។ ជាមួយគ្នានេះលោក រ៉ុង ឈុន លើកឡើងថា ប្រជាពលរដ្ឋមិនត្រូវខ្លាចពាក្យនយោបាយឡើយ ហើយត្រូវមានភាពក្លាហានដើម្បីការពារសិទ្ធិរបស់ខ្លួន។ លោកក៏ជំរុញឲ្យថ្នាក់ដឹកនាំប្រទេស អ្នកនយោបាយ ត្រូវមានសីលធម៌ខ្ពស់ ដើម្បីធ្វើជាគំរូដល់យុវជនជំនាន់ក្រោយ។
«យើងនាំគ្នាខ្លាច អ៊ីចឹងគេយកអាចំណុចហ្នឹងមកបន្លាចយើង ដូច្នេះយើងកុំខ្លាចពាក្យនយោបាយ ត្រូវយល់ពាក្យនយោបាយ ពីព្រោះយើងទាំងអស់គ្នាត្រូវបានច្បាប់រដ្ឋធម្មនុញ្ញធានា ដូច្នេះយើងមានសិទ្ធិក្នុងការចូលរួមប្រារព្ធពិធី ក្នុងការចូលរួមហែក្បួន ក្នុងការចូលរួមសម្រេចចិត្តបោះឆ្នោត»។
ការដើរដង្ហែក្បួនធម្មយាត្រា ដើម្បីលើកកម្ពស់សីលធម៌សង្គម ដែលដឹកនាំដោយសមាគមគ្រូបង្រៀនកម្ពុជាឯករាជ្យ បានចាប់ផ្ដើមតាំងពីថ្ងៃទី១ ខែកុម្ភៈមក ហើយតែងប្រឈមឧបសគ្គ និងការរារាំងពីអាជ្ញាធរជាបន្តបន្ទាប់ ដូចជា ហាមមិនឲ្យពួកគាត់ ចូលសម្រាកបរិភោគអាហារ និងស្នាក់នៅពេលយប់ នៅតាមវត្តអារាម សាលារៀន ឬកន្លែងសាធារណៈជាដើម។
ក្បួនធម្មយាត្រាបានបិទបញ្ចប់ បន្ទាប់ពីទីប្រឹក្សាសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ថ្លែងសាររម្លឹកឡើងវិញពីគោលបំណងនៃធម្មយាត្រា និងបួងសួងឱ្យព្រលឹងអ្នកតាឃ្លាំងមឿង និងព្រលឹងបុព្វបុរសដែលបានពលីជីវិតក្នុងបុព្វហេតុការពារប្រទេសជាតិ ឱ្យបន្ទន់ឥរិយាបថអ្នកនយោបាយ ថ្នាក់ដឹកនាំប្រទេស និងប្រជាពលរដ្ឋទូទៅគ្រប់មជ្ឈដ្ឋាន ឱ្យចេះចែករំលែកក្ដីស្រលាញ់ឱ្យគ្នា និងផ្ដល់ការអធ្យាស្រ័យឱ្យគ្នា ដើម្បីកសាងជាតិឱ្យរឹងមាំឡើងវិញ៕
អត្ថបទរឿងនេះ ត្រូវបានធ្វើបច្ចុប្បន្នភាព ដោយការដាក់សេចក្ដីរាយការណ៍ពេញលេញ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម