មន្ត្រី​សិទ្ធិ​មនុស្ស​អន្តរជាតិ​បារម្ភ​ពី​ការ​រំលោភច្បាប់ និង​សិទ្ធិមនុស្ស​កាន់​តែ​ខ្លាំង​នៅ​កម្ពុជា

ដោយ ឡេង ម៉ាលី សេក បណ្ឌិត
2020-11-10
Share
Phil Robertson លោក ហ្វីល រ៉ូបឺតសុន (Phil Robertson) នាយករង​ទទួល​បន្ទុក​កិច្ច​ការ​តំបន់​អាស៊ី នៃ​អង្គការ Human Rights Watch។
រូប៖ Screenshot AFP

តុលាការ​ក្រុង​ភ្នំពេញ​ចាប់​ផ្តើម​បើក​សវនាការ​ជំនុំ​ជម្រះ​សំណុំ​រឿង​របស់​មន្ត្រី​ជាន់​ខ្ពស់ និង​សកម្មជន​បក្ស​ប្រឆាំង​ជា​បន្តបន្ទាប់​នៅ​អំឡុង​ខែវិច្ឆិកា​នេះ។ សំណុំ​រឿង​ដែល​ត្រូវ​ជម្រះ​ដំបូង គឺ​នៅ​ថ្ងៃ​ទី១១ វិច្ឆិកា ដែល​ពាក់​ព័ន្ធ​នឹង​មន្ត្រី​ជាន់ខ្ពស់​បក្ស​ប្រឆាំង​ចំនួន ៩រូប ដោយ​ឡែក​នៅ​ថ្ងៃ​ទី២៦ វិច្ឆិកា តុលាការ​នឹង​ជម្រះ​សំណុំ​រឿង​ដែល​មាន​មន្ត្រីបក្ស​ប្រឆាំង​សរុប ៥៩នាក់។ បទ​ចោទ​ប្រឆាំង​នឹង​ថ្នាក់​ដឹក​នាំ និង​មន្ត្រី​គណបក្ស​សង្គ្រោះ​ជាតិ​ទាំង​នោះ រួម​មាន បទ​ឧបឃាត បទ​រួម​គំនិត​ក្បត់ និង​បទ​ញុះញង់។

អ្នក​ជំនាញសិទ្ធិមនុស្ស​អន្តរជាតិពិនិត្យ​ឃើញថា នេះ​ជាយុទ្ធសាស្ត្រ​បំភិតបំភ័យ​អ្នក​គាំទ្រ​បក្ស​ប្រឆាំង​ មិន​មែន​ជាការ​រក​យុត្តិធម៌ពិត​ប្រាកដឡើយ។ លើសពីនេះ អ្នក​ជំនាញ​ដដែល​បារម្ភ​ថា ករណី​​រំលោភសិទ្ធិមនុស្ស​អាច​កើត​មាន​កាន់​តែខ្លាំង ក្នុងពេល​កម្ពុជា​ប្រឈម​ហានិភ័យ​នៃការ​ផ្ទុះរាល​ដាល​ទ្រង់​ទ្រាយ​ធំ​នៃ​ជំងឺកូវីដ-១៩។

ខាង​ក្រោម​នេះ ជា​បទ​សម្ភាស​រវាង​លោក ឡេង ម៉ាលី ជាមួយ​លោក ហ៊្វីល រ៉ូបឺតសុន (Phil Robertson) ជា​នាយក​រង​ទទួល​បន្ទុក​កិច្ចការ​តំបន់​អាស៊ី​នៃ​អង្គការ​ឃ្លាំមើល​សិទ្ធិ​មនុស្ស​អន្តរជាតិ យូមែន រ៉ៃស៍ វ៉ច្ឆ (Human Rights Watch)

លោក ឡេង ម៉ាលី៖ ជម្រាប​សួរ លោក ហ៊្វីល រ៉ូបឺតសុន! ជា​ដំបូង​នេះ ខ្ញុំចង់​ឱ្យ​លោក​វាយ​តម្លៃ​អំពី​ស្ថាន​ភាព​សិទ្ធិ​សេរីភាព​​នៅ​កម្ពុជា​បន្តិច​សិន។ តើ​ស្ថាន​ភាព​នេះ​ បាន​វិវឌ្ឍ​ទៅ​រក​ភាព​ប្រសើរ​ឡើងខ្លះ​ដែរ​ឬ​ទេ បើ​គិត​តាំង​ពីចុង​ឆ្នាំ២០១៧ ពេល​ដែល​របប​លោក ហ៊ុន សែន រំលាយ​គណបក្ស​សង្គ្រោះ​ជាតិនោះ​រួច​មក?

លោក ហ៊្វីល រ៉ូបឺតសុន៖ «ជាក់​ស្តែងណាស់ ស្ថាន​ភាព​សិទ្ធិសេរីភាព​នៅកម្ពុជាកាន់​តែ​យ៉ាប់យ៉ឺន បើ​និយាយ​ចំពោះគណបក្ស​នយោបាយ​ប្រឆាំង។ ​សេរីភាព​សារព័ត៌មាន​ធ្លាក់ចុះច្រើន ព្រោះយើង​ឃើញហើយ មាន​ការ​បិទកាសែត​ខេមបូឌាដេលីដោយ​សាររឿងពន្ធដារ​ក្លែងក្លាយ ការ​លក់​កាសែត​ភ្នំពេញប៉ុស្តិ៍ទៅ​ឱ្យ​មនុស្ស​ជំនិតលោក ហ៊ុន សែន ការ​បញ្ឈប់វិទ្យុសំឡេង​សហរដ្ឋ​អាមេរិក និង​វិទ្យុអាស៊ីសេរី​មិន​ឱ្យផ្សាយ​លើ​ប្រេកង់អេហ្វអឹម ការ​បិទ​ការិយាល័យ​អាស៊ីសេរីនៅភ្នំពេញ ​ការ​ចោទ​ប្រកាន់ និង​កាត់​ទោស​អ្នក​សារព័ត៌មាន ជាដើម។ ចំណែក អង្គការ​​សង្គម​ស៊ីវិល​វិញ រង​ការ​យាយី​​ និង​ធ្វើ​ទុក្ខ​បុកម្នេញ ស្របពេល​សេរីភាព​នៃ​ការ​ចងក្រង​ជាសមាគម និងការ​ប្រមូល​ផ្តុំ​ដោយ​សន្តិវិធី​ស្ថិតក្រោម​ការគំរាម​កំហែង។ ដូច្នេះ ស្ថាន​ភាព​ស្ថាន​ភាពសិទ្ធិសេរីភាព​នៅកម្ពុជាមិន​មាន​ភាព​ល្អប្រសើរនោះទេ តែ​​កំពុង​ដាំក្បាល​ចុះ​គ្រប់​ផ្នែក​ទាំងអស់»

លោក ឡេង ម៉ាលី៖ លោក ហ្វីល រ៉ូបឺតសុន! ដូចលោក​ឃើញស្រាប់​ហើយថា តុលាការ​របបលោក ហ៊ុន សែន ចាប់​ផ្តើម​លើក​យក​សំណុំ​រឿង​ព្រហ្មទណ្ឌ​ប្រឆាំង​នឹង​មន្ត្រីជាន់ខ្ពស់​ និង​សកម្មជន​សង្គ្រោះជាតិ​មក​ជំនុំ​ជម្រះ នៅអំឡុង​ខែវិច្ឆិកានេះ។ តើ​លោក​យល់ថា សវនាការ​ទាំងនោះ​អាច​​ផ្តល់​យុត្តិធម៌ដល់​ក្រុម​អ្នក​នយោបាយ​បក្ស​ប្រឆាំង​បាន​ដែរឬទេ?

លោក ហ៊្វីល រ៉ូបឺតសុន៖ «សវនាការ​ទាំងនេះ​ប្រាកដ​ជាគ្មាន​យុត្តិធម៌​នោះទេ ព្រោះតុលាការ​កម្ពុជា​គ្រាន់​តែ​ជាឧបករណ៍​លេងសើច និង​ចាំស្តាប់​តែបញ្ជាប៉ុណ្ណោះ។ ចៅក្រម​នៅក្នុង​តុលាការ​កម្ពុជា​ ជា​ប្រភេទ​មនុស្ស​មិន​ចេះ​ខ្មាស់អៀន​ ហើយ​រង់​ចាំ​តែ​បញ្ជា​ពីគណបក្ស​កាន់​អំណាច​។ សំណុំ​រឿង​នយោបាយ​ប្រឆាំង​នឹង​មន្ត្រីគណបក្សសង្គ្រោះជាតិ​ទាំងអស់​នេះ ​នឹងដូចលើក​មុន​ដែរ គឺស្រប​ទៅតាម​អ្វី​ដែល​បក្ស​កាន់​អំណាច​ចង់បាន។ ការ​ជំនុំ​ជម្រះរឿង​បទចោទ​ញុះញង់ រួម​គំនិត​ក្បត់ ឬក៏​បទចោទ​ផ្សេង​ពីនេះ គឺ​​ជា​ការ​ព្យាយាម​កម្ចាត់​អ្វីៗដែល​នៅសេសសល់​ចុងក្រោយ​របស់​គណបក្ស​ប្រឆាំង​​នៅកម្ពុជា។ ខ្ញុំ​ជឿថា រដ្ឋាភិបាល​លោក ហ៊ុន សែន កំពុង​ព្យាយាម​បំភ័យអ្នក​នយោបាយ​បក្ស​ប្រឆាំង​នៅក្រៅប្រទេស​មិន​ឱ្យ​វិល​ទៅកម្ពុជាវិញ ​ហើយ​និងធ្វើ​ឱ្យ​អ្នក​នៅក្នុងស្រុក​រត់​ភៀស​ខ្លួន​ទៅក្រៅប្រទេស​។ នេះ​ជា​យុទ្ធសាស្រ្ត​របស់​លោក​នាយករដ្ឋ​មន្ត្រី ហ៊ុន សែន ដើម្បី​លុប​បំបាត់​ចោល​សំណល់​គណបក្ស​សង្រ្គោះជាតិ​នៅគ្រប់​ទីកន្លែង​ទាំងអស់»

លោក ឡេង ម៉ាលី៖ ខ្ញុំ​ចង់​ឱ្យ​លោក​បកស្រាយ​បន្តិច​ទៀតអំពីសវនាការនេះ។ យើងឃើញហើយថា តុលាការបាន​កោះហៅ​មន្ត្រីបក្ស​ប្រឆាំង​ទាំងនោះចូល​សវនាការ​ តែរដ្ឋាភិបាល​នៅតែបិទ​ច្រក​​មិន​ឱ្យ​ពួក​គេ​ចូល​កម្ពុជា​វិញបាន​ឡើយ។ តើ​ករណី​នេះ​យ៉ាង​ដូចម្តេច​ទៅវិញ?

លោក ហ៊្វីល រ៉ូបឺតសុន៖ «រដ្ឋាភិបាល​លោក ហ៊ុន សែន ត្រូវ​តែបើក​ផ្លូវ​ឱ្យ​ពួក​គេ​មាន​ឱកាស​ចូល​រួម​ក្នុង​សវនាការ​ ព្រោះពួក​គេ​ភាគច្រើន​កំពុង​រស់នៅនិរទេស​ខ្លួន​ឯក្រៅប្រទេស​ គេច​ចេញពីការ​ធ្វើ​ទុក្ខបុកម្នេញ។ តែយ៉ាងណា នេះគ្រាន់​តែ​ជាការ​ធ្វើ​បង្គ្រប់កិច្ច​ប៉ុណ្ណោះ គេ​ធ្វើ​ឱ្យ​​សកម្មជន​ប​ក្ស​ប្រឆាំង​ទាំងនេះ​មិន​អាច​វិល​ចូលស្រុក​វិញបាន ដើម្បី​ឱ្យ​ពួក​គេ​ជាប់​ទោស​កាន់​តែ​ច្រើន។ ដូចខ្ញុំ​បញ្ជាក់អ៊ីចឹងថា រឿង​រ៉ាវ​ទាំងនេះ​គេ​ធ្វើ​ឡើង ដើម្បីគ្រាន់​តែ​បង្អាក់​ដំណើរវិល​ចូល​ស្រុក​វិញ​របស់​ក្រុម​សកម្មជន​នៅក្រៅប្រទេស ហើយ​បង្ខំ​ឱ្យ​អ្នក​នៅក្នុងស្រុក​នាំគ្នា​រត់​ភៀស​ខ្លួន​ទៅប្រទេស​ថៃ ឬ​ប្រទេសដទៃទៀត បើ​ពុំ​ដូច្នេះពួក​គេ​ត្រូវ​ប្រឈម​មុខ​នឹង​ការ​ជាប់​ពន្ធនាគារ​រយៈពេល​ច្រើន​ឆ្នាំ»

លោក ឡេង ម៉ាលី៖ លោក ហ្វីល រ៉ូបឺតសុន ខ្ញុំ​សូម​ងាក​ទៅរឿង​ជំងឺកូវីដ-១៩ បន្តិច។ កាល​ពីសប្តាហ៍មុន ​រដ្ឋ​មន្ត្រីការបរទេស​ហុងគ្រី លោក ភីតធ័រ ស៊ីចាតូ (Peter Szijjato) បានមក​ទស្សនកិច្ច​នៅកម្ពុជា ប៉ុន្តែ​ពេល​លោក​ចាក​ចេញពីកម្ពុជាទៅដល់​ប្រទេស​ថៃ ស្រាប់​តែគេ​រក​ឃើញថា គាត់​មាន​ផ្ទុក​ជំងឺកូវីដ-១៩។ រឿងនេះបានបង្ក​ការ​ព្រួយ​បារម្ភ​យ៉ាង​ខ្លាំង​អំពីការ​ឆ្លងរាលដាល​ជំងឺកូវីដ-១៩ នៅកម្ពុជា ព្រោះ​លោកនាយករដ្ឋ​មន្ត្រី ហ៊ុន សែន និង​មន្ត្រីរបស់​គាត់ មិនបាន​​ពាក់ម៉ាស់ និង​គោរព​គោលការណ៍​គម្លាត​សង្គមនោះទេ។ ឥឡូវ​នេះ មន្ត្រីមួយ​ចំនួន​បាន​ឆ្លង​ជំងឺនេះហើយ​ ហើយមនុស្ស​​លើសពី​មួយ​ពាន់​នាក់ ក្នុងនោះក៏រួម​ទាំងលោក ហ៊ុន សែន ផងដែរ កំពុង​ធ្វើ​ចត្តាឡឺស័ក​ ដើម្បីតាម​ដាន​សុខភាពបន្ត​។ តើ​លោកយល់​​ឃើញយ៉ាង​ដូចម្តេចដែរចំពោះករណីនេះ?

លោក ហ៊្វីល រ៉ូបឺតសុន៖ «កន្លងទៅ កម្ពុជា​ពិត​ជា​សំណាងខ្លាំងណាស់ដែល​ជំងឺនេះ​មិន​សូវ​ឆ្លង​រាតត្បាត​ខ្លាំង ប៉ុន្តែ​រឿងនេះ​អាច​ផ្លាស់ប្តូរ​យ៉ាង​លឿន​។ ប្រសិន​បើជំងឺកូវីដ-១៩ ចាប់​ផ្តើម​​ឆ្លង​រាល​ដាលកាន់​តែច្រើន​នៅកម្ពុជា ​នោះនឹង​ក្លាយ​ជា​បញ្ហា​ធ្ងន់ធ្ងរសម្រាប់​ពលរដ្ឋ​ខ្មែរ ព្រោះ​យើង​ដឹង​ហើយថា រដ្ឋាភិបាល និង​ប្រព័ន្ធសុខាភិបាល​កម្ពុជា​មិន​អាច​បញ្ឈប់​ជំងឺនោះបាន​ទេ។ និយាយឱ្យ​មែន​ទែន​ទៅ រដ្ឋាភិបាល​កម្ពុជា​​អត់​ខ្វល់​អ្វីសោះ ដែល​ទៅអញ្ជើញ​មន្ត្រីហុងគ្រីមក​បំពេញទស្សនកិច្ច ដោយ​មិន​ចាត់​វិធានការ​បង្ការទុក​ជាមុនបែបនេះ។ តើ​រដ្ឋាភិបាល​ហ្នឹង​គិត​ថាខ្លួន​ជាមនុស្សអច្ឆរិយៈ ដែល​មិន​ចេះ​ឈឺ​ ឬយ៉ាងម៉េច? រឿងដ៏គួរ​ឱ្យ​សោកសង្រេងនោះ គឺ​ថា​មន្ត្រីគ្រាក់ៗ​នៃ​រដ្ឋាភិបាល​លោក ហ៊ុន សែន មាន​លទ្ធភាព​ជិះយន្តហោះ​ទៅសឹង្ហ​បុរី ឬប្រទេស​ផ្សេង​ទៀត ដើម្បី​ព្យាបាល​ជំងឺ ប៉ុន្តែ​ប្រជាពលរដ្ឋ​សាមញ្ញ​មិន​មាន​លទ្ធភាពធ្វើ​​​បែបនេះទេ។ ប្រសិន​បើ​ជំងឺកូវីដ-១៩ រាតត្បាត​ចូលក្នុង​សហគមន៍ នោះ​ពលរដ្ឋ​សាមញ្ញ​ គឺជា​អ្នក​រង​គ្រោះ មិន​មែន​មន្ត្រីគ្រាក់ៗទាំងនោះឡើយ»

លោក ឡេង ម៉ាលី៖ លោក ហ្វីល រ៉ូបឺតសុន! តើ​ហានិភ័យ​នៃការ​ឆ្លង​រាល​ដាល​ជំងឺកូវីដ-១៩ នៅកម្ពុជា​នេះ អាច​នាំឱ្យ​មាន​ការ​រំលោភសិទ្ធិមនុស្ស​បន្ថែម​ទៀត​ដែរឬទេ?

លោក ហ៊្វីល រ៉ូបឺតសុន៖ «នេះ​ជាពិត​ជារឿង​ដ៏​គួរ​ឱ្យ​ព្រួយ​បារម្ភ។ យើងបាន​ឃើញហើយថា អាជ្ញាធរ​បាន​ចាប់​ខ្លួន​មនុស្ស​ជាច្រើន​នាក់​ដែល​រិះគន់​វិធានការ​របស់​រដ្ឋាភិបាល​ក្នុង​ការ​ឆ្លើយតប​នឹង​ជំងឺកូវីដ-១៩។ យើង​ក៏​បាន​ឃើញដែរពី​ការ​អនុវត្ត​បែប​រើស​អើង​របស់​រដ្ឋាភិបាល ពោល​បើ​អ្ន​ក​រិះគន់​ជា​មនុស្ស​មាន​និន្នាការ​គាំទ្រ​គណបក្ស​សង្គ្រោះជាតិ អាជ្ញាធរ​នឹង​ចាប់​ពួកគេ​យក​ទៅឃុំ​ទុក​ក្នុងពន្ធនាគារ​ដោយ​ចោទ​ពីបទញុះញង់ឱ្យ​ប្រព្រឹត្ត​បទ​ឧក្រិដ្ឋ ប៉ុន្តែ​បើ​ពួក​គេ​មិន​មាន​អ្វី​ពាក់ព័ន្ធ​នឹង​បក្ស​ប្រឆាំងទេ នោះអាជ្ញាធរ​នឹង​ដោះលែង​ជន​ទាំងនោះ​វិញ។ ដូច្នេះ វាច្បាស់​ណាស់​ថា ​រដ្ឋាភិបាល​កម្ពុជា​បាន​ប្រើប្រាស់​ហេតុផល​ជំងឺកូវីដ-១៩ នេះមួយ​ផ្នែក​ ដើម្បី​ចាប់​ខ្លួន​មន្ត្រីបក្ស​សង្គ្រោះជាតិ​ដែល​កំពុង​រស់នៅក្នុង​ប្រទេស»

លោក ឡេង ម៉ាលី៖ ពាក់ព័ន្ធនឹងរឿងនេះដែរ លោកនាយករដ្ឋ​មន្ត្រី ហ៊ុន សែន បាន​បង្ហើប​អំពី​បំណង​ប្រើប្រាស់​ច្បាប់​គ្រប់​គ្រង​ប្រទេស​ក្នុងភាព​អាសន្ន ដើម្បីទប់​ស្កាត់​សភាពការណ៍​កូវីដ-១៩។ តើ​លោក​យល់​យ៉ាងណា​ដែរ?

លោក ហ៊្វីល រ៉ូបឺតសុន៖ «ច្បាប់​គ្រប់គ្រង​ប្រទេស​ក្នុងភាពអាសន្ន​របស់​កម្ពុជានោះ គឺ​ជាច្បាប់​​រំលោភ​សិទ្ធិមនុស្ស ជា​ច្បាប់​ដែល​ផ្តល់​អំណាច​គ្មាន​ព្រំដែន​ដល់​នាយករដ្ឋ​មន្ត្រី អាច​ធ្វើ​អ្វី​ក៏​​បាន​ស្រេច​តែ​អំពើ​ចិត្ត​ ដោយ​គ្មាន​ទោសទណ្ឌ។ ខ្ញុំ​គិត​ថា ការ​ប្រើប្រាស់​ច្បាប់​នេះ ​នឹងបង្កើតឱ្យ​​មាន​ការ​រំលោភ​សិទ្ធិមនុស្ស​ធ្ងន់ធ្ងរ ដូច្នេះ​នេះ​ជា​បញ្ហា​ធំមែន​ទែន»

លោក ឡេង ម៉ាលី៖ សំណួរ​របស់​ខ្ញុំ​ជាចុងក្រោយថា តើ​ប្រជាពលរដ្ឋ​ខ្មែរ និង​សហគមន៍​អន្តរជាតិ គួរ​តែ​ធ្វើ​អ្វីខ្លះ​ដើម្បី​ជួយ​ឱ្យ​មាន​ការ​កែ​ប្រែ​ស្ថាន​ភាព​សិទ្ធិមនុស្ស​នៅកម្ពុជា?

លោក ហ៊្វីល រ៉ូបឺតសុន៖ «សហគមន៍​អន្តរជាតិ​គួរ​តែ​ថ្លែងការណ៍​ជា​សាធារណៈ​អំពីការ​រំលោភ​សិទ្ធិមនុស្ស​នៅកម្ពុជា។ ​ស្ថានភាព​សិទ្ធិមនុស្ស​នៅកម្ពុជា​ដែល​កំពុង​ធ្លាក់​ដុន​ដាប​ខ្លាំងនេះ គឺ​​ជា​រឿង​​មិន​អាច​ទទួល​យក​បាន​ឡើយ។ កន្លងមក មន្ត្រីទូត​បរទេស​ប្រចាំនៅកម្ពុជាហាក់​​រក្សាភាព​ស្ងៀម​ស្ងាត់ជ្រុល​ពេក​ហើយ។ រីឯ​​ក្រុម​ប្រឹក្សា​សិទ្ធិមនុស្ស​អង្គការ​សហប្រជាជាតិ​ក៏​ត្រូវ​តែ​មាន​ចំណាត់​ការ​លើ​រឿងនេះដែរ។ ដោយ​ឡែក ប្រជា​ពលរដ្ឋ​ខ្មែរ​វិញ គឺ​ត្រូវ​តែ​បន្ត​បញ្ចេញ​មតិ​ និង​អនុវត្តសិទ្ធិសេរីភាព​របស់​ខ្លួន​តទៅទៀត»

លោក ឡេង ម៉ាលី៖ សូម​អរគុណ​លោក ហ្វីល រ៉ូបឺតសុន ដែលបាន​​ផ្តល់​បទសម្ភាស​ដល់​អាស៊ីសេរី។ សូម​ជម្រាបលា!

លោក ហ៊្វីល រ៉ូបឺតសុន៖ បាទអរគុណ ជម្រាបលា!

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល