អ្នក​​សារព័ត៌មាន​ និង​​សង្គម​​ស៊ីវិល​​ស្នើ​រដ្ឋាភិបាល​​លុប​​បំបាត់​​ការ​​ដាក់​​សម្ពាធ​​តាម​​ប្រព័ន្ធ​ឌីជីថល​លើ​វិស័យ​​សារព័ត៌មាន

អ្នក​​សារ​ព័ត៌​មាន និង​សង្គម​ស៊ីវិល​ស្នើ​ដល់​រដ្ឋា​ភិបាល​លុប​បំបាត់​ការ​ដាក់សម្ពាធ​តាម​ប្រព័ន្ធ​ឌីជី​ថល​លើ​វិស័យ​សារព័ត៌​មាន​ដោយ​ស្វែង​រក​ដំណោះ​ស្រាយពីភាគី​ពាក់​ព័ន្ធ​ឆ្លើយ​តប​នឹង​បញ្ហា​ប្រឈម​ទាំង​នោះ។ ពួក​គេ​ក៏​ស្នើ​រដ្ឋា​ភិបាល និងក្រសួងព័ត៌​មាន​ដោះ​​ស្រាយ​​បញ្ហា​​ប្រឈម​​របស់​អ្នក​សារ​ព័ត៌​មាន​ ​ដើម្បី​ធានា​ផ្តល់សេរី​ភាព​ពេញ​លេញ​ដល់​អ្នក​សារព័ត៌​មាន​រាយ​ការណ៍​ព័ត៌​មាន​ពិត​ដោយ​សេរីសម្រាប់​ប្រយោជន៍​ប្រជា​ពលរដ្ឋ​និង​សង្គម។​ ការ​លើក​ឡើង​នេះ គឺ​កើត​​​មាន​​ក្រោយ​​ពី​​​ពួក​គេ​​​រក​​ឃើញ​​ថា ករណី​រំលោភ​បំពាន​លើ​អ្នក​សារព័ត៌​បាន​បន្ត​កើនឡើង​គួរ​ឱ្យ​ព្រួយ​បារម្ភ ជា​ពិសេស​តាម​រយៈ​ការ​បង្កើត​ច្បាប់​ និង​អនុក្រឹត្យ​របស់​រដ្ឋា​ភិបាល។

អង្គ​ការ​សង្គម​ស៊ីវិល សមាគម​អ្នក​សារព័ត៌​មាន​ប្រមាណ​២៤ស្ថាប័ន បាន​រៀប​ចំទិវា​​សេរីភាព​សារព័ត៌​មាន​ពិភព​លោក​ក្រោម​ប្រធាន​បទ សារព័ត៌មានក្នុងសម្ពាធប្រព័ន្ធឌីជីថល នៅ​សណ្ឋាគារ​ហ៊ីម៉ារី រាជ​ធានី​ភ្នំពេញ នៅថ្ងៃទី០២ ខែឧសភា។ ក្នុង​នោះ​ក៏​មាន​រៀបចំ​វេទិកា​សួរ​ដេញ​ដោល​ដែល​មាន​ការ​ចូល​រួម​ពី​អ្នក​សារព័ត៌​មាន អ្នក​ការ​ពារ​សិទ្ធិ​មនុស្ស សិស្ស​និស្សិត មេធាវី សហគម តំណាង​រដ្ឋា​ភិបាល តំណាង​រាស្រ្ត និង​ស្ថាន​ទូត តំណាង​ដៃ​គូអភិវឌ្ឍន៍ ដើម្បី​ជជែក ពិភា​ក្សា និងស្វែង​យល់ អំពី​ការ​រឹត​ត្បិត​លើ​សេរី​ភាព​សារ​ព័ត៌​មាន តាម​រយៈ​ការ​បង្កើត​អនុក្រឹត្យ​ច្រក​ទ្វារ​អ៊ីន​ធើណិត​ជាតិ អនុ​ក្រឹត្យ​ស្តី​ពី​ការ​គ្រប់​គ្រង ការ​ប្រើ​ប្រាស់ ​ការការ​ពារ​សុវត្ថិ​ភាព​នៃ​ទិន្នន័យ​អត្ត​សញ្ញាណ​ផ្ទាល់​ខ្លួន។

នាយក​ប្រតិបត្តិ​សមាគម​សម្ព័ន្ធ​អ្នក​សារព័ត៌​មាន​ខេមបូចា (CamboJa) លោក ណុប វី ថ្លែង​​​​​ថា ​ស្រប​ពេល​ប្រជាពលរដ្ឋ​ទទួល​យក​ព័ត៌​មាន​តាម​ប្រព័ន្ធ​អន​ឡាញ ហើយ​ក្រសួង​មាន​វិធាន​ការ​ជា​បន្ត​បន្ទាប់ ដែល​នាំ​ឱ្យអ្នក​​ផលិត​ព័ត៌​មាន​អនឡាញ​កម្រិត​នូវ​សេរីភាព​របស់​ខ្លួន ខ​ណៈ​ការបោះ​ឆ្នោត​ខិត​ជិត​មកដល់​ដែល​រដ្ឋាភិបាល​ត្រូវ​ធានា​លំហូ​ព័ត៌​មាន​ត្រូវ​ទៅ​ដល់​ប្រជា​ពលរដ្ឋ។

លោក​ឱ្យ​ដឹង​ថា​ប៉ុន្មានឆ្នាំ​មក​នេះ​សេរីភាព​សារព័ត៌​មាន​នៅ​កម្ពុជា​មិន​ទាន់​វិវឌ្ឍន៍​ប្រសើរ​នៅ​ឡើយ​ទេ ព្រោះ​អ្នក​សារព័ត៌​មាន​នៅ​តែ​ទទួល​រង​ការ​ធ្វើ​ទុក្ខ​បុក​ម្នេញ គំរាម​កំហែង ការ​ចាត់វិធាន​រដ្ឋ​បាល ការ​ប្រើ​អំពើ​ហិង្សា ការ​បៀត​បៀនលើ​​អ្នក​សារព័ត៌​មាន​ជា​ស្រ្តី ព្រមទាំង​ការ​ចាប់​និង​ឃុំ​ខ្លួន​បណ្តោះ​ដាក់​​ក្នុង​​ពន្ធនគារ​ដោយ​សារ​តែ​ការ​ងារ​របស់​ពួកគេ៖ «ការ​ទទួល​ព័ត៌​មាន​ចាំបាច់​ណាស់ ហើយ​ការ​ទទួល​ព័ត៌​មាន​ពិតកាន់​តែ​បាំបាច់​ទៅ​ទៀត ដើម្បី​ធ្វើ​ឱ្យ​មាន​គុណ​ភាព​ជីវិត រីក​ចម្រើន​ដល់​ដំណើរការ​ប្រជា​ធិប​តេយ្យ ធានា​ឱ្យ​មាន​ការ​ចូល​រួម​ពី​ប្រជា​ពលរដ្ឋ។ ស្រប​ពេល​ប្រទេសកម្ពុជា​រៀបចំ​ការ​បោះ​ឆ្នោត​ខែ​ក្រោយ​នេះ និង​ឆ្នាំ​២០២៣ ដែល​រដ្ឋា​ភិបាល​គួរធានា​ថា​លំហូ​ព័ត៌​មាន​ត្រូវ​ទៅ​ដល់​ប្រជា​ពលរដ្ឋ​គ្រប់​រូប​ហើយ​រាល់​ការ ហើយ​រាល់ការ​បៀត​បៀន​លើ​អ្នក​សារ​ព័ត៌​មាន​នឹង​មិន​បន្ត​ទៀត​ឡើយ»។

ស្រប​ពល​អប​អរ​សាទរ​ទិវា​សេរី​ភាព​អ្នក​សារព័ត៌​មាន អង្គការ​សង្គម​ស៊ីវិល អ្នកសារ​ព័ត៌​មាន​​​​​សំណូម​ពរ​​​​ចំនួន ៧​ចំណុច​សំខាន់ៗ ​​ទៅ​​កាន់​​​​រដ្ឋា​​ភិបាល​ដើម្បី​យកទៅ​ឆ្លើយ​តប​ប្រដប​ដោយ​​វិជ្ជមាន​ត្រឡប់​មក​វិញ ដូច​ជា​ស្នើ​សុំ​ចាត់​វិធាន​ការបញ្ចាប់​អំពើ​និទណ្ឌ​ភាព​ទាក់​ទង​បទ​ឧក្រិដ្ឋ​ទាំង​ឡាយ​ណា​ដែល​ប្រឆាំង​នឹង​អ្នកសារ​ព័ត៌​មាន ស្នើ​ឱ្យ​ក្រសួងព័ត៌​មាន​ពិនិត្យ និង​ផ្តល់​សុពល​ភាព​អាជ្ញា​ប័ណ្ណ​ដល់​បណ្តា​សារ​ព័ត៌​មាន​ដែល​ក្រសួង​ដកហូត​​ចាប់​តាំង​ពី​ឆ្នាំ​២០១៧ រហូត​ដល់​បច្ចុប្បន្ន និង​ស្នើ​ឱ្យ​រដ្ឋា​ភិបាល​បន្ត​ពង្រឹង​ភាព​ជា​ដៃ​គូ​ជា​មួយ​អ្នក​សារ​ព័ត៌​មាន និង​លើកកម្ពស់​ការ​យល់​ដឹង​ដល់​ប្រជាពល​រដ្ឋ​តាម​រយៈ​ប្រព័ន្ធ​ព័ត៌​មាន និង​ឌីជីថល​ជា​ដើម។ លើស​ពី​នេះ​ពួក​គេ​ស្នើ​រដ្ឋា​ភិបាល​ត្រូវ​ពន្លឿន​ដំណើរ​ការ​អនុម័ត​ច្បាប់​ស្តី​ពីសិទ្ធិ​ទទួល​បាន​ព័ត៌​មាន និង​វិសោធ​កម្ម​ច្បាប់​ស្តី​ពី​របប​សារ​ព័ត៌​មាន ដោយ​បើកការ​ប្រឹក្សា​យោបល់​ឱ្យ​បាន​ទូលំ​ទូលាយ​លើ​សេចក្តី​ព្រាង​ច្បាប់​ស្តីពី​ឧក្រិដ្ឋ​កម្មតាម​ប្រព័ន្ធ​បច្ចេក​វិទ្យា សន្តិ​សុខ​ឌីជីថល និង​វិធី​វិធាន​ផ្សេង​ទៀត​ដែល​ប៉ះ​ពាល់ដល់​សិទ្ធិ​ទទួល​បាន​ព័ត៌​មាន​ សរីភាព​សារ​ព័ត៌​មាន និង​ការ​បញ្ចេញ​មតិ។ ម្យ៉ាងទៀតវិញ​ទៀត​ស្នើ​លុប​បំបាត់​ទម្រង់​នៃ​ការ​បៀប​បៀន​លើ​ស្រ្តី​ជា​អ្នក​សារ​ព័ត៌​មាន ស្នើ​លើក​ទឹក​ចិត្ត​ឱ្យ​មាន​ភាព​ចម្រុះ​នៃ​ប្រព័ន្ធ​ផ្សព្វ​ផ្សាយ​ពី​គ្រប់​និន្នា​ការនយោ​បាយ និង​ស្នើ​បញ្ចាប់​ការ​ប្រើ​ប្រាស់​ច្បាប់​ព្រហ្ម​ទណ្ឌ​ចោទ​ប្រកាន់ និង​ចាប់​អ្នកសារ​ព័ត៌​មាន​ដាក់​ពន្ធនា​គារជាដើម។

ជុំវិញ​រឿង​នេះ រដ្ឋលេ​ខាធិ​ការ និង​ជា​អ្នក​នាំ​ពាក្យក្រសួងព័ត៌មានលោក មាន សុភ័ណ្ឌ ថ្លែងថាក្រសួងតែងតែយកចិត្តដាក់ និង​ចាត់​ទុក​អ្នកសារ​ព័ត៌​មាន គឺ​​ជា​ដៃ​គូមិន​អាច​ខ្វះ​បាន ​ដោយ​គ្មាន​ការ​រើស​អើង​និន្នា​ការ​នយោ​បាយ។ លោក​បន្ត​ថា​រដ្ឋាភិបាល​បាន​ប្តេជ្ញា​ចិត្ត​ធានា​ការ​ពារ​បន្ថែម​ទៀត​ចំពោះ​ការ​គោរព​សិទ្ធិ​សេរី​ភាពអ្នក​សារ​ព័ត៌​មាន និង​សិទ្ធិ​បញ្ចេញ​មតិ ដែល​ធ្វើ​ឱ្យ​វិស័យ​សារព័ត៌​មាន​នៅ​កម្ពុជា​កំពុងររីកចម្រើន​តាមរយៈ​ការ​កើន​ឡើង​ចំនួន​អង្គភាព​សារព័ត៌​មាន​បែប​ទំនើប និងប្រពៃណី​ជា​បន្ត​បន្ទាប់។

យ៉ាង​ណា​ក្តី​លោក​ថា​អ្នកសារ​ព័ត៌​មាន​ក៏​កំពុង​ជួប​បញ្ហាប្រឈម​ដូច​ជា​សេដ្ឋកិច្ច​ដោយ​វិបត្តិ​ជំងឺ​កូវីដ១៩ និង​ការ​រីក​ចម្រើន​នៃ​ប្រព័ន្ធ​ឌីជីថល ការ​ប្រកួត​ប្រជែង ​ដែល​ទាមទារ​ចូលរួមពី​ភាគ​ពាក់ព័ន្ធ​ទាំង​អស់៖ «ក្រសួង​ព័ត៌​មាន​ដែល​ជា​សេនាធិការ​របស់​រដ្ឋា​ភិបាល គឺ​យើងបាន​ផ្តល់​នូវ​ភាព​ស្រប​ច្បាប់ ផ្តល់​តម្លៃ​ដល់​អង្គភាព​សារព័ត៌​មាន​ទាំង​អស់​ដែល​ចុះបញ្ជី​នៅ​ព្រះរាជា​ណាចក្រ​កម្ពុជា​មាន​ទាំង​អង្គភាព​ព័ត៌​មាន​ក្នុង​ស្រុក និង​បរទេសនូវភាព​ស្រប​ច្បាប់ និង​តម្លៃ​ស្មើៗ​គ្នា ដោយ​មិន​គិត​តើ​អង្គភាព​ហ្នឹង​តូច ឬ​ធំ​ទេ»។

ក្នុង​​​រយៈ​​ពេល​​​ជា​ច្រើន​​​ឆ្នាំ​​​បន្ត​​បន្ទាប់​​​មក​​នេះ កម្ពុជា​​​ជាប់​​​ក្នុង​​​ចំណាត់​​​ថ្នាក់​​​ជា​ប្រទេស​​​មាន​​​សេរីភាព​​​តិច​តួច​​​នៅ​​​លើ​​​បណ្តាញ​​​អ៊ិនធើ​ណិត របស់​​​អង្គការ​​​ឃ្លាំ​មើល​​សេរីភាព​​​ពិភព​​លោក Freedom House ដោយ​​សារ​​តែ​​​​រដ្ឋា​ភិបាល​​​បាន​​​ព្យា​យាម​​ប្លុក​​​គេហ​ទំព័រ​​​មួយ​​​ចំនួន រួម​​ទាំង​​​គេហ​ទំព័រ​​​អាស៊ី​សេរី នៅ​​​មុន​​ពេល​​​បោះ​ឆ្នោត​​ជាតិ​​​ឆ្នាំ​​២០១៨ ដែល​​​ត្រូវ​​​គេ​​ចាត់​​​ទុក​​​ថា «ក្លែងក្លាយ» និង​​​បាន​​​បង្កើន​​​យុទ្ធនា​ការ​​ចាប់​​ខ្លួន និង​​បំ​ភិត​​បំភ័យ​​​ក្រុម​​អ្នក​​​រិះគន់​ និង​​​​សំឡេង​​​ប្រឆាំង​​​នៅ​​លើ​​​បណ្តាញ​​អ៊ិនធើ​ណិត។

ក្រុម​​អង្គ​ការ​​​ជាតិ ​និង​​​អន្តរ​​ជាតិ តែង​តែ​​ទទូច​​​ឱ្យ​​​រដ្ឋា​ភិបាល​​​លោក​ ហ៊ុន សែន ​ធានា​សេរីភាព​​​ជា​​​មូល​​ដ្ឋាន ​និង​​​​ធានា​​​ប្រសិទ្ធ​​ភាព​​​នៃ​​​ការ​​​ប្រើ​​​ប្រាស់​​​អ៊ីនធើ​ណិត​​នៅ​​​កម្ពុជា​​ប្រកប​​​ដោយ​​​សុវត្ថិ​ភាព​សម្រាប់​​​ពល​រដ្ឋ​​ និង​អ្នក​សារព័ត៌​មាន​​ត្រូវ​​​បាន​​គោរព​​​ស្រប​​​តាម​​​រដ្ឋ​​ធម្ម​នុញ្ញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។