សហព័ន្ធ​ខ្មែរ​កម្ពុជា​ក្រោម​ស្នើ​ឲ្យ​រដ្ឋាភិបាល​បញ្ឈប់​គំរាម​កំហែង​ដល់​យុវជន​ខ្មែរ​ក្រោម ដែល​ហ៊ាន​ងើប​ឡើង​ទាមទារ​សិទិ្ធ

ដោយ យន់ សាមៀន
2020-11-04
Share
KhmerKrom ព្រះ​ចៅ​អធិការ​វត្ដ​ខេមរង្សី ព្រះតេជព្រះគុណ សឺង យ៉ឹងរតនា។
Provided

សហព័ន្ធខ្មែរ​កម្ពុជា​ក្រោម ស្នើ​ឲ្យ​អាជ្ញាធរ​វៀតណាម ឈប់​ធ្វើ​ទុក្ខ​បុក​ម្នេញ យុវជន​ខ្មែរ​កម្ពុជា​ក្រោម ដែល​កំពុង​រស់​នៅ​លើ​ទឹក​ដី​កំណើត។ សំណើ​នេះ ធ្វើ​ឡើង​ដោយសារ​តែ អាជ្ញាធរ​វៀតណាម​​​ កាលពី​ពេលថ្មីៗនេះ បន្ត​កោះហៅ​យុវជន​ខ្មែរ​ក្រោម ទៅ​សម្លុត​បំភ័យ កុំ​ឲ្យ​ហ៊ាន​ងើប​​ឡើង​តវ៉ា​ទាមទារ សិទ្ធិ​សេរីភាព និង​សិទ្ធិ​ការងារ​ដោយ​គ្មាន​ការ​រើសអើង​ពូជសាសន៍។

ប្រធាន​នាយកដ្ឋាន​ព័ត៌មាន​នៃ​សហព័ន្ធ​ខ្មែរ​កម្ពុជា​ក្រោម ព្រះភិក្ខុ ស៊ឺង យ៉ឹងរតនា មាន​ថេរ​ដីកា​ថា​ អាជ្ញាធរ​វៀតណាម កំពុង​ប្រើប្រាស់​យុទ្ធសាស្ត្រ​ថ្មី ដើម្បី​បំបាក់​ស្មារតី​យុវជន​ខ្មែរ​ក្រោម ដែល​​​​ហ៊ាន​ងើប​ឡើង​តវ៉ា ជុំវិញ​ការ​រើសអើង​ពូជសាសន៍ ក្នុង​កន្លែង​ការងារ និង​ទាមទារ​សិទ្ធិ​សេរីភាព​ជា​ជនជាតិ​ដើម​កំណើត៖ «អាត្មា​យល់​ឃើញ​ថា នេះ​ជា​យុទ្ធសាស្ត្រ​របស់​អាជ្ញាធរ​វៀតណាម ដើម្បី​សម្លុត​បំភ័យ​ខ្មែរ​ក្រោម ហ៊ាន​ងើប​ឡើង​តវ៉ា ដើម្បី​បញ្ចេញ​ការ​ពិត និង​ប្រវត្តិសាស្ត្រ​នៃ​ទឹក​ដី​កម្ពុជា​ក្រោម ក៏​ដូច​ជា​ការ​បញ្ចេញ​មតិ​ក្នុង​នាម​ជា​កម្ពុជា​ក្រោម»

ប្រតិកម្ម​របស់​សហព័ន្ធ​ខ្មែរ​ក្រោម​នេះ បន្ទាប់ពី អាជ្ញាធរ​វៀតណាម កាលពី​សប្ដាហ៍​មុន បាន​កោះ​ហៅ​យុវជន យឿងភុក ជា​តំណាង​ឲ្យ​កម្មករ​ខ្មែរ​ក្រោម​ជាង ២០០នាក់ ដែល​បាន​រួមគ្នា​ចុះ​ហត្ថលេខា​លើ​ញត្តិ​រួម​មួយ ដាក់​ទៅ​ក្រសួង​ពលកម្ម​វៀតណាម ដើម្បី​ស្នើ​ឲ្យ​រដ្ឋាភិបាល​វៀតណាម ធ្វើ​អន្តរាគមន៍​​​​ជួយ​ដល់​កម្មករ​ខ្មែរ​ក្រោម ករណី​ក្រុមហ៊ុន និង​រោងចក្រ​វៀតណាម មិន​ទទួល ​ខ្មែរ​ក្រោម​ចូល​ធ្វើការ ដោយសារតែ​ការរើសអើង​ជាតិ​សាសន៍ និង​ការ​ជិះជាន់​កម្មករ​ខ្មែរ​ក្រោម នៅ​ក្នុង​រោងចក្រ។ យុវជន យឿងភុក ប្រាប់​អាស៊ី​សេរី​កាល​ពី​ថ្ងៃ​ទី៣១ តុលា​ថា លោក​ត្រូវ​អាជ្ញាធរ​វៀតណាម សាកសួរ​រ​អស់​ជា​ច្រើន​ម៉ោង ហើយ​បាន​ព្រមាន​លោក​ថា អាជ្ញាធរ​នឹង​ចាប់ខ្លួន បើ​លោក​នៅតែ​បន្ត​ធ្វើ​សកម្មភាព​ទាំង​ឡាយ​ណា ដែល​នាំ​ឲ្យ​មាន​ផល​ប៉ះពាល់ ដល់​ផលប្រយោជន៍​កម្មករ​ជា​ជនជាតិ​វៀតណាម។​ ទោះ​បី​ជា​យ៉ាង​ណា​ក៏​ដោយ យុវជន យឿងភុក អះអាង​ថា លោក​នឹង​មិន​ចាញ់​សម្លុត​បំភ័យ​ អាជ្ញាធរ​វៀតណាម​នោះ​ទេ៖ «អូន​អត់​ភ័យ​អី​ទេ​បង​អើយ។ ពេល​ខ្មែរ​ធ្វើ​មិន​ត្រូវ​ចិត្ត យួន វា​ចេះ​តែ​ទះ​ក្បាល។ បង​ប្អូន​ខ្មែរ​គេ​ចេះ​តែ​ពឹង​ប្អូន»

នេះមិនមែន​ជា​លើក​ទី​មួយ​ទេ ដែល​អាជ្ញាធរ​វៀតណាម បាន​ព្យាយាម​គំរាម​កំហែង មិន​ឲ្យ​យុវជន​និង​ពលរដ្ឋ​ខ្មែរ​ក្រោម​ងើប​ឡើង​តវ៉ា​រឿង​ទាមទារ​សិទ្ធិ​ជា​ជនជាតិ​ដើម​កំណើត និង​សិទ្ធិ​ដីធ្លី កាល​ពី​ខែ​កញ្ញា​កន្លង​ទៅ​អាជ្ញាធរ​វៀតណាម នៅ​ខេត្ត​ព្រះត្រពាំង​បាន​កោះហៅ​ឲ្យ​យុវជន​ខ្មែរ​កម្ពុជា​ក្រោម​ពីរ​នាក់ ឲ្យ​បង់​ប្រាក់​ពិន័យ ដោយសារ​តែ​គេ​បង្ហោះ​​អត្ថាធិប្បាយ​តាម​បណ្ដាញ​សង្គម​រឿង​ប្រវត្តិសាស្ត្រ​ខ្មែរ​ក្រោម និង​រិះគន់​គុណភាព​អង្ករ​វៀតណាម ដែល​ចែកចាយ​ឲ្យ​ពលរដ្ឋ​ខ្មែរ​ក្រោម ដែល​រង​គ្រោះ​ដោយសារ​តែ​ការ​រាតត្បាត​នៃ​ជំងឺ Covid-19។ យុវជន​ខ្មែរ​ក្រោម​ទាំង​ពីរ​នាក់ នៅ​តែ​រក្សា​ជំហរ​ថា ពួក​គេ​នឹង​មិន​បង់​ប្រាក់ ពិន័យ​ឲ្យ​អាជ្ញាធរ​វៀតណាម​នោះ​ទេ ដោយសារ​តែ​ពួក​គេ កំពុង​ជួប​វិបត្តិ​សេដ្ឋកិច្ច បណ្ដាល​មក​ពី​ជំងឺ Covid-19 និង​ពួក​គេ​យល់​ថា ពួក​គេ​មិន​បាន​ប្រព្រឹត្ត​កំហុស។

យុវជន​ខ្មែរ​កម្ពុជា​ក្រោម​ទាំង​ពីរ​នាក់​នោះ​រួម​មាន លោក តោ ហ្វាងចឿង ដែល​ត្រូវ​អាជ្ញាធរ​វៀតណាម​បន្ត​បង្ខំ​ឲ្យ​បង់​ពិន័យ​រាប់​រយ​ដុល្លារ ករណី​ប្រើប្រាស់​បណ្ដាញ​សង្គម ចែក​ចាយ​ព័ត៌មាន​របស់​សហព័ន្ធ​ខ្មែរ​កម្ពុជា​ក្រោម ស្ដីពី​ការ​បាត់បង់​ទឹក​ដី​ខ្មែរ​ក្រោម ក្នុង​ខួប​បាត់បង់​ទឹក​ដី​លើក​ទី ៧១ឆ្នាំ។ ក្រោយ​ការ​ចែកចាយ​ព័ត៌មាន​នេះ ភ្លាម​អាជ្ញាធរ​បាន​ផ្ញើ​លិខិត​កោះហៅ យុវជន តោ ហ្វាងចឿង ទៅ​ជួប​ដោយ​បញ្ចុះបញ្ចូល​លោក ​ឲ្យ​ធ្វើ​ជា​ភ្នាក់ងារ​សម្ងាត់​វៀតណាម​ដើម្បី​តាម​ដាន​ខ្មែរ​ក្រោម​ណា ដែល​ហ៊ាន​រិះគន់​អាជ្ញាធរ​វៀតណាម ប៉ុន្តែ លោក​បាន​បដិសេធ​ទើប​អាជ្ញាធរ​វៀតណាម​សម្រេច​ផាក​ពិន័យ។ ករណី​យុវជន​ទី​ពីរ​វៀតណាម បាន​ផាក​យុវជន​ខ្មែរ​ក្រោម​ម្នាក់​ទៀត ឈ្មោះ ថាច់ កឿង ចំនួន ​បី​រយ​ដុល្លារ ដោយសារ​តែ​លោក​ប្រើប្រាស់​បណ្ដាញ​សង្គម ដើម្បី​សំដែង​មតិ រិះគន់​គុណភាព​អក្សរ​វៀតណាម ដែល​ចែកចាយ​ឲ្យ​ខ្មែរ​ក្រោម​ណា​ដែល​រង​ផល​ប៉ះពាល់​ដោយសារតែ ជំងឺcovid-19

អាជ្ញាធរ​វៀតណាម មិន​ត្រឹម​តែ​រឹតត្បឹត​សិទ្ធិ​ខ្មែរ​ក្រោម ក្នុង​ការ​បញ្ចេញ​មតិ តាម​បណ្តាញ​សង្គម​នោះ​ទេ។ អាជ្ញាធរ​វៀតណាម ក៏​បាន​រំលោភ​យក​ដី​កេរ្តិ៍​របស់​ពលរដ្ឋ​ខ្មែរ​ក្រោម​ផង​ដែរ។

កាល​ពី​ខែ​ឧសភា​កន្លង​ទៅ កសិករ​ខ្មែរ​ក្រោម​នៅ​ខេត្ត​ក្រមួន​ស បាន​ប៉ះ​ទង្គិច​នឹង​អាជ្ញាធរ​វៀតណាម នៅ​ពេល​អាជ្ញាធរ​ព្យាយាម​រឹប​អូស​ដី​ខ្មែរ​ក្រោម ដោយ​មិន​ផ្តល់​សំណង  រហូត​ឈាន​ដល់​មាន​ការ​ប្រើ​ប្រាស់​អំពើ​ហិង្សា រហូត​ក្រោយ​មក​វៀតណាម​បាន ​ចាប់​ខ្លួន​បុរស​ខ្មែរ​ក្រោម​ម្នាក់​ដាក់​ពន្ធនាគារ​ជា​ច្រើន​ខែ ប៉ុន្តែ​ក្រោយ​មក​បាន​ដោះ​លែង​លោក​ឲ្យ​មាន​សេរីភាព​ឡើង​វិញ។ ជុំវិញ​ការ​គំរាម​កំហែង ពលរដ្ឋ​ខ្មែរ​ក្រោម គ្មាន​ពេល​ស្រាកស្រាន្ត​ពីសំណាក់​អាជ្ញាធរ​វៀតណាម​នេះ​ ព្រះភិក្ខុ ស៊ឺង យ៉ឹង​រតនា ស្នើ​ឲ្យ​អាជ្ញាធរ​វៀតណាម​បញ្ឈប់​ជា​បន្ទាន់ ចំពោះ​ការ​ធ្វើ​ទុក្ខ​បុក​ម្នេញ​ពលរដ្ឋ​ខ្មែរ​ក្រោម៖ «អាជ្ញាធរ​វៀតណាម​គួរ​តែ​បញ្ឈប់ ការ​កោះហៅ​យុវជន ឈប់​ហៅ​ពលរដ្ឋ​ខ្មែរ​ក្រោម ទៅ​សួរ​ចម្លើយ​ពីព្រោះ​អី ពួក​គាត់​អត់​មាន​កំហុស។ ពួក​គាត់​មាន​សិទ្ធិ​ទាមទារ​សិទ្ធិ​សេរីភាព ការ​បញ្ចេញ​មតិ និង​ផ្សព្វផ្សាយ​វប្បធម៌ និង​ប្រពៃណី និង​ទឹក​ដី​របស់​ខ្លួន»

កាល​ពី​ដើម​ខែ​តុលា តំណាង​ក្រុម​អង្គការ​ខ្មែរ​ក្រោម និង​អង្គការ​ក្នុង​ស្រុក​ចំនួន ១០ បាន​ធ្វើ​របាយការណ៍​ប្រាប់​ប្រជុំ​ក្រុម​ប្រឹក្សា​សិទ្ធិ​មនុស្ស​អង្គការ​សហប្រជាជាតិ ក្នុង​កិច្ចប្រជុំ​ប្រចាំ​ឆ្នាំ​ថា ពលរដ្ឋ​ខ្មែរ​ក្រោម ដែល​កំពុង​រស់​នៅ​លើ​ដី​កំណើត ​ជួបប្រទះ​ការរំលោភ​សិទ្ធិ​មនុស្ស និង​ការ​រើសអើង​មិន​ចេះ​ចប់ មិន​ចេះ​ហើយ។ ​របាយការណ៍​បញ្ជាក់​ថា នៅ​កម្ពុជា​ក្រោម ដោយសារ​តែ​ខ្មែរ​ក្រោម មាន​វប្បធម៌ និង​ប្រតិបត្តិ​សាសនា​ផ្សេង​គ្នា​ពី​ជន​ជាតិ​វៀតណាម​ទើប​បណ្ដាល​ឲ្យ​មាន​គំនាប​បង្ខំ​ឲ្យ​ខ្មែរ​ក្រោម បញ្ចប់​អត្តសញ្ញាណ​ជា​ខ្មែរ ហើយ​ប្រែ​ក្លាយ​ពូជសាសន៍ និង​វប្បធម៌​​ទៅ​ជា​ជន​ជាតិ​វៀតណាម​វិញ។ អាជ្ញាធរ​ វៀត ណាម​ ក៏​បាន​ជ្រៀតជ្រែក​ចូល​កិច្ចការ​ និង​ការ​ប្រតិបត្តិ​សាសនា​របស់​ពលរដ្ឋ​ខ្មែរ​ក្រោម ហើយ​ការ​តវ៉ា​របស់​ខ្មែរ​ក្រោម​ត្រូវ​បាន​អាជ្ញាធរ​វៀតណាម​បង្ក្រាប ដោយ​អំពើ​ហិង្សា​ថែម​ទៀត​ផង។​ របាយការណ៍​បន្ត​ទៀត​ថា ទោះ​បី​បើ​វៀតណាម​អះអាង​ថា រដ្ឋាភិបាល​នេះ បាន​សន្យា និង​ជួយ​លើក​តម្កើង និង​គាំពារ​ខ្មែរ​ក្រោម​រួម​មាន​អក្សរ និង​សិទ្ធិ​សេរីភាព​ផ្នែក​សាសនា ក៏​ដោយ​ចុះ តែ​ធាតុ​ពិត​ខ្មែរ​ក្រោម​ថា វៀតណាម​បាន​បដិសេធ​ផ្តល់​សិទ្ធិ និង​ភាព​ស្មើ​គ្នា ទើប​បណ្ដាល​ឲ្យ​ខ្មែរ​ក្រោម​ជា​ច្រើន ភៀស​ខ្លួន​ចេញ​ពី​ស្រុក​កំណើត​ទៅ​រស់​កម្ពុជា និង​អ្នក​ខ្លះ​ទៀត​រត់​ទៅ​សុំ​សិទ្ធិ​ជ្រក​កោន​នៅ​ប្រទេស​ថៃ។ ក្រុម​អង្គការ​ខ្មែរ​ក្រោម​សង្កេត​ឃើញ​ថា អាជ្ញាធរ​វៀតណាម បាន​ចាប់​ផ្ដើម​ធ្វើ​ទុក្ខ​បុក​ម្នេញ​ពលរដ្ឋ​ខ្មែរ​ក្រោម​ឡើង​វិញ​នេះ គឺ​បន្ទាប់​ពី​ពលរដ្ឋ​ខ្មែរ​ក្រោម បាន​ងើប​ឡើង​តវ៉ា​ជា​បន្ត​បន្ទាប់ ដើម្បី​ទាមទារ​សិទ្ធិស្វ័យសម្រេច ដោយ​ខ្លួន​ឯង​ទៅ​ថ្ងៃ​អនាគត៕

ឯកអគ្គរដ្ឋទូត​នៃ​សាធារណរដ្ឋ​សិង្ហបុរី​ប្រចាំ​នៅ​កម្ពុជា គាំទ្រ​គោល​នយោបាយ​លើក​កម្ពស់​ការ​ប្រើប្រាស់​ប្រាក់​រៀល​របស់​រដ្ឋាភិបាល

 

ឯកអគ្គរដ្ឋទូត​នៃ​សាធារណរដ្ឋ​សិង្ហបុរី​ប្រចាំ​នៅ​កម្ពុជា គាំទ្រ​គោល​នយោបាយ​លើក​កម្ពស់​ការ​ប្រើប្រាស់​ប្រាក់​រៀល​របស់​រដ្ឋាភិបាល ដែល​នឹង​លើកកម្ពស់​ប្រសិទ្ធភាព​នៃ​ការ​អនុវត្ត​គោល​នយោបាយ​រូបិយវត្ថុ​នៅ​កម្ពុជា។

 

ទីភ្នាក់ងារ​សារព័ត៌មាន​កម្ពុជា អាកាប៉េ (AKP) រាយការណ៍​ថា ក្នុង​ជំនួប​រវាង​ឯកអគ្គរដ្ឋទូត​នៃ​សាធារណរដ្ឋ​សិង្ហបុរី លោក ម៉ាឆាល តានកេងស្យុង (Michael Tan Keng Soing) និង​ទេសាភិបាល​ធនាគារ​ជាតិ​នៃ​កម្ពុជា​លោក ជា ចាន់តូ បាន​ជួប​ពិភាក្សា​គ្នា​កាល​ពី​ថ្ងៃ​ទី៣ វិច្ឆិកា ឯកអគ្គរដ្ឋទូត​នៃ​សាធារណរដ្ឋ​សិង្ហបុរី ថ្លែង​ថា រវាង​កិច្ចសហការ​ទ្វេភាគី ជាមួយ​កម្ពុជា បាន​បង្ក​លក្ខណៈ​អំណោយ​ផល​ដល់​ពាណិជ្ជកម្ម និង​ការ​វិនិយោគ​នៃ​ប្រទេស​ទាំង​ពីរ។ លោក​ថា នៅ​ក្នុង​វិស័យ​ធនាគារ និង​ហិរញ្ញវត្ថុ​សិង្ហបុរី បាន​បង្កើន​ការ​វិនិយោគ ក្នុង​នោះ ភាគហ៊ុន​ដែល​មាន​ប្រភព​មក​ពី​សិង្ហបុរី រួមមាន នៅ​ក្នុង​ធនាគារ ហ្វីលីព ភីអិលស៊ី និង​ធនាគារ​ប្រៃសណីយ៍​កម្ពុជា ដែល​រួមចំណែក​ធ្វើ​ឱ្យ​វិស័យ​ធនាគារ​កាន់តែ​មាន​ការ​រីកចម្រើន។ ចំពោះ​ទំនាក់ទំនង​ទ្វេ​ភាគី​រវាង​ធនាគារ​កណ្ដាល​ទាំងពីរ ធនាគារ​ជាតិ​នៃ​កម្ពុជា​មាន​ទំនាក់ទំនង​ល្អ​ជាមួយ​នឹង​អាជ្ញាធរ​រូបិយវត្ថុ​សិង្ហបុរី តាមរយៈ​ការ​ផ្លាស់​ប្តូរ​ព័ត៌មាន ការ​បណ្ដុះបណ្ដាល​ធនធាន​មនុស្ស​ និង​កិច្ច​សហប្រតិបត្តិការ​លើ​វិស័យ​នានា។

កាលពី​ឆ្នាំ២០១៩ កន្លងទៅ ធនាគារ​ជាតិ​នៃ​កម្ពុជា និង​អាជ្ញាធរ​រូបិយវត្ថុ​សិង្ហបុរី បាន​ចុះ​អនុស្សរណៈ​យោគយល់​មួយ ស្ដីពី​កិច្ច​សហប្រតិបត្តិការ​ទ្វេភាគី​លើ​វិស័យ​នវានុវត្តន៍​ហិរញ្ញវត្ថុ ដែល​មាន​បំណង​បង្កើត​ជា​ក្របខ័ណ្ឌ​សម្រាប់​កិច្ច​សហប្រតិបត្តិការ​រវាង​ធនាគារ​កណ្ដាល​ទាំងពីរ ដើម្បី​ជំរុញ​នវានុវត្តន៍​ហិរញ្ញវត្ថុ​ក្នុង​ទីផ្សារ​របស់​សាមី​ប្រទេស៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។