ពលរដ្ឋខ្មែរក្រោមនៅលើទឹកដីកំណើតនិងនៅតាមប្រទេសមួយចំនួនជុំវិញពិភពលោកបានប្រារព្ធខួបបាត់បង់ទឹកដីខ្មែរក្រោម កាលពីចុងសប្ដាហ៍នេះ តាមរូបភាពផ្សេងៗគ្នា ដើម្បីឲ្យពលរដ្ឋខ្មែរជំនាន់ក្រោយបានយល់ដឹងពីប្រវត្តិសាស្ត្រពិត និងសំដែងការដឹងគុណដល់វីរបុរសខ្មែរ ដែលបានបូជា និងលះបង់ជីវិតដើម្បី បុព្វហេតុជាតិ និងមាតុភូមិ។ ក្នុងខួបលើទី៧២ឆ្នាំនៃការបាត់បង់ទឹកដីនៅឆ្នាំនេះ មេដឹកនាំអង្គការខ្មែរក្រោមបានប្រើប្រាស់ពាក្យស្លោក "ក្រោកឈរដើម្បីសិទ្ធិសម្រេចវាសនាដោយខ្លួនឯង"។
សហព័ន្ធខ្មែរកម្ពុជាក្រោមដែលមាន មូលដ្ឋាននៅទីក្រុង សានចូសេ (San Jose) រដ្ឋកាលីហ្វ័រញ៉ា (California) និងសាខាសហព័ន្ធនៅតាមរដ្ឋមួយចំនួននៅអាមេរិក និងអឺរ៉ុប បានប្រារព្ធទិវាបាត់បង់ទឹកដីខ្មែរកម្ពុជាក្រោម កាលពីទី៤ មិថុនា និងខ្លះទៀតធ្វើពិធីនេះ កាលពីថ្ងៃទី៥ និង៦ មិថុនា ចុងសប្ដាហ៍នេះ។ សហព័ន្ធបានរៀបចំនិងប្រមូលផ្តុំយុវជនខ្មែរក្រោម រស់នៅសហរដ្ឋអាមេរិក មកចូលរួមប្រារព្ធទិវាបាត់បង់ទឹកដីនេះដើម្បីបណ្ដុះទំពាំងស្នងឫស្សីបន្តតស៊ូដើម្បីឈានទៅទទួលបានសិទ្ធិស្វ័យសម្រេចដោយខ្លួនឯងទៅថ្ងៃអនាគត។
ចំណែកយុវជនខ្មែរក្រោមនៅកម្ពុជាក្រោមវិញ ក៏នាំគ្នាប្រារព្ធខួបបាត់បង់ទឹកដីនេះ តាមរយៈបណ្ដាញសង្គម (Facebook) ដោយនាំគ្នាពាក់អាវយឺតដែលមានអក្សរថា ក្រោកឈរដើម្បីសិទ្ធិសម្រេចវាសនាដោយខ្លួនឯង" និងខ្លះទៀតប្ដូររូបភាព(Profile)ដាក់ផែនទីខ្មែរកម្ពុជាក្រោមវិញ។ យុវជនខ្មែរក្រោម ជ្រើសរើសយកវិធីតាមបណ្ដាញសង្គមនេះ ដោយសារតែវៀតណាមកំពុងបិទខ្ទប់ខេត្តមួយចំនួនដោយសារតែវិបត្តិ Covid-19 ដូច្នោះទើបយុវជនមិនហ៊ានប្រជុំខ្លាចវៀតណាម យកលេសធ្វើបាប។ ដោយឡែកអង្គការសមាគមខ្មែរក្រោមនៅកម្ពុជាវិញនៅមិនទាន់ប្រារព្ធខួបបាត់បង់ទឹកដីដោយមានការជួបជុំគ្នានៅឡើយទេដោយសារតែជំងឺ Covid-19 នៅមិនទាន់បានធូរស្រាល។ អង្គការសមាគមខ្មែរក្រោមគ្រោងនឹងលើកពិធីជួបជុំនេះ ទៅថ្ងៃទី២៧ មិថុនាវិញ ប្រសិនបើស្ថានភាពជំងឺបានប្រសើរឡើងវិញ។ ទោះបីជាយ៉ាងអង្គការសមាគមខ្មែរក្រោមនៅកម្ពុជា បានជួបជជែកគ្នាជុំវិញបញ្ហាបាត់បង់ទឹកដីនេះនៅតាមបណ្ដាញសង្គម (Facebook) វិញ និងចែកអំណោយជូនពលរដ្ឋខ្មែរក្រោម ដែលកំពុងជួបវិបត្តិជំងឺ Covid-19។
ប្រធាននាយកដ្ឋានព័ត៌មានសហព័ន្ធខ្មែរកម្ពុជាក្រោម ដែលមានមូលដ្ឋាននៅសហរដ្ឋអាមេរិក ព្រះភិក្ខុ សឺង យ៉ឹងរតនា មានថេរដីកាប្រាប់អាស៊ីសេរីថា ខ្មែរក្រោមនៅជុំវិញពិភពលោក បានជោគជ័យប្រារព្ធខួប ៧២ឆ្នាំនៃថ្ងៃបាត់បង់ទឹកដី ដោយបានបញ្ជូនសារឲ្យខ្មែរក្រោមទាំងអស់ងើបឡើងដើម្បីទាមទារសិទ្ធិជាជនជាតិដើមកំណើត៖ «ទឹកចិត្តមនសិការយុវជន និងយុវតី ខ្មែរក្រោមនិងសហព័ន្ធខ្មែរក្រោម និងតំបន់មួយចំនួនក៏បានធ្វើខួប ៧២ឆ្នាំថ្ងៃអាណានិគមយួនត្រួតត្រានៅលើពលរដ្ឋខ្មែរក្រោម។ ឃើញថា បងប្អូនយើងជុំវិញពិភពលោក ជាពិសេស ស្មារតីនៃយុវជននៅទឹកដីកម្ពុជាក្រោមបានរំលឹកនៅព្រឹត្តិការណ៍ប្រវត្តិសាស្ត្រ មានហូរហែដែរ ជាពិសេស យុវជនមានភាពក្លាហានដើម្បីទាមទារសិទ្ធិស្វ័យសម្រេចដោយខ្លួនឯង»។
ព្រះភិក្ខុ សឺង យ៉ឹងរតនា មានថេរដីកាបន្តថា ពិធីនេះ ក៏បានប្រាប់ទៅរដ្ឋាភិបាលវៀតណាម ក៏ពិចារណាឈប់រំលោភបំពានសិទ្ធិជនជាតិដើមកំណើតទៅថ្ងៃក្រោយ។ ព្រះអង្គបន្តថា វៀតណាមបានសន្យាគោរពសិទ្ធិជនជាតិដើមដែលប្រទេសនេះ កំពុងត្រួតត្រា ដូច្នោះវៀតណាមមិនត្រូវក្បត់សន្យារបស់ខ្លួនចំពោះមុខអង្គការប្រជាជាតិនោះទេ៖ " រដ្ឋាភិបាលវៀតណាមមិនដែលទទួលស្គាល់ហើយមហិច្ឆតារបស់រដ្ឋាភិបាលវៀតណាមនៅតែចិញ្ចឹមចិត្តធ្វើទុកបុកម្នេញបំបាត់ជាតិសាសន៍ខ្មែរក្រោមនៅលើទឹកដីកម្ពុជាក្រោម។ អ្វីដែលសហព័ន្ធនិងខ្មែរក្រោមជុំវិញពិភពលោក ដែលបានរំលឹកថ្ងៃទី៤ មិថុនានេះ ជាប្រវត្តិសាស្ត្រ ដើម្បីដាស់ស្មារតីឲ្យកូនចៅនៅលើទឹកដីកម្ពុជាក្រោមហ្នឹងបានដឹងពីប្រវត្តិសាស្ត្រពិតរបស់ខ្លួន»។
ពាក់ព័ន្ធនឹងការធ្វើទុក្ខបុកម្នេញរបស់វៀតណាមទៅលើពលរដ្ឋខ្មែរក្រោមនេះយុវជនខ្មែរក្រោមដែលចូលរួមប្រារព្ធខួបបាត់បង់ទឹកដីនេះ ត្រូវបានវៀតណាម គំរាមកំហែងមិនឲ្យបង្ហោះព័ត៌មានស្ដីពីខួប ៧២ឆ្នាំ។
យុវជនខ្មែរក្រោម លោក ថាច់ កឿង ដែលកំពុងនៅក្រោមការត្រួតត្រារបស់វៀតណាម នៅខេត្តព្រះត្រពាំងថា ក្នុងថ្ងៃរំលឹកខួបបាត់បង់ទឹកដីខ្មែរក្រោម លោកបានបង្ហោះរូបទង់ជាតិ និងផែនទីខ្មែរក្រោម តាមបណ្ដាញសង្គមហ្វេសប៊ុក ប៉ុន្តែ ត្រូវបានអាជ្ញាធរវៀតណាមបញ្ជាឱ្យលុបរូបនោះចោល និងព្រមានថា ពួកគេនឹងទៅសួរនាំលោកដល់កន្លែងស្នាក់នៅ។ លោកថា ទោះបីមានការគំរាមកំហែងដូច្នោះក្ដី លោកនៅតែរក្សាស្មារតីរក្សាការទាមទារសិទ្ធិជាជនជាតិដើមកំណើត៖ «ប្អូនធម្មតាទេ ពីព្រោះរឿងវានិយាយជាមួយប្អូនហ្នឹងជ្រេញពេកហើយពីព្រោះកន្លះខែ មួយខែវាមកម្តង។ ប្អូនមិនបាក់ស្បាតទេ»។
របាយការណ៍សហព័ន្ធខ្មែរក្រោមប្រចាំឆ្នាំឲ្យដឹងថា កាលពីឆ្នាំ២០២០ និងដើមឆ្នាំ២០២១ អាជ្ញាធរវៀតណាម បានបន្តរឹតត្បិតសិទ្ធិសេរីភាពពលរដ្ឋ និងយុវជនខ្មែរក្រោម មិនឲ្យផ្សព្វផ្សាយប្រវត្តិសាស្ត្រពិតនៃការបាត់បង់ទឹកដី និងសិទ្ធិចែកចាយព័ត៌មានតាមបណ្ដាញសង្គម។ យុវជនខ្មែរក្រោមមួយចំនួន ត្រូវបានអាជ្ញាធរវៀតណាមចាប់ផាកពិន័យរាប់រយដុល្លារ និងបានរឹបអូសសៀវភៅ ស្ដីពីសិទ្ធិជនជាតិដើមកំណើតជាដើម។ ចំណែកកសិករខ្មែរក្រោមដែលត្រូវអាជ្ញាធររឹបអូសយកដីស្រែកេរ្តិ៍ដូនតា ក៏ត្រូវតុលាការវៀតណាមកាត់ទោសឲ្យជាប់ពន្ធនាគាររាប់ឆ្នាំទាំងអយុត្តិធម៌ផងដែរ។
អាណានិគមបារាំង បានកាត់ទឹកដីខ្មែរកម្ពុជាក្រោមទៅឱ្យវៀតណាមត្រួតត្រាទាំងខុសច្បាប់ កាលពីថ្ងៃទី៤ ខែមិថុនា ឆ្នាំ១៩៤៩។ ចាប់តាំងពីពេលនោះមក វៀតណាមបានប្រើប្រាស់គ្រប់មធ្យោបាយទាំងអស់ ដើម្បីបំបាត់វប្បធម៌ អត្តសញ្ញាណ សាសនា និងទំនៀមទម្លាប់ខ្មែរក្រោម។ បច្ចុប្បន្នសហព័ន្ធខ្មែរកម្ពុជាក្រោមកំពុងធ្វើចលនានៅជុំវិញពិភពលោក ដើម្បីទាមទារសិទ្ធិស្វ័យសម្រេចដោយខ្លួននៅថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។