សហព័ន្ធ​​ខ្មែរ​​កម្ពុជា​​ក្រោម​​នឹង​​ធ្វើ​​មហាសន្និបាត​​លើកទី​១១​​នៅ​ខែឧសភា​ ដើម្បី​​ជ្រើសរើស​​ក្បាល​​ម៉ាស៊ីន​​ដឹកនាំ​ថ្មី

0:00 / 0:00

សហព័ន្ធ​ខ្មែរ​កម្ពុជា​ក្រោម​នឹង​បើក​មហាសន្និបាត​លើកទី១១ ដែល​មាន​រយៈពេល​បី​ថ្ងៃចាប់​ពី​ថ្ងៃទី៦ ដល់ថ្ងៃទី៨ ខែឧសភា​ខាងមុខ នៅ​ទីក្រុង​ហ្វីឡាដែលហ្វៀ (Philadelphia)​ សហរដ្ឋ​អាមេរិក។

មហាសន្និបាត​នោះនឹង​មាន​ការបង្ហាញ​របាយការណ៍ស្តីពី​សកម្មភាព និង​សមិទ្ធផល​របស់​សហព័ន្ធ​ចាប់​តាំង​ពី​ឆ្នាំ២០១៦ រហូត​ដល់​ឆ្នាំ​២០២១ និងការបោះឆ្នោត​ជ្រើស​រើស​​គណៈកម្មការ​នាយក​ថ្មី។ គណៈកម្មការ​នាយក ​ជា​ស្ថាប័ន​ដឹកនាំ​កំពូល​របស់​សហព័ន្ធ ដែលមាន​សមាជិក​យ៉ាង​តិច​ប្រាំពី​រ (៧​រូប​) ដែល​បាន​មហាសន្និបាត​សកល​​បោះឆ្នោត​​ជ្រើសរើស​បំរើ​ក្នុង​មួយ​អាណត្តិ​បួន​ឆ្នាំ​ (៤​ឆ្នាំ​)​ ម្តង​។

ប្រធាននាយកដ្ឋានព័ត៌​មាន​សហព័ន្ធ​ខ្មែរ​កម្ពុជា​ក្រោម​ព្រះភិក្ខុ ស៊ឺង យ៉ឹងរតនា មាន​ថេរ​ដីកា​ប្រាប់​វិទ្យុ​អាស៊ីសេរី កាលពីថ្ងៃទី២៦​​​ ខែមីនាថា សហព័ន្ធ​ក៏​នឹង​ជជែក​ពី​យុទ្ធសាស្រ្ត​ស្វែងរក​សិទ្ធិ​ស្វ័យសម្រេច​ដោយ​ខ្លួន​ឯង​ឲ្យ​ពលរដ្ឋ​ខ្មែរ​ក្រោម​ ដែល​កំពុង​រស់​នៅ​​ក្រោមការ​ត្រួតត្រា​របស់​វៀតណាម៖ «សហព័ន្ធ​ខ្មែរ​កម្ពុជា​ក្រោម​ជា​អង្គការ​ជាតិ​តែ​មួយ​គត់​របស់​ខ្មែរ​ក្រោម​ដើម្បី​ទាមទារ​សម្រេច​វាសនា​ដោយ​ខ្លួន​ឯង ជាពិសេស​ធ្វើ​ចលនា​អហិង្សា​លើ​ឆាកអន្តរជាតិ ដើម្បី​ប្រមូល​ផ្តុំ​សហគមន៍​អន្តរជាតិ​ឲ្យ​ជ្រាប​ពី​ស្ថានភាព​ពលរដ្ឋខ្មែរ​ក្រោម ដែល​កំពុង​រស់​នៅ​ក្រោម​នឹម​អាណានិគម​និយម​វៀតណាម ដែល​សព្វថ្ងៃ​កំពុង​រង​ការ​ធ្វើ​ទុក្ខ​បុកម្នេញ»។

សហព័ន្ធ​ខ្មែរ​កម្ពុជា​ក្រោម​ ដែល​មាន​មូលដ្ឋាន​នៅ​សហរដ្ឋអាមេរិក ​​​ជា​អង្គការ​ធ្វើ​ចលនា​តស៊ូ​មតិ​ដោយ​អហិង្សា​លើ​ឆាក​អន្តរជាតិ ដើម្បី​តស៊ូ​ទាម​ទាម​ឱ្យ​រដ្ឋាភិបាល​វៀតណាម ​គោរព​សិទ្ធិមនុស្ស សិទ្ធិ​រស់នៅ​ដោយ​សុវត្ថិភាព សិទ្ធិ​រក្សា​សាសនា វប្បធម៌ ទំនៀមទម្លាប់ ប្រពៃណី និង​សិទ្ធិ​សម្រេច​វាសនា​ខ្លួន ដោយ​ខ្លួនឯង របស់​ខ្មែរក្រោម ដែលជា​ជនជាតិដើម​នៅលើ​ដែនដី​កម្ពុជា​ក្រោម​។ សហព័ន្ធ​ខ្មែរ​កម្ពុជា​ក្រោម​ ត្រូវបានមហាសន្និបាត​លើក​ទី​៥ នៃ​ខ្មែរ​កម្ពុជា​ក្រោម ពិភពលោក​បង្កើត​ឡើង​កាលពីថ្ងៃទី​៤ ខែសីហា ឆ្នាំ​១៩៩៦៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។