ក្រសួង​ព័ត៌មាន​ហៅ​អ្នក​សារព័ត៌មាន​អនឡាញ (Online) ​ណែនាំ​ឱ្យ​ធ្វើ​ការ​ប្រកប​ដោយវិជ្ជាជីវៈ

ដោយ សន ចាន់រដ្ឋា
2023.01.30
Share on WhatsApp
Share on WhatsApp
ក្រសួង​ព័ត៌មាន​ហៅ​អ្នក​សារព័ត៌មាន​អនឡាញ (Online) ​ណែនាំ​ឱ្យ​ធ្វើ​ការ​ប្រកប​ដោយវិជ្ជាជីវៈ លោក ហ៊ុន សែន ថ្លែងក្នុងមហាសន្និបាតគណបក្សប្រជាជនកម្ពុជាតំណាងទូទាំងប្រទេសនៅវិមាន ៧ មករា កាលពីថ្ងៃទី២៩ ខែមករា ឆ្នាំ២០២៣។
រូប៖ ហ្វេសប៊ុក SPM

ក្រសួង​ព័ត៌មាន​ហៅ​អ្នក​សារព័ត៌មាន​អនឡាញ (Online)​ ណែនាំ​ឱ្យ​ធ្វើ​ការ​ប្រកប​ដោយវិជ្ជាជីវៈ។ ចំណាត់​ការ​នេះ ​ធ្វើ​ឡើង​បន្ទាប់​ពី​មាន​បញ្ជា​ពីលោក ហ៊ុន សែន ឱ្យ​ហៅ​អ្នក​សារព័ត៌មាន​អនឡាញ (Online) ទាំង​អស់​​យក​ទៅ​អប់រំ។ អ្នក​ជំនាញ​ខាង​សារព័ត៌មាន​យល់​ឃើញ​ថា ការ​ណែនាំ​អ្នក​សារព័ត៌មាន​ពី​វិជ្ជាជីវៈ​ជា​រឿង​ល្អ ប្រសិន​បើ​ជា​ការ​ណែនាំ​មិន​បង្គាប់​បញ្ជា​ឱ្យ​អ្នក​សារព័ត៌មាន​ធ្វើ​នេះ​ធ្វើ​នោះ​ប៉ះពាល់​ដល់​ការ​អនុវត្ត​សិទ្ធិ​សេរីភាព​ការងារ​របស់​ពួកគេ។

ក្រសួង​ព័ត៌មាន​បាន​កោះ​ហៅ​អ្នក​សារព័ត៌មាន​ទាំង​អស់​មក​ណែនាំ អប់រំ​ពី​វិជ្ជាជីវៈ និង​ក្រមសីលធម៌ ភ្លាមៗ ក្រោយ​ពី​មាន​បញ្ជា​ពី​នាយក​រដ្ឋ​មន្ត្រី លោក ហ៊ុន សែន។ បញ្ជា​របស់លោក ហ៊ុន សែន នេះ​ធ្វើ​ឡើង​បន្ទាប់ពី​លោក​ខឹង​នឹង​អ្នក​សារព័ត៌មាន ធីវី.ហ្វេសប៊ី (TVFB) ម្នាក់​បាន​ប្រើ​កាយ​វិការ និង​ពាក្យ​សំដី​មិន​សមរម្យ​ទៅ​កាន់​បុរស​ម្នាក់​នៅ​ក្នុង​ពេល​ចូល​យក​ព័ត៌មាន​គ្រោះ​ថ្នាក់ចរាចរណ៍​នៅ​លើស្ពាន​ជ្រោយ​ចង្វា កាល​ពី​ពេល​ថ្មីៗ​នេះ។ លោក ហ៊ុន សែន ថា ការ​ធ្វើ​បែប​នេះ​ជា​រឿង​មិន​ត្រឹម​ត្រូវ​ឡើយ។

អ្នក​សារព័ត៌មាន​ពលរដ្ឋ​ម្នាក់ ​គឺលោក កង រ៉ា ប្រាប់​វិទ្យុអាស៊ីសេរី​​នៅ​ថ្ងៃទី២៩ ខែមករា​ថា លោកសប្បាយ​ចិត្ត​នៅ​ពេល​ក្រសួង​ចេះ​គិត​គូរ​ពី​អ្នក​សារព័ត៌មាន​បែប​នេះ។ លោក​បន្ត​ថា ប៉ុន្តែ​ក្រសួង​ត្រូវ​ពិនិត្យ​មើល​ដែល​ថា បើ​អ្នក​សារព័ត៌មាន​ទាំង​នោះ​ពួកគាត់​ធ្វើ​ទៅ​តាម​វិជ្ជាជីវៈ​ហើយ មិន​គួរ​ណា​យក​ពួកគាត់​ទៅ​ណែ​នាំ​ទៀត​ទេ ព្រោះ​វា​អាច​ប៉ះពាល់​ដល់​សេរីភាព​ការ​បំពេញ​ការងារ របស់​ពួកគាត់៖

«បើ​ហៅ​ទៅ​ដោយ​មាន​ការ​បង្គាប់​បញ្ជា​បន្ថែម​អឺ​រឹត​បន្តឹង​ទៅ​អ្នក​សារព័ត៌មាន​ខ្ញុំ​មិន​គាំទ្រ​ទេ​បាទ ​អ្នក​សារព័ត៌មាន​មាន​វិជ្ជាជីវៈ​ហើយ បើសិន​ការ​ហៅ​ទៅ​ដោយ​មិន​ប្រក្រតី​ណា​មួយ​ វា​អាច​ជា​ការ​បន្ថែម ឬ​រឹត​បន្តឹង​អី​ផ្សេងៗ​ខ្ញុំ​ដូច​ជា​មិន​សូវ​ពេញ​ចិត្ត​ទេ​បាទ»

វិទ្យុអាស៊ីសេរី​នៅ​មិន​អាច​ទាក់ទង អ្នកនាំ​ពាក្យ​ក្រសួង​ព័ត៌មាន លោក មាស សុភ័ណ្ឌ ដើម្បី​សុំ​អត្ថាធិប្បាយ​ជុំវិញ​បញ្ហា​នេះ​បាន​ទេ​នៅថ្ងៃទី២៩ ខែមករា។ ប៉ុន្តែ លោកបាន​ប្រាប់​វិទ្យុបារាំងអន្តរជាតិថា ការ​អញ្ជើញ​អ្នក​សារព័ត៌មាន​មក​ណែនាំ​នេះ​មិន​មែន​ជា​ការ​គំរាមកំហែង​ទេ។

ជុំវិញ​រឿង​នេះ​នាយក​ប្រតិបត្តិ​នៃ​សម្ព័ន្ធ​អ្នក​សារ​ព័ត៌មាន​កម្ពុជា ហៅកាត់ថា ខេមបូចា លោក ណុប វី យល់​ឃើញ​ថា ការ​ណែនាំ​អ្នក​សារព័ត៌មាន​អំពី​វិជ្ជាជីវៈ មាន​វគ្គ​បណ្ដុះ​បណ្ដាល​ គឺ​ជា​រឿង​ល្អ ប៉ុន្តែ​បើ​ជា​កា​ណែនាំ​បង្គាប់​បញ្ជា​ឱ្យ​អ្នក​សារព័ត៌មាន​ធ្វើ​នេះ​ធ្វើ​នោះ​អាច​ប៉ះពាល់​ដល់​ការ​អនុវត្ត​សិទ្ធិ​សេរីភាព​ក្នុង​ការ​បំពេញ​ការងារ​របស់​ពួកគាត់៖

«សម្រាប់​ក្រសួង​គួរ​តែ​ពិនិត្យ​អំពី​លទ្ធភាព​នៃ​ការ​ចូល​រួម​នៅ​ក្នុង​ការ​រៀបចំ​វគ្គ​បណ្ដុះ​បណ្ដាល​ផ្សេងៗ ឬ​មួយ​ក៏​ផ្ដល់​កិច្ច​សហការ​ជាមួយ​ស្ថាប័ន អង្គការ សមាគម ផ្សេងៗ​ក្នុង​ការ​ផ្ដល់​វគ្គ​បណ្ដុះបណ្ដាល​ដល់​អ្នក​សារព័ត៌មាន​ហើយ​សម្រាប់​អ្នក​សារព័ត៌មាន​ខ្លួន​ឯង​គួរ​តែ​ពង្រឹង​ការ​យល់ដឹង​បន្ថែម​ទៀត​នូវ​ការ​អនុវត្ត​អំពី​វិជ្ជាជីវៈ​ឱ្យ​បាន​ត្រឹមត្រូវ​ ការ​គោរព​ក្រមសីលធម៌​ឱ្យ​បាន​ម៉ត់ចត់​ដើម្បី​ធានា​អំពី​ការ​កាត់​បន្ថយ​ជា​អវិជ្ជមាន​ទៅ​ដល់​កេរ្តិ៍ឈ្មោះ​ទៅ​ដល់​សេចក្ដី​ថ្លៃថ្នូរ​អ្នក​សារព័ត៌មាន​ហ្នឹង»

ចំណែក​មន្ត្រី​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក យី សុខសាន្ត លើក​ឡើង​ថា បើ​ក្រសួង​ព័ត៌មាន​យល់​ថា ការ​ដែល​អ្នក​សារព័ត៌មាន​អនឡាញ (Online) ​គ្មាន​វិជ្ជាជីវៈ​មក​អប់រំ​ចុះ​ហេតុ​អី​កន្លង ​មក​ក្រសួង​ព័ត៌មាន​ចេញ​អាជ្ញាប័ណ្ណ​ឱ្យ​អ្នក​សារព័ត៌មាន​ទាំង​នេះ។ លោកបន្ត​ទៀត​ថា ​សព្វ​ថ្ងៃ​នេះ​មាន អ្នក​សារព័ត៌មាន​អនឡាញ​ជា​ច្រើន​នាក់​ណាស់ ​ដែល​តាំង​ខ្លួន​ជា​ចាងហ្វាង ជា​អ្នក​កាត់​ក្ដី​ហើយ​ប្រើ​ពាក្យ​អសុរោះ​លើ​សង្គម​ស៊ីវិល ប៉ុន្តែ​ក្រសួង​បែរ​ជា​មិន​មាន​វិធាន​ការ​ទៅ​លើ​ពួក​គេ​ឡើយ៖

«នេះ​ជា​ទស្សនៈ​របស់​ខ្ញុំ​ដែល​ខ្ញុំ​មើល​ឃើញ​អ៊ីចឹង​ដែរ​បាទ ​ក្រសួង​ផ្ដល់​នូវបច្ចេកវិទ្យា​ថ្មី​តាម​រយៈ​ការ​បង្រៀន​ដើម្បី​ឱ្យ​ពួក​គាត់​ទទួល​បាន​នូវ​ចំណេះដឹង​ដូច​ប្រទេស​គេ​ដទៃ​ទៀត​ ហើយ​អឺ​ក្រសួង​គួរ​តែ​អនុវត្ត​ទៅ​លើ​វិធានការ​ផ្ដល់​នូវ​សិទ្ធិ​សេរីភាព​ដែល​មាន​ចែង​ក្នុង​រដ្ឋ​ធម្មនុញ្ញ​ល្អ​ជាង​យក​ពួកគាត់​ទៅ​អប់រំ»

មាត្រ៤១​នៃ​ច្បាប់​រដ្ឋធម្មនុញ្ញ​បាន​ចែង​ថា ប្រជាពលរដ្ឋ​ខ្មែរ​មាន​សេរីភាព​ខាង​ការ​បញ្ចេញមតិ​របស់​ខ្លួន សេរីភាព​ខាង​សារព័ត៌មាន សេរីភាព​ក្នុង​ការ​បោះពុម្ព​ផ្សាយ និងសេរីភាព​ខាង​ការ​ជួបជុំ។

សង្គម​ស៊ីវិល​យល់​ថា ​ក្រសួង​ព័ត៌មាន​គួរ​តែ​ធ្វើ​ការងារ​ដោយ​ឯករាជ្យ​កុំ​ចាំ​តែ​មាន​ការ​បញ្ជា ឬ​មើល​បំណាំ​មេ​ដឹក​នាំ ដែល​បង្ហាញ​ឱ្យ​ឃើញ​ថា ​ក្រសួង​កំពុង​បញ្ជាក់​ថា​អសមត្ថភាព​ក្នុង​ការ​បម្រើ​ការងារ​ជូន​ប្រជាពលរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។