លោកឧកញ៉ា ម៉ុង ឬទ្ធី សមាជិកព្រឹទ្ធសភាគណបក្សប្រជាជន និងជាម្ចាស់ចម្ការដូងប្រេងដ៏ធំនៅកម្ពុជា នៅល្ងាចថ្ងៃសុក្រ ទី៨ ខែមីនា បានធានាផ្តល់ជម្រក និងការងារជូនអ្នកភូមិកែវផុស បើពួកគាត់ព្រមទទួលយកទឹកចិត្តសប្បុរសរបស់លោក។
ការសន្យាផ្តល់ជូននេះ បន្ទាប់ពីលោកមើលឃើញទុក្ខលំបាកអ្នកភូមិកែវផុស នៅស្រុកស្ទឹងហាវ ចំនួន ២១គ្រួសារ ដែលផ្ទះសម្បែងត្រូវបំផ្លាញដោយអំណាចសាលក្រមរបស់តុលាការខេត្តព្រះសីហនុ ហើយពួកគាត់គ្មានជម្រក គ្មានអាហារ និងដើរសុំសំចតលើដីអ្នកភូមិជិតខាង៖ «ខ្ញុំចុះទៅមូលដ្ឋាន ហើយប្រជាជនគាត់នាំគ្នាមករកខ្ញុំ។ ដល់ពេលគាត់មករកខ្ញុំៗអង្វរគាត់ថា ឲ្យចេញពីហ្នឹងមក បើអ៊ីចឹងទៅហើយ មកនៅផ្ទះដែលខ្ញុំមានស្រាប់។ ឥឡូវខ្ញុំយកឡាន១ដឹកឲ្យទៅមើលផ្ទះដែលខ្ញុំមានស្រាប់ គាត់ចង់មើលផ្ទះម៉េចអីម៉េច គាត់នៅបានដែរឬទេ? ឥឡូវគាត់នាំគ្នាទៅហើយ មេឃុំជូនទៅមើល។ បើគាត់នៅបាន គាត់នៅទៅ ខ្ញុំអង្វរគាត់ហើយអង្វរទៀតសុំឲ្យគាត់ចេញពីហ្នឹងមក កុំនៅកន្លែងហ្នឹងទៀត ព្រោះអីនៅតំបន់នេះចាប់ផ្ដើមភ្លៀងហើយៗបើភ្លៀងខ្យល់មកដូច្នេះខ្លាចឈឺ»។
តុលាការសាលាដំបូងខេត្តព្រះសីហនុ សម្រេចអនុវត្តន៍សាលក្រមបណ្ដោះអាសន្នឈូសឆាយដីចម្ការ និងដីភូមិ រុះរើផ្ទះសម្បែងអ្នកភូមិនៅចំណុចចំរាំង ស្ថិតក្នុងឃុំកែវផុស ស្រុកស្ទឹងហាវ អ្នកភូមិចំនួន ២១គ្រួសារ កាលពីដើមខែមីនា នេះ។
លោកឧកញ៉ា ម៉ុង ឬទ្ធី ក្រៅពីបានធានាផ្តល់ជម្រកជូនអ្នកភូមិកែវផុស លោកក៏ធានាផ្តល់ការងារជូនពលរដ្ឋរងគ្រោះនៅក្នុងក្រុមហ៊ុនលោកតាមជំនាញជាក់ស្តែងថែមទៀត៖ «ទាំងអស់ដែលខ្ញុំយកមក សុទ្ធតែមានការងារធ្វើទាំងអស់ ទៅតាមជំនាញជាក់ស្តែង។ មិនមែនធានាតែមាត់ទេ គឺមានផ្ទះឲ្យនៅ ហើយមានការងារឲ្យធ្វើទៀត។ សំខាន់ គាត់ថាគាត់នៅក្រាញននៀលនៅលើទីតាំង ទាល់តែបានទីតាំងចាស់វិញ។ ហើយខ្ញុំថាកុំទៅនៅលើទីតាំងហ្នឹងទៀតអីម៉ោៗកសាងជីវិតថ្មីទៅ។ ហើយយប់ហ្នឹងខ្ញុំធ្វើកម្មវិធី ៨មីនា ជូនពួកគាត់នៅកែវផុស មានប្រជាជនចូលរួមប្រហែល ២០០នាក់ដែរ។ ឲ្យគាត់ចូលរួមចាំត្រឡប់ទៅផ្ទះវិញ»។
លោកបន្តថា អ្នកភូមិកែវផុស គួរស្វែងរកការកសាងជីវិតថ្មីជាជាងក្រាញននៀលនៅលើទីតាំងរបស់ខ្លួន ដែលត្រូវបំផ្លាញអស់ទៅហើយនោះ។
អ្នកភូមិកែវផុស អះអាងថា មកទល់ពេលនេះ ពួកគាត់រស់ទាំងវេទនា គ្មានអាហារហូបចុក គ្មានជម្រក និងជ្រកក្រោមដើមឈើក្នុងដីញាតិជិតខាងក្បែរលំនៅឋាន ដែលត្រូវបំផ្លាញជាបណ្ដោះអាសន្ន។
តំណាងអ្នកភូមិទាំង ២១គ្រួសារ បានរៀបរាប់ទាំងក្រៀមក្រំថា ក្នុងមួយប៉ប្រិចភ្នែក ផ្ទះសម្បែង និងដីចម្ការរបស់ពួកគាត់ធ្លាប់បង្កបង្កើនផលជិត ៣០ឆ្នាំ ត្រូវបានឈូសបំផ្លាញអស់គ្មានសល់ តាមអំណាចសាលក្រមបណ្ដោះអាសន្នរបស់តុលាការខេត្តព្រះសីហនុ ដែលពួកគាត់អះអាងថា គ្មានភាពយុត្តិធម៌។
កាលពីថ្ងៃទី៥ ខែមីនា សមត្ថកិច្ចចម្រុះ រួមមានមន្ត្រីកងរាជអាវុធហត្ថ នគរបាល និងមន្ត្រីយោធាជិត ១០០នាក់ ប្រដាប់ដោយអាវុធ និងដំបងឆក់គ្រប់ដៃ បានដាក់ពង្រាយនៅភូមិកែវផុស ស្រុកស្ទឹងហាវ រង់ចាំការពារគ្រឿងចក្រចំនួន ២គ្រឿង ឈូសឆាយ និងកម្ទេចផ្ទះអ្នកភូមិ ដើម្បីរឹបអូសយកដីទំហំជិត ៤០០ហិកតារ ប្រគល់ឲ្យលោក ជៀម ផែន នាយកក្រុមហ៊ុនស្រាបៀលីអូ ដែលបានឈ្នះក្តីនៅឆ្នាំ២០១២ ប៉ុន្តែត្រូវអ្នកភូមិមិនសុខចិត្ត និងបន្តបណ្ដឹងទាស់ទៅសាលាឧទ្ធរណ៍។
អ្នកភូមិឲ្យដឹងថា នៅគ្រាសាលាឧទ្ធរណ៍មិនទាន់សើរើបណ្ដឹងរបស់ពួកគាត់ផង បែរជាតុលាការខេត្តព្រះសីហនុ ចុះទៅអនុវត្តសាលក្រមបណ្ដោះអាសន្នរបស់ខ្លួន ផ្ទុយនឹងសេចក្តីជូនដំណឹងឆ្នាំ២០០៨ របស់ប្រធានតុលាការកំពូល លោក ឌិត មន្ទីរ ដែលធ្លាប់បង្គាប់ឲ្យសាលាដំបូងខេត្ត-ក្រុងទាំងអស់ មិនត្រូវអនុវត្តន៍សាលក្រមបណ្ដោះអាសន្នមុននឹងមានការជំនុំជម្រះ ឬសាលក្រមថ្មីចេញដោយសាលាឧទ្ធរណ៍ ឬតុលាការកំពូលនោះទេ។
យ៉ាងណាក៏ដោយ លោកឧកញ៉ា ម៉ុង ឬទ្ធី មានប្រសាសន៍ថា លោកមានផ្ទះថ្មសង់រួចជាង ២០ខ្នង និងចំណាយថវិកាសាងសង់ជាង ២លានដុល្លារ ស្ថិតនៅស្រុកព្រៃនប់ ចម្ងាយ ៨គីឡូម៉ែត្រពីលំនៅឋានអ្នកភូមិកែវផុស ដែលត្រូវបំផ្លាញអស់ហើយនោះ។ លោកសង្កត់ធ្ងន់ថា បើអ្នកភូមិចំរាំង ស្ម័គ្រចិត្តទៅនៅ លោកនឹងចែកបន្ទប់ស្នាក់ឲ្យពួកគាត់ និងផ្តល់ការងារនៅក្នុងក្រុមហ៊ុនរបស់លោកមានការងារធ្វើទៅតាមសមត្ថភាពជាក់ស្តែង៖ «ខ្ញុំបង្ហាញទឹកចិត្តថា ខ្ញុំវាមានទឹកចិត្តអាណិតអាសូរគាត់សុទ្ធតែចាស់ៗ និងមានកាយសម្បទាទ្រុឌទ្រោមផង ហើយមានអ្នកខ្លះមានកូនក្មេងផង។ ដូច្នេះ ខ្ញុំមិនអាណិតតែមាត់ទេ គឺអាណិត និងព្រមជួយគាត់ផង។ ខ្ញុំត្រឡប់ទៅវិញ គឺខ្ញុំឲ្យអង្ករគាត់ ១០បាវ ដើម្បីឲ្យគាត់ដាំបាយហូបសិន ហើយខ្ញុំរៀបចំអាហារឲ្យគាត់ ២ពេល ដើម្បីឲ្យគាត់ទៅពិចារណាមើលថា តើបើគាត់យល់ព្រម ខ្ញុំយកឡានទៅដឹកគាត់មករស់នៅ»។
ទោះជាបែបនេះក្តី អ្នកភូមិកែវផុស មានការរារែក និងមិនទាន់សម្រេចចិត្ត ឬឆ្លើយតបបែបណាទេ តបទៅសន្តានចិត្តលោកឧកញ៉ា ម៉ុង ឬទ្ធី នៅឡើយ ដោយពួកគាត់ក្រាញននៀលទាមទារដីចម្ការ និងលំនៅឋានរបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។