កូដករដែលជាបុគ្គលិកក្រុមហ៊ុនបនល្បែងណាហ្គាវើលដ៍ (NagaWorld) នៅតែបន្តនាំគ្នាធ្វើកូដកម្មទាមទារដំណោះស្រាយពីក្រុមហ៊ុន ទោះបីពួកគាត់ត្រូវប្រឈមនឹងបញ្ហាជីវភាព និងរងការចោទប្រកាន់ពីប្រមុខរដ្ឋាភិបាលយ៉ាងណាក្ដី។ មន្ត្រីសង្គមស៊ីវិល យល់ឃើញថា ការបន្តធ្វើកូដកម្មនេះបង្ហាញពីការយល់ដឹងនូវគុណតម្លៃនៃសហជីពក្នុងការការពារកម្មករនិយោជិត និងឱ្យក្រុមហ៊ុនគោរពសិទ្ធិការងារ។
ក្រុមកូដករណាហ្គាវើលដ៍នៅតែបន្តធ្វើកូដកម្ម ទាមទារឱ្យក្រុមហ៊ុនបនល្បែងមួយនេះគោរពសិទ្ធិការងារ និងដោះលែងសហជីពដែលកំពុងជាប់ឃុំក្នុងពន្ធនាគារ ទោះបីចំនួនអ្នកតវ៉ាថយចុះ និងត្រូវចែកវេនគ្នាយ៉ាងណាក្ដី។
តំណាងកូដករណាហ្គាវើលដ៍ កញ្ញា ច័ន្ទ ស្រីរ័ត្ន ប្រាប់វិទ្យុអាស៊ីសេរីនៅថ្ងៃទី១២ កក្កដា ថា បច្ចុប្បន្នក្រុមកូដករចេញតវ៉ាតែម្ដង ទៅពីរ ដងប៉ុណ្ណោះក្នុងមួយសប្ដាហ៍។ កញ្ញាបន្ត ថា ក្រុមកូដករត្រូវបែងចែកវេនគ្នា ដោយសារពួកគាត់ត្រូវរកប្រាក់មកផ្គត់ផ្គង់ជីវភាពប្រចាំថ្ងៃ។ កញ្ញាបន្ថែមថា ការតវ៉ានេះនឹងបន្តធ្វើរហូតដល់តុលាការទម្លាក់បទចោទ និងដោះលែងតំណាងសហជីពដែលកំពុងជាប់ឃុំ ឯភាគីក្រុមហ៊ុនត្រូវទទួលយកបុគ្គលិក ព្រមទាំងសហជីពឱ្យចូលធ្វើការវិញ។
កញ្ញា ច័ន្ទ ស្រីរ័ត្ន៖ «និយាយទៅ បើការសម្របសម្រួលពីក្រសួងការងារគឺអត់មានសម្របសម្រួល គឺមានតែឆ្លើយថា មិនព្រមទេៗ។ ដូចពួកខ្ញុំគឺតវ៉ាទាមទារចង់ចូលធ្វើការវិញ តែបែរជាស្ថាប័នពាក់ព័ន្ធគាត់អត់មានសមត្ថភាពក្នុងការដោះស្រាយ បែរជាចោទពួកខ្ញុំធ្វើបដិវត្តន៍ពណ៌ ស៊ីឈ្នួលគេធ្វើបាតុកម្មអីផ្សេងៗអ៊ីចឹងទៅ»។
គិតត្រឹមថ្ងៃទី ១២ កក្កដា ឆ្នាំ២០២៣ អតីតបុគ្គលិកក្រុមហ៊ុនណាហ្គាវើលដ៍បានធ្វើកូដកម្មអស់រយៈពេល៥៧២ថ្ងៃមកហើយ ចាប់តាំងពីក្រុមហ៊ុនបានបញ្ឈប់បុគ្គលិកជាង១ពាន់នាក់កាលពីឆ្នាំ២០២១។
អ្នកធ្វើកូដកម្មមានចំនួនជាង៣០នាក់ ដោយនាំគ្នាពាក់មួកបិទក្រដាសទម្រង់មកុដ និងមានសរសេរអក្សរអង់គ្លេស LRSU ដែលជាឈ្មោះ សហជីពទ្រទ្រង់សិទ្ធិការងាររបស់ពួកគេ។ ចំណែកអ្នកខ្លះ មានកាន់ស្លាកសរសេរថា «៥៧២ថ្ងៃ ដើម្បីសិទ្ធិសហជីព មិនមែនស៊ីឈ្នួល មិនមែនជាបទញុះញង់» និងខ្លះសរសេរថា «ដោះលែងកញ្ញា ឈឹម ស៊ីថរ ជាបន្ទាន់» ដែលអមដោយសម្លេងត្រែ និងស្គរបន្លឺឡើងនៅមុខអគារណាហ្គាវើលដ៍២។ ជាមួយគ្នានេះ ក៏មានការអធិប្បាយតាមមេក្រូស្នើឱ្យតុលាការដោះលែងកញ្ញា ឈឹម ស៊ីថរ និងសមាជិកសហជីពដទៃទៀតពីពន្ធនាគារ ជាពិសេសគឺការទាមទារឱ្យក្រុមហ៊ុនណាហ្គាវើលដ៍ទទួលបុគ្គលិក និងក្រុមសហជីពឱ្យចូលធ្វើការវិញ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ដើម្បីសុំការបកស្រាយបានទេ នៅថ្ងៃទី១២ កក្កដា។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (ADHOC) លោក សឹង សែនករុណា យល់ឃើញថា ក្រុមកូដករសុខចិត្តនៅបន្តធ្វើកូដកម្ម ព្រោះពួកគេយល់ពីតម្លៃសហជីពដែលការពារសិទ្ធិ និងអត្ថប្រយោជន៍របស់កម្មករក្នុងក្រុមហ៊ុន។ លោកបន្តថា សកម្មភាពទាំងនេះ អាចក្លាយជាគំរូឱ្យក្រុមសហជីពនៅតាមស្ថាប័នផ្សេងទៀត ងាកមកការពារសិទ្ធិកម្មករជាជាងការពារផលប្រយោជន៍ឱ្យក្រុមហ៊ុន។
លោក សឹង សែនករុណា៖ «យើងឃើញស្រាប់ហើយ ពួកគាត់សុខចិត្តប្រកាន់នូវជំហរដោយសមស្រប ការពារនូវផលប្រយោជន៍បុគ្គលិកកម្មករខ្មែរស្របតាមច្បាប់ ស្របតាមសិទ្ធិរបស់ពួកគាត់ រួមទាំងការពារនូវសហជីពដែលមានជំហរឯករាជ្យ ការពារផលប្រយោជន៍ របស់បុគ្គលិកកម្មករខ្មែរ ទោះបីមានភាពប្រឈមលំបាកយ៉ាងណាក៏ពួកគាត់ធ្វើដែរ»។
ក្រុមកូដករដែលនៅបន្តធ្វើកូដកម្ម សុទ្ធតែអះអាងដូចៗគ្នាថា មានតែសហជីពទ្រទ្រង់សិទ្ធការងារនៃក្រុមហ៊ុនណាហ្គាវើលដ៍នេះប៉ុណ្ណោះ ដែលមានគោលជំហរការពារសិទ្ធិបុគ្គលិក នៅពេលមានការបៀតបៀន និងការប្រើប្រាស់អំពើហិង្សាពីភ្ញៀវ និងពេលក្រុមហ៊ុនរំលោភសិទ្ធការងារ។
ចាប់តាំងពីមានការធ្វើកូដកម្មនៅចុងឆ្នាំ២០២១ មក ក្រុមកូដករ និងតំណាងសហជីព បានរងការចោទប្រកាន់ ចាប់ខ្លួន និងឃុំឃាំង ជាហូរហែ ដោយក្នុងនោះប្រមុខរដ្ឋាភិបាលលោក ហ៊ុន សែន បានចោទប្រកាន់ថា ក្រុមកូដករស៊ីឈ្នួលធ្វើបាតុកម្ម។ ចំណែកឯសាលាដំបូងរាជធានីភ្នំពេញវិញ តុលាការជាន់ទាបមួយនេះបានចេញសាលក្រម កាលពីខែឧសភា ឆ្នាំ២០២៣ ផ្ដន្ទាទោសប្រធានសហជីព គឺកញ្ញា ឈឹម ស៊ីថរ ឱ្យជាប់គុក ២ឆ្នាំ និងសមាជិកសហជីព ៦ នាក់ទៀតជាប់គុក ចន្លោះពី១ឆ្នាំ ទៅ១ឆ្នាំកន្លះ។
ទោះរងការចោទប្រកាន់ និងការគំរាមកំហែងយ៉ាងណាក្ដី ក្រុមកូដករនៅតែរក្សាជំហរធ្វើកូដកម្មរហូតទទួលបានយុត្តិធម៌ និងដំណោះស្រាយ ខណៈពួកគាត់ស្នើទៅថ្នាក់ដឹកនាំរដ្ឋាភិបាលឱ្យបញ្ឈប់ការចោទប្រកាន់ថា ពួកគាត់ជាអ្នកស៊ីឈ្នួលធ្វើបាតុកម្មបន្តទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។