ក្រុមសង្គមស៊ីវិលបន្តធ្វើយុទ្ធនាការសប្ដាហ៍ទី១៣ ដើម្បីទាមទារឲ្យតុលាការដោះលែងអ្នកឃ្លាំមើលព្រំដែន និងជាមេដឹកនាំសហជីព លោក រ៉ុង ឈុន ឲ្យមានសេរីភាពវិញ។
តំណាងរដ្ឋាភិបាលរក្សាជំហរថា យុទ្ធនាការនេះ មិនមានឥទ្ធិពលលើតុលាការ ខណៈលោក រ៉ុង ឈុន រំពឹងថា សាលាឧទ្ធរណ៍នឹងដោះលែងលោកនៅថ្ងៃទី១២ វិច្ឆិកា។
នៅសប្ដាហ៍ទី១៣ នេះ អង្គការសង្គមស៊ីវិលបានបង្ហោះសារថា ប្រធានសភាពសហជីពកម្ពុជា លោក រ៉ុង ឈុន តែងតែហ៊ានបញ្ចេញមតិ ដើម្បីសិទ្ធិសេរីភាព សិទ្ធិគ្រូបង្រៀន សិទ្ធិកម្មករ កម្មការិនី និងជាអ្នកលើកកម្ពស់សិទ្ធិមនុស្សនៅកម្ពុជា។ សង្គមស៊ីវិលសង្កេតឃើញថា អាជ្ញាធររដ្ឋមិនបានគាំពារដល់ការបញ្ចេញមតិរបស់លោក រ៉ុង ឈុន ទេ ផ្ទុយទៅវិញលោកបែរជារងការចាប់ដាក់ឃុំពន្ធនាគារដោយអយុត្តិធម៌ទៅវិញ។
សង្គមស៊ីវិលបានបន្ថែមសារនៅលើផ្ទាំងរូបរបស់លោក រ៉ុង ឈុន ថា អ្នកការពារសិទ្ធិមនុស្ស លោក រ៉ុង ឈុន ឈរជួរមុខទាមទារឲ្យមានកាដំឡើងប្រាក់ខែ កែលម្អលក្ខខណ្ឌការងារ និងអត្ថប្រយោជន៍របស់កម្មករ។ ពួកគេលើកជាសំណួរថាតើនេះឬជាអំពើញុះញង់នោះ? សង្គមស៊ីវិល អំពាវនាវឲ្យពលរដ្ឋចែករំលែកសារនៃយុទ្ធនាការនេះ ដើម្បីគាំទ្រ និងជាការលើកទឹកចិត្តសកម្មភាពដើម្បីប្រយោជន៍សង្គម។
នាយករងអង្គការលីកាដូ ទទួលបន្ទុកផ្នែកឃ្លាំមើលសិទ្ធិមនុស្ស លោក អំ សំអាត លើកឡើងថា នៅសប្ដាហ៍នេះសង្គមស៊ីវិលទាមទារឲ្យតុលាការដោះលែងតែលោក រ៉ុង ឈុន ម្នាក់ទេ ព្រោះថា សកម្មជនសង្គម ៧នាក់ទៀត ត្រូវបានតុលាការសម្រេចដោះលែងហើយ។ ប៉ុន្តែនៅសប្ដាហ៍ខាងមុខ ក្រុមសង្គមស៊ីវិល នឹងបន្ថែមយុទ្ធនាការនេះ ដើម្បីទាមទារតុលាការទម្លាក់ចោលបទចោទទាំងអស់លើសកម្មជនដែលត្រូវបានដោះលែង៖ « អ្នកខ្លះត្រូវបានដោះលែងហើយ ក៏យើងមិនបានទាមទារបន្តទៀតទេ។ យើងទាមទារបន្តអ្នកដែលអត់ទាន់ត្រូវបានដោះលែងឲ្យដោះលែង ហើយជាបន្តទៅទៀត ប្រហែលជាយើងត្រូវដូរពីសុំដោះលែង គឺរក្សាដដែល គឺសុំឲ្យទម្លាក់ការចោទប្រកាន់ និងសុំដោះលែងឲ្យមានសេរីភាពឡើងវិញ»។
ក្រុមអង្គការសង្គមស៊ីវិល នឹងបន្តធ្វើយុទ្ធនាការបង្ហោះសារតាមហ្វេសប៊ុក (Facebook) ទាមទារដោះលែងប្រធានសហភាពសហជីពកម្ពុជា លោក រ៉ុង ឈុន និងក្រុមសកម្មជនបរិស្ថានចំនួន ៦នាក់ រហូតដល់ទិវាសិទ្ធិមនុស្សអន្តរជាតិ ១០ ធ្នូ។ ពួកគាត់ ក៏កំពុងពិចារណាបន្ថែមការទាមទារឲ្យតុលាការដោះលែងសកម្មជនដីធ្លី ឬអ្នកដែលត្រូវបានចាប់ខ្លួនដោយអយុត្តិធម៌ទាំងអស់ដែរ។
បើទោះជាសង្គមស៊ីវិលអះអាងយុទ្ធនាការនេះ ទទួលបានការគាំទ្រច្រើន ប៉ុន្តែតំណាងរដ្ឋាភិបាលនៅតែរក្សាជំហរថា យុទ្ធនាការនេះគ្មានឥទ្ធិពលដល់ប្រព័ន្ធតុលាការទេ។ សមាជិកគណៈកម្មាធិការសិទ្ធិមនុស្សកម្ពុជា លោក កត្តា អ៊ន ឲ្យដឹងថា ការដោះលែងសកម្មជនសង្គមទាំង ៧នាក់ និងអ្នកនយោបាយនៃគណបក្សសង្គ្រោះជាតិនាពេលថ្មីៗ នេះ គឺជាឆន្ទៈរបស់តុលាការសុទ្ធសាធ និងមិនជាប់ពាក់ព័ន្ធជាមួយយុទ្ធនាការរបស់ក្រុមអង្គការសង្គមស៊ីវិលទេ៖ « បងប្អូនមួយចំនួនត្រូវបានតុលាការដោះលែង ត្រូវបានចេញសេចក្ដីសម្រេចផ្សេងៗ ដូច្នេះគឺជាសមត្ថកិច្ចផ្ទៃក្នុងរបស់តុលាការ មិនពាក់ព័ន្ធទៅនឹងការដាក់សម្ពាធទៅលើតុលាការនោះទេ»។
ពាក់ព័ន្ធនឹងរឿងនេះ លោក រ៉ុង ឈុន សង្ឃឹមថា សាលាឧទ្ធរណ៍នឹងដោះលែងឲ្យលោកមានសេរីភាព ក្នុងការប្រកាសសាលដីកាថ្ងៃទី១២ វិច្ឆិកាខាងមុខ ដើម្បីលោកបន្តសកម្មភាពឃ្លាំមើលសង្គម និងការពារផលប្រយោជន៍ផ្នែកសិទ្ធការងារបន្តទៀត។ នេះបើតាមការអះអាងរបស់ក្មួយប្រុសរបស់ លោក រ៉ុង ឈុន គឺ លោក រ៉ុង វិជ្ជា។
លោក រ៉ុង វិជ្ជា ឲ្យដឹងថា លោក រ៉ុង ឈុន សប្បាយចិត្តនៅពេលតុលាការដោះលែងយុវជនសង្គមឲ្យមានសេរីភាពវិញ។ លោកក៏ផ្ដាំមកអរគុណ ចំពោះពលរដ្ឋទាំងអស់ដែលគាំទ្រលោក ហើយលោកប្ដេជ្ញាបន្តសកម្មភាពការងារសង្គមបន្តទៀត ក្រោយការដោះលែង។
ចំណែកស្ថានភាព និងសុខភាពរបស់លោកនៅក្នុងពន្ធនាគារវិញ មានភាពល្អប្រសើរច្រើននៅមួយរយៈចុងក្រោយនេះ។ លោក រ៉ុង វិជ្ជា បញ្ជាក់ថា របួសវះកាត់ភ្នែកម្ខាងរបស់លោក រ៉ុង ឈុន ក៏វិវត្តន៍មកភាពល្អប្រសើរច្រើនជាងមុនដែរ តែលោកនៅតែបញ្ហាជំងឺប្រចាំកាយមួយចំនួនទៀត ដែលគួរតែទទួលបានការព្យាបាលត្រឹមត្រូវនៅក្នុងមន្ទីរពេទ្យក្រៅពន្ធនាគារ៖ « គាត់សង្ឃឹមថា តុលាការនឹងផ្ដល់យុត្តិធម៌ឲ្យគាត់មានសេរីភាពឡើងវិញ ដើម្បីឲ្យស្ថានភាពក៏ដូចជាសិទ្ធិមនុស្សនៅកម្ពុជាហ្នឹង កុំឲ្យអាក្រក់ពេក មុនការបោះឆ្នោតឈានមកដល់ឆាប់ៗនេះ»។
លោកនាយករដ្ឋមន្ត្រី ហ៊ុន សែន បានបញ្ជាឲ្យនគរបាលចាប់លោក រ៉ុង ឈុន បញ្ជូនទៅតុលាការ កាលពីចុងខែកក្កដា ឆ្នាំ២០២០ ដោយសារលោកបានបញ្ចេញមតិពីបញ្ហាព្រំដែនកម្ពុជា-វៀតណាម។ ក្រោយការជាប់ឃុំបណ្ដោះអាសន្នជាងមួយឆ្នាំ នៅថ្ងៃទី១៨ សីហា តុលាការក្រុងភ្នំពេញ សម្រេចផ្ដន្ទាទោសលោក រ៉ុង ឈុន ដាក់ពន្ធនាគារ ២ឆ្នាំពីបទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងពិន័យប្រាក់ ២លានរៀលចូលរដ្ឋ។
តុលាការក៏បានបង្គាប់ឱ្យលោក និងសកម្មជន ២នាក់ទៀត គឺកញ្ញា ស កណិកា និងលោក តុន និមល បង់សំណងរួមគ្នាដល់ដើមបណ្ដឹងរដ្ឋប្បវេណី គឺគណៈកម្មាធិការចម្រុះកិច្ចការព្រំដែន ចំនួន ៤០០លានរៀល គឺប្រហែល ១០ម៉ឺនដុល្លារអាមេរិក។ ប៉ុន្តែសហគមន៍ជាតិ និងអន្តរជាតិបានថ្កោលទោសសាលក្រមនោះថា អយុត្តិធម៌ និងជាការដាក់ទោសលើសេរីភាពបញ្ចេញមតិរបស់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។