កូនប្រុសលោកស្រី ផាវ ញ៉ើង លើកឡើងថា សុខភាពម្ដាយរបស់លោកនៅក្នុងពន្ធនាគារ គឺមានសភាពចុះទន់ខ្សោយ បណ្ដាលមកពីគាត់ទើបតែចេញពីបន្ទប់វះកាត់មុនពេលជាប់ពន្ធនាគារ។
កត្តានេះហើយ ដែលសហគមន៍បានសរសេរលិខិតស្នើសុំជំនួសម្ដាយរបស់លោកគឺ លោកស្រី ផាវ ញ៉ើង និងលោកស្រី សេង លីន ដែលកំពុងឃុំខ្លួននៅពន្ធនាគារខេត្តកោះកុង បាននៅក្រៅឃុំបណ្ដោះអាសន្ន ដើម្បីព្យាបាលជំងឺ។
កូនប្រុសលោកស្រី ផាវ ញ៉ើង គឺយុវជន វាសនា ប្រាប់អាស៊ីសេរីនៅថ្ងៃទី៣០ កញ្ញា ថា លោកបានឃើញលិខិត ដែលសហគមន៍បានសរសេរនោះ ហើយបានទាក់ទងទៅម្ដាយផងដែរ។ យុវជនវាសនា យល់ឃើញថា សកម្មភាពដែលម្ដាយរបស់លោកតវ៉ា នឹងការរំលោភបំពានដីធ្លី មិនមែនជាកំហុសនោះទេ ហើយលោកគោរពការសម្រេចចិត្តរបស់ម្ដាយ និងជឿជាក់លើ សាលាឧទ្ធរណ៍ព្រះសីហនុថា នឹងស្វែងរកយុត្តិធម៌សម្រាប់ម្ដាយរបស់លោក។
យុវជន វាសនា៖ «យើងអត់ទាន់ដឹងទេ តើគាត់សម្រេចចិត្តធ្វើបែបណា ប៉ុន្តែខ្ញុំនៅតែជឿជាក់ថា ម៉ាក់ខ្ញុំនឹងរង់ចាំការដោះស្រាយពីខាងប្រព័ន្ធតុលាការដដែល ព្រោះបច្ចុប្បន្នយើងទទួលបានដំណឹងថា រឿងក្ដីគាត់ហ្នឹងបានទៅដល់ដៃឧទ្ធរណ៍ហើយ គ្រាន់តែថា ឧទ្ធរណ៍មិនទាន់មានការជំនុំជម្រះ ឬក៏ការកោះហៅកាត់ក្ដីអ៊ីចឹងហាបង»។
ការលើកឡើងនេះធ្វើឡើងក្រោយពីសហគមន៍ បានសរសេរលិខិតស្នើសុំអន្តរាគមន៍នៅក្រៅឃុំបណ្ដោះអាសន្នជំនួសសកម្មជនដីធ្លី លោកស្រី ផាវ ញ៉ើង និងលោកស្រី សេង លីន។ យុវជនវាសនា អះអាងថា ការសុំនៅក្រៅឃុំនេះ មិនអាចឲ្យម្ដាយលោកបានរួចពីការចោទប្រកាន់នោះទេ ពោលគឺមានតែសាលាឧទ្ធរណ៍ព្រះសីហនុទេ ជាអ្នកសម្រេចលើរឿងនេះបាន។
កាលពីថ្ងៃទី២៩ សីហា កន្លងទៅ សាលាឧទ្ធរណ៍ព្រះសីហនុ បានសម្រេចឲ្យសកម្មជនដីធ្លី ខេត្តកោះកុងទាំង៩នាក់ ក្រោមបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ឲ្យនៅក្រៅឃុំបណ្ដោះអាសន្ន។ ប៉ុន្តែសកម្មជនត្រឹមតែ៧នាក់ប៉ុណ្ណោះ ត្រូវបានដោះលែងឲ្យនៅក្រៅឃុំ ចំណែកសកម្មជន២នាក់ផ្សេងទៀត គឺលោកស្រី ផាវ ញ៉ើង និងលោកស្រី សេង លីន មិនត្រូវបានដោះលែងឡើយ ព្រោះពួកគាត់ត្រូវបានតុលាការចោទប្រកាន់ពាក់ព័ន្ធនឹងបទបរិហារបង្កាច់កេរ្តិ៍មួយករណីទៀត។
ការឃុំខ្លួនសកម្មជនដីធ្លីនេះ ត្រូវបានអ្នកការពារសិទ្ធិមនុស្សចាត់ទុកថា ជាការបំបាក់ស្មារតីសកម្មជនដីធ្លី មិនឲ្យចេញតវ៉ា ស្របពេលពួកគេអនុវត្តសិទ្ធិ និងសេរីភាពជាមូលដ្ឋាន ដែលមានចែងក្នុងរដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។