អាជ្ញាធរ​នឹង​សិក្សា​ពី​លទ្ធភាព​ប្ដូរ​ទីតាំង​ពន្ធនាគារ​ចេញពី​តំបន់​លិច​ទឹក

ដោយ វ៉ែន សុមេធ
2020-11-05
Share
ពន្ធនាគារ​ព្រៃ​ស "ម២" ទិដ្ឋភាព​​មុខ​មណ្ឌល​អប់រំ​កែប្រែ​ទី២ "ម២" ឬ​​ពន្ធនាគារ​ព្រៃ​ស សម្រាប់​ដាក់​អ្នក​ជាប់​ឃុំ​ជា​ស្ត្រី ត្រូវ​ទឹក​ជន់​លិច ថ្ងៃ​ទី១៦ ខែតុលា ឆ្នាំ២០២០។
រូប៖ ពលរដ្ឋ

អាជ្ញាធរ​កំពុង​សិក្សា​ពី​លទ្ធភាព​ដើម្បី​ប្ដូរ​ទីតាំង​ពន្ធនាគារ​ខ្លះ ចេញពី​តំបន់​លិច​ទឹក ក្រោយ​ពេល​បាន​បញ្ជូន​អ្នក​ជាប់ឃុំ តាម​បណ្ដា​ពន្ធនាគារ មក​ដាក់​នៅ​ទីតាំង​ដើម​វិញ​។ មន្ត្រី​ពន្ធនាគារ​ឲ្យ​ដឹង​ថា មណ្ឌល​អប់រំ​កែប្រែ​ទី​២ ឬ​ម​២ ត្រូវ​បាន​លាង​សំអាត​រួចរាល់ ហើយ អាជ្ញាធរ​បាន​យក​អ្នក​ជាប់ឃុំ​ស្ត្រី ពី​ម​១ និង​ប៉េហ្ស៊ី (PJ) មកវិញ​អស់​ហើយ។

អគ្គនាយករង និង​ជា​អ្នកនាំពាក្យ​អគ្គនាយកដ្ឋាន​ពន្ធនាគារ លោក នុត សាវនា ប្រាប់​អាស៊ីសេរី​ថា គិត​ត្រឹម​ថ្ងៃ​ទី​០៤ វិច្ឆិកា ឆ្មាំ​ពន្ធនាគារ បាន​ទទួលយក​អ្នក​ជាប់ឃុំ​នៅ​ក្នុង​ពន្ធនាគារ​ព្រៃ​ស​ផ្នែក​ស្ត្រី ឬ​«​ម​២» មកវិញ​ទាំង​អស់ហើយ ក្រោយ​ការ​លាង​សំអាត និង​ធ្វើ​អនាម័យ​សម្លាប់​មេរោគ​ក្នុង​កន្លែង​ឃុំឃាំង​រួចរាល់​។ ចំណែក​ខាង​ពន្ធនាគារ​ខេត្ត​បន្ទាយមានជ័យ​វិញ លោក​ថា អាជ្ញាធរ បាន​យក​អ្នក​ជាប់ឃុំ​ចំនួន​៩៣​នាក់ ពី​ពន្ធនាគារ​ខេត្ត​ឧត្តរមានជ័យ​មកវិញ ដើម្បី​ឲ្យ​ពួកគាត់​លាង​សំអាង​ពន្ធនាគារ​ហើយ​ត្រៀម​យក​អ្នក​ជាប់ឃុំ​ទាំងអស់​មកវិញ។

មន្ត្រី​ពន្ធនាគារ​រូប​នេះ​ឲ្យ​ដឹង​ថា ក្រោយ​រៀបចំ អ្នក​ជាប់ឃុំ​តាម​កន្លែង​ដើម​វិញ​រួចរាល់ ខាង​ពន្ធនាគារ នឹង​សិក្សា​ពី​លទ្ធភាព​ប្ដូរ​ទីតាំង​ពន្ធនាគារ​មួយ​ចំនួន​ដែល​លិច​ទឹក​ព្រោះ ពន្ធនាគារ​ខ្លះ ស្ថិតនៅ​តំបន់​ទាប​ងាយ​នឹង​ទឹក​ជន់​លិច​តែម្ដង៖ «​ថ្នាក់ដឹកនាំ​កំពុង​ពិចារណា​ដែរ ដោយសារ​ស្ថានភាព​ពី​មួយ​ឆ្នាំទៅ​មួយ​ឆ្នាំ យើង​សង្កេតឃើញ វា​តែងតែ​ទទួលរង​ការ​គំរាមកំហែង​ទឹកជំនន់​។ អ៊ីចឹង សម្រាប់​ទៅ​ថ្ងៃ​អនាគត​ខ្ញុំ​គិត​ថា ប្រហែលជា​មានការ​ប្ដូរ​ទីតាំង​សម្រាប់​ពន្ធនាគារ ដែល​បាន​ជន់​លិច​។ យើង​សិក្សា​ដែរ ថា តើ​កត្តា​អ្វី​ពេក បណ្ដាល​ឲ្យ​ជន់​លិច​ហ្នឹង កត្តា​មកពី​ប្រព័ន្ធ​បង្ហូរទឹក​ឬក៏​កត្តា​លូ​សាធារណៈ​ហ្នឹង មកពី​មិនបាន​ភ្ជាប់​អ្វី បាន​ជាប់​លាប់​ល្អជា​មួយ​ពន្ធនាគារ​ទេ ទើប​វា​ជន់​លិច ឬ​ភូមិសាស្ត្រ​ហ្នឹង​វា​លិច​តែម្ដង​។ អាហ្នឹង យើង​សិក្សា​អំពី​អស់ហ្នឹង គ្រប់​ជ្រុងជ្រោយ​ហើយ យើង​ដាក់​ជូន​ថ្នាក់ដឹកនាំ​ដើម្បី​សម្រេច»

អាជ្ញាធរ បាន​ជម្លៀស​អ្នក​ជាប់ឃុំ​ទាំងអស់​ចេញពី​មណ្ឌល​អប់រំ​កែប្រែ​ទី​២ «​ម​២» ឬ​ហៅថា​ពន្ធនាគារ​ព្រៃ​ស​ផ្នែក​ស្ត្រី​មាន​ចំនួន​សរុប​ជាង​២ ០០០​នាក់​ចេញ​ទាំងស្រុង ដោយ​ខ្លះ​ជម្លៀស​ទៅ​ផ្នែក​បុរស គឺ "​ម​១" និង​ខ្លះ​ទៀត​ទៅ​ពន្ធនាគារ​រាជធានី​ភ្នំពេញ ហៅ​កាត់​ថា ប៉េហ្ស៊ី (PJ)​។ ចំណែក អ្នក​ជាប់ឃុំ​ជាង ១ ៦០០​នាក់​នៅ​ពន្ធនាគារ​ខេត្ត​បន្ទាយមានជ័យ ក៏​ត្រូវ​ជម្លៀស​ចេញ​ទាំងស្រុង​ដែរ ដោយ​ខ្លះ​យក​ទៅ​ដាក់​នៅ​ពន្ធនាគារ​ខេត្ត​កំពង់ធំ ពន្ធនាគារ​ខេត្ត​សៀមរាប​ពន្ធនាគារ​ខេត្ត​ឧត្តរមានជ័យ និង​ខ្លះ យក​ទៅ​ដាក់​នៅ​មណ្ឌល​អប់រំ​កែប្រែ​ទី​៣ ឬ​ពន្ធនាគារ​ត្រពាំង​ផ្លុង នៅ​ខេត្ត​ត្បូងឃ្មុំ។

ការ​ជម្លៀស​អ្នក​ជាប់ឃុំ​ចេញពី​ម​២ និង​ពន្ធនាគារ​ខេត្ត​បន្ទាយមានជ័យ ភ្លាមៗ​បណ្ដាល​ឲ្យ​អ្នក​ជាប់ឃុំ​ខ្លះ កើត​កន្ទួល​រមាស់ ដោយសារ​ដើរ​លុយ​ទឹក​ជាប់​មេរោគ និង​ការ​ស្នាក់នៅ​ប្រជ្រៀត​គ្នា បណ្ដោះអាសន្ន​។ តែ​យ៉ាងណា មន្ត្រី​ពន្ធនាគារ​ឱ្យដឹង​ថា ឆ្មាំ​ពន្ធនាគារ​បាន​ចែក​សាប៊ូ និង​ថ្នាំ​បំបាត់​រមាស់​ឲ្យ​អ្នក​ជាប់ឃុំ​ទាំងអស់ ដើម្បី​សំអាង​រាងកាយ និង​ថែទាំ​អនាម័យ តាម​បន្ទប់​ឃុំឃាំង

បងប្រុស​របស់​អ្នកទោស​មនសិការ និង​ជា​សកម្មជន​បរិស្ថាន​កញ្ញា ភួន កែវរស្មី គឺ លោក ភួន ពុទ្ធារិទ្ធិ ប្រាប់​ថា ពេល​អាជ្ញាធរ​ជម្លៀស​ប្អូនស្រី​លោក​ទៅ​ឃុំ​នៅ​ប៉េហ្ស៊ី (PJ) ស្ថានភាព សុខភាព​របស់​នាង​ពិបាក​ខ្លាំង ដោយសារ ភាព​ចង្អៀត ឆ្លង​ជំងឺ​រមាស់​ត​គ្នា និង​ត្រូវ​ទ្រាំ​ហិតក្លិន​ផ្សែង​បារី ក្នុង​បន្ទប់​ឃុំ​ឃាំង ជាដើម​។ ប៉ុន្តែ លោក​បញ្ជាក់​ថា ស្ថានភាព​សុខភាព​របស់​កញ្ញា ភួន កែវរស្មី បាន​ធូរស្បើយ​ខ្លះ​ហើយ ទាំង​ភាព​ចង្អៀត​ណែន និង​កន្ទួល​រមាស់​នៅពេ​ល​អាជ្ញាធរ​បញ្ជូន​មក​ម​២​វិញ៖ «គាត់ (​ភួ​ន កែវ​រស្មី​) អាច​ថា នៅ​ម​២​អាច​ប្រសើរ​បង។ តែ​ដោយ​សារ​រង​ឥទ្ធិពល​ពី​ប៉េហ្ស៊ី (PJ) មក​។ ដូច​ខ្ញុំ​ប្រាប់​បង​ពី​ដើម​អ៊ីចឹង គាត់​ស្រូប​ផ្សែង​បារី ពី​នោះ ច្រើន​ណាស់ ដោយសារ​គេ​អត់​មាន​បម្រាប​ការ​ជក់​បារី​ក្នុង​ហ្នឹង​សេរី​តែម្ដង​។ អត់​មាន​អ្នកណា ហាមឃាត់​អ្នកទោស​នៅ​ទី​ហ្នឹង​ទេ ព្រោះ​អ្នកទោស​នៅ​ហ្នឹង ដូច​បង​ដឹង​ស្រាប់​អ៊ីចឹង អា​គុក​ហ្នឹង គេ​កសាង​សម្រាប់​កូន​អ្នក​មាន​គេ​មាន​ខ្សែ​មាន​អ្វី​អ៊ីចឹង​ទៅ​ការគ្រប់គ្រង​នៅ​ខាងក្នុង​វា​ធូររលុង​។ សូម្បីតែ​បារី​អ្វី​ហ្នឹង ជួញដូរ​លក់​នៅ​ខាងក្នុង​ហ្នឹង​សេរី ហើយ​យើង​ទៅ​នៅ​ជាមួយគ្នា យើង​មាន​បញ្ហា​ផ្លូវ​ដង្ហើម​ផង​។ ទៅ​ហ្នឹង ទាក់ទង​នឹង​ការ​ចង្អៀត​ហ្នឹង យើង​ទទួល​យក​បាន ព្រោះ ទៅ​ផ្ញើ​ជាមួយ​គេ​។ ប៉ុន្តែ​អា​ជក់បារី ជក់​អ្វី​ហ្នឹង​។ គាត់​ស្ត្រេស​ផង អត់​ឲ្យ​គាត់​ចេញ​ក្រៅ​បន្ទប់​(​ឃុំឃាំង​)​ទេ មួយថ្ងៃ ទល់​មួយថ្ងៃ​អ៊ីចឹង​ណា»

ចំណែក អ្នក​ទោស​នយោបាយ ក្នុង​មណ្ឌល​អប់រំ​កែប្រែ​ទី​១ ឬ​ពន្ធនាគារ​ព្រៃ​ស​ផែ្នក​បុរស វិញ ក៏​កើត​កន្ទួល​រមាស់​ខ្លាំង​ដែរ ដោយសារ​ឆ្លង​មេរោគ​ត​គ្នា ក្នុងអំឡុងពេល ដាក់​អ្នក​ជាប់ឃុំ​ប្រជ្រៀត​គ្នា កាល​ពេល​ទឹក​ជំនន់។

ប្រពន្ធ​របស់​សមាជិក​ក្រុមប្រឹក្សា​ជាប់ឆ្នោត​ខេត្ត​កំពង់ធំ​លោក ស៊ុន ធន់ គឺ លោកស្រី សេង ចាន់ថន ដែល​បាន​ទៅ​សួរសុខទុក្ខ​ប្តី កាលពី​ថ្ងៃ​ទី​២ វិច្ឆិកា ឲ្យ​ដឹង​ថា លោក ស៊ុន ធន់ កើត​រមាស់​ឡើង​ខ្មៅ​ដុំៗ និង អេះ​ដាច់​សាច់ ដោយ​កន្លែង​។ លោកស្រី​ថា នឹង​ពឹង​ពាក់​មេធាវី​ដាក់​លិខិត​ស្នើសុំ​អាជ្ញាធរ​មាន​សមត្ថកិច្ច អនុញ្ញាត​ឲ្យ​ប្តី​លោកស្រី​បាន​ចេញ​មក​ព្យាបាល​នៅ​មន្ទីរពេទ្យ​ខាងក្រៅ បាន​មួយ​រយៈ។

លោកស្រី សេង ចាន់ថន អះអាង​ថា ស្ថានភាព​កន្ទួល​រមាស់​ធ្ងន់ធ្ងរ​នេះ កើត​លើ​អ្នក​កំពុង​ជាប់ឃុំ នៅ​ពន្ធនាគារ​ព្រៃ​ស ស្ទើរ​ទាំងអស់​គ្នា ព្រោះ​ការ​ឆ្លង​រាលដាល​គ្នា ការ​ប្រជ្រៀត​គ្នា រស់នៅ​ក្នុង​បន្ទប់​ឃុំឃាំង​និង​មិនបាន​ចេញ​ក្រៅ​ឲ្យ​ត្រូវ​ពន្លឺ​ថ្ងៃ​ពេល​ទឹកជំនន់ ព្រមទាំង​ខាង​ពន្ធនាគារ​គ្មាន​ថ្នាំសង្កូវ​ឲ្យ​អ្នក​ជាប់ឃុំ​ប្រើ​គ្រប់គ្រាន់ និង​បរិស្ថាន​ក្នុង​បន្ទប់​ឃុំឃាំង​គ្មាន​អនាម័យ​ជាដើម។ លោកស្រី ស្នើសុំ​ឲ្យ​ក្រសួង​សុខាភិបាល បញ្ជូន​គ្រូពេទ្យ​និង​ថ្នាំ​ទៅ​ពិនិត្យ​និង​ព្យាបាល ដល់​អ្នក​ជាប់ឃុំ​ទាំងអស់ នៅ​ក្នុង​ពន្ធនាគារ៖ «គាត់​លាត់​អាវ លាត់​អ្វី ឲ្យ​ខ្ញុំ​មើល​ទៅ​ឡើង​ខ្មៅ ប៉ុន​ម្រាមដៃ​តែម្ដង​ពេញ​ខ្លួន​តែម្ដង​។ ខ្ញុំ​សួរ​ទៅ ថា គាត់​កើត​អ្វី​? គាត់​ថា គាត់​កើត​រមាស់ ហើយ​ទៅ​គាត់​ឈឺ​ភ្លៅ ឈឺ​ជង្គង់ ឈឺ​ចង្កេះ​ចុក​ពេញ​ហ្នឹង​តែម្ដង​។ យក​ថ្នាំ ទិញ​ថ្នាំ ទិញ​អ្វី យក​ទៅ​ឲ្យ​គាត់​លាប បន្ថែម​ទៀត​ផង ព្រោះ​លាបថ្នាំ​រាល់ថ្ងៃ​ហ្នឹង អត់​បាត់​សោះ វា​កាន់តែ​ឡើង​ថែម​។ កាលពីមុន​ដូច​មិន​ខ្មៅ​អ៊ីចឹង​ពេក​ទេ​។ ដល់​ឥឡូវនេះ ដូច​រន្ធ​បាយខុន អ៊ីចឹង​ណា ឡើង​ខ្មៅ កន្ទឹស​សៗ​ពេល​ខ្លួន​ឡើង​ខ្មៅ ពេញ​ហ្នឹង​ហ្មង​ណា»

ទាក់ទង​រឿង​នេះ នាយករង​ទទួលបន្ទុក​ផ្នែក​សិទ្ធិមនុស្ស នៃ​អង្គការ​លីកាដូ (Licadho) លោក អំ សំអាត ឲ្យ​ដឹង​ថា ស្ថានភាព​អ្នក​ជាប់ឃុំ​ខ្លះ ពិតជា​កើត​កមរមាស់​ធ្ងន់ធ្ងរ​មែន ដោយសារ ការ​ឆ្លង​មេរោគ ពេល​ដើរកាត់​ទឹក​ស្អុយ ជម្លៀស​ពី​ពន្ធនាគារ​មួយ ទៅ​ពន្ធនាគារ​មួយទៀត​។ លោក​យល់​ថា​ការ​ផ្ដល់​សាប៊ូ និង​ថ្នាំ​បំបាត់​រមាស់​ឲ្យ​អ្នក​ជាប់ឃុំ មិនទាន់​គ្រប់គ្រាន់​ទេ គឺ អាជ្ញាធរ គួរតែ​យល់ព្រម​ឲ្យ​អ្នក​ជាប់ឃុំ​មួយ​ចំនួន បាន​ចេញទៅ​សម្រាក​ព្យាបាល​ជំងឺ​នៅ​តាម​មន្ទីរពេទ្យ​សិន ហើយ​ត្រូវ​សំអាត​និង​សម្លាប់​មេរោគ ក្នុង​ពន្ធនាគារ​ឲ្យ​បាន​ស្អាត។

មន្ត្រី​សង្គម​ស៊ីវិល​រូប​នេះ គាំទ្រ​ឲ្យ​អាជ្ញាធរ​សិក្សា​រក​ទីតាំង​ថ្មី ដើម្បី​ប្ដូរ​ពន្ធនាគារ ចេញពី​តំបន់​ទំនាប ដែល​ងាយ​នឹង​លិច​ទឹក​។ លោក អំ សំអាត មាន​ប្រសាសន៍ថា ខាង​សង្គម​ស៊ីវិល តែងតែ​ជំរុញ​ឲ្យ​ប្ដូរ​ទីតាំង​ពន្ធនាគារ និង​ត្រូវ​ពង្រីក​អគារ ឲ្យ​បាន​ធំ ដើម្បី​កាត់បន្ថយ​ភាព​ចង្អៀត​ណែន និង​ធានា ឲ្យ​បាន​ពី​សិទ្ធិ​របស់​អ្នក​ជាប់ឃុំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល