អាជ្ញាធរពន្ធនាគារបារម្ភពីការឆ្លងជំងឺកូវីដដល់អ្នកជាប់ឃុំក្នុងពន្ធនាគារ
2021.03.20
ស្ថានភាពអ្នកទោសរស់នៅក្នុងពន្ធនាគារបណ្ដោះអាសន្ន ដែលជាអតីតរោងកុនខេត្តប៉ៃលិន កាលពីថ្ងៃ២៥ ខែសីហា ឆ្នាំ២០១១។
អាជ្ញាធរពន្ធនាគារ កំពុងព្រួយបារម្ភខ្លាំងចំពោះលទ្ធភាពនៃការឆ្លងជំងឺកូវីដ-១៩ ចូលទៅក្នុងពន្ធនាគារ ខណៈជំងឺនេះកំពុងរាតត្បាតខ្លាំងនៅរាជធានីភ្នំពេញ និងខេត្តមួយចំនួន និងមានមេរោគបម្លែងខ្លួនថ្មីដែលមានលទ្ធភាពចម្លងលឿនជាងមុន។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សាវនា ប្រាប់អាស៊ីសេរីថា មណ្ឌលអប់រំកែប្រែ និងពន្ធនាគាររាជធានី-ខេត្តទាំងអស់ កំពុងអនុវត្តវិធានការបង្ការនិងការពារមន្ត្រី និងជនជាប់ឃុំកុំឲ្យឆ្លងជំងឺកូវីដ-១៩។ លោកបញ្ជាក់ថា វិធានការបង្ការ និងការពារទាំងនោះ មានដូចជា ផ្អាកការចូលសួរសុខទុក្ខជនជាប់ឃុំបណ្ដោះអាសន្ន ការបាញ់ថ្នាំសម្លាប់មេរោគក្នុងពន្ធនាគារជាប្រចាំ បង្កើនការប្រើប្រាស់សាប៊ូ និងការទំនាក់ទំនង រវាងមន្ត្រីនិងអ្នកជាប់ឃុំ ត្រូវរក្សាគម្លាត និងពាក់ម៉ាស់ជាដើម៖ «យើងរឹតបន្តឹងការនាំអីវ៉ាន់ចូល បញ្ញើពីខាងក្រៅដែរ ព្រោះយើងដឹងហើយថា អ៊ីវ៉ាន់ខ្លះវាអាចនាំមេរោគចូលដែរ ដូច្នេះទោះបីយើងយកចូលយើងបាញ់អាកុលក្តី ក៏វានៅតែមានចន្លោះប្រហោងដែរ ដូច្នេះយើងរឹតបន្តឹងការងារហ្នឹង។ មួយទៀត យើងពង្រឹងការងារគ្រប់គ្រងមន្ត្រី ការចល័តរបស់មន្ត្រីយើង ក៏មានការគ្រប់គ្រងជាងមុន ដូច្នេះអ្នកណាដើរហើរត្រពាសអីមិនបានទេ គាត់អាចទៅផ្ទះមកផ្ទះបានតែត្រូវរាយការណ៍ពីការចល័តរបស់ខ្លួន។ មួយទៀតចំពោះអ្នកចូលថ្មី យើងវាស់កម្តៅ យើងពិនិត្យអាការៈយើង យើងសួរនាំគាត់ពីការចរាចរណ៍របស់គាត់ក្នុងអំឡុងពេល ២សប្តាហ៍ មុនជាដើម»
ជាមួយគ្នានេះលោក នុត សាវនា អះអាងថា ពន្ធនាគារក៏បានត្រៀមសម្ភារៈ និងវិធានការចាំបាច់នានាដើម្បីសង្គ្រោះនិងអន្តរាគមន៍បន្ទាន់ក្នុងករណីមានការឆ្លងរាតត្បាតក្នុងពន្ធនាគារដែរ៖ «យើងបានធ្វើលំហាត់របៀប យើងមានសេចក្តីណែនាំ យើងមានត្រៀមលក្ខណៈចាំបញ្ជាជាប្រចាំហើយឯកឧត្តមអគ្គនាយក លោក តែងតែរំលឹកកិច្ចការនេះជារៀងរាល់ថ្ងៃដល់គ្រប់គោលដៅ ដូច្នេះមានការអីប្រព័ន្ធគោលដៅយើងបានរៀបចំអស់ហើយ។ យើងក៏មានកិច្ចសហការជាមួយនគរបាលផងនិងមន្ទីរពេទ្យបង្អែក ក៏ដូចជាមន្ទីរសុខាភិបាលផង»។
អ្នកនាំពាក្យអគ្គនាយកដ្ឋានពន្ធនាគាររូបនេះឲ្យដឹងថា ពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈនេះ ក៏មានអ្នកជាប់ឃុំទើបចូលថ្មីមួយចំនួនមានរោគសញ្ញាសង្ស័យដែរ ប៉ុន្តែក្រោយយកសំណាកទៅធ្វើតេស្តរកជំងឺកូវីដ គឺលទ្ធផលអវិជ្ជមានជាបន្តបន្ទាប់។
ទាក់ទងរឿងនេះដែរ ប្រពន្ធរបស់សមាជិកក្រុមប្រឹក្សាខេត្តកំពង់ធំនៃគណបក្សសង្គ្រោះជាតិលោក ស៊ុន ធន់ គឺលោកស្រី សេង ចាន់ថន រៀបរាប់ថា លោកស្រីមិនបានដឹងអំពីសុខទុក្ខប្តីនៅក្នុងពន្ធនាគារព្រៃសជាច្រើនសប្តាហ៍មកហើយ ចាប់តាំងពីជំងឺកូវីដផ្ទុះក្នុងសហគមន៍ជាលើកទី៣។ លោកស្រីព្រួយបារម្ភជាខ្លាំងអំពីសុវត្ថិភាព និងសុខភាពរបស់ប្តីដោយសារតែពន្ធនាគារមានភាពចង្អៀតណែនពិបាករស់នៅ គ្មានអនាម័យ និងកង្វះការទទួលបានសេវាថែទាំនិងព្យាបាលជំងឺ។ទន្ទឹមគ្នានេះលោកស្រី បារម្ភខ្លាចប្តីខ្វះអាហារបរិភោគគ្រប់គ្រាន់ ដោយសារកាលពីសប្តាហ៍មុន មន្ត្រីពន្ធនាគារ សម្រេចផ្អាកទទួលរបស់បញ្ញើគ្រប់ប្រភេទពីសាច់ញាតិចូលខាងក្នុងពន្ធនាគារទៀត៖ «បើថាគេយាមបានល្អហើយមានអនាម័យអីចឹង ខ្ញុំក៏ត្រេកអរប៉ុន្តែពួកខ្ញុំនៅតែព្រួយបារម្ភ និងនៅតែទទូចដល់រដ្ឋាភិបាល និងតុលាការឲ្យដោះលែងពួកគាត់ដើម្បីជៀសវាងបញ្ហាជំងឺកូវីដ»។
របាយការណ៍របស់អគ្គនាយកដ្ឋានពន្ធនាគារបង្ហាញថា ចំនួនអ្នកជាប់ឃុំក្នុងពន្ធនាគារនៅកម្ពុជាមានចំនួនជិត ៤ម៉ឺន (៣៩.០០០) នាក់។ នេះជាចំនួនដ៏ច្រើនលើសលប់ ព្រោះអង្គការជាតិ និងអន្តរជាតិ បានប៉ាន់ប្រមាណថា ពន្ធនាគារគួរតែអាចផ្ទុកមនុស្សបានត្រឹមចំនួនជាង ២ម៉ឺន៦ពាន់ (២៦. ៥៩៣) នាក់ប៉ុណ្ណោះ។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គកាលីកាដូ (LICADHO) លោក អំ សំអាត ទទួលស្គាល់អំពីកិច្ចខិតខំប្រឹងប្រែងរបស់ពន្ធនាគារក្នុងការទប់ស្កាត់ជំងឺកូវីដ-១៩។ ប៉ុន្តែលោកថា ក្រុមអង្គការជាតិនិងអន្តរជាតិនៅតែព្រួយបារម្ភពីហានិភ័យខ្ពស់នៃការឆ្លងជំងឺកូវីដ ព្រោះពន្ធនាគារមានភាពចង្អៀតណែនខ្លាំង ហើយតុលាការនៅតែបញ្ជូនជនសង្ស័យទៅឃុំខ្លួននៅក្នុងពន្ធនាគារជារៀងរាល់ថ្ងៃ។ លោកជំរុញឲ្យពន្ធនាគារបង្កើនការប្រុងប្រយ័ត្នបន្ថែមទៀត និងចាត់វិធានការភ្លាមៗ ដើម្បីកាត់បន្ថយភាពចង្អៀតណែននៅក្នុងពន្ធនាគារ៖ «ស្ថាប័នពាក់ព័ន្ធជាពិសេសតុលាការ ត្រូវពិនិត្យដែរ ទី១ទាក់ទងនឹងការចោទប្រកាន់នៃការឃុំខ្លួន បើសិនជាបទល្មើសណាដែលមិនចាំបាច់ឃុំខ្លួនបណ្តោះអាសន្នទេ គួរតែអនុញ្ញាតឲ្យនៅក្រៅឃុំ ហើយជំរុញនីតិវិធីនៃការកាត់ក្តីរឿងហ្នឹងឲ្យបានឆាប់ដោយរឿងខ្លះកាត់ និងអាចថាបន្ធួបន្ថយ ឬថា បើជាបទល្មើសមជ្ឈឹមទេ គួរតែឲ្យនៅក្រៅឃុំបណ្តោះអាសន្នតាមការស្នើសុំ ក៏ជួយកាត់បន្ថយដែរ។ ការកាត់ទោសសហគមន៍ ការកាត់ទោសពាក់កណ្តាលអី គួរតែពិនិត្យពិចារណា ព្រោះប្រទេសផ្សេងៗក្នុងពេលរីករាលដាលជំងឺនេះ គេបានពិនិត្យទៅលើអ្នកទោសមួយចំនួនដែលត្រូវបានដោះលែង»។
ចាប់តាំងពីដើមឆ្នាំ ២០២០ មក ក្រុមអង្គការជាតិ និងអន្តរជាតិ បានអំពាវនាវឲ្យរដ្ឋាភិបាលពិចារណាជាបន្ទាន់ លើការដោះលែងអ្នកជាប់ឃុំដែលប្រឈមនឹងហានិភ័យខ្ពស់ ក្នុងការឆ្លងវីរុសកូវីដ១៩ រួមមាន អ្នកជាប់ឃុំបណ្ដោះអាសន្នទាក់ទងនឹងបទល្មើសស្រាលៗ និងអ្នកទោសនយោបាយ។ ជាមួយគ្នានេះ អាជ្ញាធរគួរតែពិចារណាលើជម្រើសផ្សេងទៀតទាក់ទងនឹងការឃុំខ្លួនអ្នកទោសដោយឈរលើមូលដ្ឋានលក្ខខណ្ឌសុខភាព អ្នកជាប់ឃុំវ័យចំណាស់ ស្ត្រីមានផ្ទៃពោះ និងស្ត្រីជាប់ឃុំដែលមានកូនតូចនៅជាមួយ និងអ្នកជាប់ឃុំអាយុក្រោម ១៨ឆ្នាំ ជាដើម។ ប៉ុន្តែមកទល់ពេលនេះ ក្រុមអង្គការសង្គស៊ីវិលពិនិត្យឃើញថា អាជ្ញាធររដ្ឋាភិបាល នៅតែមិនទាន់ចាត់វិធានការឲ្យមានប្រសិទ្ធភាពដើម្បីកាត់បន្ថយភាពចង្អៀតណែនក្នុងពន្ធនាគារបាននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
