អ្នកធ្វើធម្មយាត្រាលើកកម្ពស់សីលធម៌សង្គមរិះគន់អាជ្ញាធរដែលតាមរំលោភសិទ្ធិពួកគាត់
2023.02.02
ក្បួនហែធម្មយាត្រា លើកកម្ពស់សីលធម៌សង្គម នៅថ្ងៃទី២ ខែកុម្ភៈ ឆ្នាំ២០២៣។
រូប៖ ពលរដ្ឋផ្ដល់ឱ្យ
ក្បួនហែធម្មយាត្រា លើកកម្ពស់សីលធម៌សង្គម រៀបចំឡើងដោយសមាគមគ្រូបង្រៀនកម្ពុជាឯករាជ្យ ឈានដល់ថ្ងៃទី២ ហើយ។ អ្នកចូលរួម នៅតែតាំងចិត្តមោះមុតធ្វើដំណើរថ្មើរជើងរាប់គីឡូម៉ែត្រ និងស្រែកអំពាវនាវឲ្យអ្នកដឹកនាំធ្វើជាគំរូល្អក្នុងសង្គម។ ទោះជាយ៉ាងណាក្ដី ក្បួនធម្មយាត្រានេះ មានសមត្ថកិច្ចស្លៀកពាក់ស៊ីវិលលួចថតរូប តាមអុកឡុក និងការហៅទៅសួរនាំរកលិខិតអនុញ្ញាតផ្សេងៗ បើទោះបីជា ក្រសួងមហាផ្ទៃអនុញ្ញាតរួចហើយក្ដី។ សង្គមស៊ីវិល ចាត់ទុកទង្វើរបស់អាជ្ញាធរ គឺជាការបំពានច្បាប់និងរំលោភសិទ្ធិពលរដ្ឋ។
ថ្ងៃទី២ នៃក្បួនធម្មយាត្រា «លើកកម្ពស់សីលធម៌សង្គម» របស់សមាគមគ្រូបង្រៀនកម្ពុជាឯករាជ្យ ដែលមានការចូលរួមពីព្រះសង្ឃ គ្រូបង្រៀន សកម្មជនសិទ្ធិមនុស្ស និងក្រុមស្ត្រីថ្ងៃសុក្រប្រមាណ ៥០នាក់ បានធ្វើដំណើរទៅដល់ស្រុកកំពង់ត្រឡាច ខេត្តកំពង់ឆ្នាំង ហើយនៅថ្ងៃទី២ ខែកុម្ភៈ។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយាវី ឱ្យដឹងថា ដំណើរធម្មយាត្រាថ្មើរជើងរយៈពេល ២ថ្ងៃនេះ ពុំមានបញ្ហាសុខភាពឬគ្រោះថ្នាក់ណាមួយលើអ្នកចូលរួមនោះឡើយ ប៉ុន្តែអ្នកស្រីសង្កេតឃើញមានក្រុមអាជ្ញាធរក្នុងឈុតស៊ីវិលតែងមកលួចថតសកម្មភាព ឬសួរនាំរកលិខិតផ្សេងៗ។ អ្នកស្រីថា សកម្មភាពរបស់អាជ្ញាធរមូលដ្ឋានទាំងនេះ ហាក់ផ្ទុយពីការសម្រេចរបស់រដ្ឋមន្ត្រីក្រសួងមហាផ្ទៃ លោក ស ខេង ដែលអនុញ្ញាតឱ្យសមាគមធ្វើធម្មយាត្រាដោយគ្មានការរារាំង។
លោកស្រី អ៊ុក ឆាយាវី៖ «គួរតែគាត់ហ្នឹង (អាជ្ញាធរ) កុំបាច់លួច (ថត) យើងអត់មានលាក់បាំងអីខុសច្បាប់ មិនចាំបាច់លួចទេ»។
ធម្មយាត្រានេះ ប្រព្រឹត្តទៅមិនសូវរលូននោះឡើយតាំងពីថ្ងៃចាប់ផ្ដើមដំបូង ដោយអាជ្ញាធរដែលតែងតែឃ្លាំមើល និងបង្កឧបសគ្គដល់ក្បួនធម្មយាត្រា ដូចជាមិនអនុញ្ញាតឱ្យក្រុមដង្ហែធម្មយាត្រា ចូលបរិភោគបាយ និងស្នាក់នៅតាមវត្តអារាម ឬតាមកន្លែងសាធារណៈ និងមកសួរនាំរកលិខិតអនុញ្ញាតឱ្យដង្ហែក្បួនជាដើម។
ជាក់ស្ដែង កាលពីចាប់ផ្ដើមធម្មយាត្រា អាជ្ញាធរខេត្តកណ្ដាល បានរារាំង មិនអនុញ្ញាតឱ្យក្រុមដង្ហែធម្មយាត្រាស្នាក់នៅវត្តជាច្រើន ស្ថិតក្នុងស្រុកពញាឮ ឡើយ។ អាជ្ញាធរបានឱ្យអ្នកហែក្បួនទៅសុំផ្ទះអ្នកស្រុកដើម្បីស្នាក់នៅ ប៉ុន្តែនៅពេលទៅដល់មុខច្រកចូលផ្ទះដែលជាទិសដៅសម្រាក មានក្រុមប្រជាការពារភូមិ និងសមត្ថកិច្ចប្រមាណ ៣០នាក់ បានមកសួរនាំ និងសួររកលិខិតអនុញ្ញាតឱ្យដង្ហែក្បួន។ អ្នកធ្វើធម្មយាត្រាចោទអាជ្ញាធរមូលដ្ឋានថា បង្កការរំខាន និងមិនធ្វើតាមការណែនាំរបស់ក្រសួងមហាផ្ទៃ។
ជាមួយគ្នានេះ រដ្ឋបាលខេត្តពោធិ៍សាត់ នៅថ្ងៃទី២ ខែកុម្ភៈ បានចេញលិខិតហៅ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ដើម្បីសាកសួរបន្ថែម និងពិភាក្សាស្ដីពីការសម្រួលផ្លូវធ្វើដំណើរឆ្លងកាត់ និងទីកន្លែងបញ្ចប់ការដង្ហែក្បួនធម្មយាត្រា ដើម្បីធានាសុវត្ថិភាពចរាចរណ៍ សណ្ដាប់ធ្នាប់សាធារណៈ និងការការពារជំងឺកូវីដ១៩។
ឆ្លើយតបនឹងសំណើនេះ ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បញ្ជាក់ថា គណៈកម្មការធម្មយាត្រានឹងចាត់តំណាងម្នាក់ ឱ្យទៅចូលរួមពិភាក្សាជាមួយអាជ្ញាធរខេត្តពោធិ៍សាត់នៅថ្ងៃស្អែក។
វិទ្យុអាស៊ីសេរីមិនអាចទាក់ទងអ្នកនាំពាក្យរដ្ឋបាលខេត្តពោធិ៍សាត់ លោក ពៅ ពិសិដ្ឋ ដើម្បីសុំការអត្ថាធិប្បាយបន្ថែមបានទេ នៅថ្ងៃទី២ កុម្ភៈ។
ទាក់ទិនរឿងនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ ឱ្យដឹងថា ក្រសួងបានផ្ដល់ដំណឹង ដល់អាជ្ញាធរនៅតាមបណ្ដាខេត្តរួចហើយ ពីការដង្ហែធម្មយាត្រានេះ។ លោកបញ្ជាក់ថា ត្បិតក្រសួងមហាផ្ទៃអនុញ្ញាតឱ្យធ្វើក្បួនហែធម្មយាត្រា តែសកម្មភាពនេះត្រូវស្ថិតក្រោមការឃ្លាំមើលពីសមត្ថកិច្ច និងតម្រូវឱ្យសមាគមគ្រូបង្រៀនសហការជាមួយអាជ្ញាធរនៅតាមមូលដ្ឋាន។
លោក ខៀវ សុភ័គ៖ «ថោកអ្វីនឹងដៃ ថ្លៃអ្វីនឹងមាត់! សុំគេទៅ! ទាក់ទងគេទៅ! ឱនលំទោនគេទៅ! សហការគ្នាទៅ! កុំឱ្យតែយើងទៅជេរគេ»។
ក្បួនធម្មយាត្រា “លើកកម្ពស់សីលធម៌សង្គម” ដើរថ្មើរជើង ចេញពីរាជធានីភ្នំពេញ កាលពីថ្ងៃទី១ ខែកុម្ភៈ ឆ្ពោះទៅខេត្តពោធិ៍សាត់ ដោយឆ្លងកាត់ខេត្តកណ្ដាល កំពង់ស្ពឺ និងកំពង់ឆ្នាំង។ នៅតាមផ្លូវដង្ហែធម្មយាត្រាពលរដ្ឋខ្លះប្រគេនភេសជ្ជៈ និងថ្នាំសង្កូវដល់ព្រះសង្ឃ និងអ្នកដែលចូលរួមដង្ហែ។ អ្នកចូលរួម នាំគ្នាកាន់ទង់ជាតិ និងទង់សាសនា ហើយអ្នកខ្លះទៀត កាន់រូបថតអ្នកទោសនយោបាយ ដូចជា កញ្ញា សេង ធារី និងមេដឹកនាំសហជីពណាហ្គាវើលដ៍ កញ្ញា ឈឹម ស៊ីថរ ជាដើម។ ពួកគាត់ ដើរផងស្រែកផងឲ្យរដ្ឋាភិបាល ដោះលែងអ្នកជាប់ឃុំដោយសារនយោបាយ និងការអនុវត្តិសិទ្ធិសេរីភាព ហើយបញ្ឈប់ការប្រើប្រាស់ពាក្យសម្ដីគំរាមកំហែងបង្កការឈឺចាប់ ដោយងាកមកដោះស្រាយជម្លោះនយោបាយ ដើម្បីឲ្យមានឯកភាពជាតិ និងផ្សះផ្សាជាតិឡើងវិញ។ សមាគមគ្រូបង្រៀនកម្ពុជាឯករាជ្យ យល់ឃើញថាការបណ្ដោយឱ្យមានទង្វើនិងពាក្យសម្ដីទាំងនេះកើតឡើង គឺជាការសាបព្រោះវប្បធម៌អាក្រក់ ដល់អ្នកនយោបាយ និងយុវជនជំនាន់ក្រោយ ប្រសិនបើគ្មានការទប់ស្កាត់ ឬពញ្ញាក់ស្មារតីបុគ្គលទាំងនោះ។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត ជំរុញឱ្យអាជ្ញាធរតាមខេត្ត-ក្រុង គួរចូលរួមសហការ និងផ្ដល់កិច្ចការពារដល់សមាគមគ្រូបង្រៀនឱ្យដល់គោលដៅ ជាជាងការគំរាមកំហែងដែលឆ្លុះបញ្ចាំងឱ្យឃើញតម្លៃគុណធម៌សង្គមកាន់តែធ្លាក់ចុះ។ លោកបន្តថា អាជ្ញាធរគួរតែថែរក្សាសុវត្ថិភាពអ្នកចូលរួមតាមដងផ្លូវ និងត្រូវធានាថាគ្មានការរារាំង ឬសកម្មភាពរំខានផ្សេងៗ ដែលបណ្ដាលឱ្យប៉ះពាល់ដល់ក្បួនហែធម្មយាត្រានេះ។
លោក អំ សំអាត៖ «ការលើកតម្កើងសីលធម៌នៅក្នុងសង្គម វាជារឿងល្អ ព្រោះបច្ចុប្បន្ននេះយើងឃើញថា សីលធម៌នៅក្នុងសង្គមខ្មែរ វាមានការធ្លាក់ចុះខ្លាំងណាស់។ អ៊ីចឹង ធម្មយាត្រា ក្នុងការលើកកម្ពស់ទៅលើសីលធម៌សង្គមនេះ វាជារឿងមួយដែលគួរតែគាំទ្រ និងយកចិត្តទុកដាក់ទាំងអស់គ្នា»។
ក្បួនហែ ឬសកម្មភាពផ្សេងៗ ដឹកនាំដោយអង្គការសង្គមស៊ីវិល ឬសកម្មជន ភាគច្រើនតែងមានការហាមឃាត់ ឬធ្វើទុក្ខបុកម្នេញគំរាមកំហែងតាមរូបភាពផ្សេងៗ ពីសំណាក់អាជ្ញាធរ ខុសពីសកម្មភាពដែលផ្ដល់ប្រយោជន៍ដល់គណបក្សកាន់អំណាច តែងតែមានអាជ្ញាធររៀបចំការពារសុវត្ថិភាព ឬបិទផ្លូវទាំងមូលដើម្បីសម្រួលចរាចរណ៍ឱ្យពួកគេ។
យ៉ាងណា សមាគមគ្រូបង្រៀនកម្ពុជាឯករាជ្យ និងអ្នកចូលរួមប្រមាណ ៥០នាក់ នៅតែរក្សាជំហរបន្តធម្មយាត្រាថ្មើរជើង ឱ្យដល់រមណីយដ្ឋានប្រវត្តិសាស្ត្រ ឧកញ៉ា ឃ្លាំង មឿង ខេត្តពោធិ៍សាត់ ដើម្បីបង្ហាញពីការលះបង់ ដើម្បីលើកស្ទួយសីលធម៌ គុណធម៌ និងឱ្យអ្នកនយោបាយរួមគ្នាគោរព និងលើកកម្ពស់សីលធម៌សង្គមឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន មិនគាំទ្រដីកាតុលាការICCដើម្បីចាប់ខ្លួនមេដឹកនាំរុស្ស៊ី
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
