កម្មករក្រុមហ៊ុនកាស៊ីណូណាហ្គាវើលដ៍ (NagaWorld) ម្នាក់ដែលត្រូវបានអាជ្ញាធររុញច្រានបណ្ដាលឱ្យស្លាប់ទារកក្នុងផ្ទៃ គឺ លោកស្រី សុខ រតនា មកដល់ពេលនេះ កំពុងស្ថិតក្នុងស្ថានភាពទ្រុឌទ្រោម និងគ្មានថវិកាគ្រប់គ្រាន់សម្រាប់ទិញម្ហូបអាហារសម្រាប់បំប៉នសុខភាពឡើងវិញឡើយ។ លោកស្រី សុខ រតនា ថា ការបាត់បង់កូនក្នុងផ្ទៃនេះគឺជាអំពើនិទ្ទណ្ឌភាពមួយ ដែលបានធ្វើឱ្យក្រុមគ្រួសារសាច់ញាតិលោកស្រីស្លុតចិត្ត និងទទួលរងក្ដីសោកសង្រេងដែលមិនអាចបំភ្លេចបាន។
កូដករក្រុមហ៊ុនណាហ្គាវើលដ៍ម្នាក់គឺលោកស្រី សុខ រតនា លើកឡើងទាំងអួលដើម ក ថាលោកស្រី និងប្តី ព្រមទាំងបងប្អូនសាច់ញាតិ សោកសង្រេង និងសោកស្ដាយបំផុតពេលបាត់បង់ទារកក្នុងផ្ទៃ ដោយសារកម្លាំងសមត្ថកិច្ចរុញច្រាន។ លោកស្រីមិននឹងស្មានថា ការប្រើសិទ្ធជាមូលដ្ឋានរបស់លោកស្រី ដើម្បីទាមទារឱ្យថៅកែបនល្បែងណាហ្គាវើលដ៍ គោរពច្បាប់កម្ពុជា បែរជាត្រូវបានអាជ្ញាធរបង្ក្រាបដោយហិង្សារហូតបាត់បង់កូនក្នុងផ្ទៃ និងស្ទើរបាត់បង់ជីវិតខ្លួនឯងបែបនេះឡើយ។ លោកស្រីឱ្យដឹងថា ថ្វីត្បិតមកដល់ពេលនេះ ការធ្លាក់ឈាមភាពថមថយយ៉ាងណាក្ដី ប៉ុន្តែ លោកស្រីនៅមានអាការៈចុកពោះម្ដងម្កាល និងខ្សោះអស់កម្លាំង។
លោកស្រី សុខ រតនា ប្រាប់វិទ្យុអាស៊ីសេរីថា គ្រូពេទ្យបានឱ្យលោកស្រី បន្តការតាមដានសុខភាពខ្លួនឯង និងមកពិគ្រោះជាមួយគ្រូពេទ្យជំនាញជាប្រចាំ ដោយសារលោកស្រីបានធ្លាក់ឈាមច្រើនក្នុងអំឡុងពេលដែលកូនបានស្លាប់ក្នុងផ្ទៃ។ លោកស្រីបន្តថា ម្យ៉ាងប្រឈមវិបត្តិសេដ្ឋកិច្ចក្នុងគ្រួសារ ម្យ៉ាងសុខភាពកំពុងគ្រាំគ្រា ចំណែកឯការងារ ក៏ត្រូវក្រុមហ៊ុនបានផ្អាក លោកស្រីត្រូវចាយវាយត្បិតត្បៀតបំផុត និងគ្មានប្រាក់សម្រាប់ទិញម្ហូបអាហារសម្រាប់បំប៉នសុខភាពឡើងវិញនោះទេ។
លោកស្រីឱ្យដឹងទៀតថា ទោះបីលោកស្រីមានសុខភាពប្រសើរឡើយវិញក៏ដោយ វេជ្ជបណ្ឌិតបានហាមប្រាម មិនឱ្យលោកស្រីយកកូន ក្នុងរយៈពេលយូរអង្វែង ដោយសារតែតួស្បូនមានភាពស្ដើង ពោលបើលោកស្រីបន្តយកកូន នឹងអាចប្រឈមរលូតម្ដងទៀត៖ «ជាក់ស្ដែង ឥឡូវហ្នឹងវាពិបាកខ្លាំង រឿងបញ្ហាលុយកាក់ ហើយពេលដែលខ្ញុំមានបញ្ហាតាំងពីថ្ងៃទី១៦ [ឧសភា] ធ្លាក់ឈាមហ្នឹងមក ៦-៧រយ [ដុល្លារ] ហើយ។ គ្រួសារយើង មានតែខាងគ្រួសារ [ប្តី] ហើយប្រាក់ខែគាត់ក៏មិនប៉ុន្មានដែរ។ ទប់អត់ចង់ជាប់ទេ ណាមួយធនាគារ ណាមួយថ្លៃពេទ្យ ណាមួយថ្លៃហូបចុក ត្រូវញ៉ាំអីប៉ូវៗ ហើយយើងអត់លុយ។ អារម្មណ៍ខ្ញុំឥឡូវហ្នឹង ខ្ញុំមានការឈឺចាប់ខ្លាំងណាស់។ ធម្មតា យើងស្រឡាញ់កូន ទោះយើងមានកូនពីរ កូនបីក៏ដោយ យើងនៅតែស្រឡាញ់កូនដែរ»។
ទោះជាយ៉ាងណា លោកស្រីថា ការបាត់បង់កូនជាទីស្រឡាញ់ នឹងធ្វើឱ្យលោកស្រីដិតដាមភាពឈឺចាប់ និងអារម្មណ៍សោកស្ដាយអស់មួយជីវិត។ លើសពីនេះ លោកស្រីបន្តថា បញ្ហាដែលបានកើតមានសម្រាប់លោកស្រីកន្លងមកនេះ វាជាបទពិសោធន៍មួយ បានបង្រៀនឱ្យលោកស្រី បានយល់កាន់តែច្បាស់ថែមទៀត ពីទង្វើរបស់អាជ្ញាធរដែលបានប្រព្រឹត្តអំពើឃោរឃៅ និងបន្សល់ការឈឺចាប់លើលោកស្រី និងក្រុមគ្រួសារ។
លោកស្រី សុខ រតនា រៀបរាប់បន្តថា ការចេញទាមទារធ្វើកូដកម្មអស់រយៈពេលជាង ៥ខែកន្លងមកនេះ លោកស្រី និងកូដករដែលភាគច្រើនជាស្ត្រីផ្សេងទៀត បានទទួលរងភាពអយុត្តិធម៌ផ្ទួនៗគ្នា។ លោកស្រីថា ការចេញតវ៉ាដំណោះស្រាយការងារនេះ ស្ទើរកា្លយជាវិវាទជាមួយអាជ្ញាធរ ដោយសារតែសមត្ថកិច្ចតែងតែដាក់កម្លាំងចាំបង្ក្រាបដោយហិង្សាទាំងគ្មានក្ដីអាណិត លើកម្មករដែលកំពុងរងការគាប់សង្កត់ពីសំណាក់ក្រុមហ៊ុនបរទេស។ លោកស្រីមិននឹកស្មានថា ប្រទេសកម្ពុជាដែលមានច្បាប់ត្រឹមត្រូវ ហើយមន្ត្រីអាជ្ញាធរតែងតែអះអាងថា ជាប្រទេសមានសន្តិភាពផងនោះ ប៉ុន្តែពេលដែលកម្មករគ្រាន់តែសិទ្ធិស្របច្បាប់ទាមទាមឱ្យមានសហជីពនៅកន្លែងធ្វើការ ដើម្បីឱ្យមានតុល្យភាពការងារជាមួយថៅកែ បែបជារងការបង្ក្រាបដាក់គំនាប់លើពលរដ្ឋគ្រប់ទម្រង់បែបនេះឡើយ។
លោកស្រីវាយតម្លៃថា ការបង្ក្រាបរបស់កម្លាំងសមត្ថកិច្ចលើកូដករឥតឈប់ឈរនេះ មិនមែនជាការអនុវត្តច្បាប់នោះទេ គឺជាមន្ត្រីអាជ្ញាធរ មានការរៀបចំជាប្រព័ន្ធជាមួយភាគីក្រុមហ៊ុន ដើម្បីដាក់សម្ពាធលើពលរដ្ឋខ្លួនឯង។ លោកស្រី សុខ រតនា រិះគន់ថា រដ្ឋាភិបាលគួរតែរៀបចំកញ្ចប់ថវិកាឡើងវិញ ក្នុងការបើកវគ្គបណ្តុះបណ្តាលជាថ្មី សម្រាប់អប់រំមន្ត្រីដែលអនុវត្តផ្ទុយពីច្បាប់ និងធ្វើការណែនាំមន្ត្រីអាជ្ញាធរទាំងនោះឱ្យបំពេញតួនាទីត្រឹមត្រូវតាមវិជ្ជាជីវៈការងាររបស់ខ្លួន៖ «មិនបានប្រើវិជ្ជាជីវៈ ជាអាជ្ញាធររបស់គាត់ហ្នឹងតិចតែម្ដង។ ទង្វើជាក់ស្ដែងតាមការឡៃវ៍ (Live) មិនដឹងថាពួកគាត់ [អាជ្ញាធរ] ប្រើច្បាប់ព្រៃអី មកលើពួកខ្ញុំទេ ព្រោះ អាជ្ញាធរមួយៗ ឆ្លងកាត់ការវឹក ការហាត់ រៀនសូត្រ មិនមែន គេយកអ្នកល្ងង់ទៅធ្វើជាអាជ្ញាធរទេ។ គាត់អនុវត្តនេះ មិនដឹងយកច្បាប់ព្រៃអីមកអនុវត្តជាមួយពួកខ្ញុំទេ បានជាគាត់អត់មានចិត្តជាមនុស្សអីតិចតែម្ដង។ សុទ្ធតែខ្មែរដូចគ្នា តែគាត់ [អាជ្ញាធរ] យកច្បាប់ព្រៃ មកអនុវត្តលើមនុស្ស ដែលមានសិទ្ធិរស់នៅក្នុងសង្គម មួយហ្នឹងគេ។ រួចគាត់យកច្បាប់ព្រៃមកអនុវត្ត មិនមែនជាច្បាប់ពិតប្រាកដ មិនមែនជាវិជ្ជាជីវៈរបស់គាត់ទេ គឺច្បាប់ព្រៃហ្មង»។
វិទ្យុអាស៊ីសេរី មិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ដើម្បីបកស្រាយជុំវិញបញ្ហានេះបានទេ នៅថ្ងៃទី១ មិថុនា។
វិទ្យុអាស៊ីសេរី ក៏បានទាក់ទងសុំប្រតិកម្មករណីរលូតរបស់កូដករណាហ្គាវើកដ៍នេះពីអ្នកនាំពាក្យក្រសួងកិច្ចការនារី អ្នកស្រី ម៉ាន ចិន្តា ក៏ប៉ុន្តែពុំទទួលបានការឆ្លើយតប គិតត្រឹមម៉ោងផ្សាយនេះ។
ចំណែកឯអ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាល លោក កត្ដា អ៊ន សោកស្ដាយចំពោះកូដករណាហ្គាវើលដ៍ ដែលមានករណីរលូនកូននេះ។ ទោះយ៉ាងណា លោកថ្លែងការពារថា ករណីរលូតកូនរបស់កូដករណាហ្គាវើលដ៍នេះ មិនអាចសន្និដ្ឋានបានថា បណ្ដាលមកពីការរុញច្រានពីក្រុមកម្លាំងសមត្ថកិច្ចបានឡើយ។ លោក កត្ដា អ៊ន មានប្រសាសន៍ថា បើជនរងគ្រោះមានភស្តុតាងគ្រប់គ្រាន់ លោកជំរុញមានការដាក់ពាក្យបណ្ដឹង និងចាត់តាំងមេធាវីដើម្បីតតាំងក្ដីតាមផ្លូវតុលាការ៖ «តាមសម្ដី តាមការមើលឃើញ យើងសន្និដ្ឋានរឿងនេះថា មកពីសមត្ថកិច្ច យើងមិនអាចសន្និដ្ឋាន អ៊ីចឹងបានទេ។ មានតែក្រុមគ្រូពេទ្យជំនាញទេ ដែលអាចវាយតម្លៃថា ករណីរលូតកូននេះ មកពីមូលហេតុអ្វី? ដូច្នេះ មានតែគ្រូពេទ្យជំនាញ យើងមិនអាចសន្និដ្ឋានថា អ៊ីចេះ ថាអ៊ីចុះបានទេ។ យើងអនុវត្តច្បាប់។ ដូច្នេះ សមភាពចំពោះមុខច្បាប់ ទាំងបងប្អូនកម្មករណាហ្គាវើលដ៍ ទាំងសមត្ថកិច្ច មានភាពស្មើគ្នាចំពោះមុខច្បាប់»។
ទាក់ទងនឹងបញ្ហានេះ លោកស្រី សុខ រតនា បញ្ជាក់ថា ក្រោយពីមានករណីកម្លាំងអាជ្ញាធរ រុញច្រានខ្ទប់នឹងបង្កាន់ដៃរថយន្តកាលពីថ្ងៃទី១១ ឧសភា នៅថ្ងៃបន្ទាប់លោកស្រីបានទៅពិនិត្យអេកូ ដោយគ្រូពេទ្យសន្និដ្ឋានថា កូនលោកស្រីមានសង្ឃឹមរស់ត្រឹមតែ ៥០ភាគរយតែប៉ុណ្ណោះ ដោយសារតែមានដំឈាមកកក្បែរទារក។ លោកស្រីឱ្យដឹង នឹងរៀបចំឯកសារភស្តុតាងមួយចំនួន និងសិក្សាជាមួយរកមេធាវីដាក់ពាក្យបណ្ដឹងឆាប់ៗ នេះ។ ទោះយ៉ាងណាក្ដី លោកស្រីមិនរំពឹងថា នឹងទទួលបានយុត្តិធម៌នោះទេ ដោយលោកស្រីមើលឃើញថា តុលាការខ្វះភាពឯករាជ្យ៖ «ដំណាក់កាលទីមួយដែលខ្ញុំបានធ្លាក់ឈាមហ្នឹងគាត់ [គ្រូពេទ្យ]ថា [ទារកមិនសង្ឃឹមរស់ ៥០% សង្ឃឹមរស់ ៥០%] ព្រោះមានដុំឈាមនៅក្នុងស្បូន កូនខ្ញុំវាអត់ល្អ។ គាត់ [គ្រូពេទ្យ] ណែនាំ អត់ឱ្យទុកទេ។ គាត់ [គ្រូពេទ្យ] សួរខ្ញុំដែរ ថាខ្ញុំមានប៉ះអីអត់? ខ្ញុំប្រាប់ថា ខ្ញុំដួលអុកគូទ។ គាត់ [គ្រូពេទ្យ] ថាអ៊ីចឹងបានអ៊ីចឹង គាត់មកពីយើងដួលអុកគូទ។ បើនិយាយពីរឿងសង្ឃឹមវិញ ការដាក់ពាក្យបណ្ដឹងនេះ ដូចជាមិនសូវសង្ឃឹមទេ ព្រោះប្រធានសហជីពរបស់ខ្ញុំជាប់គុក ៩អាទិត្យ ទាំងអយុត្តិធម៌។ ឥឡូវហ្នឹងអត់ទាន់ទម្លាក់បទចោទទេ។ ឥឡូវខ្ញុំផ្ទាល់ចុះ ខ្ញុំដាក់ពាក្យបណ្ដឹងទៅហ្នឹង មិនដឹងថាទទួលបានយុត្តិធម៌ពីអ្នកណា? ឥឡូវសួរថា អ្នកណាដែលអាចផ្តល់យុត្តិធម៌ឱ្យខ្ញុំបាន?»។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ (LICADO) លោក អំ សំអាត មានប្រសាសន៍ថា ករណីសមត្ថកិច្ចប្រើអំពើលើកូដកររហូតបាត់បង់កូដករក្នុងផ្ទៃនេះ គឺជាការរំលោភសិទ្ធិមនុស្សធ្ងន់ធ្ងរ។ លោកជំរុញដល់ស្ថាប័នពាក់ព័ន្ធបើកការស៊ើបអង្កេតមួយដោយឯករាជ្យតាមចាប់ជនដៃដល់មកផ្ដន្ទាទោស ដើម្បីផ្តល់យុត្តិធម៌ដល់ជនរងគ្រោះ៖ «ការដោះស្រាយបែបវិវាទការងារ មិនមែន ជាការដោះស្រាយតាមរបៀបប្រើប្រាស់អំពើហិង្សា ការរុញច្រាន ការទប់ស្កាត់ណាមួយទេ។ ប្រសិនបើបញ្ហានេះ នៅតែបន្ត យើងឃើញហើយ អំពើហិង្សាការរុញច្រាន គ្នានៅតែបន្តទៀត ការប៉ះពាល់កើតឡើងបន្តទៅទៀត។ ជាពិសេស ក្រុមកូដករ ហើយក៏សមត្ថកិច្ចផងដែរ។ អ៊ីចឹងយូរៗ ទៅ វាទៅជាការវិវាទ ឬជាការចងគំនុំ គ្នារវាងក្រុមកូដករ ជាមួយនឹងអាជ្ញាធរ បង្ក្រាបហ្នឹងទៅវិញ»។
លោក អំ សំអាត បារម្ភថា បើការដោះស្រាយវិវាទការងារនេះ នៅតែគ្មានច្រកចេញ ក្រុមកម្មករនឹងបន្តរងការកាន់តែធ្ងន់ធ្ងរបន្ថែមទៀត ដែលអាចឈានដល់ការចោទប្រកាន់ និងចាប់ខ្លួនក្រុមកម្មករណាហ្គាវើលដ៍ជាថ្មីម្ដងទៀត។
ក្រុមកូដករនៃក្រុមហ៊ុនណាហ្គាវើលដ៍រាប់រយនាក់ បានចេញធ្វើកូដករដោយសន្តិវិធីអស់រយៈពេលជាង ៥ខែមកហើយ ដើម្បីឱ្យភាគីថៅកែគោរពសិទ្ធកម្មករនៅកន្លែងធ្វើការ។ ប៉ុន្តែ មកដល់ពេលនេះ គ្រប់ស្ថាប័នពាក់ព័ន្ធមិនត្រឹមតែមិនជួយរកដំណោះស្រាយឱ្យពួកគាត់ទទួលបានយុត្តិធម៌នោះទេ ប៉ុន្តែបែរជាប្រើកម្លាំងសមត្ថកិច្ចបង្ក្រាបពួកគាត់ឥតឈប់ឈរស្ទើរជារៀងរាល់ថ្ងៃ។ ក្រៅពីនេះ មានករណីកម្មកររលូតកូនដោយសារតែការចេញទាមទារសិទ្ធសេរីភាពការងារ នេះកន្លងតុលាការក៏បានចាប់សហជីព និងសមាជិកសរុប ១៥នាក់ដាក់ពន្ធនាគារ។ មកដល់ពេលនេះ ពួកគាត់នៅមិនទាន់មានការទម្លាក់បទចោទពីតុលាការនៅឡើយ។
លោកស្រី សុខ រតនា និងក្រុមកម្មករ នៅតែទន្ទឹមរង់ចាំពន្លឺយុត្តិធម៌ ដោយពួកគេទាមទារដល់រដ្ឋាភិបាលគួរសើរើអង្គហេតុនៃវិវាទការងារនេះឡើងវិញ ដើម្បីពន្លឿននីតិវិធីក្នុងការដោះស្រាយប្រកបដោយតម្លាភាព។ លោកស្រី សុខ រតនា ក៏ទន្ទឹមរង់ចាំមើលថា ស្ថាប័នពាក់ព័ន្ធ បើកការស៊ើបអង្កេតដល់កម្រិតណា ចំពោះជនដៃដល់រុញច្រានលោកស្រីរហូតសម្លាប់កូនក្នុងផ្ទៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។