ព្រះសង្ឃមួយអង្គដែលភៀសព្រះកាយនៅប្រទេសថៃ ព្រះនាម បូរ បេត ត្រូវបានអាជ្ញាធរថៃ ចាប់ផ្សឹក និងប្រឈមបញ្ចូនទៅដាក់ទោសទណ្ឌនៅកម្ពុជា។ រូបភាពជាច្រើនសន្លឹកដែលបង្ហោះនៅលើហ្វេសប៊ុក (Facebook) បង្ហាញថា អាជ្ញាធរថៃជាច្រើននាក់ បានចាប់ព្រះកាយព្រះអង្គ បូរ បេត ហើយនឹងមានរូបភាពដែលអាជ្ញាធរថៃ ឈរមើលព្រះអង្គស្លៀកពាក់ខោអាវ។
សមាជិកគណបក្សសង្គ្រោះជាតិលោក អឿ ណារិទ្ធិ ដែលកំពុងភៀសខ្លួននៅក្រៅប្រទេស ថ្លែងថា ព្រះតេជគុណ បូរ បេត ត្រូវបានអាជ្ញាធរថៃចាប់ព្រះកាយនៅល្ងាចថ្ងៃទី១ ខែធ្នូ នៅក្នុងវត្តមួយស្ថិតក្នុងខេត្តសមុទ្រប្រាកាន (Samut Prakan) ប្រទេសថៃ។ លោកបន្តថា ពេលនេះ អាជ្ញាធរថៃ បានចាប់ព្រះអង្គផ្សឹករួចហើយ ប៉ុន្តែលោកមិនដឹងថា ព្រះអង្គត្រូវបានអាជ្ញាធរថៃ បញ្ចូនទៅឃុំនៅទីណានោះទេ។ មន្ត្រីបក្សប្រឆាំងរូបនេះ កំពុងព្រួយបារម្ភថា ព្រះអង្គអាចនឹងត្រូវបញ្ជូនទៅឲ្យអាជ្ញាធរកម្ពុជា ដើម្បីដាក់ទោសទណ្ឌ។ លោកសង្ស័យថា ការចាប់ព្រះកាយព្រះអង្គនេះ ប្រហែលជារដ្ឋាភិបាលកម្ពុជា ជាអ្នកស្នើសុំអាជ្ញាធរថៃ ដោយសារតែព្រះអង្គ តែងតែបង្ហោះសាររិះគន់ភាពអសកម្មរបស់រដ្ឋាភិបាល និងបញ្ហាសង្គមកម្ពុជា។
រូបភាពជាច្រើនសន្លឹកដែលបង្ហោះនៅលើហ្វេសប៊ុក (Facebook) បង្ហាញថា អាជ្ញាធរថៃជាច្រើននាក់ បានចាប់ព្រះកាយព្រះអង្គ បូរ បេត ហើយនឹងមានរូបភាពដែលអាជ្ញាធរថៃ ឈរមើលព្រះអង្គស្លៀកពាក់ខោអាវ។
ព្រះតេជព្រះគុណ បូរ បេត បានភៀសព្រះកាយមកគង់នៅប្រទេសថៃ កាលពីខែវិច្ឆិកា ឆ្នាំ២០២០ ដើម្បីគេចពីការតាមចាប់របស់អាជ្ញាធរកម្ពុជា ក្រោយពេលព្រះអង្គចូលរួមតវ៉ាដោយសន្តិវិធីទាមទារឲ្យដោះលែងមេដឹកនាំសហជីពលោក រ៉ុង ឈុន។ ព្រះអង្គត្រូវបានការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR ) នៅប្រទេសថៃ ទទួលស្គាល់ឋានៈជាជនភៀសខ្លួនរួចហើយ។ ក្នុងពេលគង់នៅប្រទេសថៃ ព្រះសង្ឃដែលមានព្រះជន ៣៤វស្សាអង្គនេះ តែងតែបង្ហោះសាររិះគន់រដ្ឋាភិបាលលោក ហ៊ុន សែន ជាបន្តបន្ទាប់ពាក់ព័ន្ធនឹងការរំលោភសិទ្ធិមនុស្ស និងការបំផ្លាញលទ្ធិប្រជាធិបតេយ្យ ព្រមទាំងការបំផ្លិចបំផ្លាញធនធានធម្មជាតិជាដើម។
កាលពីខែវិច្ឆិកា កន្លងទៅ អាជ្ញាធរថៃ បានបញ្ចូនសកម្មជនគណបក្សសង្គ្រោះជាតិ ៤នាក់ហើយ ទៅឲ្យអាជ្ញាធរកម្ពុជា យកទៅដាក់ឃុំក្នុងពន្ធនាគារព្រៃស នៅរាជធានីភ្នំពេញ តាមសំណើររបស់រដ្ឋាភិបាលលោកនាយករដ្ឋមន្ត្រី ហ៊ុន សែន។ ការចាប់ខ្លួនសកម្មជនបក្សប្រឆាំងនិងព្រះតេជគុណ បូរ បេតនេះ គឺបន្ទាប់ពី លោកនាយករដ្ឋមន្ត្រី ហ៊ុន សែន ប្រកាសថា លោកនឹងតាមកម្ទេចក្រុមប្រឆាំងឲ្យដល់ទីបំផុត។
ក្រុមឃ្លាំមើលបញ្ហាសង្គម និងក្រុមអង្គការសិទ្ធិមនុស្ស បានថ្កោលទោសជាបន្តបន្ទាប់ទៅរដ្ឋាភិបាលថៃ និងរដ្ឋាភិបាលកម្ពុជាថា កំពុងរំលោភសិទ្ធិមនុស្សធ្ងន់ធ្ងរ និងមិនអាចទទួលយកបានឡើយ។ ពួកគេបន្តថា ទង្វើនេះ គឺជាជួយគ្នាទៅវិញទៅមក ដើម្បីពង្រឹងអំណាចផ្តាច់ការរបស់រដ្ឋាភិបាលនៃប្រទេសទាំងពីរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។