គ្រួសារលោកបណ្ឌិត កែម ឡី ដែលរួមមានអ្នកស្រី ប៊ូ រចនា និងកូនៗទាំង៥នាក់ របស់លោក គ្រោងនឹងធ្វើបុណ្យខួប៧ឆ្នាំ នៅថ្ងៃអាទិត្យទី៩ ខែកក្កដា នៅរដ្ឋវ៉ិកតូរីយ៉ា (Victoria) នៃប្រទេសអូស្ត្រាលី (Australia)។
កម្មវិធីបុណ្យដែលផ្សព្វផ្សាយនៅលើគណនីហ្វេសប៊ុករបស់អ្នកស្រី ប៊ូ រចនា កាលពីយប់ថ្ងៃទី២៥ ខែមិថុនា ឱ្យដឹងថា ពិធីបុណ្យខួប៧ឆ្នាំនេះនឹងប្រព្រឹត្តទៅនៅទីស្នាក់ការសមាគមខ្មែរវ៉ិកតូរីយ៉ា នៅក្រុងស្ព្រីងវែល (Springvale) រដ្ឋវ៉ិកតូរីយ៉ា។
ពិធីបុណ្យនេះនឹងចាប់ផ្ដើមពីម៉ោង ៩ព្រឹក និងបញ្ចប់ទៅវិញនៅម៉ោង២រសៀល ដោយមានពិធីរាប់បាត្រ ធម្មទេសនា ដារបង្សុកូល និងការថ្លែងអំណរគុណរបស់អ្នកស្រី ប៊ូ រចនា។
គិតត្រឹមថ្ងៃ ទី១០ ខែកក្កដា ឆ្នាំ២០២៣នេះ មានរយៈពេល៧ឆ្នាំហើយ ដែលអ្នកស្រាវជ្រាវការអភិវឌ្ឍសង្គម និងជាអ្នកវិភាគនយោបាយដ៏មានប្រជាប្រិយភាព បណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់។ សំណុំរឿងឃាតកម្មដ៏កក្រើកនេះ តុលាការបានផ្ដន្ទាទោសបុរសម្នាក់ឈ្មោះ អឿត អាង ដែលហៅខ្លួនឯងថា ជួប សម្លាប់ ឱ្យជាប់ពន្ធនាគារអស់មួយជីវិត ដោយសារភាពអះអាងថា បានបាញ់សម្លាប់លោក កែម ឡី ដែលមិនព្រមសងប្រាក់ជំពាក់ចំនួន ៣.០០០ដុល្លារ។ តែទោះជាយ៉ាងណា ក្រោយមានការរិះគន់ខ្លាំងៗ ពីសាធារណជន តុលាការក្រុងភ្នំពេញបានសម្រេចបំបែកសំណុំរឿងនេះជាពីរ ដើម្បីស៊ើបអង្កេតរកអ្នកពាក់ព័ន្ធផ្សេងទៀតយកមកផ្ដន្ទាទោស ក៏ប៉ុន្តែតុលាការមិនបានផ្ដល់ព័ត៌មានស្ដីពីការវិវឌ្ឍនៃសំណុំរឿងទីពីរនេះឡើយ រហូតមកដល់ពេលនេះ។
ទាក់ទងនឹងពិធីបុណ្យខួប៧ឆ្នាំនេះ មជ្ឈមណ្ឌលសិទ្ធិមនុស្សកម្ពុជានឹងប្រារព្ធពិធីរម្លឹកខួបមរណភាពបណ្ឌិត កែម ឡី តាមរយៈសកម្មភាពផ្សេងៗគ្នាចំនួន៥ ដើម្បីបង្ហាញពីការដឹងគុណ នឹករលឹក និងទាមទារយុត្តិធម៌សម្រាប់ជនរងគ្រោះ។
ចំណែកក្រុមយុវជនសកម្មនឹងការងារសង្គម ក្រុមយុវជនចលនាមាតាធម្មជាតិ និងសមាគមសម្ពន្ធនិស្សិតបញ្ញវន្តខ្មែរ ក៏គ្រោងរៀបចំពិធីរំឭកខួបនៃមរណភាពបណ្ឌិត កែម ឡី នៅថ្ងៃទី១០ ខែកក្កដា ខាងមុខនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។