សាលាដំបូងខេត្តរតនគិរី បានដោះលែងលោក ថេង សាវឿន និងសហការីរបស់លោកទាំងពីរនាក់ គឺលោក ញិល ភាព និងលោក ថាន់ ហាច ឱ្យមានសេរីភាពវិញហើយ នៅថ្ងៃទី៣០ ខែឧសភា បន្ទាប់ពីពួកលោកធ្វើលិខិត និងថតវីដេអូ និយាយទម្លាក់កំហុសលើខ្លួនឯង ដែលផ្សព្វផ្សាយនៅលើបណ្ដាញសារព័ត៌មាន ដែលស្និទ្ធនឹងលោកនាយករដ្ឋមន្ត្រី ហ៊ុន សែន កាលពីថ្ងៃទី២៧ ខែឧសភាកន្លងទៅ។
ភ្លាមៗ បន្ទាប់ពីទទួលបានការដោះលែងឱ្យនៅក្រៅឃុំបណ្ដោះអាសន្ន លោក ថេង សាវឿន ដែលជាប្រធានសមាគមសម្ព័ន្ធសហគមន៍កសិករកម្ពុជា (CCFC Cambodia) និងសហការីរបស់លោកទាំងពីរក៏បានថ្លែងទទួលកំហុសម្ដងទៀត និងអំពាវនាវដល់ប្រជាពលរដ្ឋចូលរួមការបោះឆ្នោតក្នុងខែកក្កដាខាងមុខផងដែរ។