មន្ត្រីសិទ្ធិការងារ និងសហជីពថា ក្រុមហ៊ុន កាស៊ីណូ ណាហ្គា វើលដ៏ (Naga World) កំពុងរំលោភច្បាប់ការងារយ៉ាងដំណំ ក្រោយបញ្ឈប់មេដឹកនាំសហជីពទាំងអស់ ដោយយកលេសថា ដោយសារវិបត្តិនៃជំងឺកូវីដ១៩ ក្រុមហ៊ុនបាត់ស្ថិរភាពអាជីវកម្ម និងមិនអាចទុកតំណាងសហជីពបាន។
មន្ត្រីសិទ្ធិការងារថា ក្រុមហ៊ុនកាស៊ីណូ ណាហ្គា វើលដ៏ (Naga World) ដែលធ្លាប់ជាប់ឈ្មោះមិនល្អក្នុងប្រវត្តិសាស្ត្រ ក្នុងបញ្ជីក្រុមហ៊ុនដែលរំលោភសិទ្ធិការងារ លើកនេះហ៊ានរហូតដល់បញ្ឈប់តំណាងបុគ្គលិកក្រុមហ៊ុនជាប្រព័ន្ធ។
ក្នុងចំណោមបុគ្គលិកជាង ១ពាន់ (១.៣២៩) នាក់ ដែលក្រុមហ៊ុនបញ្ឈប់ ភាគច្រើនជាសមាជិករបស់សហជីព សកម្មជនសហជីព និងថ្នាក់ដឹកនាំសហជីព។ អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ លោក ឃុន ថារ៉ូ (CENTRAL) ថា ការបញ្ឈប់តំណាងសហជីពជាប្រព័ន្ធបែបនេះ បង្ហាញឲ្យឃើញនូវចេតនាដែលក្រុមហ៊ុនបានគ្រោងធ្វើ និងអនុវត្តតាមវិធីសាស្ត្រដូចគ្នាកាលពីឆ្នាំ២០០៩ ព្រោះក្រុមហ៊ុនមិនចង់ឲ្យមានសហជីពនៅកន្លែងការងារ៖ «ហើយវាក៏មិនល្អសម្រាប់ប្រទេសកម្ពុជានោះដែរ ព្រោះកាលពីឆ្នាំ២០០៩ ករណីណាហ្គានេះ មាននៅរបាយការណ៍អង្គការពលកម្មអន្តរជាតិផ្នែកការងារ។ ឥឡូវនេះ ណាហ្គាហាក់ដូចជាមានចេតនាមិនខុសពីអ្វីដែលខ្លួនធ្លាប់បានធ្វើកន្លងមក ទៅនឹងការធ្វើទុក្ខបុកម្នេញទៅលើសហជីព ការបញ្ឈប់ថ្នាក់ដឹកនាំសហជីព និងសកម្មជនសហជីព»។
កាលពីដើមឆ្នាំ២០០៩ តំណាងសហជីព ១៤នាក់នៃក្រុមហ៊ុនណាហ្គា វើលដ៏ ត្រូវក្រុមហ៊ុននេះបញ្ឈប់ពីការងារ ដោយសារពួកគាត់តវ៉ាសុំដំឡើងប្រាក់ខែបុគ្គលិក និងលក្ខខណ្ឌការងារសមរម្យ។ ពួកគាត់តវ៉ាចំពោះការបញ្ឈប់នេះ។ ក្រោយមកក្រុមហ៊ុនបានប្តឹងបកទៅពួកគាត់វិញ ជាច្រើនករណី។ ការធ្វើទុក្ខបុកម្នេញ និងបំពានសិទ្ធិការងាររបស់សហជីពនេះ ត្រូវបានកត់សម្គាល់ក្នុងរបាយការណ៍របស់អង្គការអន្តរជាតិខាងការងារ (ILO)។
១០ឆ្នាំក្រោយមក នៅឆ្នាំ២០១៩ ក្រុមហ៊ុននេះ បានបញ្ឈប់មេដឹកនាំសហជីពនៅទីនោះ គឺកញ្ញា ឈឹម ស៊ីថរ ក្រោយមេសហជីពរូបនេះ បើកយុទ្ធនាការទាមទារដំឡើងប្រាក់ខែ និងជីវភាពរស់នៅសមរម្យជូនបុគ្គលិកនិយោជិតនៅក្រុមហ៊ុននេះ។ ប៉ុន្តែ ក្រោយការតវ៉ាពីបុគ្គលិកនិយោជិតរាប់ពាន់នាក់ យ៉ាងស្វិតស្វាញអស់រយៈពេលច្រើនខែ ឲ្យក្រុមហ៊ុននេះបន្តការងារកញ្ញា ឈឹម ស៊ីថរ ទើបក្រុមហ៊ុនឲ្យកញ្ញាចូលធ្វើការវិញ។ ការធ្វើទុក្ខបុកម្នេញតំណាងសហជីពនេះ ត្រូវខាងគណៈកម្មការអឺរ៉ុប កត់សម្គាល់ថា ជាផ្នែកមួយនៃការរំលោភសិទ្ធិការងារធ្ងន់ធ្ងរ និងជាប្រព័ន្ធនៅកម្ពុជាដែរ មុននឹងសម្រេចដកប្រព័ន្ធការអនុគ្រោះពន្ធ EBA ២០%។
ឥឡូវក្នុងឆ្នាំ ២០២១ នេះក្រុមហ៊ុនណាហ្គា វើលដ៏ បញ្ឈប់កញ្ញា ឈឹម ស៊ីថរ និងថ្នាក់ដឹកនាំសហជីពទាំងអស់នៅក្រុមហ៊ុននេះតែម្តង ដោយសារពួកគាត់បន្តតវ៉ាទាមទារសិទ្ធិបុគ្គលិកនិយោជិត ជាពិសេសការតវ៉ាឲ្យក្រុមហ៊ុនយកចិត្តទុកដាក់អំពីសុខុមាលភាព និងសុវត្ថិភាពបុគ្គលិក ក្នុងស្ថានភាពរីករាលដាលនៃជំងឺកូវីដ-១៩។ ប៉ុន្តែក្រុមហ៊ុនដែលមានបុគ្គលិកជាង ៨ពាន់នាក់នេះ អះអាងថា មកពីក្រុមហ៊ុនបិទដំណើរការមួយរយៈ និងដើម្បីរក្សាស្ថិរភាពអាជីវកម្មទើបក្រុមហ៊ុនត្រូវបញ្ឈប់កម្មករជាង ១ពាន់នាក់ និងតំណាងសហជីពទាំងអស់បែបនេះ។
ផ្ទុយពីអ្វីដែលក្រុមហ៊ុននេះអះអាងថា ខ្លួនមានបញ្ហាលំបាកផ្នែកហិរញ្ញវត្ថុ ដែលឈានទៅបញ្ឈប់បុគ្គលិកជិត ២០% បែបនេះ ពេញមួយឆ្នាំ ២០២០ ពេលកម្ពុជាជួបវិបត្តិនៃជំងឺកូវីដ-១៩ ក្រុមហ៊ុននេះ រកបានប្រាក់ចំណេញជាង ១០០ លាន (១០២) ដុល្លារ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូ ណាហ្គា វើលដ៏ (NAGA World) កញ្ញា ឈឹម ស៊ីថរ ថា នោះគ្រាន់តែជាលេសប៉ុណ្ណោះ ព្រោះក្រុមហ៊ុននេះចង់លុបបំបាត់សហជីពជាយូរមកហើយ ទើបឆ្លៀតឱកាសមានវិបត្តិជំងឺកូវីដ-១៩ បញ្ឈប់សមាជិក សកម្មជន និងថ្នាក់ដឹកនាំសហជីព ជាមួយការបញ្ឈប់កម្មករជាង ១ពាន់នាក់ទៀតនោះ៖ «គម្រោងនៅក្នុងការកាត់បុគ្គលិកនេះ វាមិនសមហេតុសមផលខ្លាំងមែនទែននោះ គឺនៅពេលដែលសកម្មជនសហជីព និងមេដឹកនាំសហជីពទាំងអស់ គឺសុទ្ធតែមានឈ្មោះកាត់ទាំងអស់ ហើយគាត់នៅចិញ្ចឹមចិត្តនៅក្នុងលុបបំបាត់សហជីព។ បើគ្មានការតវ៉ា បើគ្មានការជំទាស់ទេ គឺខែខាងមុខនេះ គឺលែងមានសហជីពនៅក្នុងក្រុមហ៊ុនណាហ្គា វើលដ៏ហើយ អស់តែម្តង ! បើសិនជាក្រសួងអនុញ្ញាតឲ្យក្រុមហ៊ុនរម្លាយសហជីពហ្នឹងចោលបានទៀត អាហ្នឹងគឺច្បាស់តែម្តង»។
វិទ្យុអាស៊ីសេរីមិនអាចសុំការឆ្លើយតបរឿងនេះ ពីតំណាងក្រុមហ៊ុនណាហ្គា វើលដ៏ លោក ឌី សីហា និងអ្នកនាំពាក្យក្រសួងការងារ លោក ហេង សួរ បាននៅឡើយទេ នៅថ្ងៃទី៤ ខែមិថុនា។
កន្លងមកពេលមានបញ្ហាបែបនេះកើតឡើង ក្រុមប្រឹក្សាអាជ្ញាកណ្ដាល បានអន្តរាគមន៍ខ្លះដែរ។ ប៉ុន្តែ សេចក្តីសម្រេចរបស់ស្ថាប័ននេះ មិនចងកាតព្វកិច្ចឲ្យក្រុមហ៊ុន ឲ្យធ្វើតាមនោះឡើយ។ ដូច្នេះ ក្រុមហ៊ុនតែងតែធ្វើទៅតាមជំហរក្រុមហ៊ុនក្នុងការបញ្ឈប់តំណាងសហជីព។
ប៉ុន្តែលើកនេះ កញ្ញា ឈឹម ស៊ីថរ ថា បុគ្គលិកកំពុងប្រមូលស្នាមមេដៃបានជាង ១.៨០០ នាក់ហើយ ដើម្បីដាក់បណ្ដឹងទៅក្រសួងការងារ ឲ្យជួយដោះស្រាយបញ្ហានេះ។ ចំណែកមន្ត្រីសិទ្ធិការងារលោក ឃុន ថារ៉ូ វិញ លោកថា អង្គការលោកនឹងដាក់ពាក្យប្តឹងអង្គការអន្តរជាតិខាងការងារ (ILO) ឲ្យយកចិត្តទុកដាក់ក្នុងរឿងនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។