ក្រោយពីកិច្ចប្រជុំនៅទីស្តីការក្រសួងការបរទេសក្នុងរាជធានីភ្នំពេញ កាលពីព្រឹកថ្ងៃសុក្រ ទី១១ ខែកុម្ភៈ រវាងឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា លោក ហោ ណាំហុង ជាមួយអនុរដ្ឋមន្ត្រីការបរទេសជប៉ុន លោក យុតាកា បានូ លោក កុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា មានប្រសាសន៍ថា លោកឧបនាយករដ្ឋមន្ត្រី ហោ ណាំហុង បានលើកឡើងថា អ្វីៗបង្កដោយភាគីថៃ គឺជាការឈ្លានពានមកលើកម្ពុជា។
លោក កុយ គួង ក៏បានលើកយកប្រសាសន៍របស់អនុរដ្ឋមន្ត្រីការបរទេសជប៉ុន មកបញ្ជាក់ថា រដ្ឋាភិបាលជប៉ុន បានសម្តែងការព្រួយបារម្ភចំពោះការផ្ទុះអាវុធតាមព្រំដែនកម្ពុជា និងថៃ ព្រោះប្រទេសទាំងពីរ ជាមិត្តភក្ត្ររបស់ប្រទេសជប៉ុន ហើយរដ្ឋាភិបាលជប៉ុន ក៏សង្ឃឹមថា ជម្លោះនេះត្រូវដោះស្រាយដោយសន្តិវិធី ៖ «ទាក់ទងនឹងបញ្ហាជម្លោះខ្មែរ-ថៃ លោកបានសម្ដែងពីការព្រួយបារម្ភ...។ កម្ពុជា ក៏ជាមិត្តរបស់ជប៉ុន ថៃក៏ជាមិត្តរបស់ជប៉ុន ដូច្នេះហើយលោកសង្ឃឹមថា ប្រទេសទាំង២ អាចដោះស្រាយបញ្ហានេះដោយសន្តិវិធីបាន ដោយផ្អែកទៅលើច្បាប់អន្តរជាតិ»។
លោក យុតាកា បានូ អនុរដ្ឋមន្ត្រីក្រសួងការបរទេសជប៉ុន បានបំពេញដំណើរទស្សនកិច្ចលើកទី១មកកាន់កម្ពុជា នៅពេលនេះ ដើម្បីចូលរួមពិធីបើកការដ្ឋានសម្ពោធការសាងសង់ស្ពានអ្នកលឿងនៅព្រឹកថ្ងៃសៅរ៍ ទី១២ ខែកុម្ភៈ ឆ្នាំ២០១១៕