ជនសង្ស័យពាក់ព័ន្ធពីបទជួញដូរគ្រឿងញៀនម្នាក់ ត្រូវបានសមត្ថកិច្ចប៉ូលិសខេត្តក្រចេះ បញ្ជូនខ្លួនពីកន្លែងប៉ូលិសព្រហ្មទណ្ឌទៅកាន់កន្លែងប្រឆាំងគ្រឿងញៀន ដើម្បីធ្វើកោសលវិច័យកាលពីព្រឹកថ្ងៃទី៣០ មិថុនា។
ក្នុងដំណើរឆ្លងកាត់ការបញ្ជូនទៅធ្វើកោសលវិច័យ ជននោះបានប្រាប់ប៉ូលិសថា ខ្លួននៅក្នុងសមាគមអ្នកកាសែតមួយ ៖ «ឡុង វិន ទើបចូលបានប៉ុន្មានខែ សមាគមឃ្លាំមើលកម្ពុជា ប៉ុន្តែអត់ដែលដើរនៅតែផ្ទះ នៅស្ទឹងត្រែង...»។
ស្នងការរងខេត្តទទួលបន្ទុកផ្នែកព្រហ្មទណ្ឌ គឺលោក អ៊ុំ ភី បានឲ្យដឹងថា ឈ្មោះ ឡុង វិន ត្រូវបានចាប់ខ្លួនកាលពីថ្ងៃទី២៩ មិថុនា ជាមួយគ្រឿងញៀនប្រភេទមេតំហ្វេតាមីន (Methamphetamine) ចំនួន ២កញ្ចប់ និងអាវុធខ្លីមួយដើមផង នៅភូមិឫស្សីចា ឃុំថ្មគ្រែ ស្រុកចិត្របុរី ខេត្តក្រចេះ។
ជនសង្ស័យឈ្មោះ ឡុង វិន បានអះអាងនៅចំពោះមុខអ្នកសារព័ត៌មានថា ខ្លួនស្ថិតនៅក្នុងសមាគមអ្នកកាសែតឃ្លាំមើលកម្ពុជា ប៉ុន្តែលោកស្នងការរង អ៊ុំ ភី បានបញ្ជាក់ថា ឃើញមានតែក្រដាសគូសវាសបែងចែកមុខងារ តែគ្មានហត្ថលេខា ឬត្រាបញ្ជាក់ឡើយ ដែលលោកមិនទាន់អាចសន្និដ្ឋានថា ជាអ្នកកាសែត ឬជាអ្វីបាននៅឡើយ។
លោកបន្តថា ៖ «មិនមែនអ្នកកាសែតទេ គ្រាន់វាមានតារាងរចនាសម្ព័ន្ធ អត់មានស៊ីញេអីផង មិនយកជាផ្លូវការទេ គ្រាន់តែមានតារាងរចនាសម្ព័ន្ធអ្នកណាធ្វើអីៗ...»។
លោក ជុំ កាណាល់ ប្រធានសមាគមសម្ព័ន្ធអ្នកសារព័ត៌មានកម្ពុជា បានបញ្ជាក់នៅថ្ងៃទី៣០ មិថុនា ថា លោកមិនដែលបានដឹងថា មានបង្កើតសមាគមកាសែតឃ្លាំមើលកម្ពុជានេះពីពេលណានៅឡើយ ប៉ុន្តែលោកបញ្ជាក់ថា វិជ្ជាជីវៈត្រូវចែកឲ្យដាច់ពីបទល្មើស ៖ «វិជ្ជាជីវៈសារព័ត៌មានយើងត្រូវគោរពក្រមសីលធម៌វិជ្ជាជីវៈជាតួនាទីរបស់ខ្លួន ប៉ុន្តែចំពោះច្បាប់គឺយើងត្រូវគោរពច្បាប់ បើធ្វើអ្វីខុសឆ្គង ដូចជាពិសេសបញ្ហាចែកគ្រឿងញៀនទៅកាងឈើរកស៊ីបទល្មើសអ្វីផ្សេងៗខុសច្បាប់ អាហ្នឹងគឺខុសត្រូវទទួលទោសតាមច្បាប់»។
ស្នងការរង អ៊ុំ ភី បានឲ្យដឹងថា នឹងរៀបចំបែបបទបញ្ជូនទៅតុលាការនៅរសៀលថ្ងៃទី៣០ មិថុនា នេះ។ លោក អ៊ុំ ភី បញ្ជាក់បន្ថែមថា បញ្ហាបទល្មើសគ្រឿងញៀនឆមាសដើមឆ្នាំនេះ មានការកើនឡើងជាងឆ្នាំទៅ តែមិនបានបញ្ជាក់ពីតួលេខឡើយ៕