គ្រូ​ពេទ្យ​នៅ​កំពង់ចាម​ប្រតិកម្ម​នឹង​ការ​កាត់​ប្រាក់​លើក​ទឹក​ចិត្ត

បុគ្គលិក​មន្ទីរ​ពេទ្យ​ស្រុក​ចម្ការ​លើ​បាន​តវ៉ា​មិន​ឲ្យ​រដ្ឋាភិបាល​កាត់​ប្រាក់​លើក​ទឹក​ចិត្ត​ប្រចាំ​ខែ​ដែល​បាន​ប្រើប្រាស់​ថវិកា​ជំនួយ​ឧបត្ថម្ភ​ជា​រៀង​រាល់​ខែ​ដល់​មន្ត្រី​សុខាភិបាល។

2011.06.26
Share on WhatsApp
Share on WhatsApp

ប្រាក់​លើក​ទឹក​ចិត្ត​ដែល​ឧបត្ថម្ភ​បន្ថែម​ពី​រដ្ឋាភិបាល​ដោយ​អនុវត្តន៍​ថវិកា​ជំនួយ​ដើម្បី​ផ្ដល់​ជូន​មន្ត្រី​រាជការ​ក្នុង​ស្ថាប័ន​សុខាភិបាល​ត្រូវ​បាន​បុគ្គលិក​មន្ទីរ​ពេទ្យ​បង្អែក​ស្រុក​ចម្ការ​លើ​លើក​ឡើង​ថា​ត្រូវ​បាន​អ្នក​គ្រប់គ្រង​មន្ទីរ​ពេទ្យ​នោះ​មិន​បាន​បើក​ជូន​តាម​ការ​កំណត់។

បុគ្គលិក​មន្ទីរ​ពេទ្យ​ដែល​ផ្ដល់​សម្ភាសន៍​ដោយ​សុទ្ធ​តែ​មិន​ហ៊ាន​បញ្ចេញ​ឈ្មោះ​បាន​ឲ្យ​ដឹង​ថា​ប្រាក់​លើក​ទឹក​ចិត្ត​នោះ​ត្រូវ​បាន​ផ្ដល់​ជូន​ម្នាក់ៗ តាម​ឋានៈ​មាន​ពី​៧០ ទៅ​ជាង​១០០​ដុល្លារ​ក្នុង​មួយ​ខែ ប៉ុន្តែ​នាយ​ផ្នែក​គ្រប់គ្រង​នៅ​ទី​នោះ​បើក​ជូន​មិន​គ្រប់​ទេ ដោយ​កាត់​ទៅ​លើ​ការ​ធ្វើ​ការ​ងារ​ទៅ​វិញ។ ពេទ្យ​ឆ្មប​ដែល​មិន​សប្បាយ​ចិត្ត​នោះ​បាន​លើក​ឡើង​ថា​អ្នក​ស្រី​ត្រូវ​កាត់​អស់​៣០% ៖ "ប្រធាន​ការិយាល័យ​បាន​កាត់​ប្រាក់​ខែ​បុគ្គលិក​ដូច​ខ្ញុំ​ឆ្មប​គិលានុបដ្ឋាក​ធម្មតា​អ៊ីចឹង យើង​កុង​ត្រា​គេ ១១០​ដុល្លារ​តែ​ដល់​ពេល​បើក​បាន​តែ​ជាង​៧០ ទេ អ្នក​នៅ​ការិយាល័យ​ហ្នឹង​គឺ​ចុះ​មក​វា​យក​តម្លៃ​មិន​មែន​គាត់​កាត់​ត្រឹម​មន្ទីរ​ពេទ្យ​ទេ មណ្ឌល​សុខភាព​ក៏​កាត់​ដែរ​ការិយាល័យ​ចម្ការ​លើ​ស្ទឹង​ត្រង់​មាន ១៣​មណ្ឌល​សុខ​ភាព"

បុគ្គលិក​ដទៃ​ទៀត​បាន​លើក​ឡើង​ពី​ការ​មិន​សប្បាយ​ចិត្ត​ប្រហាក់​ប្រហែល​គ្នា​ដែរ អំពី​ការ​កាត់​នេះ​ដោយ​ពួក​គេ​ទាមទារ​ឲ្យ​ប្រាក់​នោះ​បើក​ជូន​ដូច​ក្នុង​កិច្ច​សន្យា ៖ "យើង​មិន​ចង់​ឲ្យ​កាត់​អ៊ីចឹង​លុយ​ក្នុង​កិច្ច​សន្យា​ប៉ុន្មាន​ឲ្យ​បាន​ប៉ុណ្ណឹង​ដូច​ខ្ញុំ​អាំង​ហ្វៀមីញេ (infirmier) បាន ៧១​ដុល្លារ​ប៉ុន្តែ​បើក​មិន​ដែល​បាន​ទេ​នយោបាយ​ហ្នឹង​ខុស​ពី​កិច្ច​សន្យា"

បុគ្គលិក​ពេទ្យ​ទាំង​អស់​នោះ​បាន​អះអាង​ថា ការ​វាយ​តម្លៃ​ការ​ងារ​ដើម្បី​ទទួល​ប្រាក់​ឧបត្ថម្ភ​នោះ គឺ​ធ្វើ​ឡើង​ដោយ​គ្មាន​តម្លាភាព។

លោក ជា អៀក​ឆាយ ដែល​ត្រូវ​បុគ្គលិក​ពេទ្យ​ទាំង​នោះ​ចោទ​ប្រកាន់​ថា​បាន​កាត់​ប្រាក់​លើក​ទឹក​ចិត្ត​គ្មាន​តម្លាភាព​នោះ​បាន​ជម្រាប​កាល​ពី​ថ្ងៃ​ទី​២៦ ថា​លោក​បាន​ស្គាល់​ហើយ​អ្នក​បង្ក​ចលាចល​នៅ​ទី​នោះ​មាន​ប្រមាណ​តែ​ប្រាំ ឬ​ប្រាំ​មួយ​នាក់​ប៉ុណ្ណោះ​ក្នុង​ការ​វាយ​តម្លៃ​ហើយ​លោក​ថា​ទីភ្នាក់ងារ​ប្រតិបត្តិការ​ពិសេស​មិន​មែន​ធ្វើ​តែ​ម្នាក់​លោក​ទេ ៖ "វាយ​តម្លៃ​ហ្នឹង​មិន​មែន​តែ​ខ្ញុំ​ដែល​ជា​ប្រធាន​មើល​តែ​ឯង​ទេ មាន​ក្រុម​ខ្ញុំ ៦​នាក់ ចូល​រួម​វាយ​តម្លៃ​ប្រចាំ​ត្រីមាស​គេ​ដាក់​ឧបករណ៍​សម្រាប់​ឲ្យ​ពួក​ខ្ញុំ​ជា​អ្នក​គ្រប់គ្រង​អនុវត្ត​មើល​ទៅ​ការ​ផ្ដល់​សេវា​ត្រួត​ពិនិត្យ​មើល​ស្ថានភាព​ទូ​ទៅ​ដូច​អនាម័យ​គុណភាព​ឯកសារ និង​បទ​បញ្ជា​ផ្ទៃ​ក្នុង"

លោក ជា អៀក​ឆាយ បាន​បន្ថែម​ថា តាម​ពិត​គឺ​ពួក​គាត់​មិន​ទទួល​ខុស​ត្រូវ​ខ្លួន​ឯង​ដោយ​ចង់​បាន​ប្រាក់​នោះ​មក​ចាយ​វាយ​ដោយ​មិន​ធ្វើ​ការ​ដោយ​លោក​បញ្ជាក់​ថា ប្រព័ន្ធ​ហ្នឹង​គេ​ធ្វើ​មិន​ឲ្យ​យើង​យក​លុយ​ចាយ​ស្រួល​ទេ ហើយ​ថា​មាន​អង្គការ​ចំនួន​៧ បាន​ឃ្លាំ​ត្រួត​ពិនិត្យ​មើល​ពី​លើ​ទៀត​ហើយ​ថា​គណៈកម្មការ​សវនកម្ម បាន​ចុះ​ត្រួត​ពិនិត្យ​ជា​ប្រចាំ ដោយ​ពុំ​មាន​ចោទ​ថា​គ្មាន​តម្លាភាព​ឡើយ។ លោក អៀក ឆាយ បន្ថែម​ទៀត​ថា ប្រាក់​ដែល​បាន​កាត់​នោះ គឺ​ទុក​ជា​កញ្ចប់​សម្រាប់​ចែក​ជូន​បុគ្គលិក​គ្នា​គាត់​ដែល​សកម្ម ដូច្នេះ​មិន​អាច​ទទួល​ប្រាក់​នេះ​ដោយ​គ្មាន​ការ​វាយ​តម្លៃ​ឡើយ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
ក្រុម​មន្ត្រី​ជាន់ខ្ពស់​គណបក្ស​កាន់​អំណាច​ប្រតិកម្ម​នឹង​ពលរដ្ឋ​ខ្មែរ​រស់នៅ​ក្រៅ​ប្រទេស ជេរ​ប្រមាថ​លោក ហ៊ុន ម៉ាណែត តាម​បណ្ដាញ​សង្គម
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។