លោក ឌី រៀ ត្រូវជាឪពុកមាជនរងគ្រោះបានឲ្យដឹងថា បុរសស្វិតជើងម្ខាងឈ្មោះ កេន ធា អាយុ៣៦ឆ្នាំ និងភរិយាឈ្មោះ យ៉ាន មុំ អាយុ២៧ឆ្នាំ កំពុងជាប់ឃុំនៅស្នងការខេត្តកំពត រហូតមកដល់ថ្ងៃពុធ ទី១១ ឧសភា។
លោកថារឿងហេតុចាប់ឃុំនេះ បានកើតឡើងនៅគ្រាដែល កេន ធា យកបង្គោលឈើទៅបោះលើដីរបស់ខ្លួន ដែលរដ្ឋបានពង្រីកផ្លូវ ហើយឲ្យថយផ្ទះរុះរើចេញពីអ័ក្ស ២៥ម៉ែត្រ។ បុរសឈ្មោះ កេន ធា បានព្រមរុះផ្ទះរបស់ខ្លួនចេញហើយ ប៉ុន្តែមានអ្នកថ្មីមកបោះបង្គោលរកសង់រោងលើដីចំណីផ្លូវគាត់ថយចេញនោះ។ ពេលនោះ កេន ធា ក៏យកបង្គោលឈើទៅបោះដែរ ក្រោយមកក៏ត្រូវប៉ូលិសឃុំចុះទៅបង្កជម្លោះ ទើបប៉ូលិសចាប់ខ្លួន កេន ធា និងវាយដំជាទម្ងន់។
អ្នកភូមិរស់នៅក្បែរនោះ បានឃើញហេតុការណ៍ បានអះអាងថា ប៉ូលិសឃុំព្រៃថ្នងចំនួន ៤នាក់ បានវាយដំលើបុរសស្វិតជើង និងភរិយា ដែលរត់ទៅជួយប្តី ក្រោយពីមានការតដៃគ្នា ទៅវិញទៅមកមួយសន្ទុះ ប៉ូលិសចាប់ខ្លួនបុរសស្វិតជើងយកទៅឃុំ។
មេភូមិទ្វីថ្មី ឃុំព្រៃថ្នង លោក ចាន់ ថន បានអះអាងថា គ្រួសារបុរសឈ្មោះ កេន ធា បានយល់ព្រមយកប្រាក់សំណងពីគណៈកម្មការសុរិយោដីហើយ ប៉ុន្តែគេចង់មកសង់រោងលើដីខ្លួនទៀត ទើបប៉ូលិសចុះទៅណែនាំ។ ប៉ុន្តែបុរសនោះបែរជាជេរប្រមាថប៉ូលិស ទើបមានការប្រទូស្តសារាយដាក់គ្នាបានកើតឡើង។
វិទ្យុអាស៊ីសេរីមិនអាចទាក់ទងមេប៉ុស្តិ៍ឃុំព្រៃថ្នង ដើម្បីជម្រាបសួរការចោទខាងលើបានទេ នៅថ្ងៃពុធ ទី១១ ឧសភា។
ទោះជាយ៉ាងណា ពីរនាក់ប្ដីប្រពន្ធ ដែលជាជនរងការវាយដំនោះ ត្រូវសមត្ថកិច្ចចាប់ឃុំនៅស្នងការខេត្តកំពត មិនទាន់ដោះលែងនៅឡើយ រហូតមកដល់ថ្ងៃពុធ ទី១១ ឧសភា៕