លោកអគ្គនាយក អឿន រតនៈ នៃស្ថានីយទូរទស្សន៍ខ្មែរលើប្រព័ន្ធអ៊ិនធឺណិត (Khmer IPTV) បានមានប្រសាសន៍ថា ប្រព័ន្ធការផ្សាយរបស់លោកមានភ្ជាប់ការផ្សាយបន្តផ្ទាល់ពីប្រព័ន្ធវិទ្យុនិងទូរទស្សន៍មួយចំនួនមកពីប្រទេសកម្ពុជា និងមួយចំនួនទៀតមកពីប្រព័ន្ធទូរទស្សន៍នៅបរទេស។
លោកឲ្យដឹងថា ការផ្សាយទាំងនោះក្រៅពីការផ្សាយផ្ទាល់ពីប្រព័ន្ធទូរទស្សន៍នីមួយៗក៏មានការផ្សាយដទៃទៀត មានរួមទាំងការសម្តែងរឿងកំប្លែងផ្សេងៗនិងចម្រៀងខារ៉ាអូខេជាដើមផង។
លោក អឿន រតនៈ បានមានប្រសាសន៍ថា ៖ «ខ្មែរ IPTV បានចូលមកបម្រើប្រជាពលរដ្ឋខ្មែរទូទាំងពិភពលោកចាប់តាំងពីពេលនេះតទៅ។ កម្មវិធីប៉ុស្តិ៍ទូរទស្សន៍មកពីស្រុកខ្មែរយើងមានដូចជាទូរទស្សន៍ប៉ុស្តិ៍លេខ៣ ទូរទស្សន៍ប៉ុស្តិ៍លេខ៩ ទូរទស្សន៍បាយ័ន ហើយប៉ុស្តិ៍នៅសហរដ្ឋអាមេរិកនេះ យើងមានប៉ុស្តិ៍ទូរទស្សន៍អាស៊ីអាមេរិកាំង ប៉ុស្តិ៍កុន ២៤ម៉ោងលើ២៤ម៉ោង ប៉ុស្តិ៍ខារ៉ាអូខេ ២៤ម៉ោងលើ២៤ម៉ោង និងប៉ុស្តិ៍កំប្លែង ២៤ម៉ោងលើ២៤ម៉ោង។ អស់លោកអាចចូលទៅមើលកម្មវិធីទូរទស្សន៍នេះតាមរយៈ IPBOX ដែលហៅថា Desktop Box ឬក៏យើងចូលទស្សនាកម្មវិធីទូរទស្សន៍នេះនៅក្នុងគេហទំព័រ khiptv.com។ កម្មវិធីផ្សាយមាន២៤ម៉ោងក្នុងមួយថ្ងៃ ៧ថ្ងៃក្នុងមួយអាទិត្យ»។
លោកអគ្គនាយក អឿន រតនៈ នៃស្ថានីយទូរទស្សន៍ខ្មែរមួយនេះឲ្យដឹងថា ប្រព័ន្ធការផ្សាយទូរទស្សន៍របស់លោកគឺគេអាចទស្សនាបាននៅជុំវិញពិភពលោក៕