មេបញ្ជាការប៉ូលិសការពារព្រំដែននៃស្នងការដ្ឋានប៉ូលិសខេត្តស្ទឹងត្រែង លោក ហ៊ុន បាន បញ្ជាក់ឲ្យដឹងនៅថ្ងៃអង្គារ ទី១៧ ខែឧសភា ឆ្នាំ២០១១ ថា ពលរដ្ឋឡាវ និងខ្មែរដែលត្រូវតម្រួតការពារព្រំដែននៃប្រទេសទាំងពីរចាប់ខ្លួននោះ សុទ្ធសឹងតែមានកំហុសលួចឆ្លងដែនដើម្បីប្រកបរបរខុសច្បាប់ទើបត្រូវចាប់ខ្លួនតាមកិច្ចព្រមព្រៀងរវាងអាជ្ញាធរខេត្តទាំងពីរ។
លោកបន្តថា ពលរដ្ឋឡាវ និងខ្មែរទាំងអស់នោះ ត្រូវចាប់ខ្លួនកាលពីថ្ងៃទី១៥ ខែឧសភា ឆ្នាំ២០១១ ក្នុងនោះពលរដ្ឋឡាវ ៩នាក់ កំពុងរក្សាទុកនៅបញ្ជាការដ្ឋានយោធាការពារព្រំដែនលេខ១០១ មានទីតាំងនៅភូមិកំភោគ ស្រុកសៀមប៉ាង ជាប់នឹងខេត្តចំប៉ាសាក់ ប្រទេសឡាវ ចំណែកពលរដ្ឋខ្មែរ ៤នាក់ត្រូវតម្រួតឡាវ បញ្ជូនខ្លួនទៅរក្សាទុកនៅខេត្តចំប៉ាសាក់ ប្រទេសឡាវហើយ។
លោក ហ៊ុន បាន មានប្រសាសន៍បញ្ជាក់ថា ៖ «នៅទេ! ម្សិលមិញ (១៦ ឧសភា) គេចុះកិច្ចសន្យាថា ឲ្យជួបគ្នាដើម្បីលែង ប៉ុន្តែឥឡូវអាពួកហ្នឹងវាបញ្ជូនកម្លាំងយើងហ្នឹង ៤នាក់ទៅខេត្តហើយ។ អ៊ីចឹងយើងក៏អត់ទាន់នេះដែរ យើងចាំជួបគ្នាដើម្បីដោះស្រាយរឿងហ្នឹង។ វាដើររកស៊ីខុសច្បាប់តិចតួច»។
កាលពីថ្ងៃទី១២ ខែឧសភា ឆ្នាំ២០១១ កន្លងទៅ ពលរដ្ឋខ្មែរចំនួន ៤នាក់ ត្រូវបានអាជ្ញាធរខេត្តចំប៉ាសាក់ ប្រទេសឡាវ ប្រគល់មកអាជ្ញាធរខេត្តស្ទឹងត្រែងវិញ បន្ទាប់ពីពួកគេត្រូវចាប់ខ្លួនបន្តបន្ទាប់គ្នា។ ក្នុងនោះមានពលរដ្ឋខ្មែរពីរនាក់ត្រូវចាប់ខ្លួនកាលពីថ្ងៃទី១២ ខែមីនា ឆ្នាំ២០១១ និងពីរនាក់ទៀតត្រូវចាប់ខ្លួនកាលពីថ្ងៃទី២៨ ខែមេសា ឆ្នាំ២០១១ ខណៈពួកគេឆ្លងកាត់ខ្សែបន្ទាត់ព្រំដែននៅវេលាយប់ចូលទៅដីឡាវ។
សេចក្ដីរាយការណ៍ពីមន្ត្រីនគរបាលការពារខេត្តស្ទឹងត្រែង សុំមិនបញ្ចេញឈ្មោះឲ្យដឹងថា ពលរដ្ឋខ្មែរ និងឡាវ ដែលលូចឆ្លងដែនខុសច្បាប់ទាំងនោះ សុទ្ធសឹងតែប្រកបរបរខុសច្បាប់ មានកាប់ឈើប្រណីត បរបាញ់សត្វព្រៃ ឬធ្វើជំនួញគ្រឿងញៀនឆ្លងដែនជាដើម។
មិនទាន់មានសេចក្ដីរាយការណ៍ឲ្យដឹងថា តើពលរដ្ឋខ្មែរ និងឡាវ ដែលត្រូវឃាត់ខ្លួន តើក្រុមអាជ្ញាធរខេត្តទាំងពីរនឹងចាត់វិធានការបែបណាទេ។ ក៏ប៉ុន្តែមេបញ្ជាការប៉ូលិសការពារព្រំដែន លោក ហ៊ុន បាន បញ្ជាក់ឲ្យដឹងថា អាជ្ញាធរខេត្តទាំងពីរកំពុងទំនាក់ទំនងជួបពិភាក្សាគ្នាក្នុងបញ្ហានេះហើយ៕