ប្រធានក្រុមហ៊ុនដឹកជញ្ជូនភ្ញៀវទេសចរណ៍ ហង្ស ទេព លោកស្រី ស៊ីម សារ៉េត បានមានប្រសាសន៍នៅថ្ងៃព្រហស្បតិ៍ ទី២៨ ខែមេសា ថា ភ្ញៀវទេសចរណ៍ជនជាតិថៃ មានការធ្លាក់ចុះច្រើនជាងភ្ញៀវអឺរ៉ុប ៖ «គេអត់ហ៊ានមក គេថា យើងបាញ់គ្នា ប៉ុន្តែចំពោះភ្ញៀវអឺរ៉ុបមានមក។ ធ្លាប់មក ៥០អីឥឡូវវាមកត្រឹម ៣០អី លើកលែងតែភ្ញៀវជនជាតិថៃ ភ្ញៀវដែលជាក្រុមធំៗ ៥០នាក់ ៦០នាក់អី គេលុបចោលអស់ហើយ...»។
កងទ័ពកម្ពុជា-ថៃ បានចាប់ផ្ដើមច្បាំងគ្នាសាជាថ្មីចាប់តាំងពីថ្ងៃទី២២ ខែមេសា រហូតដល់ថ្ងៃព្រហស្បតិ៍ ទី២៨ ខែមេសា ឆ្នាំ២០១១។ ការបាញ់ផ្លោងផ្តក់ដាក់គ្នាទាំងកាំភ្លើងតូច កាំភ្លើងធំ រវាងកងទ័ពនៃប្រទេសទាំងពីរ កម្ពុជា-ថៃ នៅតំបន់ព្រំដែនក្នុងខេត្តឧត្តរមានជ័យ ប្រទេសកម្ពុជា នៅតែកើតមានមិនទាន់ចប់ ហើយអាចធ្វើឲ្យប៉ះពាល់ដល់អារម្មណ៍ភ្ញៀវទេសចរណ៍ ក្នុងការសម្រេចចិត្តធ្វើដំណើរមកទស្សនាក្នុងប្រទេសទាំងពីរកម្ពុជា-ថៃ។
ចំណែកឯតំណាងក្រុមហ៊ុនខ្លះដែលមានភាគហ៊ុនជាមួយក្រុមហ៊ុនថៃ បានថ្លែងថា ពួកគេនៅតែមានការព្រួយបារម្ភចំពោះការច្បាំងគ្នារវាងកងទ័ពកម្ពុជា-ថៃ អាចអូសបន្លាយរយៈពេលយូរ ដែលធ្វើឲ្យប៉ះពាល់បញ្ហាសន្តិសុខរបស់ភ្ញៀវទេសចរណ៍បរទេស ៖ «ក្រុមហ៊ុនខាងថៃ គេបានប្រាប់យើងថា ចាំមើលរៀងខ្លួន ចាំមើលតាមហេតុការណ៍ គេមិនមានថ្ងៃកំណត់ឲ្យយើងទេ។ លើកមុនពន្យារ អ៊ីចឹងដាច់អស់ អត់មានអី ព្រោះថាគេខ្លាច»។
ប្រធានមន្ទីរទេសចរណ៍ខេត្តបន្ទាយមានជ័យ លោក ជុង ឡឹម បានមានប្រសាសន៍ថា ចំនួនភ្ញៀវទេសចរណ៍បរទេស ដែលឆ្លងកាត់ច្រកទ្វារអន្តរជាតិប៉ោយប៉ែត មានការស្រុតចុះបន្តិចទៅតាមរដូវកាល ប៉ុន្តែមិនមែនដោយសារការផ្ទុះអាវុធច្បាំងគ្នានោះទេ ៖ «តាមខ្ញុំពិនិត្យមើលដូចអត់មានអីប៉ះពាល់ដល់ភ្ញៀវទេសចរណ៍បរទេសទេ ភ្ញៀវទេសចរណ៍បរទេសគាត់មកហាក់ដូចជាពុំមានការចាប់អារម្មណ៍ភ័យខ្លាចចំពោះសភាពការណ៍ គាត់មកធម្មតា យើងសួរនាំគាត់ គាត់មកធម្មតា»។
លោកប្រធានមន្ទីរទេសចរណ៍ បានបន្តថា ចំនួនភ្ញៀវទេសចរណ៍លំដាប់ថ្នាក់លេខ១ ដែលធ្វើដំណើរឆ្លងកាត់ច្រកទ្វារអន្តរជាតិប៉ោយប៉ែត គឺជាភ្ញៀវជនជាតិរុស្ស៊ី លំដាប់លេខ២ គឺភ្ញៀវជនជាតិកូរ៉េ លំដាប់លេខ៣ គឺភ្ញៀវថៃ បន្ទាប់មកជប៉ុន ចិន អាមេរិក និងភ្ញៀវជនជាតិអង់គ្លេស។
លោកបន្តថា ៖ «ប៉ុន្តែគួរកត់សម្គាល់តាំងពីចូលឆ្នាំ ច្រកទ្វារនេះឡើងលំដាប់លេខ១ គឺភ្ញៀវរុស្ស៊ី ថ្ងៃណាក៏ ១០០ជាង ទៅ ២០០ជាងដែរ ដែលឆ្នាំទៅច្រកទ្វារនេះដើរតួលេខ១ ជួនកាលកូរ៉េ ជួនកាលថៃ តាមខែ ខែខ្លះកូរ៉េ ឡើងលេខ១ ខែខ្លះថៃឡើងលេខ១ ដល់ចូលឆ្នាំនេះភ្ញៀវរុស្ស៊ី...»។
ស្ថិតិរបស់មន្ទីរទេសចរណ៍ខេត្តបន្ទាយមានជ័យ បានបង្ហាញថា ចំនួនភ្ញៀវទេសចរណ៍បរទេសដែលធ្វើដំណើរឆ្លងកាត់ច្រកទ្វារអន្តរជាតិប៉ោយប៉ែត ក្នុងរយៈពេលបីខែ នៅដើមឆ្នាំ២០១១នេះ ភ្ញៀវទេសចរណ៍បរទេសមានចំនួន ១១៦.៣៤៩នាក់ កើនឡើងច្រើនជាងដើមឆ្នាំ២០១០ កន្លងទៅ ដែលក្នុងរយៈពេលបីខែដូចគ្នា មានត្រឹមតែ ៩០.៨២៦នាក់៕