សព​អតីត​មេ​គុក​ទួល​ស្លែង លោក កាំង ហ្កេកអ៊ាវ ហៅ ឌុច ​បូជា​នៅ​វត្ត​ចាក់​អង្រែ​ក្រោម ក្រុង​ភ្នំពេញ

ដោយ ទីន ហ្សាការីយ៉ា
2020-09-02
Share
ឌុច លោក កាំង ហ្កេកអ៊ាវ ហៅ ឌុច អតីត​ប្រធាន​គុក​ទួល​ស្លែង ឬ​ហៅ​ថា ស-២១ ក្នុង​របប​ខ្មែរក្រហម។
រូប៖ ECCC

សព​អតីត​មេ​គុក​ទួល​ស្លែង​ក្នុង​របប​ខ្មែរក្រហម​លោក កាំង ហ្កេកអ៊ាវ ហៅ ឌុច ត្រូវ​បាន​សាច់​ញាតិ និង​អាជ្ញាធរ​យក​ទៅ​បូជា​ភ្លាមៗ នៅ​រសៀល​ថ្ងៃ​ទី២ កញ្ញា ចាក់​អង្រែ​ក្រោម​ដោយ​ពុំ​ធ្វើបុណ្យ​អ្វី​នោះ​ទេ ក្រោយ​លោក​ស្លាប់​កាល​ពី​ថ្ងៃ​ទី១ កញ្ញា។ អ្នក​ស្រាវជ្រាវ​ផ្នែក​ប្រវត្តិសាស្ត្រ​ថា ឌុច ជា​មនុស្ស​ច្រើន​និយាយ​យក​រួចខ្លួន​ដោយ​អះអាង​ថា ការ​សម្លាប់​មនុស្ស​ក្នុង​គុក​ទួល​ស្លែង​ជា​ការ​ធ្វើតាម​បញ្ជា​អង្គការ។

មរណភាពរបស់ ឌុច ត្រូវបានអ្នក​ស្រាវជ្រាវ​ប្រវត្តិសាស្ត្រ និងអង្គទូតប្រទេសលោកសេរីមួយចំនួនបានបញ្ចេញមតិយល់​ឃើញខុស​គ្នា។ ទោះ​បី​ជា ឌុច បានស្លាប់នៅក្នុងពេលដំណើរការសាលាក្ដីខ្មែរ​ក្រហមមិនទាន់បានបិទបញ្ចប់ដំណើរ​ការសំណុំរឿងកាត់​ទោសអតីតមេ​ដឹក​នាំខ្មែរ​ក្រហមចប់សប់គ្រប់ក្ដី ក៏អង្គទូតទាំង​នេះ នៅ​តែគាំទ្រលើដំណើរកាត់​ក្ដីអតីតមេ​ដឹក​នាំខ្មែរ​ក្រហមបន្តទៅ​ទៀត។

ឯកអគ្គរដ្ឋទូតសហរដ្ឋ​អាមេរិកប្រចាំកម្ពុជា លោក ប៉ាទ្រីក ម៉័ហ្វី (Patrick Murphy) សរសេរសារនៅលើទំព័រទ្វីតធ័រ (Twitter) របស់លោកនៅថ្ងៃទី២ កញ្ញាថា សហរដ្ឋ​អាមេរិកសម្ដែងទឹក​ចិត្តក្រៀមក្រំចំពោះអ្នកដែលត្រូវបានសម្លាប់ក្រោមបញ្ជាលោក ឌុច។ លោកថា សហរដ្ឋ​អាមេរិកចូលរួមជាមួយកម្ពុជា និងសហគមន៍អន្តរជាតិក្នុងការទ្រទ្រង់ដល់ដំណើរ​ការកាត់​ក្តីរបស់តុលាការខ្មែរ​ក្រហម ដែលបាននាំ​ឲ្យមាន​ការកាត់​ទោស «ឌុ» ពីបទឧក្រិដ្ឋកម្មប្រឆាំងមនុស្ស​ជាតិ ហើយ​ដែលជាព្រឹត្តិការណ៍ប្រវត្តិសាស្ត្រមួយក្នុងការធានាឲ្យមាននូវការ​ទទួល​ខុស​ត្រូវ។

ដោយ​ឡែកឯកអគ្គរដ្ឋទូតអូស្ត្រាលីប្រចាំកម្ពុជា លោក ប៉ាប្លូ កាង (Pablo Kang) ថ្លែងក្នុង​សេចក្ដី​ប្រកាសព័ត៌មានរបស់ស្ថានទូតអូស្ត្រាលីនៅថ្ងៃទី២ កញ្ញាថា ថ្ងៃ​នេះ ប្រទេសអូស្ត្រាលីស្ថិត​នៅជាមួយអ្នកដែលរងគ្រោះដោយរបបខ្មែរ​ក្រហម និងក្រុមគ្រួសាររបស់ពួក​គេ។ លោកថា ថ្ងៃនេះនឹងក្លាយជាថ្ងៃដ៏ឈឺចាប់សម្រាប់មនុស្សភាគច្រើននៅកម្ពុជា ក៏​ប៉ុន្តែប្រទេសអូស្ត្រាលីសង្ឃឹមថា ការណ៍ដែលសមមិត្ត ឌុច ត្រូវបាននាំយក​មកកាត់ទោសដោយសារតែទង្វើរបស់គាត់នឹងនាំ​មកនូវសេចក្ដីស្ងប់ចំពោះមនុស្សមួយចំនួន។ លោកគូសបញ្ជាក់ថា អូស្ត្រាលីមាន​សេចក្ដី​រីករាយដែលជំនួយរបស់អូស្ត្រាលីសម្រាប់សាលាក្ដីខ្មែរក្រហមបានជួយអ្នកដែលនៅរស់រាន និងក្រុមគ្រួសាររបស់ពួក​គេឲ្យទទួលបាននូវការទទួល​ស្គាល់ ហើយ​ដែលជំនួយរបស់អូស្ត្រាលីបានជួយគាំទ្រដល់ពលរដ្ឋកម្ពុជាឲ្យអាចស្វែងយល់ពីអតីតកាលរបស់ពួក​គេ និងបានជួយឲ្យពិភព​លោកធានាថា អំពើឃោរឃៅដូចអ្វីដែលសមមិត្ត ឌុច ធ្លាប់បានប្រព្រឹត្តិនឹងមិនកើត​មាន​ឡើងជាថ្មីទៀតនោះទេ

រីឯ​នាយកមជ្ឈមណ្ឌលឯកសារកម្ពុជាលោក ឆាំង យុ ដែលធ្វើ​ការងារស្រាវជ្រាវពីករណីប្រល័យពូសាសន៍វិញ ឱ្យអាស៊ីសេរីដឹងថា តាមឯកសារជន​រង​គ្រោះជាង ១៨.០០០នាក់ ត្រូវស្លាប់ក្នុង​គុកទួលស្លែងដែល ឌុច ជាអ្នក​គ្រប់គ្រង។ លោក ឆាំង យុ ថ្លែង​ថា ទោះជាមានពលរដ្ឋរាប់ម៉ឺននាក់បានស្លាប់នៅកន្លែងដែលខ្លួនគ្រប់គ្រងបែបនេះក៏ដោយក៏ ឌុច ជាមនុស្ស​ម្នាក់គ្មានវិប្បដិសារីនូវអ្វីដែលខ្លួនប្រព្រឹត្តឡើយ ដោយអះអាងថាអ្វីដែលលោកធ្វើ គឺ​ជាបញ្ជារបស់អង្គការ៖ «

អ្នកនាំពាក្យរដ្ឋាភិបាលលោក ផៃ ស៊ីផាន មាន​ប្រសាសន៍​ថា ការស្លាប់របស់លោក កាំង ហ្កេកអ៊ាវ ហៅ ឌុច អតីតមេគុកទួលស្លែងគឺជានិមិត្តរូបដើម្បីស្វែងរកយុត្តិធម៌ដល់ជន​រង​គ្រោះនៅក្នុងរបបខ្មែរ​ក្រហមបានស្ងប់ចិត្តដោយសារ​តែរដ្ឋាភិបាលបានគោរពទៅ​តាមច្បាប់​អន្តរជាតិ ដែលបានកាត់​ទោសលោក កាំង ហ្កេកអ៊ាវ រួចរាល់ហើយ។ លោកថា អ្វីដែលរដ្ឋាភិបាលកម្ពុជាបានធ្វើកន្លង​មក គឺដើម្បី​កុំ​ឲ្យរបបខ្មែរ​ក្រហមវិលត្រឡប់​មក​វិញ សារជាថ្មី​ម្ដង​ទៀត ដែលឈានទៅរក​ការកាប់សម្លាប់​ ​រង្គាលជាថ្មីទៀត៖ «

លោក កាំង ហ្កេអ៊ាវ ហៅ ឌុច ត្រូវបានតុលាការយោធាកម្ពុជាចាប់ឃុំខ្លួនតាំងពីឆ្នាំ៩។ លោកត្រូវបានផ្ទេរទៅឃុំខ្លួននៅសាលាក្ដីខ្មែរ​ក្រហម ហើយត្រូវបានតុលាការកំពូលនៃសាលាក្ដីកូនកាត់មួយនេះបានផ្ដន្ទាទោសលោក​ក្នុងសំណុំរឿងលេខ ០០១ ឲ្យជាប់​ពន្ធនាគារអស់​មួយ​ជីវិត កាល​ពីថ្ងៃទី៣ ខែកុម្ភៈ ឆ្នាំ២០១២ ពីបទ "ឧក្រិដ្ឋកម្មប្រឆាំងមនុស្ស​ជាតិ" និង "ឧក្រិដ្ឋកម្មសង្គ្រាម" ដែលបានប្រព្រឹត្តឡើងនៅគុកទួលស្លែងក្នុងរបបខ្មែរ​ក្រហម។

ដើម​បណ្ដឹងរដ្ឋប្បវេណីនិងជាអ្នកធ្លាប់ជាប់ក្នុង​គុកខេត្តសៀមរាបនៅក្នុងរបបខ្មែរ​ក្រហមលោក ស៊ុំ រិទ្ធី ឱ្យដឹងថា តាម​រយៈការឆ្លើយបំភ្លឺរបស់ ឌុច ក្នុងសវនាការនៃសាលាក្ដីខ្មែរក្រហមកន្លងមកឌុនិយាយលាក់បាំងកំហុសរបស់ខ្លួនច្រើនណាស់។ ប៉ុន្តែ លោក ស៊ុំ រិទ្ធី យល់​ថា ការសម្រេចឱ្យ ឌុច ជាប់ពន្ធនាគារអស់​មួយ​ជីវិត គឺធ្វើឱ្យលោកនិងជនរងគ្រោះផ្សេងទៀតអស់ចិត្ត៖

ឌុច ត្រូវបានសាលាក្ដីខ្មែរក្រហមរកឃើញថា ជាអ្នកទទួលខុសត្រូវខ្ពស់បំផុតចំពោះឧក្រិដ្ឋកម្មនៅគុកទួលស្លែង ឬមន្ទីរ ស-២១ ចន្លោះពីខែមេសា ឆ្នាំ១៩៧៥ ដល់ខែមករា ឆ្នាំ១៩៧៩ ក្នុងនាមលោកជាប្រធាននៅទី​នោះ។ គុកទួលស្លែង ឬមន្ទីរ ស-២១ នៅក្នុង​រយៈ​ពេល​នោះមានអ្នក​ទោសជាង ១ម៉ឺន ២ពាន់នាក់ ត្រូវបានគេយក​ទៅឃុំឃាំង ធ្វើទារុណកម្មសួរចម្លើយ រួច​ហើយ​ភាគ​ច្រើនបំផុតយក​ទៅសម្លាប់​ចោលនៅតំបន់ជើងឯកជាយក្រុងភ្នំពេញ។

ក្នុងអំឡុងពេលសង្គ្រាមពីចន្លោះឆ្នាំដល់ឆ្នាំ១៩៧៥ ឌុច ក៏ធ្លាប់មានតួនាទីជាមេបញ្ជា​ ​ការមន្ទីរសន្តិសុខនៃមន្ទីរ ម-១៣ និង ម-៩៩ ផងដែរ។ មេ​ដឹក​នាំរបបអាវខ្មៅដែលមានវ័យជរាបានបាត់បង់​ជីវិតជា​បន្តបន្ទាប់ក្នុងនោះមានលោក​ ​នួន​ ​ជា​ ​ប្រធានរដ្ឋសភាប្រជាជននៃរបបកម្ពុជា​ប្រជាធិបតេយ្យ​ ​និងជាបងធំទីបានស្លាប់កាលពីឆ្នាំ២០១៩ ក្នុងអាយុ ៩៣ឆ្នាំ។ លោក អៀង សារី អតីតឧបនាយក​រដ្ឋមន្ត្រី និងជារដ្ឋមន្ត្រីក្រសួងការបរទេសនៃរបបកម្ពុជាប្រជាធិបតេយ្យបានស្លាប់ក្នុងអាយុ ៨៨ឆ្នាំកាលពីឆ្នាំ២០១៤។ អ្នកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចនៃរបបកម្ពុជាប្រជាធិបតេយ្យ​ ​និងជាប្រពន្ធលោក អៀង សារី បានស្លាប់ក្នុងអាយុ ៨៣ឆ្នាំ កាល​ពីខែសីហា ឆ្នាំ២០១៥។ ពេល​នេះនៅ​សល់មេ​ដឹក​នាំជាន់​ខ្ពស់នៃរបបកម្ពុជា​ប្រជាធិបតេយ្យ ដែលជាជន​ជាប់​ចោទមួយរូបទៀតប៉ុណ្ណោះ គឺលោក ខៀវ សំផន ដែលជាអតីត​ប្រធានរដ្ឋ ឬប្រធានាធិបតី។

ទោះ​បី​ជាយ៉ាងក៏​ដោយមរណភាពរបស់ ឌុច មិនមាន​ការស្ដាយ​ស្រណោះពីមហាជននោះឡើយ ដោយសារ​តែ ឌុច ជាថ្នាក់ដឹក​នាំមួយរួប ដែលទទួល​ខុស​ត្រូវខ្ពស់បំផុតនៅក្នុងរបបខ្មែរ​ក្រហម ពិសេសលើការធ្វើទារុណកម្មសម្លាប់មនុស្សនៅមន្ទីរ ស-២១។ ចំពោះការបូជាសព ឌុច វិញ ពុំមានធ្វើពីធីបុណ្យអ្វីនោះទេ ការបូជាធ្វើឡើងដោយស្ងាប់ស្ងាត់នៅក្នុងបរិវេណវត្តចាក់អង្រែក្រោមក្នុងរាជធានីភ្នំពេញ។ នៅក្រោយពីបូជា​សពរួច សាច់​ញាតិ ឌុច បានយកអដ្ឋិធាតុយក​ទៅតំកល់​ទុកនៅខែត្របាត់ដំបងភ្លាមៗ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល