អង្គជំនុំជម្រះសាលាដំបូងនៃសាលាក្ដីខ្មែរក្រហម ចាប់ផ្ដើមធ្វើសវនាការរបស់ខ្លួនលើសំណុំរឿង០០២ វគ្គ២ បន្តទៀតហើយនៅព្រឹកថ្ងៃទី៨ មករា។ ប៉ុន្តែដោយសារជនជាប់ចោទ ខៀវ សំផន មានបញ្ហាសុខភាព បានបង្ខំឲ្យអង្គជំនុំជម្រះសម្រេចផ្អាកសវនាការនៅពេលរសៀល។
ជនជាប់ចោទ ខៀវ សំផន ត្រូវបានអាជ្ញាធរសាលាក្ដីខ្មែរក្រហម បញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត នៅរសៀលថ្ងៃទី៨ មករា។
ប្រធានអង្គជំនុំជម្រះសាលាដំបូង លោកចៅក្រម និល ណុន បានប្រកាសផ្អាកសវនាការស្ដាប់សាក្សីភ្លាមៗនៅពេលរសៀល ដោយសារតែអវត្តមានជនជាប់ចោទ ខៀវ សំផន៖ «លោក ខៀវ សំផន មានអាការៈវិលមុខខ្លាំង ហើយសម្ពាធឈាមឡើងខ្ពស់ ហើយឥឡូវនេះ ខាងគ្រូពេទ្យប្រចាំការនៅ អ.វ.ត.ក សម្រេចបញ្ជូនគាត់ទៅទទួលការពិនិត្យព្យាបាលនៅមន្ទីរពេទ្យមិត្តភាពខ្មែរ-សូវៀត។ ដោយសារមូលហេតុជនជាប់ចោទមួយរូបមានអាការៈដូច្នេះ ហើយមិនអាចចូលរួមនៅក្នុងកិច្ចដំណើរការសវនាការបាន ដូច្នេះអង្គជម្រះមិនអាចដំណើរការដោយអវត្តមានជនជាប់ចោទរបៀបនេះទេ។ ហេតុដូច្នេះ អង្គជម្រះសម្រេចប្រកាសផ្អាកកិច្ចដំណើរការសវនាការនៅរសៀលនេះត្រឹមនេះ ហើយសវនាការលើកទៅបន្តធ្វើនៅថ្ងៃស្អែក»។
មេធាវីការពារក្ដីជនជាប់ចោទ ខៀវ សំផន លោក គង់ សំអុន មានប្រសាសន៍បញ្ជាក់បន្ថែមថា តាមការសង្កេតអាការៈបញ្ហាសុខភាពរបស់កូនក្ដីលោក ហាក់ដូចជាមានស្ថានភាពធ្ងន់ធ្ងរ ដែលពិបាកទ្រាំ៖ «ពីព្រឹកមិញហ្នឹងគាត់មានបញ្ហាលើសឈាម អាចថាធ្ងន់ធ្ងរ ហើយបញ្ហាមួយទៀត ធ្វើឲ្យគាត់ឈឺក្បាលដែលវិលមុខខ្លាំង គាត់មិនអាចទ្រាំទ្រអង្គុយស្ដាប់សវនាការបាន។ ខ្ញុំពិនិត្យស្ថានភាពតាមភ្នែករបស់ខ្ញុំផ្ទាល់ហ្នឹងឃើញថា ពិបាកទ្រាំក្នុងខ្លួនណាស់ ប្រហែលមកពីការឈឺក្បាលខ្លាំង។ ស្ថានភាពបែបនេះ បើយើងមើលទៅ វាជាបញ្ហាដែលពិបាកក្នុងខ្លួនខ្លាំង ធ្វើឲ្យគាត់ទ្រាំមិនកើត»។
សវនាការនៅពេលព្រឹក គឺជាសវនាការស្ដាប់សក្ខីកម្មរបស់សាក្សីឈ្មោះ មាស សុខា ទាក់ទងទៅនឹងរឿងរ៉ាវនៅសហករណ៍ត្រាំកក់ ការប្រព្រឹត្តទៅលើពុទ្ធសាសនិក និងមន្ទីរសន្តិសុខក្រាំងតាចាន់ នៅខេត្តតាកែវ។ ក្នុងសវនាការនេះ ក៏មានការជជែកតវ៉ាគ្នាដែរ ដោយសារតែអង្គជំនុំជម្រះសាលាដំបូង ដាក់មេធាវីការពារក្ដីបម្រុង ដែលអង្គជំនុំជម្រះបានជ្រើសរើសដោយខ្លួនឯង ចូលអង្គុយជាមួយក្រុមមេធាវីដែលកំពុងការពារក្ដី លោក ខៀវ សំផន។ ទាំងជនជាប់ចោទ ខៀវ សំផន និងក្រុមមេធាវីរបស់គាត់ មិនពេញចិត្តនឹងការរៀបចំដូច្នេះទេ។
ជនជាប់ចោទ ខៀវ សំផន ចាត់ទុកការរៀបចំបែបនេះ ថាជាការគាបសង្កត់មេធាវីរបស់គាត់ ហើយគាត់នឹងរក្សាសិទ្ធិនៅស្ងៀមនៅក្នុងសវនាការខាងមុខ៖ «ដោយមានការគាបសង្កត់មកលើមេធាវីរបស់ខ្ញុំ ដូចបងប្អូនរួមជាតិទាំងអស់បានឃើញនឹងភ្នែកស្រាប់ ខ្ញុំគ្មានអីសង្ឃឹមអំពីតុលាការ អំពីអង្គជំនុំជម្រះសាលាដំបូងមួយដែលមិនលម្អៀងទៀតទេ។ ដូច្នេះជារួម ខ្ញុំសូមរក្សាសិទ្ធិនៅស្ងៀមស្ងាត់។ ក៏ប៉ុន្តែ យោងទៅតាមបរិបទដែលមាននៅក្នុងសំណុំរឿង០០២ លើ០២ ខ្ញុំសុំអនុញ្ញាតធ្វើសេចក្ដីថ្លែងការណ៍នៅពេលណាមួយដែលសមស្រប»។
ដោយឡែក ទាំងមេធាវីការពារក្ដីជនជាប់ចោទ ខៀវ សំផន និងជនជាប់ចោទ នួន ជា សុទ្ធតែបានស្នើសុំឲ្យអង្គជំនុំជម្រះពិចារណាឡើងវិញ អំពីការរៀបចំមេធាវីនេះ។ មេធាវីការពារក្ដីជនជាប់ចោទ ខៀវ សំផន ថ្លែងថា ជាវិធានការលឿនពេក និងមិនសមស្រប ព្រោះពួកលោកនៅមិនទាន់បោះបង់ការការពារកូនក្ដីនៅឡើយ៖ «យើងយល់ឃើញថា ការចាត់តាំងមេធាវីបម្រុងនេះ វាជាការគំរាមកំហែងដល់មេធាវីយើង ហើយក៏ឃើញថាមិនមានភាពចាំបាច់ក្នុងការឲ្យមេធាវីបម្រុងទៅចូលរួមនៅក្នុងបន្ទប់សវនាការដែរ ពីព្រោះយើងមិនដឹងថា តើឋានៈរបស់គាត់ជាអ្វី ក្នុងការដែលគាត់ទៅអង្គុយនៅក្នុងសវនាការនោះ ពីព្រោះយើងជាមេធាវីធ្វើការការពារ លោក ខៀវ សំផន នៅក្នុងនីតិវិធីតុលាការ។ ដូច្នេះ វត្តមានមេធាវីបម្រុងនេះ វាធ្វើឲ្យប៉ះពាល់ទៅដល់ការបំពេញវិជ្ជាជីវៈរបស់យើង»។
មជ្ឈដ្ឋានខ្លះសន្និដ្ឋានថា បញ្ហានៅពេលព្រឹកអាចជាមូលហេតុធ្វើឲ្យជនជាប់ចោទ ខៀវ សំផន មានភាពតឹងតែងក្នុងចិត្ត បង្កឲ្យសម្ពាធឈាមឡើង។
រហូតមកដល់ល្ងាចថ្ងៃទី៨ មករា ដដែល អ្នកនាំពាក្យសាលាក្ដីខ្មែរក្រហម លោក នេត្រ ភក្ដ្រា ឲ្យដឹងថា ជនជាប់ចោទ ខៀវ សំផន ឋិតនៅក្នុងមន្ទីរពេទ្យនៅឡើយ៖ «បាទ! រហូតមកដល់ម៉ោងនេះ លោក ខៀវ សំផន នៅបន្តឋិតនៅមន្ទីរពេទ្យមិត្តភាពខ្មែរ-សូវៀត ដដែល ដើម្បីអនុញ្ញាតឲ្យក្រុមគ្រូពេទ្យបន្តពិនិត្យព្យាបាលជំងឺរបស់គាត់។ ជំងឺរបស់គាត់ គឺការវិលមុខ ហើយនិងសម្ពាធឈាមឡើងខ្ពស់»។
លោកបញ្ជាក់បន្ថែមដែរថា អង្គជំនុំជម្រះសាលាដំបូង នៅរក្សាគម្រោងធ្វើសវនាការលើសំណុំរឿង០០២ វគ្គ២ ដដែល នៅព្រឹកថ្ងៃសុក្រ ទី៩ មករា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។