អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី១៥ ខែកញ្ញា ត្រឡប់មកស្ដាប់សក្ខីកម្មទាក់ទងនឹងមន្ទីរ ស-២១ ឬគុកទួលស្លែងបន្តទៀត។ សាក្សីថ្មីនៅក្នុងអង្គហេតុនេះអះអាងថា លោកជាប្រធានពួកផ្នែកថតរូបនៅមន្ទីរ ស-២១ ដែលបច្ចុប្បន្នជាសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។
សាក្សីថ្មីឈ្មោះ នឹម អ៊ឹម ហៅ នឹម គឹមសៀង ជម្រាបអង្គជំនុំជម្រះនៅថ្ងៃទី១៥ ខែកញ្ញា ថា លោកជាអតីតអ្នកថតរូបនៅគុកទួលស្លែងមុនគេ ចាប់តាំងពីពេលគុកនេះបង្កើតឡើងដំបូង រហូតដល់ថ្ងៃបបខ្មែរក្រហមដួលរលំ។
លោក នឹម អ៊ឹម ក៏ជាអតីតកងទ័ពខ្មែរក្រហមមួយរូបនៅក្នុងកងពលលេខ១២ ហើយក្រោយមកដូរឈ្មោះជាកងពល ៧០៣ ដែលមានឈ្មោះតា ណាត ជាបញ្ជាការ។ សាក្សីថ្លែងថា តាណាត នោះហើយដែលយកពួកលោកបីនាក់ទៅធ្វើជាអ្នកថតរូបក្នុងគុកនោះ នៅឆ្នាំ១៩៧៦៖ «ព្រោះកាលហ្នឹងតាណាត គាត់បើកឡានរបស់អាមេរិក ឌុបខ្ញុំ ៣នាក់ចូលមក ស-២១ សារមន្ទីរទួលស្លែង សព្វថ្ងៃហ្នឹង»។
សាក្សី នឹម អ៊ឹម គឺជាអ្នកថតរូបទី២ បន្ទាប់លោក ញ៉ែម អេន ដែលត្រូវបានសាលាក្ដីខ្មែរក្រហមកោះហៅឱ្យមកផ្ដល់សក្ខីកម្មទាក់ទងនឹងអង្គហេតុមន្ទីរ ស-២១។
ក្នុងសវនាការនេះ លោកត្រូវបានមេធាវីការពារក្ដីជនជាប់ចោទ នួន ជា គឺលោក វិកទ័រ កូប៉េ(Victor Koppe) សួរដេញដោលបញ្ជាក់អំពីតួនាទីរបស់អតីតអ្នកថតរូបមួយរូបទៀត គឺលោក ញ៉ែម អេន ដែលធ្លាប់អះអាងថា ជាប្រធានកងថតរូបដែរ។
លោកបញ្ជាក់ថា លោកជាអ្នកបង្រៀនលោក ញ៉ែម អេន អំពីការថតរូប។ ប៉ុន្តែលោកមិនហ៊ានបង្រៀនឱ្យចេះទេ ព្រោះចង់ពន្យារជីវិតរបស់លោក៖ «ក្រោយមក ឃើញ ញ៉ែម អេន ចូលទៅ។ អេន ហ្នឹងតូចណាស់។ ព្រោះពេលចាប់បញ្ជូនក្មេងឱ្យមកចូលកន្លែងខ្ញុំហ្នឹង ខ្ញុំដឹងខ្លួនហើយស្រេចហើយ ព្រោះខ្ញុំឃើញតា ណាត អ្នកនាំចូលមកទីនេះ ជាប់គុក។ ប្អូនខ្ញុំក៏នៅហ្នឹង អ្នកជិតខាងខ្ញុំក៏នៅទីហ្នឹង ខ្ញុំដឹងខ្លួនហើយស្រេចថា បើបង្រៀនវាឱ្យចេះ គឺងាប់បណ្ដោយ ព្រោះជំនាន់នោះ អ្នកចាស់បណ្ដុះអ្នកថ្មីបានគឺងាប់ហើយ បានជាខ្ញុំមិនបង្រៀនវាឱ្យចេះ គឺគ្រាន់តែឱ្យចេះតែថតទេ។ រឿងលាយថ្នាំផ្ដិតរូបអីមិនទាន់ចេះទេ ញ៉ែម អេន ហ្នឹង។ ក្នុងរយៈកាលហ្នឹង គ្រាន់តែចូល ញ៉ែម អេន ហើយនិងពីរនាក់ទៀតចូលទៅ ខ្ញុំប្រាប់គ្នាខ្ញុំថា កុំ! ហាមផ្ដាច់កុំឱ្យរៀនចេះឱ្យសោះ ចេះតែថតបានហើយ។ តែពេលនោះដល់ដំណាក់កាលបែកទៅ ខ្ញុំរួចខ្លួនបណ្ដោយ»។
លោក នឹម អ៊ឹម បដិសេធថា លោកមិនដឹងប្រភពដើមរបស់លោក ញ៉ែម អេន ពីមុនមកទេ។ លោកស្គាល់លោក ញ៉ែម អេន ត្រឹមពេលដែលតា ឌុច ប្រធានមន្ទីរ ស-២១ បញ្ជូនចូលទៅធ្វើការនៅទីនោះក្នុងឆ្នាំ១៩៧៨។ លោកថា ពេលនោះ គឺក្នុងអំឡុងពេលគេចាប់មេបញ្ជាការរបស់លោកឈ្មោះ ណាត បាន ៦ខែ មុនពេលរបបខ្មែរក្រហមដួលរលំ។ បន្ទាប់ពីការចាប់មេបញ្ជាការ មានសមាជិកកងទ័ពនៅកងពល ៧០៣ ជាច្រើននាក់ទៀត ក៏ត្រូវបានចាប់ខ្លួនដាក់ក្នុងមន្ទីរ ស-២១ ដែរ ដោយសារតែជាប់ចោទថា ចូលដៃជាមួយវៀតណាម ក្បត់អង្គការបក្សកុម្មុយនិស្តកម្ពុជា ជាពិសេសកម្មាភិបាលនៅភូមិភាគកណ្ដាល ពាយ័ព្យ និងកម្មាភិបាលបូព៌ា ឈ្មោះ សោ ភឹម។
បញ្ជីអ្នកទោស ១២.៧០០នាក់ ត្រូវបានអង្គជំនុំជម្រះសាលាដំបូងយកធ្វើជាភស្តុតាងសម្រាប់ជំនុំជម្រះក្នុងសំណុំរឿង ០០១ និង ០០២។ ក្រៅពីនេះ ក៏មានរូបថតអ្នកទោសនៅ ស-២១ ជាង ៥ពាន់សន្លឹកផ្សេងទៀត ក៏ត្រូវបានអង្គជំនុំជម្រះយកមកធ្វើជាភស្តុតាងដែរ។ នៅពេលដែលសហព្រះរាជអាជ្ញាបង្ហាញរូបថតខ្លះៗ សាក្សី នឹម អ៊ឹម ទទួលស្គាល់ថា ជារូបលោកថត។ ទោះជាយ៉ាងនេះក្ដី សាក្សី នឹម អ៊ឹម ថ្លែងថា លោកមិនបានថតរូបអ្នកទោសទាំងអស់ទេ ជាពិសេសអ្នកទោសសំខាន់ៗ គឺមានអ្នកថតជាបក្ខជន៖ «ខ្ញុំកន្លងមក មិនដែលជួបអ្នកធំសុទ្ធ ព្រោះកាលហ្នឹងមិនទាន់បានចូលស្អីនឹងគេទេ។ នៅជាយុវជននៅឡើយ ព្រោះអ្នកធំៗ ខ្ញុំមិនដែលបានថតទេ។ កូនចៅខ្ញុំ ក៏មិនដែលបានថតដែរ»។
ទន្ទឹមគ្នានឹងការស្ដាប់សាក្សីលើអង្គហេតុមន្ទីរសន្តិសុខ ស-២១ ប្រធានចៅក្រមជំនុំជម្រះ លោក យ៉ា សុខន ក៏កំពុងពិចារណាកោះហៅក្មួយរបស់កម្មាភិបាលបូព៌ា ឈ្មោះ សោ ភឹម មកធ្វើជាសាក្សីបន្ថែមទៀត ពាក់ព័ន្ធនឹងស្ថានភាពជម្លោះប្រដាប់អាវុធ។ ភាគីសហព្រះរាជអាជ្ញា លោក ដេល ឡៃសាក់ (Dale Lysak) យល់ថា សាក្សីនេះសំខាន់៖ «តាមការយល់ឃើញរបស់យើងឃើញថា គាត់អាចនិយាយរឿងរ៉ាវច្រើន មិនមែនតែជម្លោះប្រដាប់អាវុធទេ។ គាត់អាចអំពីការបោសសម្អាតនៅភូមិភាគបូព៌ា ហើយមានអ្វីកើតឡើងនៅភូមិភាគនោះ។ ដូច្នេះ តាមការយល់ឃើញរបស់ខ្ញុំគាត់គឺជាសាក្សីមួយដ៏សំខាន់ដែលអង្គជំនុំជម្រះគួរតែកោះហៅ»។
រីឯមេធាវីការពារជនជាប់ចោទ នួន ជា គឺលោក វិកទ័រ កូប៉េ យល់ថា សាក្សីរូបនេះមិនសូវជាសំខាន់ដែលត្រូវមកផ្ដល់សក្ខីកម្មទេ។ លោកថា សាក្សីសំខាន់ គឺមន្ត្រីរដ្ឋាភិបាលបច្ចុប្បន្នមួយចំនួន ដូចជា ប្រធានរដ្ឋសភា លោក ហេង សំរិន ជាដើម៖ «សាក្សីសំខាន់ៗ ដែលពាក់ព័ន្ធទៅនឹងព្រឹត្តិការណ៍នៅភូមិភាគបូព៌ា ក៏ដូចជាពាក់ព័ន្ធទៅនឹងជម្លោះប្រដាប់អាវុធ យើងខ្ញុំបានស្នើសុំឱ្យអង្គជំនុំជម្រះសាលាដំបូងកោះហៅលោក ហេង សំរិន ឱ្យកោះហៅលោកនាយករដ្ឋមន្ត្រី ហ៊ុន សែន លោក អ៊ុក ប៊ុនឈឿន ឱ្យកោះហៅលោក ប៉ែន សុវណ្ណ។ ពួកគាត់ទាំងអស់នេះ ជាមនុស្សសំខាន់ណាស់ ដែលត្រូវផ្ដល់សក្ខីកម្មអំពីព្រឹត្តិការណ៍ ដែលយើងនិយាយគ្នាតាំងពីម្សិលមិញថ្ងៃនេះ ហើយក៏បានស្នើសុំឱ្យកោះហៅតាំងពី ៩ឆ្នាំមុនមកម្ល៉េះ។ ដូច្នេះ ក្មួយរបស់ សោ ភឹម រូបនេះ ខ្ញុំសប្បាយចិត្តណាស់បើគាត់អាចមកបាន បើគាត់មកមិនបានក៏មិនបញ្ហាអ្វីដែរ។ ក៏ប៉ុន្តែអ្វីដែលសំខាន់ គឺឈ្មោះដែលខ្ញុំបានលើឡើងអម្បាញ់មិញហើយ ទើបជាសាក្សីដ៏សំខាន់ដែលត្រូវផ្ដល់សាក្សីកម្មចំពោះមុខអង្គជំនុំជម្រះ»។
ទោះជាភាគីទាំងពីរលើកហេតុផលឡើងដូច្នេះក្ដី ក៏ក្រុមចៅក្រមអង្គជំនុំជម្រះសាលាដំបូងមិនទាន់ចេញសេចក្ដីសម្រេចយ៉ាងណានៅឡើយទេ។ ប្រធានចៅក្រមជំនុំជម្រះ លោក យ៉ា សុខន ថ្លែងថា អង្គជំនុំជម្រះនឹងយកមតិយោបល់ទាំងនេះទៅពិចារណា ហើយនឹងប្រកាសសេចក្ដីសម្រេចនៅពេលក្រោយ។
អង្គជំនុំជម្រះសាលាដំបូងនឹងធ្វើសវនាការស្ដាប់សាក្សី នឹម អ៊ឹម បន្តបញ្ចប់ នៅសុក្រ ទី១៦ កញ្ញា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។