ក្រុមប្រទេសផ្តល់ជំនួយរបស់សាលាក្តីខ្មែរក្រហម ប្ដេជ្ញាចិត្តយ៉ាងមុតមាំ តស៊ូមតិដើម្បីយុត្តិធម៌ និងប្រឆាំងជាដាច់ខាតចំពោះអំពើនិទ្ទណ្ឌភាព ព្រមទាំងបានរំលឹកឡើងវិញនូវការជួយគាំទ្ររបស់ពួកគេ ចាប់តាំងពីសាលាក្តីខ្មែរក្រហមចាប់ផ្តើមដំបូង កាលពីឆ្នាំ២០០៦ ដោយសង្ឃឹមថា កេរ្តិ៍ដំណែលនេះ នឹងបន្សល់ទុកដល់ពលរដ្ឋជំនាន់ក្រោយ។
សេចក្តីប្រកាសព័ត៌មានរួមរបស់ក្រុមមិត្តរបស់សាលាក្តីខ្មែរក្រហម នៅថ្ងៃទី២៣ ខែកញ្ញា ឲ្យដឹងថា មុនមួយថ្ងៃដែលតុលាការកំពូលនៃសាលាក្ដីខ្មែរក្រហមបានចេញដីកាសម្រេចចុងក្រោយ ក្រុមមិត្តនៃសាលាក្តីខ្មែរក្រហម បានជួបពិភាក្សាគ្នា ជាមួយតំណាងរដ្ឋាភិបាល តំណាងផ្នែករដ្ឋបាលជាតិនិងអន្តរជាតិ នៃសាលាក្តីខ្មែរក្រហម ព្រមទាំង ឧបការីអគ្គលេខាធិការ អង្គការសហប្រជាតិ និងជានាយកទទួលបន្ទុកកិច្ចការច្បាប់ លោក ស្ទេហ្វិន ម៉ាធៀស (Stephen Mathias) នៅស្ថានទូតបារាំង កាលពីថ្ងៃទី ២១ ខែកញ្ញា ដើម្បីជជែកពិភាក្សាអំពីការវិវត្តន៍ចុងក្រោយ ស្ថានភាពហិរញ្ញវត្ថុ និងការងារសេសសល់របស់សាលាក្តីខ្មែរក្រហម។
តុលាការកំពូលនៃអង្គជំនុំជម្រះវិសាមញ្ញក្នុងសាលាក្តីខ្មែរក្រហមនៅកម្ពុជា (ECCC) កាលពីថ្ងៃទី ២២ ខែកញ្ញា បានចេញដីកាសម្រេចចុងក្រោយ បដិសេធបណ្ដឹងសារទុករបស់លោក ខៀវ សំផន ដោយរក្សាសេចក្ដីសម្រេចរបស់តុលាការដំបូងដដែល ដោយផ្ដន្ទាទោសឲ្យជាប់ពន្ធនាគារអស់មួយជីវិត ពាក់ព័ន្ធនឹងបទចោទក្នុងករណី ០០២/០២ ជុំវិញអំពើប្រល័យពូជសាសន៍ប្រឆាំងជនជាតិចាម និងជនជាតិវៀតណាម ឧក្រិដ្ឋកម្មប្រឆាំងមនុស្សជាតិ និងការរំលោភធ្ងន់ធ្ងរប្រឆាំងអនុសញ្ញាទីក្រុងហ្យឺណែវ (Geneva Conventions)។
ចំណែកស្ថានទូតអាមេរិកប្រចាំកម្ពុជាវិញ ក៏បានចេញសេចក្តីប្រកាសព័ត៌មាន ស្នើឲ្យអាជ្ញាធរកម្ពុជាបន្តរក្សានិងជួយការពារកេរ្តិ៍ដំណែលនៃតុលាការនេះ ជាពិសេសអភិរក្ស និងបង្ហាញដល់សាធារណជន នូវឯកសារ និងព័ត៌មានដ៏ច្រើនស្ដីពីការពិត ដែលសាលាក្តីខ្មែរក្រហម (ECCC) បានចងក្រង និងផលិតកន្លងមក។
អង្គជំនុំជម្រះវិសាមញ្ញក្នុងតុលាការកម្ពុជា ហៅកាត់ថាសាលាក្ដីខ្មែរក្រហម បានដំណើរការរយៈពេល ១៦ឆ្នាំហើយ ចាប់តាំងពីដើមខែកុម្ភៈ ឆ្នាំ២០០៦ រហូតមកដល់ឆ្នាំ២០២២នេះ ដោយចំណាយថវិកា ដែលបានមកពីការផ្ដល់វិភាគទានស្ម័គ្រចិត្តរបស់ក្រុមប្រទេសម្ចាស់ជំនួយមានចំនួនទឹកប្រាក់ចំនួនជាង ៣៣០លានដុល្លារ ក្នុងនោះភាគីជាតិ ចំណាយអស់ជិត ៩៥លានដុល្លារ (៩៤,៧៤) និងភាគីអន្តរជាតិចំណាយអស់ថវិកាចំនួនជាង ២៣៥លានដុល្លារ (២៣៥,៣៥)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។