អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២១ ខែមីនា បន្តសវនាការសួរដេញដោលសាក្សីមួយរូបទៀត ទាក់ទងនឹងរឿងរ៉ាវសម្លាប់មនុស្សនៅមន្ទីរសន្តិសុខអូរកន្សែង ខេត្តរតនគិរី កាលពីក្នុងរបបកម្ពុជាប្រជាធិបតេយ្យ។ សាក្សីរូបនេះ អតីតជាសមាជិកកម្មាភិបាលមួយរូបក្នុងចំណោម ៣រូប ដែលគ្រប់គ្រងអ្នកអ្នកទោសនៅមន្ទីរសន្តិសុខ អូរកន្សែងនោះ។
សាក្សីថ្មីដែលមិនបង្ហាញឈ្មោះពិត ហើយប្រើតែលេខកូដថា 2TCW-900 ជម្រាបអង្គជំនុំជម្រះនៅថ្ងៃទី២១ ខែមីនា ថា លោកជាអតីតអ្នកកត់ត្រាកំណត់ហេតុសួរចម្លើយអ្នកទោស នៅមន្ទីរសន្តិសុខអូរកន្សែង ក្នុងខេត្តរតនគិរី។
សាក្សីរូបនេះបដិសេធថា លោកមិនមែនជាអនុប្រធានមន្ទីរសន្តិសុខ អូរកន្សែង ដែលទទួលបន្ទុកការសម្លាប់មនុស្សទេ គឺលោកជាអ្នកកត់ត្រាកំណត់ហេតុសួរចម្លើយអ្នកទោស៖ «ទីន ហ្នឹងគាត់ជាអនុប្រធាន សែ ជាប្រធាន ហើយខ្ញុំជាសមាជិកទទួលបន្ទុករៀបចំចម្លើយអ្នកជាប់ឃុំឃាំងហ្នឹង»។
ការធ្វើសវនាការមិនបង្ហាញឈ្មោះសាក្សីរូបនេះ ត្រូវបានប្រធានអង្គជំនុំជម្រះសាលាដំបូងលោកចៅក្រម និល ណុន បញ្ជាក់ថា ដោយសារសាក្សីនេះកំពុងស្ថិតនៅក្នុងកិច្ចដំណើរការស៊ើបអង្កេតក្នុងសំណុំរឿងផ្សេង៖ «លោកសាក្សី! នៅក្នុងកិច្ចដំណើរការសវនាការចំពោះមុខអង្គជម្រះ តាមសំណើរបស់សហចៅក្រមស៊ើបអង្កេតអន្តរជាតិ គឺប្រើប្រាស់តែរហស្សនាមរបស់លោកទេ ហើយលោកសាក្សីមានរហស្សនាម 2TCW-900 ហើយជាទូទៅ ភាគីនឹងប្រើប្រាស់ហៅលោកក្នុងនាមជាសាក្សីប៉ុណ្ណោះ»។
សាក្សីថ្មី 2TCW-900 អះអាងដូចអតីតអ្នកទោសនៅទីនោះដែរថា នៅឆ្នាំ១៩៧៧ មានជនជាតិចារ៉ាយ រស់នៅប្រទេសវៀតណាម ប្រមាណ ១០០នាក់ ដែលគេចាប់បាននៅក្នុងទឹកដីកម្ពុជា ត្រូវបានគេយកទៅសម្លាប់។ គេយកទៅសម្លាប់គឺពេលយប់៖ «ក្នុងគ្រប់គ្រងផ្នែកសន្តិសុខ ក្នុងការយកអ្នកទោសទៅសម្លាប់ហ្នឹង ទីន ហ្នឹងហើយជាអ្នកទទួលខុសត្រូវ។ គេសម្លាប់ជនជាតិចារ៉ាយ នៅរណ្ដៅ បេ៥២។ ខ្ញុំដឹងថា កន្លែងដែលគេកប់នៅរណ្ដៅ បេ៥២ នៅពេលក្រោយការកម្ទេចជនជាតិចារ៉ាយអស់ពីកន្លែងទៅ ពីរបីថ្ងៃក្រោយមកខ្ញុំដើរទៅកន្លែងខាងលើ ព្រោះកន្លែងហ្នឹងមានដើមខ្នុរផ្លែ។ អ៊ីចឹងខ្ញុំទៅតំបន់នោះធំក្លិនស្អុយ»។
លោកបន្តថា ការសម្លាប់ជនជាតិចារ៉ាយនោះ គឺបន្ទាប់ពីមានបញ្ជាពីមេបញ្ជាការកងពលឈ្មោះ សារឿន។ លោកថា អ្នកទោសខ្លះ ដែលជាប់ឃុំនៅអូរកន្សែង ព្រោះតែមានចម្លើយសារភាពគេឆ្លើយដាក់ពីភ្នំពេញទៅ។
កាលពីដើមខែមីនា មានអតីតអ្នកទោសនៅមន្ទីរសន្តិសុខអូរកន្សែង ពីររូប គឺឈ្មោះ មឿង ចាន់ឌី និង ផន ថុល បានជម្រាបអង្គជំនុំជម្រះសាលាដំបូងថា ពួកគាត់បានឃើញជនជាតិចារ៉ាយ ដែលចាប់បាននោះ និងកន្លែងកប់សពក្នុងរណ្ដៅគ្រាប់ បេ៥២។
មន្ទីរសន្តិសុខអូរកន្សែង នៅខេត្តរតនគិរី គឺជាទីតាំងឧក្រិដ្ឋកម្មមួយ ដែលជនជាប់ចោទ នួន ជា និងជនជាប់ចោទ ខៀវ សំផន កំពុងរងការចោទប្រកាន់នៅក្នុងសំណុំរឿង ០០២ វគ្គ ២។
សវនាការស្ដាប់សាក្សី 2TCW-900 នៅមិនទាន់ចប់ទេ លោកនឹងត្រូវបន្តផ្ដល់សក្ខីកម្ម នៅព្រឹកថ្ងៃទី២២ មីនទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។