អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី១៨ ខែមេសា ចាប់ផ្ដើមស្ដាប់សក្ខីកម្មទាក់ទងនឹងអង្គហេតុស្ដីពីមន្ទីរសន្តិសុខ ស-២១ ឬគុកទួលស្លែង នៅក្នុងសំណុំរឿង ០០២ វគ្គ ២។ សក្ខីកម្មដំបូងអំពីអង្គហេតុនេះ គឺជាសក្ខីកម្មរបស់ដើមបណ្ដឹងរដ្ឋប្បវេណីឈ្មោះ ជុំ ម៉ី។
លោក ជុំ ម៉ី ដែលជាអតីតអ្នកទោសម្នាក់នៅមន្ទីរសន្តិសុខ ស-២១ ឬគុកទួលស្លែង កាលពីក្នុងរបបខ្មែរក្រហមត្រូវបានអង្គជំនុំជម្រះសាលាដំបូងកោះហៅឱ្យមកផ្ដល់សក្ខីកម្មម្ដងទៀត ទាក់ទងនឹងរឿងរ៉ាវនៅក្នុងគុកនេះ។
លោកបញ្ជាក់ជូនអង្គជំនុំជម្រះថា នៅចុងខែតុលា ឆ្នាំ១៩៧៧ លោកត្រូវបានកម្មាភិបាលខ្មែរក្រហមនៅអង្គភាពកាត់ដេររដ្ឋបញ្ជូនទៅឃុំឃាំងនៅកុកទួលស្លែង ដោយជាប់ចោទថា ជាភ្នាក់ងារស៊ើបការណ៍សម្ងាត់របស់អាមេរិក ហៅកាត់តាមភាសាបារាំងថា សេ.អ៊ី.អា (CIA) ក្បត់បដិវត្តន៍៖ «ពេលនោះគេវាយសួរថា គ្នាហ្អែងមានប៉ុន្មាននាក់ចូល សេ.អ៊ី.អា កាហ្សេបេ (KGB)? យើងប្រាប់គេ ថា ខ្ញុំអត់ស្គាល់ សេ.អ៊ី.អា កាហ្សេបេ ទេ។ ពេលនោះ អា សេង វាទាញរំពាត់រ៉ាវមកវាយខ្ញុំភឹងៗ ទៅ។ ពេលវាយ ខ្ញុំយកដៃរងអ៊ីចឹងបាក់កូនដៃហ្នឹងមួយ។ ខ្ញុំដេកគិតផង អង្គុយគិតផងថា ប្រហែលជាមាននរណាឆ្លើយដាក់ខ្ញុំហើយ បានជាគេយកខ្ញុំមកវាយហ្នឹង។ ខ្ញុំអត់ដឹងទេ។ ពេលនោះយើងអត់ស្គាល់ សេ.អ៊ី.អា កាហ្សេបេ ដែរ ហើយវាឱ្យនិយាយតែ សេ.អ៊ី.អា កាហ្សេបេៗ។ និយាយអីក្រៅពីហ្នឹងអត់បានទេ វាវាយយើង»។
លោក ជុំ ម៉ី ថ្លែងថា បានជាប់ឃុំឃាំងនៅគុកទួលស្លែង រហូតដល់ពេលរបបខ្មែរក្រហមដួលរលំ នៅឆ្នាំ១៩៧៩។ លោករំឭកឡើងវិញថា លោកបានទទួលរងទារុណតាមរបៀបផ្សេង ពេលដែលពួកឆ្មាំគុកសួរចម្លើយលោកម្ដងៗ៖ «វាយកដង្កាប់មួលក្រចកមេជើងហ្នឹងទាញផ្ដាច់ ពេលយើងឆ្លើយថា យើងអត់ស្គាល់ សេ.អ៊ី.អា កាហ្សេបេ ហ្នឹងទេ។ ពេលហ្នឹងវាវាយថែមទៀត។ វាយហើយ វាយកខ្សែភ្លើងមកញាត់ស្លឹកត្រចៀកយើង។ ញាត់ឆាច់ទៅ ប៊ឹង! ដូចរយះបែកអំពិលអំពែកអ៊ីចឹង។ យើងសន្លប់មួយសន្ទុះធំ។ វាវាយ ១២ថ្ងៃ ១២យប់។ វាវាយពេលព្រឹក ពីម៉ោង ៧ ដល់ម៉ោង ១១។ ម៉ោង ១ រហូតដល់ម៉ោង ៥។ ពីម៉ោង ៦ រហូតដល់ម៉ោង ១០យប់។ ដល់សួរចប់ហើយ បានវាយកទៅដាក់នៅឯលើនោះ ៤ខែ»។
លោក ជុំ ម៉ី ជាអ្នកទោសម្នាក់ក្នុងចំណោម ៧នាក់ ដែលបានរួចជីវិតពីគុកទួលស្លែង ហើយហេតុផលដែលពួកខ្មែរក្រហមមិនសម្លាប់លោក ក៏ព្រោះតែពួកគេទុកប្រើលោកឱ្យជួសជុលម៉ាស៊ីនអង្គុលីលេខសម្រាប់កត់ត្រាចម្លើយអ្នកទោស។ រហូតមកដល់ពេលនេះ មានតែលោក ជុំ ម៉ី និងលោក ប៊ូ ម៉េង ដែលនៅមានជីវិតពីគុកទួលស្លែង ក្រោយរបបខ្មែរក្រហមដួលរលំ។
ទាក់ទងនឹងទារុណកម្ម និងការប្រព្រឹត្តចំពោះអ្នកទោសនេះ លោកធ្លាប់មកផ្ដល់សក្ខីកម្មនៅសាលាក្ដីខ្មែរក្រហមដែរ កាលពីក្នុងសំណុំរឿង ០០១ ដែលប្រឆាំងនឹងអតីតប្រធានគុកទួលស្លែង ឈ្មោះ កាំង ហ្កេកអ៊ាវ ហៅ ឌុច។ ឌុច ត្រូវបានអង្គជំនុំជម្រះផ្ដន្ទាទោសដាក់គុកអស់មួយជីវិត ចំពោះការធ្វើទារុណកម្ម និងសម្លាប់អ្នកគុកទួលស្លែង ជិត ១៣.០០០នាក់។
អង្គហេតុគុកទួលស្លែង ត្រូវបានអង្គជំនុំជម្រះដាក់ក្នុងសំណុំរឿង ០០២ វគ្គទី២ ប្រឆាំងនឹងជនជាប់ចោទ នួន ជា និង ខៀវ សំផន។
លោក ជុំ ម៉ី ជម្រាបអង្គជំនុំជម្រះសាលាដំបូងថា លោកធ្លាប់ឃើញជនជាប់ចោទ ខៀវ សំផន ពេលដែលលោកធ្វើការនៅអង្គភាពកាត់ដេរ មុនពេលលោកជាប់នៅគុកទួលស្លែង។ លោក ជុំ ម៉ី នឹងត្រូវអង្គជំនុំជម្រះស្ដាប់ការសួរដេញដោលបញ្ចប់នៅថ្ងៃទី១៩ ខែមេសា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។