អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២១ ខែកញ្ញា នៅតែបន្តសវនាការរបស់ខ្លួនដោយស្ដាប់សក្ខីកម្មទាក់ទងនឹងគោលការណ៍បោសសម្អាតផ្ទៃក្នុងរបស់បក្សកុម្មុយនិស្តកម្ពុជា និងការកាប់សម្លាប់នៅក្នុងរបបកម្ពុជាប្រជាធិបតេយ្យ ចន្លោះឆ្នាំ១៩៧៥ ដល់ឆ្នាំ១៩៧៩។
សាក្សីជាអតីតយុទ្ធជននៃកងទ័ពខ្មែរក្រហមក្នុងភូមិភាគឧត្ដរ ឈ្មោះ សែម អំ ប្រាប់អង្គជំនុំជម្រះសាលាដំបូងនៅថ្ងៃទី២១ កញ្ញា ថា លោកបានឃើញផ្ទាល់ភ្នែកនូវការកាប់សម្លាប់របស់កងទ័ពខ្មែរក្រហមក្នុងភូមិភាគបូព៌ា៖ «ឃើញគេដឹកទាហានបូព៌ាបីឡាន ហើយខ្ញុំសួរបង ណាំ នៅកន្លែងតេអូ គាត់ថា គេដឹកពួកក្បត់។ មួយសន្ទុះឃើញគេហែកក្រមារុំមុខ គេចង។ ខ្ញុំអើតពីលើឡានទៅឃើញគេអូសរុញទៅខាងក្រោយត្បូងមន្ទីរនោះ។ រុញទៅ ឮតែភីសភូស អ៊ិះអ៊ុះ។ បានប្រហែលជាមួយម៉ោង បង ណាំ មកវិញខ្ញុំក៏មកកន្លែងខ្ញុំវិញ»។
លោកបន្តថា ការសម្លាប់នោះជាការបោសសម្អាតផ្ទៃក្នុងរបស់បក្សកុម្មុយនិស្តកម្ពុជា ចំពោះអ្នកដែលត្រូវបានកម្មាភិបាលភូមិភាគនិរតីចោទថា ក្បត់នឹងអង្គការ។
សាក្សី និងភស្តុតាងបង្ហាញថា ការបោសសម្អាតផ្ទៃក្នុងរបស់បក្សកុម្មុយនិស្តកម្ពុជា បានបណ្ដាលឲ្យមានការសម្លាប់រង្គាលស្ទើរទូទាំងប្រទេសនៅក្នុងរបបកម្ពុជាប្រជាធិបតេយ្យ។ មានមនុស្សជាច្រើនត្រូវបានគេចាប់បញ្ជូនទៅសួរចម្លើយ និងសម្លាប់នៅមន្ទីរស-២១ ឬគុកទួលស្លែង។ ការបោសសម្អាតផ្ទៃក្នុងចាប់ផ្ដើមមុនគេលើពួកយោធាក្នុងកងពល ៣១០ នៃភូមិភាគឧត្ដរ គឺនៅពេលដែលអ្នកទាំងនោះត្រូវបានចោទប្រកាន់ប្រុងធ្វើរដ្ឋប្រហារទម្លាក់ ប៉ុន ពត ក្នុងឆ្នាំ១៩៧៦។
សាក្សី សែម អំ ដែលជាអតីតយោធិនក្នុងកងពល ៣១០ ដែរ ថ្លែងថា ពួកលោកជាកូនទាហានត្រូវបានគេប្រមូលដកអាវុធ ហើយបញ្ជូនឱ្យទៅធ្វើស្រែជាយក្រុងភ្នំពេញ៖ «ខ្ញុំបានឃើញគេរៀបខោអាវមួយកងៗ។ គេប្រាប់ថា ឯកសណ្ឋាននេះទុកសម្រាប់កងទ័ព។ ខ្ញុំសង្ស័យថា យើងស្លៀកពាក់តែខោអាវមកពីចិន ហើយខោអាវ ស្បែកជើងកង់ឡាន ដល់នេះគេឲ្យពាក់ស្បែកជើងទាហាន លន់ នល់។ ខ្ញុំយល់ដឹងថា ឯកសណ្ឋានទាំងនោះ គឺគេវាយបាន ឬក៏គេដេរថ្មីយ៉ាងម៉េចមិនដឹងទេ។ ក្រណាត់អត់ស្អាតទេ។ ក្រណាត់គ្រើមៗ ទាំងក្រឡារាងល្អិតៗ ប៉ុនៗ ពីរធ្នាប់។ ខ្ញុំឃើញតែម្ដងហ្នឹង ដល់ក្រោយមកគេចាប់មេៗ ទៅ គេថា ពួកក្បត់ បានខ្ញុំដឹងត្រង់នោះថា គេក្បត់ប្រាកដមែន»។
ការបោសសម្អាតផ្ទៃក្នុងរបស់បក្សកុម្មុយនិស្តកម្ពុជា និងការកាប់សម្លាប់អ្នកដែលត្រូវគេចោទថា ក្បត់បក្សជាអង្គហេតុចោទប្រកាន់របស់សាលាដំបូងចំពោះជនជាប់ចោទ នួន ជា និង ខៀវ សំផន អតីតជាមេដឹកនាំជាន់ខ្ពស់ខ្មែរក្រហមក្នុងសំណុំរឿងលេខ ០០២ វគ្គ ២។
លោក សែម អំ ឱ្យដឹងថា ក្រៅពីការកាប់សម្លាប់កងទ័ពដូចគ្នា លោកក៏ធ្លាប់ឃើញគេសម្លាប់ស្ត្រី និងកុមារ ដែលជាសមាជិកគ្រួសាររបស់កងទ័ពនោះដែរ៖ «ពេលដែលគេចាប់នារីនោះ គេថា ប្រពន្ធទាហាន ផើម។ តែគេមិនហាលមុខទេ គឺយប់ជ្រៅស្ងាត់ គេអូសយកទៅពិសោធន៍ថ្នាំពេទ្យរបស់គេ នៅកន្លែងមន្ទីរពេទ្យ។ គេវះពិសោធន៍មើល ចាក់ថ្នាំចាក់អីរស់វិញ គេសម្លាប់ចោលទៅ»។
ការបោសសម្អាត និងការកាប់សម្លាប់នៅភូមិភាគបូព៌ា មានខេត្តកំពង់ចាម ស្វាយរៀង ព្រៃវែង គឺកើតឡើងដូចគ្នានឹងភូមិភាគពាយ័ព្យ ក្នុងខេត្តពោធិ៍សាត់ និងបាត់ដំបង ដែរ។ បន្ទាប់ពីសាក្សី សែម អង្គ អង្គជំនុំជម្រះសាលាដំបូង ក៏បានស្ដាប់សាក្សីមួយរូបទៀត ដែលជាអតីតនីរសាររបស់ប្រធានភូមិភាគពាយ័ព្យ ឈ្មោះ រស់ ញឹម។ លោក រស់ ញឹម ត្រូវបានបក្សកុម្មុយនិស្តកម្ពុជា ចាប់ទៅសម្លាប់នៅគុកទួលស្លែង ក្នុងឆ្នាំ១៩៧៧។ សាលាដំបូងនឹងបន្តស្ដាប់សាក្សីនេះទៀត នៅថ្ងៃទី២២ ខែកញ្ញា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។