ជីវប្រវត្តិ​សង្ខេប​លោក អៀង សារី

លោក អៀង សារី ដែល​ជា​ជន​ជាប់​ចោទ​ពី​បទ​ប្រល័យ​ពូជសាសន៍​ឧក្រិដ្ឋកម្ម​ប្រឆាំង​មនុស្ស​ជាតិ និង​ឧក្រិដ្ឋកម្ម​សង្គ្រាម​របស់​សាលា​ក្តី​ខ្មែរ​ក្រហម បាន​ស្លាប់​នៅ​ក្នុង​មន្ទីរពេទ្យ​មិត្តភាព​កម្ពុជា-សូវៀត នៅ​ថ្ងៃ​ព្រហស្បតិ៍ ទី១៤ ខែ​មីនា ព្រឹក​មិញ នៅ​មុន​ការ​ជំនុំ​ជម្រះ​មិន​ទាន់​បាន​បញ្ចប់។

0:00 / 0:00

ស្ថិត​ក្នុង​សំណុំ​រឿង​០០២ លោក អៀង សារី ជា​អតីត​សិស្ស​វិទ្យាល័យ​ស៊ីសុវត្ថិ និង​អតីត​និស្សិត​ពី​ប្រទេស​បារាំង ដែល​នៅ​ទីនោះ​លោក​បាន​ចូល​ជា​សមាជិក​បក្ស​កុម្មុយនិស្ត​បារាំង នៅ​ឆ្នាំ​១៩៥១។ ក្នុង​ឆ្នាំ​១៩៥៧ លោក អៀង សារី បាន​ក្លាយ​ជា​សមាជិក​សកម្ម​នៃ​បក្ស​កុម្មុយនីស្ត​កម្ពុជា ខណៈ​ធ្វើ​ជា​គ្រូ​បង្រៀន​ប្រវត្តិវិទ្យា នៅ​វិទ្យាល័យ​ស៊ីសុវត្ថិ។ នៅ​ឆ្នាំ​១៩៦៣ លោក​បាន​គេច​ចូល​ព្រៃ ចូល​រួម​ជាមួយ​ចលនា​ខ្មែរ​ក្រហម។

ក្នុង​ចំណោម​ជន​ជាប់​ចោទ ៥​រូប​របស់​សាលា​ក្តី​ខ្មែរ​ក្រហម លោក អៀង សារី ស្ថិត​ក្នុង​ចង្កោម​អតីត​មេ​ដឹកនាំ​ខ្មែរ​ក្រហម​កំពូល និង​ជា​អ្នក​ទទួល​ខុស​ត្រូវ​ខ្ពស់​បំផុត ចំពោះ​ឧក្រិដ្ឋកម្ម​ធ្ងន់ធ្ងរ​នានា​ដែល​បាន​កើត​ឡើង​ក្នុង​របប​កម្ពុជា​ប្រជាធិបតេយ្យ ឬ​របប​ខ្មែរ​ក្រហម​ពី​ចន្លោះ​ឆ្នាំ​១៩៧៥ ដល់​ដើម​ឆ្នាំ​១៩៧៩ ដែល​បណ្ដាល​អោយ​ពលរដ្ឋ​កម្ពុជា ជិត ២​លាន​នាក់​បាត់​បង់​ជីវិត។

កើត​ក្នុង​ខែ​តុលា ឆ្នាំ​១៩២៥ នៅ​ខេត្ត​ត្រាវីញ ទឹក​ដី​ខ្មែរ​កម្ពុជា​ក្រោម លោក អៀង សារី ឈ្មោះ​ក្រៅ​ហៅ វ៉ាន់ មាន​កូន​បួន​នាក់ ស្រី ៣​នាក់ និង​ប្រុស ១​នាក់។

ឆ្លើយ​ទៅ​នឹង​សំណួរ​ទាក់ទង​នឹង​បុគ្គលិក​លក្ខណៈ​របស់​លោក អៀង សារី លោក អៀង វុធ ដែល​ត្រូវ​ជា​កូន និង​ជា​អភិបាល​រង​ខេត្ត​ប៉ៃលិន អោយ​ដឹង​ថា ឪពុក​របស់​លោក​មិន​ខុស​ប្លែក​គ្នា​ពី​ឪពុក​ម្តាយ​ដទៃ​នោះ​ទេ៖ «យ៉ាង​ម៉េច​ក៏ដោយ គាត់​ជា​ឪពុក​របស់​យើង យ៉ាង​ម៉េច​ក៏ដោយ គាត់​ជា​ម្តាយ​របស់​យើង។ គាត់​ធម្មតាៗ​ដូច​គេ​ដូច​ឯង​ដែរ»

ក្រោម​របប​ខ្មែរ​ក្រហម លោក អៀង វុធ ត្រូវ​បាន​រដ្ឋ​អំណាច​ខ្មែរ​ក្រហម បញ្ជូន​អោយ​ទៅ​រៀន​បើកបរ​យន្តហោះ​នៅ​ប្រទេស​ចិន។ លោក​អះអាង​ថា លោក​ពុំ​បាន​ដឹង​នូវ​ឧក្រិដ្ឋកម្ម​នានា​កើត​ឡើង​ក្នុង​របប​ខ្មែរ​ក្រហម​នោះ​ទេ។ ហើយ​ចំពោះ​ការ​ចោទ​ប្រកាន់​របស់​សាលា​ក្តី​ខ្មែរ​ក្រហម មក​លើ​លោក អៀង សារី ដែល​ជា​ឪពុក​របស់​លោក លោក អៀង វុធ គ្រាន់​តែ​មាន​ប្រសាសន៍​ថា សច្ចភាព​គឺ​មាន​តែ​មួយ។

លោក អៀង វុធ៖ «រឿង​ហ្នឹង​ខ្ញុំ​មិន​ចង់​បញ្ចេញ​មតិ​អី​ទេ ព្រោះ​កិច្ចការ​ហ្នឹង តុលាការ​កំពុង​រក​យុត្តិធម៌ ការ​ពិត​វា​នៅ​តែ​ការ​ពិត​ទេ ប្រវត្តិសាស្ត្រ​នៅ​លើ​អ្នក​សរសេរ ប៉ុន្តែ​អ្នក​ចងក្រង​គេ​ចងក្រង​យ៉ាង​ម៉េច អា​ហ្នឹង​បញ្ហា​មួយ​ផ្សេង។ ខ្ញុំ​គ្រាន់​តែ​ចង់​និយាយ​ថា ការ​ពិត​វា​មិន​អាច​បំផ្លើស​បាន​ទេ យូរ​និង​ឆាប់ ការ​ពិត​វា​ត្រូវ​តែ​ចេញ ថ្ងៃ​នេះ​វា​អត់​ចេញ ថ្ងៃ​ក្រោយ​វា​ត្រូវ​ចេញ​ទៀត»

នៅ​ឆ្នាំ​១៩៧៨ ក្នុង​នាម​ជា​រដ្ឋមន្ត្រី​ក្រសួង​ការ​បរទេស​នៃ​រដ្ឋាភិបាល​កម្ពុជា​ប្រជាធិបតេយ្យ លោក អៀង សារី បាន​ថ្លែង​ទៅ​កាន់​មហា​សន្និបាត​អង្គការ​សហប្រជាជាតិ នៅ​ទីក្រុង​ញីវយ៉ក (New York) យ៉ាង​មោទនភាព​អំពី​របប​ថ្មី​ក្រោម​ការ​ដឹកនាំ​ដោយ​របប​បក្ស​កុម្មុយនិស្ត​កម្ពុជា។

លោក អៀង សារី៖ «ប្រជាជន​កម្ពុជា​យើង​ខ្ញុំ កំពុង​ប្រយុទ្ធ​បំពេញ​ភារកិច្ច​ការពារ​ឯករាជ្យ​ភាព អធិបតីភាព បូរណភាព​ទឹកដី​នៃ​កម្ពុជា​ប្រជាធិបតេយ្យ និង​ការ​កសាង​ប្រទេស​ក្នុង​ដំណាក់​កាល​ថ្មី​នៃ​បដិវត្តន៍​របស់​ខ្លួន ដោយ​ឯករាជ្យ ម្ចាស់​ការ​ខ្លួន​ទីពឹង​ខ្លួន ក្រោម​ការ​ដឹកនាំ​ដ៏​ត្រឹមត្រូវ​បក្ស​កុម្មុយនីស្ត​កម្ពុជា និង​សមមិត្ត​លេខា ប៉ុល ពត»

នៅ​ខណៈ​ប្រជាជន​កម្ពុជា កំពុង​ស្រេក​ឃ្លាន​ខ្វះខាត​ថ្នាំ​សង្កូវ​សម្រាប់​ព្យាបាល​ហេវហត់​បាក់​កម្លាំង​ពី​ការងារ​បង្ខំ និង​រង​ការ​សម្លាប់​យ៉ាង​រង្គាល​នោះ លោក អៀង សារី បាន​និយាយ​ប្រាប់​មហា​សន្និបាត​អង្គការ​សហប្រជាជាតិ​ថា ប្រជាជន​កម្ពុជា កំពុង​មាន​ជីវភាព​សម្បូរ​សប្បាយ។

លោក អៀង សារី៖ «សភាពការណ៍​នៃ​ប្រទេស​យើង​ខ្ញុំ​ល្អ​ប្រសើរ ប្រជាជន​កម្ពុជា​យើង​ខ្ញុំ​បាន​ឡើង​កាន់​កាប់​វាសនា​ខ្លួន និង​វាសនា​ប្រទេស​ជាតិ​ខ្លួន​ដោយ​ខ្លួន​ឯង។ កសិកម្ម​ថ្មី​របស់​យើង​ខ្ញុំ​ចាប់​ផ្ដើម​ចម្រើន​ជឿនលឿន ជន​បទ​ថ្មី​ប្រែ​មុខ​មាត់​ជា​រៀង​រាល់​ឆ្នាំ។ ប្រជាជន​មូលដ្ឋាន​ពេញ​ចិត្ត​ពេញ​ថ្លើម​នឹង​បដិវត្តន៍ ហើយ​ការពារ​របប​ថ្មី​ដាច់​ខាត»

បន្ទាប់​ពី​ក្តោប​ក្តាប់​អំណាច​ទាំង​ស្រុង​នៅ​ខែ​មេសា ឆ្នាំ​១៩៧៥ ថ្នាក់​ដឹកនាំ​ខ្មែរ​ក្រហម បាន​ប្រើ​នយោបាយ​ឃោសនា​អូស​ទាញ​ពលរដ្ឋ​ដែល​រស់នៅ​ក្រៅ​ប្រទេស អោយ​ធ្វើ​មាតុភូមិ​និវត្តន៍។ អតីត​មន្ត្រី​រាជការ និង​និស្សិត​បញ្ញវន្ត ជិត ៤​ពាន់​នាក់ នៅ​ទ្វីប​អឺរ៉ុប និង​សហរដ្ឋ​អាមេរិក បាន​ត្រឡប់​មក​ប្រទេស​កម្ពុជា វិញ ដើម្បី​រួម​ដៃ​គ្នា​ជួយ​កសាង​កម្ពុជា ឡើង​វិញ តាម​ការ​អំពាវនាវ​របស់​លោក អៀង សារី ដែល​ពេល​នោះ​ជា​រដ្ឋមន្ត្រី​ការ​បរទេស។

អតីត​កងទ័ព​នាវី​នៃ​របប​សាធារណរដ្ឋ​ខ្មែរ លោក ទុំ បូរ៉ាន់ បច្ចុប្បន្ន​រស់នៅ​ក្នុង​រដ្ឋ Virginia សហរដ្ឋ​អាមេរិក បាន​រំលឹក​ពី​ពាក្យ​សម្ដី​ឃោសនា​របស់​លោក អៀង សារី ដែល​មក​ជួប​លោក​នៅ​ឯ​បុរី​ញីវយ៉ក បន្ទាប់​ពី​ខ្មែរ​ក្រហម​ឡើង​កាន់​អំណាច។

លោក ទុំ បូរ៉ាន់៖ «បង ធី សុខុម ហ្នឹង គាត់​នៅ​ក្នុង​ពេល​ហ្នឹង​ដែរ​នុះ ខ្ញុំ​សួរ​លោក អៀង សារី ពី​រឿង​ថា​អ្នក​អ្នក​ចូល​ទៅ​ស្រុក​ខ្មែរ​វិញ​នោះ ថា​តើ​គេ​ទៅ​ធ្វើ​របៀប​ម៉េច គេ​យក​ទៅ ពីព្រោះ​គាត់​បាន​និយាយ​ថា គេ​សុខ​សប្បាយ​ទេ ហើយ​ថា​គេ​ទៅ​គេ​មាន​គំនិត​ស្រឡាញ់​ជាតិ គេ​ចង់​ទៅ​ជួយ​ជាតិ ហើយ​ខ្ញុំ​សួរ​ថា អីចឹង​អ្នក​ដែល​ត្រឡប់​ចូល​ទៅ​វិញ​ហ្នឹង ពេល​ហ្នឹង ជា​ពិសេស​បង​ខ្ញុំ​ផ្ទាល់ គាត់​អ្នក​នាំ​ទ័ព​ជន​ភៀស​ខ្លួន​ពី​កង់អ៊ូតាប៉ាវ ទៅ ចូល​ទៅ តើ​រស់​ឬ​ស្លាប់? ហើយ​គាត់​ឆ្លើយ​នឹង​សំណួរ​ខ្ញុំ​ថា​រស់​ឬ​ស្លាប់​ហ្នឹង គាត់​ថា​គាត់​អត់​បាន​ដឹង​ឲ្យ​បាន​ច្បាស់​ទេ នៅ​ពេល​ហ្នឹង មិន​ដឹង​ជា​រស់​ឬ​ស្លាប់​ទេ តែ​ប្រហែល​ជា​បាន​សេចក្ដី​សុខ​ហើយ។ គាត់​និយាយ​ពី​រឿង​កម្ពុជា​ប្រជាធិបតេយ្យ​ហ្នឹង​គេ​បាន​ឈ្នះ​ហើយ គេ​ចម្រុង​ចម្រើន គេ​មហា​អស្ចារ្យ គេ​មហា​លោត​ផ្លោះ​អី​ចុះ​ឡើង​អីចឹង​ទៅ នេះ​ជា​សម្ដី​របស់​គាត់»

ដោយ​ជ្រើសរើស​យក​ការ​រៀន​បន្ត​នៅ​សហរដ្ឋ​អាមេរិក លោក ទុំ បូរ៉ាន់ មិន​បាន​វិល​ត្រឡប់​ទៅ​កម្ពុជា វិញ​ទេ។

ក្រោយ​ពី​បាន​ចូល​រួម​ដឹកនាំ និង​បម្រើ​ចលនា​កុម្មុយនិស្ត​ខ្មែរ​ក្រហម​អស់​រយៈ​កាល​ជិត ៤​ទសវត្សរ៍​មក លោក អៀង សារី នៅ​ឆ្នាំ​១៩៩៦ បាន​បោះបង់​ចោល​ចលនា​នេះ ហើយ​ចុះ​ចូល​ជាមួយ​រាជ​រដ្ឋាភិបាល​កម្ពុជា ដោយ​នាំ​មក​ជាមួយ​នូវ​កង​ឧទ្ទាម​ទ័ព​ព្រៃ​ខ្មែរ​ក្រហម​ប្រមាណ ៣​ពាន់​នាក់។ ការ​ចុះ​ចូល​របស់​លោក អៀង សារី ជាមួយ​រាជ​រដ្ឋាភិបាល​កម្ពុជា នៅ​ខែ​សីហា ឆ្នាំ​១៩៩៦ នោះ គឺ​ជា​ចំណុច​ចាប់​ផ្ដើម​នៃ​ការ​ដួល​រលំ​នៃ​ចលនា​ខ្មែរ​ក្រហម​ទាំង​មូល នៅ​ឆ្នាំ​១៩៩៨។

ជា​ថ្នូរ​នឹង​ការ​ដឹកនាំ​កម្លាំង​ខ្មែរ​ក្រហម​ចុះ​ចូល​ជាមួយ​រាជ​រដ្ឋាភិបាល​កម្ពុជា លោក អៀង សារី បាន​ទទួល​ព្រះរាជក្រឹត្យ​លើក​លែង​ទោស​ពី​ព្រះ​មហា​វីរក្សត្រ ព្រះ​បាទ សម្ដេច​ព្រះ នរោត្តម សីហនុ។ ព្រះរាជក្រឹត្យ​លើក​លែង​ទោស បាន​អនុញ្ញាត​អោយ​និរាករណ៍ ឬ​លុប​ចោល​ទោស​ប្រហារ​ជីវិត​លោក អៀង សារី ដោយ​តុលាការ​ប្រជាជន​បដិវត្តន៍​កម្ពុជា នៅ​ឆ្នាំ​១៩៧៩ និង​លុប​ចោល​ទោស​ទាំង​ឡាយ​ក្រោម​ច្បាប់​ដាក់​ខ្មែរ​ក្រហម​អោយ​នៅ​ក្រៅ​ច្បាប់​ឆ្នាំ​១៩៩៤។

ប៉ុន្តែ ព្រះរាជក្រឹត្យ​លើក​លែង​ទោស​ពី​ព្រះករុណា ព្រះបាទ សម្ដេច​ព្រះ នរោត្តម សីហនុ មិន​បាន​ជួយ​ដល់​លោក អៀង សារី អោយ​រួច​ផុត​ពី​ការ​ចាប់​ខ្លួន​ដោយ​តុលាការ​កូន​កាត់​ចម្រុះ​ជាតិ​សាសន៍ ដែល​ត្រូវ​បាន​បង្កើត​ឡើង​នៅ​ឆ្នាំ​២០០៧ នោះ​ឡើយ។ ថ្ងៃ​ទី១២ ខែ​វិច្ឆិកា ឆ្នាំ​២០០៧ លោក អៀង សារី និង​ភរិយា​គឺ​លោកស្រី អៀង ធីរិទ្ធ ត្រូវ​បាន​ចាប់​ខ្លួន ជាប់​ចោទ​ពី​បទ​ឧក្រិដ្ឋកម្ម​ប្រឆាំង​មនុស្ស​ជាតិ ការ​រំលោភ​បំពាន​យ៉ាង​ធ្ងន់ធ្ងរ​លើ​អនុសញ្ញា​ទីក្រុង​ហ្សឺណែវ ឆ្នាំ​១៩៤៩ និង​បទ​ឧក្រិដ្ឋកម្ម​ប្រល័យ​ពូជ​សាសន៍ ដែល​បាន​កើត​ឡើង​នៅ​ក្នុង​របប​កម្ពុជា​ប្រជាធិបតេយ្យ។

ក្រោយ​ពី​ការ​ចាប់​ខ្លួន​ដោយ​សាលា​ក្តី​ខ្មែរ​ក្រហម នៅ​ឆ្នាំ​២០០៧ លោក អៀង សារី តែង​បដិសេធ​រាល់​ការ​ចោទ​ប្រកាន់។ លើស​ពី​នោះ​ទៅ​ទៀត ជន​ជាប់​ចោទ អៀង សារី ដែល​ស្ថិត​ក្នុង​សំណុំ​រឿង​០០២ បាន​ជ្រើស​រើស​យក​សិទ្ធិ​មិន​ឆ្លើយ​តប​រាល់​សំណួរ​ទាំង​ឡាយ​នៅ​ក្នុង​អង្គ​សវនាការ ដោយ​បាន​ផ្ទេរ​សិទ្ធិ​ទាំង​នេះ​ជូន​មេធាវី​របស់​ខ្លួន។

ភរិយា​របស់​លោក អៀង សារី គឺ​លោកស្រី អៀង ធីរិទ្ធ ជា​ស្ត្រី​បញ្ញវន្ត​ជាន់​ខ្ពស់​មួយ​រូប និង​ធ្លាប់​បាន​តស៊ូ​បដិវត្តន៍​ជាមួយ​ស្វាមី​ខ្លួន ទទួល​បាន​តំណែង​ជា​រដ្ឋមន្ត្រី​ក្រសួង​សង្គម​កិច្ច នៅ​ក្នុង​របប​កម្ពុជា​ប្រជាធិបតេយ្យ។ លោកស្រី អៀង ធីរិទ្ធ ក៏​ជា​ជន​ជាប់​ចោទ​មួយ​រូប​ក្នុង​សំណុំ​រឿង​០០២ របស់​សាលា​ក្តី​ខ្មែរ​ក្រហម ដែល​ត្រូវ​បាន​ចាប់​ឃុំ​ខ្លួន​តំណាល​គ្នា​នឹង​លោក អៀង សារី នៅ​ឆ្នាំ​២០០៧។ ប៉ុន្តែ​ដោយសារ​តែ​គ្រូពេទ្យ​ពិនិត្យ​ឃើញ​ថា លោកស្រី អៀង ធីរិទ្ធ មាន​ជំងឺ​វង្វេងវង្វាន់ និង​បាត់​ការ​ចងចាំ​ធ្ងន់ធ្ងរ កាល​ពី​ថ្ងៃ​ទី១៦ ខែ​កញ្ញា ឆ្នាំ​២០១២ តុលាការ​កំពូល​នៃ​សាលា​ក្តី​ខ្មែរ​ក្រហម បាន​សម្រេច​ដោះ​លែង​លោកស្រី​ពី​ពន្ធនាគារ អោយ​ទៅ​រស់នៅ​ឯ​គេហដ្ឋាន​របស់​ខ្លួន ដោយ​មាន​លក្ខខណ្ឌ​បណ្ដោះ​អាសន្ន។

របប​កម្ពុជា​ប្រជាធិបតេយ្យ​ពី​ឆ្នាំ​១៩៧៥ ដល់​ឆ្នាំ​១៩៧៩ ក្រោម​ការ​ដឹកនាំ​របស់​បក្ស​កុម្មុយនិស្ត​កម្ពុជា ដែល​មាន​លោក អៀង សារី ជា​សមាជិក​ម្នាក់​ដែរ​នោះ បាន​ធ្វើ​អោយ​បាត់​បង់​ជីវិត​ពលរដ្ឋ​កម្ពុជា ជិត ២​លាន​នាក់។ របប​នេះ​ត្រូវ​បាន​ផ្ដួល​រំលំ​ដោយ​កងទ័ព​វៀតណាម ជាង ១០​ម៉ឺន​នាក់ ដែល​បាន​វាយ​លុក​ចូល​កម្ពុជា នៅ​ចុង​ឆ្នាំ​១៩៧៨។

លោក អៀង សារី ដែល​ជា​ជន​ជាប់​ចោទ​ពី​បទ​ប្រល័យ​ពូជ​សាសន៍​ឧក្រិដ្ឋកម្ម​ប្រឆាំង​មនុស្ស​ជាតិ និង​ឧក្រិដ្ឋកម្ម​សង្គ្រាម​របស់​សាលា​ក្តី​ខ្មែរ​ក្រហម​នោះ បាន​ស្លាប់​នៅ​ក្នុង​មន្ទីរពេទ្យ​មិត្តភាព​ខ្មែរ-សូវៀត នៅ​ថ្ងៃ​ព្រហស្បតិ៍ ទី១៤ ខែ​មីនា ឆ្នាំ​២០១៣ នៅ​មុន​ការ​ជំនុំ​ជម្រះ​មិន​ទាន់​បាន​បញ្ចប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។