សេចក្ដី​សម្រេច​ចុងក្រោយ​ជុំវិញ​ករណី​លោក មាស មុត នឹង​ចេញ​នៅ​ដើម​ឆ្នាំ​២០២០

ដោយ មួង ណារ៉េត
2019-11-30
អ៊ីម៉ែល
មតិ
Share
បោះពុម្ព
មន្ត្រី​សាលាក្ដី​ខ្មែរ​ក្រហម​ថ្លែង​ទៅ​កាន់​ពលរដ្ឋ​ដែល​ចូល​រួម មុន​បញ្ចាំង​ភាពយន្ត​រឿង​ស្នេហា​ឆ្លង​កាត់​ក្នុង​របប​ខ្មែរក្រហម​របស់​ប្ដី​ប្រពន្ធ​មួយ​គូ នៅ​សាលាក្ដី​ខ្មែរ​ក្រហម កាល​ពី​ថ្ងៃ​ទី​​១០ ខែ​សីហា ឆ្នាំ​២០១៧។
មន្ត្រី​សាលាក្ដី​ខ្មែរ​ក្រហម​ថ្លែង​ទៅ​កាន់​ពលរដ្ឋ​ដែល​ចូល​រួម មុន​បញ្ចាំង​ភាពយន្ត​រឿង​ស្នេហា​ឆ្លង​កាត់​ក្នុង​របប​ខ្មែរក្រហម​របស់​ប្ដី​ប្រពន្ធ​មួយ​គូ នៅ​សាលាក្ដី​ខ្មែរ​ក្រហម កាល​ពី​ថ្ងៃ​ទី​​១០ ខែ​សីហា ឆ្នាំ​២០១៧។
RFA

អ្នកនាំពាក្យ​សាលា​ក្តី​ខ្មែរក្រហម​លោក នេត្រ ភក្ត្រា ប្រាប់​អាស៊ីសេរី ឱ្យ​ដឹង​កាល​ពី​ថ្ងៃ​ទី២៩ ខែ​វិច្ឆិកា​ថា អង្គ​បុរេ​ជំនុំជម្រះ នឹង​ថយ​ទៅ​ពិចារណា​ដើម្បី​ចេញ​សាលដីកា​សម្រេច​មួយ​ថា តើ​ត្រូវ​ទម្លាក់​ចោល​បទ​ប្រកាន់​លើ​លោក មាស មុត ឬ​ត្រូវ​បញ្ជូន​សំណុំរឿង​លោក មាស មុត ទៅ​ជំនុំជម្រះ ចំពោះ​ឧក្រិដ្ឋកម្ម ដូច​ការ​ចោទ​ប្រកាន់ ដែរ​ឬ​យ៉ាងណា៖ «អង្គ​បុរេ​ជំនុំជម្រះ ដក​ខ្លួន​ទៅ​ពិនិត្យ​ទៅលើ​ឯកសារ​ពាក់ព័ន្ធ ក៏ដូចជា​ទឡ្ហីករណ៍ មុននឹង​ឈាន​ទៅ​ដល់​ការ​ចេញ​សាលដីកា​ពាក់ព័ន្ធ​នឹង​បណ្តឹង​ឧទ្ធរណ៍ នៅ​ក្នុង​ត្រីមាស​ទី​មួយ ក្នុង​ឆ្នាំ​២០២០ ខាងមុខ»

អង្គ​បុរេជំនុំជម្រះ​នៃ​អង្គ​ជំនុំជម្រះ​វិសាមញ្ញ​ក្នុង​តុលាការ​កម្ពុជា ទើបតែ​បាន​បិទ​បញ្ចប់​សវនាការ​រយៈពេល​បី​ថ្ងៃ នៅ​ក្នុង​សំណុំរឿង ០០៣ ប្រឆាំង​នឹង​លោក មាស មុត។ សវនាការ​បី​ថ្ងៃ​នោះ ប្រព្រឹត្ត​ទៅ​កាលពី​ថ្ងៃ​ទី២៧ ដល់ ២៩ ខែ​វិច្ឆិកា។

នៅ​ក្នុង​សវនាការ​នោះ មាន​វត្តមាន​សហ​ព្រះរាជអាជ្ញា​អន្តរជាតិ សហ​ព្រះរាជ​អាជ្ញា​រង​ជាតិ និង​សហ​មេធាវី​ការពារ​ក្ដីជា​អន្តរជាតិ ដែល​បាន​បង្ហាញ​ទឡ្ហីករណ៍​របស់​ខ្លួន​នៅ​ក្នុង​សំណុំ​រឿង​នេះ​។ ប៉ុន្តែ លោក មាស មុត ដែល​ជា​ជន​ត្រូវ​ចោទ ពុំ​មាន​វត្តមាន​នោះ​ឡើយ ដោយសារតែ បញ្ហា​សុខភាព ព្រោះ​វ័យ​ចំណាស់ សុខភាព​ខ្សោយ គ្មាន​កាយសម្បទា​គ្រាប់​គ្រាន់​នឹង​ចូលរួម​សវនាការ​បាន។ទោះជា​យ៉ាង​នេះ​ក្តី គាត់​មាន​សហ​មេធាវី​តំណាង​គាត់​នៅ​ក្នុង​សវនាការ​នេះ។

សហ​ចៅក្រម​ស៊ើបអង្កេត​ជាតិ និង​អន្តរជាតិ កាលពី​ចុង​ខែ​វិច្ឆិកា ឆ្នាំ​២០១៨ ខ្វែង​យោបល់​គ្នា រឿង​កាត់ទោស ឬ​មិន​កាត់ទោស អតីត​កម្មាភិបាល​ខ្មែរក្រហម​លោក មាស មុត។ ការ​ខ្វែង​យោបល់គ្នា​នេះ តម្រូវ​ឱ្យ​ខាង​ចៅក្រម​ខាង​ភាគី​ជាតិ ចេញ​ដីកា​ដំណោះស្រាយ​មួយ ចំណែក​ឯ​ចៅក្រម​ខាង​ភាគី​អន្តរជាតិ ចេញ​ដីកា​ដំណោះស្រាយ​មួយ​ដាច់ដោយឡែក ដោយមាន​សម្អាង​ហេតុ​រៀង​ៗ​ខ្លួន។មូលហេតុ​នៃ​ការ​ខ្វែង​យោបល់​គ្នា​នេះ ខាង​សហ​ចៅក្រម​ស៊ើបអង្កេត​ជាតិ សម្អាង ​ថាលោក មាស មុត មិន​ស្ថិត​ក្នុង​យុត្តាធិការ​បុគ្គល​របស់​សាលា​ក្តី​ខ្មែរក្រហម​នេះ​ទេ។ មាន​ន័យថា​លោក មាស មុត មិនមែន​ស្ថិត​ក្នុង​ចំណោម​មេដឹកនាំ​ជាន់ខ្ពស់ ឬ ជា​ជន​ម្នាក់​ដែល​ទទួលខុសត្រូវ​បំផុត ចំពោះ​បទឧក្រិដ្ឋ​ដែល​កើតឡើង​នៅ​ក្នុង​សម័យ​ខ្មែរក្រហម​នោះ​ឡើយ។

ប៉ុន្តែ សហ​ចៅក្រម​ស៊ើបអង្កេត​អន្តរជាតិ យល់​ផ្សេង​ពី​នេះ ដោយ​លើក​ហេតុផល​ថា​លោក មាស មុត ពិតជា​ស្ថិត​ក្នុង​យុត្តាធិការ​បុគ្គល​របស់​សាលា​ក្តី​នេះ ដោយសារ​មាន​ភស្តុតាង​គ្រប់គ្រាន់​បញ្ជាក់​ថា លោក មាស មុត ស្ថិត​ក្នុង​ចំណោម​ជន​ដែល​ទទួលខុសត្រូវ​ខ្ពស់​បំផុត ក្នុង​របប​ខ្មែរក្រហម​។ សហចៅក្រម​ស៊ើបអង្កេត​អន្តរជាតិ​បន្ត​ថា ភស្តុតាង​ទាំងនេះ គ្រប់គ្រាន់​ដើម្បី​ចោទប្រកាន់​លើ​លោក មាស មុត និង បញ្ជូន​ទៅ​កាត់ទោស ចំពោះ​បទ​ចោទ​នៃ​អំពើ​ប្រល័យពូជសាសន៍​លើ​ជនជាតិ​វៀតណាម ឧក្រិដ្ឋកម្ម​ប្រឆាំង​មនុស្សជាតិ ឧក្រិដ្ឋកម្ម​សង្គ្រាម និង​អំពើ​មនុស្សឃាត​គិតទុក​ជាមុន យោង​តាម​ច្បាប់​កម្ពុជា។

សហ​ចៅក្រម​ស៊ើបអង្កេត​ជាតិ សម្រេច​យក​ដីកា​លើកលែង​ការចោទប្រកាន់ ចំពោះ​លោក មាស មុត។ ប៉ុន្តែ សហ​ចៅក្រម​ស៊ើបអង្កេត​អន្តរជាតិ សម្រេច​យក​ដីកា​បញ្ជូន​រឿង​ទៅ​ជំនុំជម្រះ​។ ការ​សម្រេច​បញ្ជូន​រឿង​លោក មាស មុត ទៅ​ជំនុំជម្រះ​នេះ រង​ការជំទាស់​ពី​សហ​ព្រះរាជអាជ្ញា​ជាតិ និង សហ​មេធាវី​ការពារ​ក្តី​ឱ្យ​លោក មាស មុត ដែល​បាន​ប្ដឹង​ឧទ្ធរណ៍ នៅ​ចំពោះ​មុខ​អង្គ​បុរេជំនុំជម្រះ​នេះ កាលពី​ខែ​មេសា ឆ្នាំ​២០១៩។

លោក មាស មុត ឆ្នាំនេះ​អាយុ ៨១ ឆ្នាំ មាន​ស្រុកកំណើត​នៅ​ស្រុក​ឈូក ខេត្ត​កំពត។ បច្ចុប្បន្ន​មាន​ទីលំនៅ នៅ​ខេត្ត​បាត់ដំបង។ លោក​មាន​មេធាវី​ការពារ​ក្ដី​ពីរ​រូប គឺ​មេធាវី​ជាតិ​លោក អាង ឧត្តម និង​មេធាវី​អន្តរជាតិ និង​ជា​ជនជាតិ​អាមេរិក​លោក ម៉ៃឃើល ខាណាវ៉ាស់ (Michael Karnavas)​។ លោក​ត្រូវ​បាន​ចោទ​ប្រកាន់​ថា ធ្លាប់​ជា​កម្មាភិបាល​ជាន់ខ្ពស់​ក្នុង​របប​ខ្មែរក្រហម ដោយ​មាន​តួនាទី​ជា​សមាជិក​គណៈ​មជ្ឈិម​បក្ស ជា​លេខាធិការ​រង ជា​លេខា​កងពល​១៦៤ (​រាប់បញ្ចូល​ទាំង​កងទ័ពជើងទឹក​) និង​ជា​លេខា​ស្វយ័ត​នៅ​កំពង់សោម​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

Ta Muth wants Ta HSen,Ta Hor N.Hong and Ta H.Samrin come to stand trial before they all getting olds and dies+some N.Hanoi's war criminals conspiracy too.

Comrade Ta M.Muth reveals that why the ICJ tribunal in P Penh didn't call big brethren Ta Hun Sen,Ta Hor N.Hong,and Ta H.Samrin to stand trial with him.If,the ICJ call all these big brethren and some n.Hanoi's war top criminals conspiracy like comrade N.Chea always appealed to the IJC,please bring all those war criminals conspiracy come to trials as witness and then everything will solved"save times and save money",and a justice will go through to million victims families who still alive with taken 40+years to see this justice.

Nov 30, 2019 05:45 PM

គេហទំព័រ​ទាំងមូល