នៅក្នុងលិខិតដោយមានស្នាមមេដៃរបស់ប្រជាពលរដ្ឋចំនួន ៤៥នាក់ នៅភូមិស្អាត ឃុំស្រែចា បានប្តឹងចោទប្រកាន់ឈ្មោះ ហែម ហ៊ុន ថាបានកាប់ឆ្ការលើព្រៃដែលសហគមន៍ម្ចាស់ស្រុកនិងក្រុមប្រឹក្សាឃុំរក្សាទុកនៅចំណុចទឹកផុសត្រពាំងព្រីងប្រមាណ ២ហិកតារ ជាទីកន្លែងគោរពបូជាតាមសាសនាដែលពួកគេបានថែរក្សាទុកតាំងពីឆ្នាំ២០០៤ មកនោះ ត្រូវបានឈ្មោះ ហែម ហ៊ុន យកទៅលក់ឲ្យឈ្មោះ សុខ រ៉នី ហើយសំណូមពរទៅអភិបាលស្រុកឲ្យទាមទារដកយកមកវិញដើម្បីទុកជាសម្បត្តិសមូហភាពវិញ ៖ «សារសំខាន់គោរពបូជា ដីកន្លែងទឹកផុស។ កន្លងមក គេគោរពបូជា ពេលឈឺពេលគ្រុនអី ទៅបន់ស្រន់ត្រង់ហ្នុង មិនបាច់យកទៅពេទ្យទេ គឺជាតែម្ដង។ រហូតមកដល់ថ្ងៃហ្នឹង....។ ពីជំនាន់ប៉ុលពត ស្រែគេទេ ឆ្នាំ២០០៣-២០០៤ ហ្នឹង ដីហ្នឹងវាទឹកផុស ក្រោយមក គេដឹងថា ដីហ្នឹងជាផ្ទៃដីអារក្សអ្នកតាព្រៃភ្នំ»។
ប្រធានសហគមន៍ស្រុកស្នួល គឺលោក មូល សានិត្យ បានលើកឡើងថា ហែម ហ៊ុន បានលក់ដីបំភ័ន្តភ្នែកមេឃុំ ៖ «មេឃុំគាត់អត់ដឹងដែរទេ ព្រោះគេឲ្យវ៉ៃត្រាហ្នឹង គឺមិនមែនចំណុចដីហ្នឹងទេ ដីហ្នឹង គាត់មិនឲ្យទេ ព្រោះវាទៅបោកមេឃុំហ្នឹងថា ដីឯណាឯក្រោយហ្នឹងទេ។ គាត់និយាយហើយ គាត់ថា អ្នកលក់ភូតគាត់ បោកប្រាស់គាត់ ឲ្យគាត់វ៉ៃត្រា»។
លោក ហែម ហ៊ុន ដែលទទួលរងការចោទប្រកាន់នោះ បានបំភ្លឺថា លោកបានកាប់ឆ្ការលើដីព្រៃដែលរដ្ឋអំណាចភូមិឃុំទទួលស្គាល់តាំងពីឆ្នាំ១៩៩៨ ហើយថា ក្រុមអ្នកចោទប្រកាន់ទាំងនោះទេដែលជាអ្នកបានរំលោភយកដីអ្នកដទៃធ្វើជាកម្មសិទ្ធិដើម្បីលក់ ៖ «មូលគំនិតឃុបឃិតជាមួយនឹងឈ្មួញ សព្វថ្ងៃ កំពុងដើរជួញដូរដីលើដីសម្បទានសង្គមកិច្ច រួមគំនិតនឹងក្រុមសិក្សាម្នាក់ ហើយដល់ក្រោយមកគាត់បានដីធ្លី កាប់ឆ្ការបំពានទៅ ត្រង់ណេះដីគាត់ ត្រង់ណោះដីគាត់ អ៊ីចឹងដើរលក់ដូររាល់ថ្ងៃនេះ ទម្លាក់កំហុសមកលើខ្ញុំ»។
ការចោទប្រកាន់គ្នាទៅវិញទៅមកនេះ លោក អ៊ីវ សាភុំ អភិបាលស្រុកបានផ្តល់សម្ភាសន៍តាមទូរស័ព្ទថា លោកមិនទាន់បានដឹងអំពីរឿងនេះនៅឡើយទេ ហើយលោកនឹងធ្វើការស៊ើបអង្កេត ៖ «អរគុណ ដោយសារកន្លែងហ្នឹង ផ្លូវវាលំបាក ហើយខ្ញុំក៏មានការខ្វះខាតដែរ ដោយសារវារវល់ពេក ហើយចាំមើល៍ខ្ញុំចុះទៅមើល»។
ប្រជាពលរដ្ឋដើមបណ្តឹងបានអះអាងថា បើដីនោះដាក់ជារបស់រដ្ឋគឺអាចថែរក្សាកូនឈើដែលសល់ពីការកាប់ឆ្ការឲ្យដុះឡើងវិញ ហើយថា នឹងប្តឹងទៅតុលាការនៅពេលណាដែលបុគ្គលនិងអ្នកឃុបឃិតនៅតែបន្តកាន់កាប់ដីនេះទៀត៕