ពលរដ្ឋជាង ១៥០នាក់តំណាងឲ្យ ១៩៧គ្រួសារ មកពីរឃុំចំនួន២ នៃស្រុកស្រែអំបិល ប្រមូលផ្ដុំគ្នាមុខសាលាខេត្តកោះកុង ស្នើសុំដំណោះស្រាយក្នុងជម្លោះដីធ្លីជាមួយឧកញ៉ា ហេង ហ៊ុយ ដែលអូសបន្លាយជាង១០ឆ្នាំមកហើយ។ សង្គមស៊ីវិលយល់ថា អាជ្ញាធរ និងក្រសួងពាក់ព័ន្ធ គួរផ្ដល់ដំណោះស្រាយដល់ពលរដ្ឋ ដែលមានជម្លោះដីធ្លីឲ្យបានស្មើភាពគ្នា គ្រប់ទីកន្លែងទាំងអស់ក្នុងខេត្តកោះកុង ដើម្បីបញ្ចប់ការចេញតវ៉ារឿងដីធ្លីតទៅទៀត។
តំណាងពលរដ្ឋ លោក ឆាន់ ឈឿន ប្រាប់អាស៊ីសេរីថា ពួកគាត់ជិត ២០០គ្រួសារសម្រេចនាំចេញតវ៉ារកដំណោះស្រាយរឿងដីធ្លីជាថ្មី ក្រោយពីដឹងថាពលរដ្ឋដែលមានជម្លោះដីធ្លីនៅកន្លែងផ្សេងទៀត ក្នុងខេត្តកោះកុង បានទទួលសំណងសមរម្យពីអាជ្ញាធរ។ លោក ឆាន់ ឈឿន លើកឡើងថា ដំណោះស្រាយ ដែលពលរដ្ឋចង់បានគឺ ស្នើសុំកាត់ឆ្វៀលដីទំហំ ៤២១ហិកតារ ចេញពីទីតាំងរបស់ក្រុមហ៊ុនស្ករអំពៅរបស់លោកឧកញ៉ា ហេង ហ៊ុយ យកមកប្រគល់ឲ្យពលរដ្ឋវិញ និងរួមទាំងចេញប័ណ្ណកម្មសិទ្ធិកាន់កាប់ដីធ្លី និងផ្ដល់ប្រាក់សំណងក្នុង១គ្រួសារ ៧ពាន់ដុល្លារ។
តំណាងពលរដ្ឋរូបនេះថា ការទាមទារសំណងនេះ ដោយសាររយៈពេលជាង ១០ឆ្នាំមកនេះ ពួកគាត់បាត់បង់ដីធ្វើស្រែចម្ការ គ្មានប្រាក់ចំណូលចិញ្ចឹមគ្រួសារ និងកូនមិនបានទៅសាលារៀន ក្រោយពីលោក ហេង ហ៊ុយ ប្រើគ្រឿងចក្រឈូសឆាយ រឹបអូសយកដីធ្លីពលរដ្ឋទៅដាំអំពៅ៖ «ខ្ញុំចង់ឲ្យគាត់ដោះស្រាយ និងជួយសម្រួលឲ្យដីឲ្យពួកខ្ញុំ មួយគ្រួសារ ២ហិកតារ ហើយនិងលុយ ៧ពាន់ដុល្លារ។ ចង់បានតែប៉ុណ្ណឹងមកវិញ» ។
លោក ឆាន់ ឈឿន ថា សាលាខេត្តកោះកុង នឹងជូនដំណឹងទៅពលរដ្ឋវិញ នៅដើមសប្ដាហ៍ក្រោយ បន្ទាប់ពីទទួលញត្តិរួចរាល់ នៅថ្ងៃទី២១ មិថុនា។ កាលពីថ្ងៃទី២០ មិថុនា ប្រជាពលរដ្ឋនៃឃុំជីខក្រោម និងឃុំជីខលើ នាំគ្នាទៅដាក់ពាក្យបណ្ដឹងនៅសាលាឃុំ និងសាលាស្រុកស្រែអំបិល ប៉ុន្តែត្រូវបានបដិសេធ ក្រោមហេតុផលថា រឿងរ៉ាវដីធ្លីនេះ គឺបានកើតឡើងជាយូរឆ្នាំហើយ។
អភិបាលខេត្តកោះកុង អ្នកស្រី មិថុនា ភូថង ថ្លែងថា ខាងរដ្ឋបាលទើបតែទទួលបានញត្តិពីពលរដ្ឋនៅថ្ងៃទី២១ មិថុនា បន្ទាប់មក គណៈកម្មការខេត្តនឹងពិនិត្យមើលសំណើប្រជាពលរដ្ឋ ដោយផ្អែកទៅតាមអង្គហេតុ និងអង្គច្បាប់នៃជម្លោះដីធ្លី៖ «យើងនឹងមើលអង្គហេតុ ព្រោះថាមានរឿងច្រើនពេក។ យើងមិនទាន់ពិនិត្យនៅឡើយ ហើយការស្រាវជ្រាវត្រូវប្រើពេលវេលា អាចថាពេលវេលាគួរសមដែរ មិនអាចថាយូរឬឆាប់ទៅតាមអង្គហេតុដែរ។អ៊ីចឹង ! គណៈកម្មការខេត្ត គាត់មិនទាន់បានពិនិត្យដែរ ព្រោះយើងទទួលបានថ្ងៃហ្នឹង ហើយថ្ងៃសុក្រទៀត។ អ៊ីចឹង ! ចាំពេលវេលាបន្តិច» ។
មន្ត្រីអង្គការ លីកាដូ ប្រចាំខេត្តកោះកុង លោក ហួរ អ៊ីន ដែលតាមដានជម្លោះដីធ្លីនេះ ឲ្យដឹងថា សំណងដែលខាងក្រុមហ៊ុនផ្ដល់ឲ្យពលរដ្ឋកាលពីពេលកន្លងទៅ មានអ្នកខ្លះទទួលបានប្រាក់១០ម៉ឺនរៀល ៥០ម៉ឺនរៀល ហើយខ្លះទៀតបាន ១លានរៀល ឬ ២លានរៀល ទៅតាមទំហំដីធំ ឬតូច។ លោក ហួរ អ៊ីន ថា ពលរដ្ឋទទួលសំណងនោះ ដោយសារមានការបង្ខិតបង្ខំ និងគំរាមពីខាងក្រុមហ៊ុន។ មន្ត្រីឃ្លាំមើលផ្នែកសិទ្ធិមនុស្ស រូបនេះ យល់ថា អាជ្ញាធរខេត្ត និងក្រសួងរៀបចំដែនដី គួររិះរកដំណោះស្រាយសមរម្យណាមួយជូនពួកគាត់ ដូចទៅនឹងដំណោះស្រាយដែលធ្លាប់បានផ្ដល់ឲ្យពលរដ្ឋនៅទីតាំងផ្សេងទៀត ដែលទទួលបានទាំងដីនិងប្រាក់សំណង៖ «អ៊ីចឹង ! យើងឃើញថា ដើម្បីឲ្យយុត្តិធម៌សម្រាប់អ្នកមានជម្លោះដីធ្លីទាំងអស់ គឺអាជ្ញាធរខេត្តត្រូវតែខិតខំស្វែងយល់ពីការពិត តើប្រជាពលរដ្ឋហ្នឹង បានទទួលសំណងដែរឬអត់។ ហើយបើបាន សំណងហ្នឹងទទួលបានដោយការបង្ខំ ឬដោយការពេញចិត្ត ដោយខ្លួនឯង។ បើសិនជាយើង យកគំរូតាមដីធ្លីដែលបានដោះហើយកន្លងមក យើងឃើញថាប្រជាពលរដ្ឋដែលទើបតែតវ៉ាជាង ១៩០គ្រួសារនេះ ពិតជាទទួលបានយុត្តិធម៌ដូចជាប្រជាពលរដ្ឋផ្សេងៗ ទៀតដែរ» ។
អាស៊ីសេរីមិនអាចទាក់ទងលោក ហេង ហ៊ុយ ប្រធានក្រុមហ៊ុន ហេង ហ៊ុយ អឹគ្រីខាល់ឈើរ គ្រុប (Heng Huy Agriculture Group) បានទេ អំពីដំណោះស្រាយសម្រាប់ពលរដ្ឋជិត ២០០គ្រួសារនេះ។
ពលរដ្ឋឲ្យដឹងថា បញ្ហាជម្លោះដី នៅស្រុកស្រែអំបិល ខេត្តកោះកុង កើតឡើងពីឆ្នាំ២០០៩ ហើយបន្តអូសបន្លាយមកដល់ពេលបច្ចុប្បន្ននេះ។ នៅឆ្នាំ២០១០ ពលរដ្ឋចោទ ក្រុមហ៊ុន ហេង ហ៊ុយ ថាបានយកគ្រឿងចក្រទៅឈូសឆាយដីលំនៅប្រជាពលរដ្ឋ និងគំរាមចាប់ខ្លួនប្រជាពលរដ្ឋណា ដែលហ៊ានតវ៉ាចំពោះការឈូសឆាយវាទយកដីរបស់ក្រុមហ៊ុន។ ពលរដ្ឋអះអាងថា ពួកគាត់ចូលកាន់កាប់ និងអាស្រ័យផលលើដីធ្លីចាប់តាំងពីឆ្នាំ១៩៩៣ មកម្ល៉េះ ដោយមានប័ណ្ណកាន់កាប់ដីធ្លីទទួលស្គាល់ពីអាជ្ញាធរមូលដ្ឋាន។
តំណាងពលរដ្ឋជិត ២០០គ្រួសារ បញ្ជាក់ថាពួកគាត់នឹងទៅប្រមូលផ្ដុំគ្នានៅមុខសាលាខេត្តកោះកុង នៅសប្ដាហ៍ក្រោយ ដើម្បីតាមដានសំណើដែលបានដាក់រួចហើយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។