ចៅក្រមជំនុំជម្រះនៃសាលាដំបូងរាជធានីភ្នំពេញ បានសម្រេចលើកពេលសវនាការក្រុមស្ត្រីមានជម្លោះដីធ្លីនៅតំបន់បឹងកក់ និងបុរីកីឡា តាមសំណើសុំរបស់មេធាវីការពារចុងចោទ។ ក្រុមស្ត្រីនៅសហគមន៍ជម្លោះដីធ្លីបឹងកក់ និងបុរីកីឡាប្ដេជ្ញាថា បើទោះជារងពាក្យបណ្ដឹង ប៉ុន្ដែពួកគេមិនភ័យតក់ស្លុតទេ និងបន្ដតវ៉ាមុខភូមិគ្រឹះម្ចាស់ក្រុមហ៊ុន ផានអ៊ីមិច (PHANIMEX) អ្នកស្រី ស៊ុយ សុផាន បន្ដទៀត។
ពលរដ្ឋមានជម្លោះដីធ្លីនៅសហគមន៍បុរីកីឡា អ្នកស្រី ភោគ សុភីន ឲ្យដឹងថា មេធាវីការពារក្ដីអ្នកទាំង៣ បានស្នើសុំឲ្យលើកពេលសវនាការ ដោយសារតែមេធាវីមិនទាន់បានសិក្សាច្បាស់ លើករណីនេះ។ បើទោះជាបែបណាក្ដី អ្នកស្រី ភោគ សុភីន អះអាងថា មិនបានគំរាមកំហែង ឬប្រព្រឹត្តបទល្មើសដឹកនាំក្រុមសហគមន៍មានជម្លោះដីធ្លីទៅបំផ្លាញរបងភូមិគ្រឹះរបស់អ្នកស្រី ស៊ុយ សុផាន ដូចការចោទប្រកាន់ទេ៖ «ខ្ញុំនៅតែទៅតវ៉ា ខ្ញុំនៅតែទាមទារដរាប ណាបានដំណោះស្រាយ បានខ្ញុំឈប់ ហើយកុំចោទខ្ញុំថា ខ្ញុំប្រមូលផ្តុំអ្នកបឹងកក់ កុំលាបពណ៌ពួកខ្ញុំ អ្នកបឹងកក់បដិវត្តន៍ពណ៌ខ្ញុំមិនមែនបដិវត្តន៍ពណ៌ មិនមែនទម្លាក់រដ្ឋាភិបាលអីទេ។ កុំមកលាបពណ៌ខ្ញុំសព្វបែបសព្វយ៉ាងអ៊ីចឹង។ ខ្ញុំមិនមែនជាអ្នកចេះដឹងអ្វីនោះទេ។ ខ្ញុំចេះតែអក្សរខ្មែរសរសេរមិនត្រូវផង។ កុំដាក់បន្ទុកខ្ញុំ ហើយកុំថា ខ្ញុំទៅផ្ទះអ្នកស្រី ស៊ុយ សុផាន់ ទៅបំផ្លាញទ្រព្យសម្បត្តិរបស់គាត់ គ្មានទេ គ្មានធ្វើស្អីទេ គ្មានធ្វើអ្វីកើតទេ មានតែគាត់ទេ ពេលពួកខ្ញុំទៅតវ៉ាទាមទារ មានតែបើកទឹកបង្ហូរដាក់ពួកខ្ញុំទុយោប៉ុនភ្លៅមិនឲ្យអង្គុយកើតផង។ មិនតែប៉ុណ្ណោះទេថែមទាំងលែងឆ្កែចេញមក បង្ហូរទឹកពេញមុខផ្ទះពួកខ្ញុំអង្គុយមិនបានផង»។
ពលរដ្ឋរងបណ្ដឹងពីអ្នកស្រី ស៊ុយ សុផាន មាន ៣រូប ក្នុងសហគមន៍បុរីកីឡា និងបឹងកក់ គឺអ្នកស្រី ភោគ សុភីន កញ្ញា អ៊ឺម ស្រីទូច និងអ្នកស្រី ស៊ា ណារ៉េត។
ស្ត្រីមានជម្លោះដីធ្លីទាំង ៣រូប ត្រូវបានម្ចាស់ក្រុមហ៊ុន ផានអ៊ីមិច អ្នកស្រី ស៊ុយ សុផាន ដាក់ពាក្យប្ដឹងទៅតុលាការពីបទថា បានគំរាមកំហែងដោយមានបញ្ជាឲ្យបំពេញលក្ខខណ្ឌអ្វីមួយ និងបំផ្លិចបំផ្លាញទ្រព្យសម្បត្តិអ្នកដទៃ។ ពាក្យបណ្ដឹងរបស់អ្នកស្រី ស៊ុយ សុផាន ធ្វើឡើងក្រោយពេលក្រុមស្ត្រីទាំងនោះ បានប្រមូលផ្ដុំគ្នាវាយគម្របឆ្នាំង ចាន លើកបដា ស្រែកតវ៉ា នៅមុខភូមិគ្រឹះអ្នកស្រី ស៊ុយ សុផាន ក្នុងខណ្ឌទួលគោក ដើម្បីទាមទារសុំជួបអ្នកស្រី ស៊ុយ សុផាន សុំរកដំណោះស្រាយករណីដី និងផ្ទះរបស់ពួកគេ រងការឈូសបំផ្លាញ និងបច្ចុប្បន្នដីមានជម្លោះនៅតំបន់បុរីកីឡា ក្រុមហ៊ុនចិនកំពុងបុកគ្រឹះធ្វើអគារ។
នៅខាងក្រៅបរិវេណសាលាដំបូងរាជធានីភ្នំពេញនៅថ្ងៃព្រហស្បតិ៍ ទី១ វិច្ឆិកានេះ ក្រុមស្ត្រីនៃសហគមន៍បឹងកក់ និងបុរីកីឡា បាននាំគ្នាតវ៉ា និងទាមទារឲ្យចៅក្រមទម្លាក់បទចោទលើ ក្រុមស្ត្រីទាំង៣ ដោយអះអាងថា ពួកគេមិនបានបំផ្លិចបំផ្លាញទ្រព្យសម្បត្តិម្ចាស់ក្រុមហ៊ុន ផានអ៊ីមិច ទេ គឺមានតែខាងក្រុមហ៊ុន ផានអ៊ីមិច យកគ្រឿងចក្រទៅឈូសកម្ទេចផ្ទះរបស់ពួកគាត់៖ «អ្នកមានលុយមានអំណាច ... សាមគ្គីគ្នានាំគ្នាមកប្លន់ដីប្រជាពលរដ្ឋ ដើម្បីធ្វើបាបអ្នកក្រ ធ្វើបាបអ្នកទន់ខ្សោយតុលាការបក្សពួកនិយមបម្រើតែអ្នកមានអំណាច ... តុលាការពុករលួយ! តុលាការរាល់ថ្ងៃនេះបម្រើតែអ្នកមានអំណាចបក្សពួក តើមែនអត់ ?»។
កាលពីថ្ងៃទី២០ ខែមីនា ពលរដ្ឋមានជម្លោះដីធ្លីនៅសហគមន៍បុរីកីឡា គឺអ្នកស្រី ភោគ សុភីន ធ្លាប់ត្រូវបានប្រធាននាយកដ្ឋានព្រហ្មទណ្ឌ នៃក្រសួងមហាផ្ទៃ លោក សុខ ខេមរិន្ទ បានចេញលិខិតកោះហៅឲ្យចូលខ្លួន នៅក្រសួងមហាផ្ទៃម្ដងរួចហើយ ទាក់ទងនឹងសកម្មភាពក្រុមស្ត្រីមានជម្លោះដីធ្លី នាំគ្នាទៅតវ៉ា ទាមទាររកដំណោះស្រាយ នៅមុខភូមិគ្រឹះអ្នកស្រី ស៊ុយ សុផាន។ អ្នកស្រី ភោគ សុភីន អះអាងថា កាលនោះ គឺមន្ត្រីនាយកដ្ឋាននគរបាលព្រហ្មទណ្ឌម្នាក់ មិនព្រមប្រាប់ឈ្មោះទេ តែបានព្រមានចាប់ឃុំខ្លួនអ្នកស្រី បើនៅបន្តការតវ៉ាស្វែងរកដំណោះស្រាយនៅមុខភូមិគ្រឹះអ្នកស្រី ស៊ុយ សុផាន បន្ដទៀត។
ជម្លោះដីធ្លីនៅតំបន់បុរីកីឡា កើតឡើងក្រោយពេលរបបក្រុងភ្នំពេញបានប្រគល់ដីតំបន់នោះ ឲ្យក្រុមហ៊ុនអភិវឌ្ឍន៍ ឈ្មោះ ផាន អ៊ីម៉ិច របស់ អ្នកស្រី ស៊ុយ សុផាន ធ្វើការអភិវឌ្ឍន៍ និងសាងសង់អគារជាច្រើនខ្នង។ ប៉ុន្ដែក្រោយសាងសង់អគារបានចំនួន ៨ខ្នង ក្រុមហ៊ុន ផានអ៊ីមិច បានប្រកាសថា ក្ស័យធន មិនអាចបន្ដគម្រោងបាន។ ចំណែកដី និងផ្ទះរបស់ពលរដ្ឋនៅបុរីកីឡា ត្រូវបានក្រុមហ៊ុន ផានអ៊ីមិច និងអាជ្ញាធរខណ្ឌ ៧មករា ឈូសកម្ទេចចោល និងបណ្ដេញចេញទាំងបង្ខំ តាំងពីថ្ងៃទី៣ មករា ឆ្នាំ២០១២ មក។
អាស៊ីសេរីមិនអាចរកប្រភពសុំការបំភ្លឺពីខាងភាគីម្ចាស់ក្រុមហ៊ុន ផានអ៊ីមិច អ្នកស្រី ស៊ុយ សុផាន បានទេ នៅថ្ងៃទី១ វិច្ឆិកា។
អ្នកការពារសិទ្ធិមនុស្សនៃសមាគម អាដហុក លោក យី សុខសាន្ដ យល់ថា ខាងភាគីក្រុមហ៊ុន មិនគួរប្រើប្រាស់ផ្លូវតុលាការជំនួសការចរចារកដំណោះស្រាយបញ្ចប់រឿងទេ។ សង្គមស៊ីវិលរូបនេះ សង្កេតឃើញថា ករណីជម្លោះដីធ្លីនៅបុរីកីឡា អាជ្ញាធររាជធានីភ្នំពេញ និងរបបក្រុងភ្នំពេញ ហាក់បានដោះស្រាយជិតចប់ហើយ នៅសល់ចំនួនតិចតួចប៉ុណ្ណោះ។ ដូច្នេះគួរដោះស្រាយបញ្ចប់ ហើយពលរដ្ឋទាំងនោះ នឹងមិនទៅអាចទៅតវ៉ាទាមទារនៅមុខភូមិគ្រឹះអ្នកស្រី ស៊ុយ សុផាន ទៀតទេ៖ «បើសិនជាក្រុមហ៊ុនអ្នកស្រី ស៊ុយ សុផាន់ មិនបានប៉ះពាល់ដីប្រជាពលរដ្ឋនោះ ពួកគាត់ក៏មិនទៅរកដំណោះស្រាយពីគាត់ដែរ។ ដោយសារអ្នកស្រី ស៊ុយ សុផាន មានការពាក់ព័ន្ធហ្នឹងហើយ បានពួកគាត់ទៅ»។
ចំណែកអ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា (CCHR) លោក វណ្ណ សូផាត វិញ ហៅការប្ដឹងក្រុមស្ត្រីមានជម្លោះដីធ្លីទៅតុលាការ ដោយសារតែការតវ៉ាទាមទាររកដំណោះស្រាយ ជារូបភាពនៃការគំរាមកំហែងអ្នកមានជម្លោះដីធ្លី ដោយប្រើប្រាស់ផ្លូវតុលាការ។ ក្រុមស្ត្រីនៃសហគមន៍មានជម្លោះដីធ្លីបឹងកក់ និងបុរីកីឡា អះអាងថា ពួកគេចងក្រងគ្នា ដើម្បីជួយគ្នា ក្នុងការទាមទាររកដំណោះស្រាយដីធ្លី ហើយពួកគេ នឹងនៅតែបន្ដសកម្មភាពទៅវាយឆ្នាំង ស្រែកតវ៉ាទាមទាររកដំណោះស្រាយមុខភូមិគ្រឹះអ្នកស្រី ស៊ុយ សុផាន បន្ដទៀត លុះត្រាទទួលបានដំណោះស្រាយដីធ្លីសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។