ពលរដ្ឋបុរីកីឡា ព្រួយ​បារម្ភ​ខ្លាច​មាន​ការ​បណ្តេញ​ចេញ​ជា​ថ្មី

ដោយ ថន ថារ៉ូ
2018.09.20
បំបែក បុរីកីឡា ៨៥៥ ២០១៧ កម្លាំង​សមត្ថកិច្ច​ចុះ​បំបែក​អតីត​អ្នក​បុរីកីឡា ដែល​ព្យាយាម​ចូល​ទៅ​រស់​នៅ​អគារ​ចាស់​ឡើង​វិញ កាល​ពី​ព្រឹក​ថ្ងៃ​ទី​៣ ខែ​មករា ឆ្នាំ​២០១៧។
Photo: RFA

ក្រុមពលរដ្ឋបុរីឡាកីឡាព្រួយបារម្ភថា ពួក​គេ​នឹង​ប្រឈម​ការបណ្តេញ​ចេញ​ជា​ថ្មី​ទៀត ដោយ​សារ​តែ​ពួក​គេ​សង្កេត​ឃើញ​មាន​គ្រឿងចក្រ​ជា​ច្រើន​កំពុង​ធ្វើ​សកម្មភាព​ឈូស​ឆាយ​ដី​ជិត​កន្លែង​ពួក​គេ​រស់នៅ។

ប្រជា​ហគមន៍​បុរីកីឡាបាននាំគ្នាមកជួបជុំនៅក្នុងសហគមន៍នេះដើម្បីរិះរកមធ្យោបាយប​ង្ការ​ព្រោះ​ពួក​គេ​ខ្លាចមានបណ្តេញ​​ចេញ​ម្តង​ទៀត​នៅ​ពេល​នេះ។ ការបង្ហាញគ្រឿងចក្រនៅ​តំបន់​បុរីកី​ឡា​បែបនេះនៅគ្រាដែលអភិបាលខណ្ឌ៧មករា លឹម សុភា នៅ​តែ​ហៅ​ពលរដ្ឋបុរីកីឡាឲ្យ​ទទួល​សំណង​លុយ​ប្រាំ​ពាន់​ដុល្លារ និងផ្ទះនៅភូមិអណ្តូងជាយក្រុងភ្នំពេញ។ ថ្ងៃទី១៩ កញ្ញា លោក​​អភិបាល​​ខណ្ឌ​បានកោះហៅពលរដ្ឋបីគ្រួសារបន្ថែមទៀត​ក្នុងចំណោម៧គ្រួសារដែលមិនទាន់​យល់​ព្រម​ទទួល​សំណង​ឲ្យ​ចូល​ជួប​លោក។

ពលរដ្ឋបុរីកីឡាម្នាក់លោកស្រី សោម សុម៉ាលី ដែល​បាន​ចូល​ជួប​​អភិបាល​​ខណ្ឌ៧ មករា ឲ្យ​អាស៊ី​សេរី​ដឹង​ថា លោក​​អភិបាល​​ខណ្ឌ​ប្រាប់​​ថា គណៈកម្មការរបស់សាលា​ក្រុងភ្នំពេញ​បាន​វាយ​តម្លៃ​ថា លោកស្រីបានត្រឹមតែសំណង​លុយ​ប្រាំ​ពាន់​​ដុល្លារ និង​​ផ្ទះ​​នៅ​​ភូមិ​​អណ្តូង​ជាយ​ក្រុង​ភ្នំពេញ។លោក​ស្រី​អះអាង​ថា ទាំងលោកស្រី និងអ្នកភូមិផ្សេងទៀត មិនព្រមទទួល​​យក​​សំណង​​​បែប​​​នេះ​​​ឡើយ។ លោក​ស្រីបន្តទៀតថា នៅ​ពេល​លោកស្រី​ប្រកាស​បែប​នេះ​លោក​អភិបាល​ខណ្ឌ​បាន​ព្រមាន​លោក​ស្រី​ថា លោក​ស្រី​​អាច​​ប្រឈម​​មុខ​​ផ្លូវ​​ច្បាប់​ បើ​​មិន​​ព្រម​​ទទួល​​យក​សំណង៖ «គាត់ (អភិបាល​ខណ្ឌ) ថា ឥឡូវ​ដូច​ចេះ​ដឹង​ច្រើន​​ណាស់ និយាយ​​ផូងៗ អត់​​មាន​​អី​​ខ្លាច​​សោះ។ ខ្ញុំ​ឆ្លើយ​វិញ​ថា ខ្ញុំ​មាន​អី​ខ្លាច​ទៀត គេ​រំលោភ​សិទ្ធិ​ខ្ញុំ​គេ​មិន​ខ្លាច​ផង»

ពលរដ្ឋសង្កេតឃើញថា ក្រោយរបបភ្នំពេញរៀបចំរបបថ្មីរបស់ខ្លួនត្រឹមត្រូវរួចហើយ ពួក​គេ​កំពុង​ប្រើ​វិធានការ​បង្ខំឲ្យពលរដ្ឋទទួលសំណង ដែល​ជា​សំណង​ក្រុម​ពលរដ្ឋ​មិន​អាច​ទទួល​​យក​បាន។ នេះ​ជា​លើកទី២ ហើយ ដែល​អភិបាល​ខណ្ឌ៧ មករា ឲ្យ​ក្រុម​ពលរដ្ឋ​មានជម្លោះ​ដី​ធ្លី​នៅ​តំបន់​បុរី​កីឡា​ចូល​ជួប​ស្វែង​រក​ដំណោះ​ស្រាយ។

តំណាង​សហគមន៍​បុរីកីឡាលោកស្រី ស ស៊ន ឲ្យ​ដឹង​ថា ពេល​នេះ​មាន​គ្រឿងចក្រ​កំពុង​ឈូស​ឆាយ​ដី​ក្បែរ​កន្លែង​លោកស្រី​រស់នៅ ដែល​ធ្វើ​ឲ្យ​លោក​ស្រី​ព្រួយបារម្ភ។ លោកស្រី​យល់​ថា ការ​ដាក់​គ្រឿងចក្រ​នេះ គឺ​ជា​វិធានការ​មួយ​ដើម្បី​ជំរុញ​ឲ្យ​សហគមន៍​​លោក​​ស្រី​​ចាក​ចេញ​ពី​តំបន់​បុរី​កីឡា៖ «មាន​អា​កាយ​ដី មាន​អាបុក មាន​អាឈួស សម្រាប់​​មីង​​បារម្ភ​​ដែរ​​ហ្នឹង​ ព្រោះ​​អី​​គេ​​និយាយ​​ហើយ​ បើ​មីង​មិន​ចេញ​ទេ​គេ​នឹង​វិធាន​អ្វី​មួយ»

សង្គមស៊ីវិលដែលតាមដំណើរឿងនេះយល់ថា អាជ្ញាធរ និង​ក្រុមហ៊ុនគួរតែ​មាន​ឆន្ទៈ​ដោះ​ស្រាយ​បញ្ចប់​ទំនាស់​ដីធ្លី​ទាំង​នេះ​កុំ​​ឲ្យ​​បន្ត​នៅ​​​រ៉ាំរ៉ៃ​​ទៀត ព្រោះ​​ទំនាស់​​ដីធ្លី​​នេះ​នៅ​​សេសសល់​តិច​តូច​បំផុត។ កាលពី​ឆ្នាំ​២០១២ ផ្ទះ​សម្បែងនិង​ទ្រព្យ​សម្បត្តិ​របស់​ពលរដ្ឋ​ទាំង ៣៨០​គ្រួសារ ដែល​មិន​ព្រម​ចាក​ចេញ​ត្រូវ​បាន​បំផ្លិចបំផ្លាញ​អស់។

អ្នកនាំពាក្យសមាគមអាដហុក លោក ស៊ឹង សែនករុណា យល់​ថា ការ​ផ្តល់​ដំណោះ​ស្រាយ​មួយ​ដែល​ពលរដ្ឋ​មិន​ពេញ​ចិត្តគឺស្មើនិងការ​ចាប់បង្ខំឲ្យពលរដ្ឋទទួលយកដែលជាការរំ​លោភ​លើ​សិទ្ធិ​សម្រេច​ចិត្ត​របស់​ពលរដ្ឋ។ លោក​លើក​ឡើង​ទៀត​ថា ការ​ផ្តល់ដំណោះ​ស្រាយ​ដោយ​​បង្ខំ គឺ​អាច​ប៉ះពាល់​មុខ​មាត់​រដ្ឋាភិបាល ហើយ​យន្តការ​នេះ ក៏​មិន​បាន​​ជោគជ័យ​​យូ​រ​អង្វែង​​នោះ​ដែរ៖ «សាធារណៈ​​ជាតិ​ អន្តរជាតិ​​តែង​​សម្លឹង​​មើល​​មក​​កម្ពុជា​វិធានការ ដែល​ដោះ​ស្រាយ​វិវាទ​ដី​ធ្លី​ច្រើន​តែ​ប្រើ​ការ​បណ្តេញ​​ចេញ។ ដូច្នេះ គឺ​ធ្វើ​ឲ្យ​ប៉ះ​ពាល់​មុខ​មាត់​រដ្ឋាភិបាល​ទៅ​វិញ​ទេ»

គិតមកដល់ពេលនេះក្នុងចំណោមពលរដ្ឋបុរីកីឡាដែលមានឯកសារគ្រប់គ្រាន់មិនព្រម​ចាក ចេញ គឺ​នៅ​សល់​តែ ៧គ្រួសារ​ប៉ុណ្ណោះ។ ក្រៅ​ពី​នេះ ក៏​មាន​ពលរដ្ឋ​ជាង ៣០គ្រួសារ​ទៀត មិន ដែល​ចេញ​ទាមទារ​តវ៉ា ខណៈ​អ្នក​ខ្លះ​គ្មាន​ឯកសារ​គ្រប់គ្រាន់។

ជំហរ​របស់​ប្រជា​សហគមន៍​បុរីកីឡា​នៅ​តែ​បន្ត​ទាមទារ​​ផ្ទះ​នៅ​បុរី​កីឡា ឬ​លុយ​ពីរ​ម៉ឺន​ប្រាំ​ពាន់ ២៥.០០០​ដុល្លារ ដោយ​ពួក​គេ​អះអាង​ថា បើ​មិន​បាន​ដូច​ការ​ទាម ទារ គឺ​មិន​ព្រម​ចាក​ចេញ​ពី​ទី​នេះ​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។