តំណាងសហគមន៍ជនជាតិដើមភាគតិចព្នង (ពូនង) ខេត្តមណ្ឌលគិរី ព្រមានប្តឹងទៅក្រសួងមហាផ្ទៃ និងស្ថាប័នពាក់ព័ន្ធថ្នាក់ជាតិ ក្រោយពីរដ្ឋបាលខេត្តនេះនៅតែពន្យារពេល មិនដោះស្រាយបញ្ចប់ជម្លោះដីធ្លីក្នុងតំបន់វប្បធម៌ជនជាតិដើមភាគតិចភ្នំដោះក្រមុំ ដែលមានការ រំលោភបំពានជាកម្មសិទ្ធិជាបន្តបន្ទាប់។ អ្នកនាំពាក្យសាលាខេត្ត អះអាងថា រដ្ឋបាលខេត្តមណ្ឌលគិរីគ្រោងកោះប្រជុំភាគីពាក់ព័ន្ធ ស្វែងរកដំណោះស្រាយឲ្យចប់សព្វគ្រប់នៅដើមខែធ្នូ។
សហគមន៍បណ្តាញជនជាតិដើមភាគតិចខេត្តមណ្ឌលគិរី និងមន្ត្រីអភិរក្សភ្នំដោះក្រមុំ អះអាងនៅថ្ងៃទី ២៩ វិច្ឆិកាថា ថ្មីៗនេះ អង្គភាពទឹកស្អាត មន្ទីរមុខងារសាធារណៈ មន្ទីររ៉ែ និងក្រុមហ៊ុនទឹកស្អាត បានវាស់វែងដី ក្នុងបរិវេណភ្នំដោះក្រមុំ ដោយខ្លួនឯង ដោយមិនបានពិភាក្សាជាមួយគណៈកម្មការ គ្រប់គ្រងភ្នំដោះក្រមុំ និង សហគមន៍ជនជាតិដើមភាគតិចនោះទេ។ ពលរដ្ឋអះអាង មានមនុស្សមួយក្រុម បានប៉ុនប៉ងកាន់កាប់ដីមួយផ្នែកនៅតំបន់ភ្នំដោះក្រមុំ ប៉ុន្តែអាជ្ញាធរនៅតែស្ទាក់ស្ទើរដោះស្រាយមិនទាន់រួចរាល់នៅឡើយទេ ថែមទាំងមានការ លួចបោះបង្គោលរបង និងសាងសង់ផ្ទះ ក្នុងបរិវេណមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ។
អ្នកសម្របសម្រួលបណ្ដាញសហគមន៍ជនជាតិដើមភាគតិចខេត្តមណ្ឌលគិរី លោកស្រី ភ្លឹក ភីរម្យ អះអាងថា រដ្ឋបាលខេត្តមណ្ឌលគិរី ហាក់គ្មានជំហរដោះស្រាយជម្លោះដីធ្លីលើភ្នំដោះក្រមុំអោយដាច់ស្រឡះនោះទេ ដែលជាហេតុធ្វើឲ្យ មជ្ឈមណ្ឌលវប្បធម៌នេះ កាន់តែរួមរួច។ លោកស្រីអះអាងថា មជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំ នៅតែមានប៉ុនប៉ងច្បាមយកដីជាកម្មសិទ្ធិ ដោយមន្ត្រីនគរបាលម្នាក់ ពលរដ្ឋ ១១ គ្រួសារ យាយម៉ៅ និង ក្រុមហ៊ុនទឹកស្អាត។ លោកស្រីចង់ឲ្យរដ្ឋបាលខេត្ត ដោះស្រាយរឿងនេះឲ្យចប់សព្វគ្រប់ និងត្រូវកំណត់ព្រំប្រទល់មជ្ឈមណ្ឌលវប្បធម៌ជនជាតិដើមភាគតិចឲ្យបានច្បាស់លាស់៖ «អាជ្ញាធរខេត្តដូចជាគេអត់ចង់ដោះស្រាយរឿងហ្នឹងឲ្យដាច់ស្រឡះ ហើយនៅមានតែដាក់របងជុំវិញភ្នំហ្នឹង និងមានការសាងសង់ផ្ទះនៅកន្លែងហ្នឹងស្រាប់ យាយ ម៉ៅ គាត់នៅតែដាំដុះបន្ត។ ខ្ញុំអត់ដឹងថា ហេតុអីបានថ្នាក់ក្រោម មិនយកចិត្តទុកដាក់រឿងហ្នឹង ឬមួយគាត់ចង់ឲ្យដីហ្នឹងពុះចែកគ្នា » ។
លេខាធិការគណៈកម្មការ គ្រប់គ្រងភ្នំដោះក្រមុំ លោក ក្រើង តុលា ថា ប្រាប់អាស៊ីសេរីថា ជំហររបស់សហគមន៍ជនជាតិដើមភាគតិច ចង់ឲ្យរដ្ឋបាលខេត្តមណ្ឌលគិរី កោះហៅអ្នកពាក់ព័ន្ធទាំងអស់ មកជជែកពិភាក្សាគ្នា រកដំណោះស្រាយរួម ក្នុងបំណងធានាថា ទប់ស្កាត់ ការប៉ុនប៉ងបំពានដីនៅតំបន់មជ្ឈមណ្ឌលវប្បធម៌ជនជាតិដើមភាគតិចបន្ថែមទៀត។ លោកបញ្ជាក់ថា តំណាងសហគមន៍ និង រដ្ឋបាលខេត្ត បានឯកភាពគ្នា កាត់ចេញដីប្រមាណ ៨០អារ ប្រគល់ទៅឲ្យមន្ទីរចំនួន ៣ស្ថាប័ន ប្រើប្រាស់ជាកម្មសិទ្ធិរដ្ឋ ក៏ប៉ុន្តែអ្វីដែលសហគមន៍ទាមទារដំណោះស្រាយ គឺដីមួយផ្នែកក្នុងមជ្ឈមណ្ឌលនេះ មានការ កាន់កាប់ជាកម្មសិទ្ធិបន្ថែមទៀត ពីសំណាក់យាយម៉ៅ ក្រុមហ៊ុនទឹកស្អាត និង មន្ត្រីនគរបាលម្នាក់ដែលមិនស្គាល់អត្តសញ្ញាណ៖ «បញ្ហាហ្នឹងទី១ គឺការទន្ទ្រានពីពលរដ្ឋមានអំណាច មិនមែនជាពលរដ្ឋអ្នកក្រទេ វាមានប៉ះពាល់ជាមួយក្រុមហ៊ុនទឹកស្អាត និងយាយ ម៉ៅ និងមេប៉ូលិសម្នាក់។ ពាក់ព័ន្ធចំណុចហ្នឹង គឺគាំង ខេត្តមិនអាចដោះស្រាយបាន » ។
ភ្នំដោះក្រមុំ មានទីតាំងនៅកណ្ដាលក្រុងសែនមនោរម្យ ឋិតក្នុងភូមិស្វាយចេក សង្កាត់សុខដុម ខេត្តមណ្ឌលគិរី។ កាលពីឆ្នាំ ២០០៤ ទីស្ដីការគណៈរដ្ឋមន្ត្រីបានសម្រេចចាត់ទុកតំបន់ភ្នំនេះជាមជ្ឈមណ្ឌលវប្បធម៌ជនជាតិដើមភាគតិចមានទំហំដីជាង ១០២ហិកតារ។
អ្នកនាំពាក្យសាលាខេត្តមណ្ឌលគិរី លោក សុក សេរ៉ា អះអាងថា រដ្ឋបាលខេត្តបានចេញលិខិតអញ្ជើញភាគីពាក់ព័ន្ធពិភាក្សាបញ្ហានេះនៅថ្ងៃទី៦ ខែធ្នូខាងមុខ ដើម្បីធ្វើការវាស់វែងកំណត់ព្រំប្រទល់តំបន់វប្បធម៌ជនជាតិដើមភាគតិចភ្នំដោះក្រមុំជាលើកចុងក្រោយ។ លោកបញ្ជាក់ថា អាជ្ញាធរខេត្តបានឯកភាពគ្នាជាមួយ គណៈកម្មការគ្រប់គ្រងភ្នំដោះក្រមុំ ដោះស្រាយរឿងនេះ ដោយបានព្រមព្រៀងគ្នា កាត់ដីមួយផ្នែកជូនស្ថានីយទឹកស្អាត និងអាគាររដ្ឋ ៣ស្ថាប័ន ផ្អែកតាម ស.ច.ណ របស់គណៈរដ្ឋមន្ត្រី។ រីឯករណីពលរដ្ឋ ១១គ្រួសារ អាជ្ញាធរខេត្ត និងគណៈកម្មការគ្រប់គ្រងភ្នំដោះក្រមុំ មិនបានលើកមកជជែកពិភាក្សានោះទេ៖ «យើងបានឯកភាពគ្នាហើយថា ១១គ្រួសារហ្នឹង អត់មានពាក់ព័ន្ធលើដីហ្នឹងទេ។ តែដោះស្រាយទៅតាមគោលការណ៍ច្បាប់ និងកំណត់ហេតុរបស់អង្គប្រជុំមួយ ជាមួយរដ្ឋលេខាធិការក្រសួងវប្បធម៌ មានចំណុចមួយ គេនិយាយថា បដិសេធ ១១គ្រួសារ។ ទឹកស្អាត យើងជូនគេ ព្រោះគេមាន ស . ច . ណ និងមានអនុប្បយោគធ្វើស្ថានីយ៍ទឹកស្អាត។ អគាររដ្ឋ ៣ ត្រូវជូនគេ។ អ៊ីចឹងមានន័យថា ឯកភាពគ្នាធ្វើតាមហ្នឹង។ នគរបាលគាត់នៅលើហ្នឹង គាត់រស់នៅយូរដែរហើយ។ យើងបានកំណត់ពីលើកមុខឲ្យគាត់ផ្ទះចុះក្រោម យើងអាចឲ្យគាត់ តែយើងមិនទាន់បានទៅមើលទេ ក្រែងលោគាត់រំកិលរបង។ ចាំមើលយើងចុះទៅមើល » ។
មន្ត្រីឃ្លាំមើលសិទ្ធិមនុស្សសមាគម អាដហុក (ADHOC) ខេត្តមណ្ឌលគិរី លោក អ៊ាង ម៉េងលី យល់ថា ការអូសបន្លាយពេលមិនដោះស្រាយវិបត្តិដីធ្លី នៅតំបន់ភ្នំដោះក្រមុំនឹងធ្វើឲ្យសហគមន៍ជនជាតិដើមភាគតិចទួទាំងខេត្តមណ្ឌលគិរីភ័យព្រួយខ្លាចបាត់បង់ដីនៅតំបន់នោះបន្ថែមទៀត។ លោកថា សហគមន៍ជនជាតិដើមភាគតិច និងគណៈកម្មការ គ្រប់គ្រងភ្នំដោះក្រមុំមានសិទ្ធិដាក់ពាក្យប្តឹងស្វែងរកដំណោះស្រាយរឿងនេះទៅអាជ្ញាធរជាតិ។ លោកចាត់ទុកការប៉ុនប៉ងយកដីមួយផ្នែកនៅតំបន់ភ្នំដោះក្រមុំនេះ គឺរំលោភទៅលើសេចក្ដីសម្រេចរបស់ទីស្ដីការគណៈរដ្ឋមន្ត្រី ដែលកំណត់តំបន់នេះជាតំបន់វប្បធម៌បូជនីយកិច្ចជនជាតិដើមភាគតិចកាលពីឆ្នាំ ២០០៤៖ «ពលរដ្ឋមានទុក្ខកង្វល់ព្រួយបារម្ភខ្លាំងណាស់ គាត់ខិតខំ បើគាត់មិនខំដោះស្រាយការពារភ្នំដោះក្រមុំ នៅសល់តិចតូចនេះទេ គឺអស់ហើយ នៅក្នុងខេត្តមណ្ឌលគិរីយើងហ្នឹង»។
តួលេខប៉ាន់ប្រមាណរបស់សហគមន៍បច្ចុប្បន្នផ្ទៃដីភ្នំដោះក្រមុំ នៅសល់ជាង ៨៧ហិកតារតែប៉ុណ្ណោះ បន្ទាប់ពីប្រជាពលរដ្ឋរាប់សិបគ្រួសារ អង្គភាពទឹកស្អាត មន្ទីរមុខងារសាធារណៈ មន្ទីររ៉ែ និងថាមពល បានចូលទៅតាំងលំនៅ និងបោះទីតាំងនៅទីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។