តំណាងសហគមន៍ជនជាតិដើមភាគតិចព្នង ៥នាក់ តំណាងឲ្យពលរដ្ឋចំនួន ២៧៣គ្រួសារមកពីខេត្តមណ្ឌលគិរី ដាក់ញត្តិនៅខុទ្ទកាល័យនាយករដ្ឋមន្ត្រីនៅថ្ងៃទី៣០ ខែតុលា ដើម្បីស្នើសុំលុបចោលអាជ្ញាប័ណ្ណក្រុមហ៊ុនដីសម្បទានសេដ្ឋកិច្ច វីឡា ឌីវេឡុបមេន (Villa Development)។
ការទាមទារនេះ បន្ទាប់ពីពួកគេបានដាក់ពាក្យបណ្ដឹងទៅសាលាដំបូង ខេត្តមណ្ឌលគិរី មុនមកភ្នំពេញ។
បន្ទាប់ពីដាក់ពាក្យបណ្ដឹង និងដាក់ញត្តិរួចហើយ តំណាងសហគមន៍ជនជាតិដើមភាគតិចព្នង ៥នាក់ បានលើកដៃសំពះក្នុងសន្និសីទកាសែតមួយនៅទីស្នាក់ការកណ្ដាលអង្គការសិទ្ធិមនុស្សអាដហុក (adhoc) ដើម្បីសុំឲ្យស្ថាប័នពាក់ព័ន្ធបានដឹង និងជួយអន្តរាគមន៍បន្ថែម។
ក្នុងសម្លៀកបំពាក់ជនជាតិព្នង លោក ប្លឹក ម៉ាល់ មកពីភូមិឡៅកា សង្កាត់សុខដុម ក្រុងសែនមនោរម្យ ខេត្តមណ្ឌលគិរី ថ្លែងថា ក្រុមហ៊ុន វីឡា ឌីវេឡុបមេន ដែលទទួលអភិវឌ្ឍតំបន់នោះ បានឈូសឆាយដីចម្ការ ដីកប់ខ្មោច និងបានកាប់បំផ្លាញឈើជ័រទឹក។ តំណាងសហគមន៍រូបនេះ ឲ្យដឹងទៀតថា កន្លងមកនៅពេលដែលប្រជាពលរដ្ឋធ្វើការតវ៉ា ក្រុមហ៊ុនតែងតែគំរាមកំហែងក្រុមប្រជាសហគមន៍៖ «បើសិនជារាជរដ្ឋាភិបាលទុកក្រុមហ៊ុនហ្នឹងទៀត ទុកឲ្យជនជាតិដើមភាគតិចនៅណា ពីព្រោះជនជាតិដើមភាគតិច របររកស៊ីរបស់គេរស់នៅដោយសារព្រៃហ្នឹង។ កុំអោយយកខ្ញុំទៅធ្វើខ្ញុំកញ្ជះរបស់វាហ្នឹង ខ្ញុំអត់ចូលចិត្តទេ»។
ប្រជាពលរដ្ឋមានបញ្ហាដីធ្លីនៅខេត្តមណ្ឌលគិរី ដែលទាមទារឲ្យលុបចោលអាជ្ញាប័ណ្ណក្រុមហ៊ុនដីសម្បទានសេដ្ឋកិច្ច វីឡា ឌីវេឡុបមេន បានអះអាងថា បានបាត់បង់ដីធ្លី ៧២៨ហិកតារ ហើយក្រុមហ៊ុនបានកាប់ដើមជ័រច្បោះ ដែលមានជ័រជាង ៣៦០ដើម។
បន្ទាប់ពីមានបញ្ហាដីធ្លីស្ទើរគ្រប់ខេត្តរាជធានី រាជរដ្ឋាភិបាលបានលុបចោលអាជ្ញាប័ណ្ណពីក្រុមហ៊ុនដីសម្បទានសេដ្ឋកិច្ចចំនួន១៩ ដើម្បីដកហូតមកទុកគ្រប់គ្រងដោយស្ថាប័នរដ្ឋវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។