តុលាការ​ខេត្ត​កោះកុង​កោះហៅ​ពលរដ្ឋ​២​គ្រួសារ​ឱ្យ​ទៅ​បំភ្លឺ​រឿង​ដីធ្លី​តាម​បណ្ដឹង​ក្រុមហ៊ុន​ចិន

ដោយ អាស៊ីសេរី
2018-05-23
អ៊ីម៉ែល
មតិ
Share
បោះពុម្ព
សាលាដំបូង​ខេត្ត​កោះកុង
សាលាដំបូង​ខេត្ត​កោះកុង
Photo: RFA

តំណាង​អយ្យការ​អម​តុលាការ​ខេត្ត​កោះកុង​នៅ​ថ្ងៃ​ទី២២ ឧសភា នេះ កោះហៅ​ពលរដ្ឋ ២​នាក់ ឱ្យ​ទៅ​បំភ្លឺ​ជុំវិញ​រឿង​វិវាទ​ដីធ្លី តាម​បណ្ដឹង​របស់​ក្រុមហ៊ុន​យូញៀន ឌីវេឡុបមែនគ្រុប (Unions Development Group) ឬ​ហៅ​កាត់​ថា ក្រុមហ៊ុន​យូឌីជី (UDG)។ ក្រុមហ៊ុន​ឯកជន​មួយ​នេះ បាន​ប្តឹង​ទៅ​តុលាការ​ខេត្ត​កោះកុង ទាមទារ​ឱ្យ​មាន​ការ​រុះរើ​ផ្ទះ របង និង​សម្ភារៈ​ផ្សេងទៀត​របស់​ពលរដ្ឋ​ទាំងពីរ​គ្រួសារ​នេះ ចេញពី​ទីតាំង​ដី​ដែល​ក្រុមហ៊ុន​អះអាង​ថា ជា​កម្មសិទ្ធិ​របស់​ខ្លួន​នោះ។

ពលរដ្ឋ​ទាំង ២​នាក់​អះអាង​ថា ពួកគាត់​មានការ​ព្រួយបារម្ភ​យ៉ាង​ខ្លាំង​អំពី​ការ​បណ្ដេញ​ចេញ​ដោយ​បង្ខំ​នៅ​ពេល​ខាងមុខ ក្រោយ​ពេល​តំណាង​អយ្យការ​ប្រាប់​ពួកគាត់​ថា ពួកគាត់​គ្មាន​សិទ្ធិ​ទាមទារ​សំណង​តាម​ការ​ចង់​បាន​របស់​ខ្លួន​ឡើយ។

ពលរដ្ឋ​ម្នាក់ លោកស្រី លីវ ភួង អះអាង​ថា ដី​ភូមិ និង​ផ្ទះ​របស់​លោកស្រី​នៅ​ក្នុង​ភូមិ​ព្រែក​ស្មាច់ ឃុំ​កោះ​ស្ដេច ស្រុក​គិរីសាគរ ខេត្ត​កោះកុង មាន ២​កន្លែង ក្នុង​នោះ​មួយ​កន្លែង​ត្រូវ​បាន​លោកស្រី​ព្រមព្រៀង​ទទួលយក​សំណង​ពី​ក្រុមហ៊ុន​រួចហើយ ដោយ​ក្រុមហ៊ុន​បាន​ផ្តល់​ដី​កន្លះ​ហិកតារ និង​លុយ​ចំនួន ១ ពាន់ ១ រយ​ដុល្លារ​ដល់​រូប​គាត់។ ចំណែក​ដី​ភូមិ និង​ផ្ទះ​មួយ​កន្លែង​ទៀត​ដែល​លោកស្រី​កំពុងតែ​រស់នៅ​សព្វថ្ងៃ​នេះ ក្រុមហ៊ុន​មិនបាន​ផ្ដល់​សំណង​អ្វី​ឡើយ ប៉ុន្តែ​បែរជា​ប្តឹង​ទៅ​តុលាការ​បង្ខំ​ឱ្យ​លោកស្រី​ចាកចេញ​ពី​ដី​នេះ​ទៅវិញ៖ «ដី​ភូមិ​ខ្ញុំ​មាន​ពីរ​កន្លែង គេ​យក​ត្រាក់ទ័រ​មក​ឈូស​ធ្វើជា​ថ្នល់​មួយ​កន្លែង​ហើយ ដោយសារ​ខ្លាច​អត់​បាន​អ្វី​សោះ ខ្ញុំ​ក៏​ទៅ​យក​របស់​គេ​មួយ​កន្លែង​ទៅ តែ​ខ្ញុំ​មិនបាន​ទៅ​នៅ​ទេ។ ខ្ញុំ​គ្រាន់តែ​ផ្តិត​មេដៃ​យក​របស់​គេ​ហ្នឹង តែ​នៅ​របស់ខ្ញុំ​មួយ​កន្លែង​ទៀត ឥឡូវ​គេ​ថា​គ្មាន​ទេ ថា​យើង​ទទួលយក​របស់​គេ​ហើយ យើង​ដឹង​តែ​រុះ​រើចេញ បើ​អ៊ីចឹង​ទេ កន្លះ​ខែ​ទៀត គេ​នឹង​យក​ត្រាក់ទ័រ​ឈូស​ចោល​ហើយ។ វា​អយុត្តិធម៌​ណាស់​បែបនេះ លុយ​ក៏​មិន​ឱ្យ ដី​ក៏​មិន​ព្រម​ឱ្យ»

លោកស្រី​អះអាង​ថា ដី​ភូមិ​មួយ​កន្លែង​នេះ​លោកស្រី​កាន់កាប់​តាំងពី​ឆ្នាំ១៩៨៩ ហើយ​បាន​សង់ផ្ទះ​រស់នៅ​តាំងពី​ពេល​នោះ​មក ដោយ​មាន​ដាំ​ដុះ​ដំណាំ​មួយ​ចំនួន​ផង​ដែរ។ លោកស្រី​ថា សុខចិត្ត​រុះរើ​ចេញ ជា​ថ្នូរ​នឹង​លុយ ១០​ម៉ឺន​ដុល្លារ និង​ដី​ភូមិ​កន្លះ​ហិកតារ​ទៀត ប៉ុន្តែ​ខាង​តំណាង​អយ្យការ​បែរជា​ប្រាប់​លោកស្រី​វិញ​ថា លោកស្រី​គ្មាន​សិទ្ធិ​ទាមទារ​សំណង​តាម​ការ​ចង់​បាន​នោះ​ឡើយ ព្រោះ​លោកស្រី​បាន​ព្រមព្រៀងគ្នា​ទទួលយក​សំណង​ពី​ក្រុមហ៊ុន​រួចហើយ។ បញ្ហា​នេះ បាន​ធ្វើ​ឱ្យ​លោកស្រី​មានការ​ព្រួយបារម្ភ​ជា​ខ្លាំង ខ្លាច​ត្រូវ​អាជ្ញាធរ និង​ក្រុមហ៊ុន​បណ្ដេញ​ចេញ​ដោយ​បង្ខំ៖ «ខ្ញុំ​ចង់​សុំ​លុយ​បន្ថែម និង​ដី​មួយ​ប្លង់​ទៀត ហើយ​និង​ដីចម្ការ ៥​ហិកតារ ដែល​ក្រុមហ៊ុន​ថា​ឱ្យ​ខ្ញុំ​នោះ ខ្ញុំ​នឹង​ចេញ​ហើយ តែ​តុលាការ​ថា មីង​ឯង​មិនបាច់​ទៅ​សុំ​អ្វី​ទៀត​ទេ បើ​មីង​ឯង​យក​របស់​គេ​រួចហើយ នៅ​ចង់បាន​អ្វី​ទៀត ម្ដេច​មិន​ចេញទៅ កាលណា​ដីកា​ដាក់​មក​អ៊ីចឹង គឺ​ដឹង​តែ​អនុវត្ត​ហើយ»

ចំណែក​ពលរដ្ឋ​ម្នាក់ទៀត លោក អ៊ុក សាវ៉ន ក៏​អះអាង​ដូចគ្នា​ដែរ​ថា លោក​មាន​ផ្ទះ និង​ដី​ភូមិ ២ កន្លែង នៅ​ក្នុង​ភូមិ​ព្រែកស្មាច់។ លោក​បាន​ព្រមព្រៀង​ទទួល​សំណង​ពី​ក្រុមហ៊ុន​រួចហើយ​ចំពោះ​ដី​មួយ​កន្លែង​ដែល​មាន​ទំហំ ៨​ម៉ែត្រ គុណ​នឹង ២០ ម៉ែត្រ ក៏​ប៉ុន្តែ​ចំពោះ​ផ្ទះ និង​ដី​ភូមិ​មួយ​កន្លែង​ទៀត​ទំហំ ១​ហិកតារ ដែល​លោក​កំពុង​រស់នៅ​បច្ចុប្បន្ន​នេះ​វិញ ក្រុមហ៊ុន​មិនបាន​ដោះស្រាយ​ឡើយ ប៉ុន្តែ​បែរជា​ប្ដឹង​ទៅ​តុលាការ​ឱ្យ​រុះរើ​យក​ដីធ្លី និង​ផ្ទះសម្បែង​របស់​គាត់​ទៅវិញ។ លោក​កំពុង​បារម្ភ​ថា នឹង​ត្រូវ​បាត់បង់​ទ្រព្យសម្បត្តិ​ជា​ដីធ្លី និង​ផ្ទះសម្បែង​ដែល​ធ្លាប់​រស់នៅ​តាំងពី​ឆ្នាំ​១៩៨៦ នោះ ដោយសារ​អំណាច​នៃ​ពាក្យ​បណ្ដឹង​របស់​ក្រុមហ៊ុន​នេះ៖ «យើង​និយាយ​គេ​អត់​ស្ដាប់​យើង​ផង​ហ្នឹង ពាក្យ​ណា​ក៏​គេ​ស្ដាប់​យើង​មិន​បាន​ដែរ​ហ្នឹង។ គេ​និយាយ​ឡើង​សុទ្ធតែ គ្មាន​ដំណោះស្រាយ​ឡើយ ទោះបីជា​មិន​ចាក​ចេញ ក៏​គេ​ឈូស ចាកចេញ ក៏​គេ​ឈូស។ អត់​មាន​ដំណោះស្រាយ​អ្វី​ទៀត​ទេ គេ​ថា​យើង​ទទួល​ដី​គេ​ហើយ ទទួល​ផ្ទះ​គេ​ហើយ យើង​នៅ​ធ្វើ​អ្វី​ទៀត នៅ​ក្រាញ​ននាល​ដល់​អង្កាល់​ទៀត។ យើង​តវ៉ា​ថា​មាន​ផ្ទះ​ពីរ គេ​ថា​អត់​បាន​ទេ បាន​តែមួយ​ប៉ុណ្ណោះ»

អាស៊ីសេរី​មិន​អាច​ទាក់ទង​សុំ​ការ​បំភ្លឺ​បញ្ហា​នេះ ពី​តំណាង​អយ្យការ​អម​តុលាការ​ខេត្ត​កោះកុង លោក អ៊ីវ ត្រាយ បានទេ​នៅ​ថ្ងៃ​ទី២២ ឧសភា ចំណែក​តំណាង​ក្រុមហ៊ុន​យូឌីជី ក៏​មិន​អាច​ទាក់ទង​បាន​ដូចគ្នា។

មន្ត្រី​ប្រឹក្សា​ច្បាប់​គម្រោង​ពន្ធនាគារ​នៃ​អង្គការ​សិទ្ធិមនុស្ស​លីកាដូ (LICADHO) លោក លោក ហ៊ួរ អ៊ីន ថ្លែង​ថា ពលរដ្ឋ​ទាំងពីរ​គ្រួសារ​ទទួលរង​ភាព​អយុត្តិធម៌​ខ្លាំង​នៅ​ក្នុង​សំណុំ​រឿង​នេះ ព្រោះ​ដី​ដែល​ពួកគាត់​បាន​ព្រមព្រៀង​ទទួលយក​សំណង​ពី​ក្រុមហ៊ុន គឺជា​ដី​នៅ​ទីតាំង​ផ្សេង មិនមែន​ជា​ទីតាំង​ដី​ដែល​ពួកគាត់​កំពុង​រស់នៅ​សព្វថ្ងៃ​នេះ​ទេ ប៉ុន្តែ​ក្រុមហ៊ុន​បែរជា​បាន​ប្រើប្រាស់​ប្រព័ន្ធ​តុលាការ​ដើម្បី​ចាត់ការ​ពលរដ្ឋ​ទៅវិញ។ លោក​ថា​នេះ​ជា​ការ​អនុវត្ត​ផ្ទុយ​នឹង​គោលការណ៍​របស់​រដ្ឋាភិបាល​ក្នុង​ការ​ដោះស្រាយ​វិវាទ​ដីធ្លី៖ «ករណី​នេះ​វា​ពិតជា​អយុត្តិធម៌​ណាស់​សម្រាប់​ប្រជាពលរដ្ឋ។ ទទួល​សំណង​បាន​នៅ​កន្លែង​ផ្សេង ប៉ុន្តែ​ក្រុមហ៊ុន​មាន​ចេតនា​ចង់​បណ្ដេញ​ចេញពី​កន្លែង​ដែល​ពួកគាត់​កំពុងតែ​រស់នៅ​ហ្នឹង​ទៀត ដោយសារតែ​ពួកគាត់​មិន​ព្រម​ទទួលយក​សំណង​តិចតួច​ដែល​ខាង​ក្រុមហ៊ុន​បាន​ផ្ដល់​ឱ្យ។ ពួកគាត់​នៅតែ​ទាមទារ​ចង់​បាន​ឱ្យ​មានការ​ឆ្វៀល​ដី ពួកគាត់​បាន​ដាក់​លិខិត និង​ពាក្យបណ្ដឹង​ទៅ​ខេត្ត និង​ក្រសួងបរិស្ថាន តែងតែ​ទាមទារ​ចង់បាន​ដី​មកវិញ តែ​កន្លែង​នេះ​ខាង​ក្រុមហ៊ុន គេ​ថា​មិន​អាច​ឆ្វៀល​ដី​ឱ្យ​បានទេ គឺ​ត្រូវតែ​ចាកចេញ អញ្ចឹង​ហើយ​ទើប​ខាង​ក្រុមហ៊ុន​ប្រើ​ប្រព័ន្ធ​តុលាការ​ដើម្បី​បង្ខំ​ឱ្យ​ពួកគាត់​ចេញ»

មន្ត្រី​សិទ្ធិមនុស្ស​រូប​នេះ ស្នើ​ដល់​អាជ្ញាធរ​ដោះស្រាយ​វិវាទ​ដីធ្លី​ថ្នាក់​ជាតិ​ឱ្យ​ជួយ​ពិនិត្យ​ករណី​នេះ ដើម្បី​កុំ​ឱ្យ​ពលរដ្ឋ​ទាំងពីរ​គ្រួសារ​នេះ ទទួលរង​ភាព​អយុត្តិធម៌​តាមរយៈ​ការ​បណ្ដេញ​ចេញ​របស់​ក្រុមហ៊ុន។ លោក​ព្រមាន ថា ការ​ប្រើ​ប្រព័ន្ធ​តុលាការ​ដើម្បី​បណ្ដេញ​ពលរដ្ឋ​ចេញ​ដោយ​បង្ខំ នឹង​ប៉ះពាល់​ធ្ងន់ធ្ងរ​ដល់​មុខមាត់​រដ្ឋាភិបាល​ដែល​កំពុង​ខិតខំ​ដោះស្រាយ​វិវាទ​ដីធ្លី ទោះបីជា​សំណុំ​រឿង​នេះ​មាន​ពលរដ្ឋ​តិច​គ្រួសារ​ក្ដី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល