ពលរដ្ឋមានជម្លោះដីធ្លីរ៉ាំរ៉ៃ នៅសហគមន៍ឡពាង ខេត្តកំពង់ឆ្នាំង អះអាងថា ពួកគេបរាជ័យគម្រោងយកញត្តិទៅដាក់ជូនលោកនាយករដ្ឋមន្ត្រី ហ៊ុន សែន ក្នុងឱកាសលោកចុះជួបកម្មករ នៅខេត្តកំពង់ឆ្នាំង នៅព្រឹកថ្ងៃទី២៧ មិថុនា ដោយសារតែប៉ូលិស និងមេភូមិ បានឃ្លាំមើល និងទូរស័ព្ទ មកសួរនាំពួកគាត់ ពីការប្រជួបជុំគ្នា។ សង្គមស៊ីវិល ហៅសកម្មភាពអាជ្ញាធរ ជាការរំលោភសិទ្ធិ សេរីភាព និងគំរាមកំហែងពលរដ្ឋ។
សមាជិកសហគមន៍ដែលមានជម្លោះដីធ្លី នៅភូមិឡពាងម្នាក់ លោក ស្ងួន យឿន ឲ្យដឹងថា ពួកគាត់បានលឺដំណឹងពីកម្មករ ថា លោកនាយករដ្ឋមន្ត្រី ហ៊ុន សែន ចុះមកជួបកម្មករនៅខេត្តកំពង់ឆ្នាំង ដូច្នេះ ពួកគាត់បានប្រជុំគ្នា ដើម្បីត្រៀមយកញត្តិទៅសុំការអន្ដរាគមន៍ ករណីដីមានជម្លោះរ៉ាំរ៉ៃ រាប់ឆ្នាំ ពីលោក ហ៊ុន សែន។ ប៉ុន្តែ លោក ស្ងួន យឿន ឲ្យដឹងថា នៅព្រឹកថ្ងៃទី២៧ មិថុនា ប៉ូលិស ជាច្រើននាក់បាននាំគ្នាជិះម៉ូតូក្រឡឹងនៅក្នុងភូមិ ខុសពីថ្ងៃធម្មតា ដែលធ្វើឲ្យអ្នកភូមិមានការភ័យខ្លាច ហើយមេភូមិ ឡពាង បានទូរស័ព្ទមកសួរពលរដ្ឋក្នុងភូមិ ហេតុអ្វីប្រជុំគ្នា មិនប្រាប់ឲ្យលោកបានដឹង។
លោក ស្ងួន យឿន បន្តថា អ្នកភូមិក៏បានឃើញប៉ូលិសជាច្រើននាក់ បានរាយបណ្ដាក់គ្នានៅផ្លូវជាតិ ខុសពីធម្មតា គឺនៅម្ដុំថ្នល់ទទឹង ដែលអ្នកភូមិត្រូវធ្វើដំណើរឆ្លងកាត់ យកញត្តិទៅជូន លោកនាយករដ្ឋមន្ត្រី ហ៊ុន សែន។ អ្នកភូមិឡពាងរូបនេះ ថា ដោយឃើញរូបភាពទាំងនេះ ម្ចាស់គោយន្ដ ដែលអ្នកភូមិជួលឲ្យដឹកអ្នកភូមិ ទៅកន្លែងលោកនាយករដ្ឋមន្ត្រី ហ៊ុន សែន ជួបកម្មករ បានបដិសេធ លែងហ៊ានដឹកអ្នកភូមិ។ «»
ជម្លោះដីធ្លីនៅសហគមន៍ឡពាង ស្ថិតនៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ជាមួយក្រុមហ៊ុនខេ.ឌី.ស៊ី (KDC) របស់ភរិយា លោក ស៊ុយ សែម ជារដ្ឋមន្ត្រីក្រសួងរ៉ែ និងថាមពលគឺ អ្នកស្រី ជា ខេង បានអូសបន្លាយច្រើនឆ្នាំមកហើយ។ អ្នកភូមិអះអាងថា ជម្លោះដីដំបូង កើតឡើងតាំងពីឆ្នាំ១៩៩៧ ហើយស្ថានភាពជម្លោះតានតឹងខ្លាំងនៅឆ្នាំ២០០៨ ក្រោយពេលក្រុមហ៊ុនបានធ្វើរបងព័ទ្ធយកដីមានជម្លោះ មានទំហំជាង៦០០ហិកតារ។
ក្រោយឆ្នាំ២០០៨ អ្នកភូមិអះអាងថា ក្រុមហ៊ុន ខេឌីស៊ី បានប្រើប្រាស់គ្រប់វិធីសាស្ត្រជាច្រើន ក្នុងការដោះស្រាយជម្លោះ គឺប្រើទាំងទិដ្ឋភាពច្បាប់ ការសម្របសម្រួលក្រៅប្រព័ន្ធតុលាការ មានការអន្តរាគមន៍ពីតំណាងរាស្ត្រគណបក្សប្រជាជនកម្ពុជា អ្នកស្រី ឡោក ខេង និងពេលខ្លះមានប្រើអំពើហិង្សាពីសមត្ថកិច្ច និងសន្តិសុខក្រុមហ៊ុន ផងក៏មាន។
កាលថ្ងៃទី២១ ខែកក្កដា ឆ្នាំ២០១៣ លោកនាយករដ្ឋមន្ត្រី ហ៊ុន សែន បានចេញអនុក្រឹត្យលេខ៤៦៦ សម្រេចផ្ដល់ដី ដែលអ្នកភូមិអះអាងថា ជាដីមានជម្លោះ សម្បទានឲ្យទៅក្រុមហ៊ុនចិន។ អ្នកភូមិថា ពួកគេចង់ដាក់ញត្តិប្រាប់ លោក ហ៊ុន សែន ឲ្យបានដឹងពីការពិត ដោយបដិសេធរបាយការណ៍របស់អាជ្ញាធរខេត្តកំពង់ឆ្នាំង ព្រោះអាជ្ញាធរខេត្តនេះ បានធ្វើរបាយការណ៍ កុហកនាយករដ្ឋមន្ត្រី ថា ដីទាំងនោះ គ្មានទំនាស់ ហើយកុហកថា ពលរដ្ឋបានព្រមទទួលយកលុយចំនួន ៧ម៉ឺនដុល្លារ ជាថ្នូរចាកចេញ ហើយពេលយកលុយហើយមិនព្រមចាកចេញ អាជ្ញាធរសម្រេចឈូសឆាយ។
ដោយឡែក កាលពីថ្ងៃទី១១ ខែមីនា កន្លងទៅ អ្នកភូមិឡពាង បាននាំគ្នាទៅដាក់ញត្តិនៅបញ្ជាការដ្ឋានកងអង្គរក្ស លោក ហ៊ុន សែន នៅក្រុងតាខ្មៅ ហើយមន្ត្រីទីនោះបានចេញមកទទួលញត្តិ និងបានណែនាំឲ្យពួកគេ ទៅដាក់នៅខុទ្ទកាល័យ ក្រោមដើមពោធិ៍ មុខវត្តបទុមវតី ក្រុងភ្នំពេញវិញ។ អ្នកភូមិថា មកដល់ពេលនេះញត្តិនោះ មិនទាន់ត្រូវបានដោះស្រាយបែបណានៅឡើយទេ។
អាស៊ីសេរី មិនអាចរកប្រភពសុំការបំភ្លឺពីមេភូមិឡពាង និងប៉ូលិសប៉ុស្តិ៍តាជេស បានទេ នៅថ្ងៃទី២៧ មិថុនា។
អ្នកនាំពាក្យសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា ហៅសកម្មភាពឃ្លាំមើលរបស់ប៉ូលិស និងការទូរស័ព្ទសួរពីមេភូមិឡពាង ជារូបភាពគំរាមកំហែងលើសិទ្ធិ សេរីភាព ពលរដ្ឋ។ លោក ស៊ឹង សែនករុណា សង្កេតឃើញថា ដោយសារតែជម្លោះនៅភូមិឡពាង អូសបន្លាយយូរពេក អាចធ្វើឲ្យពលរដ្ឋលែងមានទំនុកចិត្តលើអាជ្ញាធរ និងមន្ត្រីមូលដ្ឋាន ទើបពួកគាត់ទៅរកកិច្ចអន្តរាគមន៍ដោយផ្ទាល់ ពីមេដឹកនាំកំពូល។ «»
សង្គមស៊ីវិល សង្កេតឃើញថា ដើមហេតុដែលបណ្ដាលឲ្យជម្លោះនៅភូមិឡពាង អូសបន្លាយរ៉ាំរ៉ៃ ដោយសារតែអាជ្ញាធរមូលដ្ឋាន បានព្យាយាមលាក់បាំងព័ត៌មានការពិតជូនថ្នាក់លើ។ សង្គមស៊ីវិលផ្ដល់ទស្សនៈថា អាជ្ញាធរនៅថ្នាក់ជាតិ គួរជំរុញ ឬសកម្មជាងនេះ ក្នុងការអនុវត្ត ឲ្យបានម៉ឺងម៉ាត់លើលិខិតរបស់ក្រសួងមហាផ្ទៃ ដែលបានណែនាំឲ្យថ្នាក់ខេត្តដោះស្រាយជម្លោះដីធ្លី នៅថ្នាក់មូលដ្ឋាន។
ពលរដ្ឋសហគមន៍ឡពាង ប្ដេជ្ញាថា ពួកគេនឹងឡើងទៅរកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ទៀត លុះត្រាតែពួកគេទទួលបានដីធ្លីមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។