ពលរដ្ឋ​ខេត្ត​ព្រះវិហារ​សង្ស័យ​ថា ពលរដ្ឋ​ម្នាក់​ក្នុងចំណោម​១៥​នាក់​ដែល​ត្រូវ​ចាប់​ខ្លួន​បាន​ស្លាប់

ដោយ ថន ថារ៉ូ
2019-02-23
អ៊ីម៉ែល
មតិ
Share
បោះពុម្ព
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
ពលរដ្ឋ​ពីរ​នាក់​ជាប់​ខ្នោះ រស់នៅ​ស្រុក​ជាំក្សាន្ត ខេត្ត​ព្រះវិហារ មាន​ជម្លោះ​ដីធ្លី​ជា​មួយ​ក្រុមហ៊ុន មេត្រីភាព។ រូបថត៖ អាដហុក
រូបថត៖ សមាគម អាដហុក (ADHOC)

ពលរដ្ឋ ៣៣០​គ្រួសារ រស់នៅ​ឃុំ​យាង ស្រុក​ជាំក្សាន្ត ខេត្ត​ព្រះវិហារ ដែល​មាន​ជម្លោះដីធ្លី​ជាមួយ​ក្រុមហ៊ុន​មេត្រីភាព​អះអាង​ថា បុរស​ម្នាក់ ក្នុងចំណោម​ពលរដ្ឋ​១៤​នាក់ ដែល​ត្រូវ​បាន​ក្រុម​កងទ័ព​វារៈ​២៦១ ចាប់ខ្លួន​កាលពី​ចុងខែ​មករា​កន្លងទៅ នៅ​មិន​ទាន់​ទទួល​ដំណឹង​នៅឡើយ​ទេ។ អ្នកភូមិ​បាន​ដាក់​ពាក្យ​ប្ដឹង​ក្រុម​យោធា​ទាំងនោះ ទៅ​ក្រសួង​ការពារ​ជាតិ និង​តំណាង​អយ្យការ​ខេត្ត​ព្រះវិហារ។

ពលរដ្ឋ​មាន​វិបត្តិ​ដីធ្លី​ជាមួយ​ក្រុមហ៊ុន​មេត្រីភាព​ចាត់​ទុក​ការ​ចាប់​ខ្លួន​ពលរដ្ឋ​១៤​នាក់ ក្នុង​នោះ​ម្នាក់​បាត់​ខ្លួន​គឺជា​រឿង​អយុត្តិធម៌​។ អ្នកភូមិ​ថា​ក្រុម​យោធា វារៈ ២៦១ ឬ​ហៅថា​ក្រុម​កងកម្លាំង​ទាហាន​កងពល​លេខ​៦ និង​អាជ្ញាធរ​ខ្លះ​កំពុង​តាម​ចាប់ខ្លួន​តំណាង​ពលរដ្ឋ ៤​នាក់​ផ្សេងទៀត ដែល​ពួកគេ​ចោទ​ថា ជា​អ្នក​មេដឹកនាំ​ក្រុម​ពលរដ្ឋ​ឱ្យ​ប្រព្រឹត្ត​បទល្មើស​បរិស្ថាន។

តំណាង​ពលរដ្ឋ​លោក ឡយ លីហ៊ួ ប្រាប់​អាស៊ីសេរី នៅ​ថ្ងៃ​ទី​២៣ កុម្ភៈ ថា តុលាការ​ខេត្ត​ព្រះវិហារ​នៅ​មិនទាន់​ដោះលែង​ពលរដ្ឋ ១៣​នាក់​នៅឡើយ​ទេ ហើយ​មក​ទល់​ពេល​នេះ​ក្រុម​គ្រួសារ​ពលរដ្ឋ​ទាំងនោះ​កំពុង​លំបាក​វេទនា​ផ្នែក​ជីវភាព​ជំពាក់​បំណុល​គេ និង​ភ័យខ្លាច​មិន​ហ៊ាន​វិល​ទៅ​រស់នៅ​លំនៅឋាន​វិញ​ទេ។ លោក​សង្ស័យ​ថា ពលរដ្ឋ​ម្នាក់​ឈ្មោះ ស៊ុំ ម៉ឺន ដែល​បាត់​ខ្លួន​ជិត ១​ខែ​មក​ហើយ​នោះ ទំនងជា​ត្រូវ​ស្លាប់​ហើយ​ពួកគេ​ទាមទារ​ឱ្យ​ក្រុម​យោធា​វារៈ​២៦១ ទទួលខុសត្រូវ​រឿង​នេះ៖ «អត់​មាន​ដឹង​ថា គួរ​លែង ឬ​មិន​លែង​ពលរដ្ឋ​ទេ អត់​មាន​នរណា​ជួយ​អន្តរាគមន៍​ទេ​។ ខ្ញុំ​ស្នើ​ទៅ​ថ្នាក់ដឹកនាំ​មេភូមិ មេ​ឃុំ ស្រុក​ខេត្ត ស្ថាប័ន​ពាក់ព័ន្ធ និង​សម្ដេច​ទាំងអស់​មេត្តា​ជួយ សូម​មេត្តា​លើកលែង​អាណិតអាសូរ​ពលរដ្ឋ​យើងខ្ញុំ​ដែល​ជា​អ្នក​ក្រីក្រ សូម​ដោះលែង​ឱ្យ​គាត់​ចេញ​ពី​ពន្ធ​ធនាគារ ដើម្បី​ឱ្យ​គាត់​មក​រក​ស៊ី​ចិញ្ចឹម ក្រុម​គ្រួសារ​គាត់»

ពលរដ្ឋ​មាន​ជម្លោះដីធ្លី​ជាមួយ​ក្រុមហ៊ុន​មេត្រីភាព​លោកស្រី ងូវ គង់ វ័យ ៥៦ ឆ្នាំ ឱ្យ​ដឹង​ថា ក្រុម​យោធា​វារៈ ២៦១ បាន​ចាប់ខ្លួន​ប្ដី និង​កូនប្រុស​របស់​លោក​ស្រី​កាលពី​ចុងខែ​មករា ហើយ​មក​ទល់​ពេល​នេះ​ពួកគេ​កំពុង​ជាប់ពន្ធនាគារ​ខេត្ត​ព្រះវិហារ។ លោកស្រី​ថា អ្នកភូមិ​បាន​ស្វែងរក​កិច្ច​អន្តរាគមន៍​ទៅ​ក្រសួង​ការពារជាតិ និង​តំណាង​អយ្យការ​ខេត្ត​ព្រះវិហារ ដើម្បី​ស្នើ​ឱ្យ​ស៊ើបអង្កេត​កង​អន្តរាគមន៍​វារៈ​យោធា​លេខ​២៦១ ដែល​លោកស្រី​ចោទ​ថា អនុវត្ត​ខុស​នីតិវិធី ប្រើ​ហិង្សា​ដោយ​ចេតនា និង​កំហែង​យក​ទ្រព្យសម្បត្តិ តែ​មក​ទល់​ពេល​នេះ​នៅ​មិនទាន់​ទទួល​លទ្ធផល៖ «កូន​ខ្ញុំ​ទៅ​ចាំ​ដំឡូង​ដើរ​ទៅ​គេ​ចាប់​តែម្ដង​អត់​មាន​បាន​ធ្វើការ​អី​ទេ និង​ប្តី​ខ្ញុំគេ​ចាប់​តាម​ផ្លូវ។ ខ្ញុំ​ថា ឱ្យ​ដោះលែង​ប្តី​ខ្ញុំ​ទៅ។ ទាហាន​ចាប់​តាំង​ពី​កាំភ្លើង ដក​សម្ភារ​ឆ្នាំង​ចាន​អី​គ្មាន​សល់​ទេ និង​ទូរស័ព្ទ​អា​ថ្លៃ​ទៅ»

មក​ទល់​ពេល​នេះ​មាន​ពលរដ្ឋ ១៤​នាក់ ត្រូវ​បាន​មន្ត្រី​យោធា​ចាប់ខ្លួន ក្នុង​នោះ​ម្នាក់​បាត់​ខ្លួន និង​ឃុំខ្លួន​បណ្ដោះអាសន្ន​នៅ​ពន្ធនាគារ​ខេត្ត​ព្រះវិហារ​ហើយ​ពលរដ្ឋ ២៥​នាក់​ផ្សេងទៀត​កំពុង​ជាប់​បណ្ដឹង​នៅ​តុលាការ។ ក្រៅ​ពី​នេះ​មាន​អ្នកភូមិ​ខ្លះ​ទៀត​រត់គេច​ចេញពី​ការ​តាម​ចាប់​របស់​អាជ្ញាធរ។

អាស៊ីសេរី​បាន​ព្យាយាម​ទាក់ទង​អ្នកនាំពាក្យ​ក្រសួងការពារជាតិ​លោក ឈុំ សុជាតិ ដើម្បី​សុំ​ការ​បំភ្លឺ​រឿង​នេះ តែ​ទូរស័ព្ទ​របស់​លោក​មិន​អាច​ទាក់ទង​បាន​នៅ​ថ្ងៃ​ទី២៣ កុម្ភៈ។

ចំណែក​តំណាង​អយ្យការ​ខេត្ត​ព្រះវិហារ​លោក ទី សុវិនថាល់ ប្រាប់​អាស៊ីសេរី​ថា បទល្មើស​ជាក់ស្ដែង​កុំ​ថា​ឡើយ​មន្ត្រី​យោធា​សូម្បីតែ​ពលរដ្ឋ​ធម្មតា​ក៏​មាន​សិទ្ធិ​ឃាត់ខ្លួន​ជនសង្ស័យ​បញ្ជូន​មក​តំណាង​អយ្យការ​បាន​ដែរ។ លោក​ថា ប្រសិនបើ​ពលរដ្ឋ​ដាក់ពាក្យ​ប្ដឹង​មក​លោក គឺ​តំណាង​អយ្យការ​ដាច់ខាត​ត្រូវតែ​ទទួល​និង​ធ្វើការ​ស៊ើបអង្កេត​ជាបឋម ក៏ប៉ុន្តែ​លោក​មិន​បាន​បញ្ជាក់​លម្អិត​ថា នឹង​មាន​ចំណាត់ការ ពេលណា​នៅ​ឡើយ​ទេ៖ «សំណុំ​រឿង​នេះ​ត្រូវការ​ស៊ើបអង្កេត​បឋម ហើយ​ចេញ​ដីកាកោះ រយៈពេល​នៃ​ការ​ចេញ​ដីកាកោះ​វា​មាន មួយ​ខែ ២​ខែ និង ៣​ខែ ទៅ​តាម​ជិត​ឆ្ងាយ ៣​ខែ គឺ​ឆ្លងដែន​។ ឱ្យ​តែ​ដាក់​ប្ដឹង​សង្ស័យ​បទល្មើស​ព្រហ្មទណ្ឌ ខាង​អយ្យការ​ត្រូវតែ​ទទួល​ដាច់ខាត ត្រូវតែ​ចុះ​ក្នុង​សំណុំរឿង»

មន្ត្រី​សម្របសម្រួល​សមាគម​អាដហុក (ADHOC) ខេត្ត​ព្រះវិហារ​លោក ឡោ ចាន់ សង្កេត​ឃើញ​ថា​ពលរដ្ឋ​បាន​ដាក់​ពាក្យ​ប្ដឹង​ក្រុម​យោធា​វារៈ ២៦១ ដែល​មាន​លោក លុយ សម្បត្តិ ជា​មេដឹកនាំ ពី​បទ​ចាប់ខ្លួន​ខុស​នីតិវិធី ការ​ប្រើ​ហិង្សា និង​ការ​កំហែង​យក​ព្រោះ​ក្រុម​ទាហាន​ទាំង​នោះ​បាន​រឹបអូស​យក​គោយន្ត និង​សម្ភារ​របស់​ពលរដ្ឋ​ទៅ​រក្សាទុក​ខុស​នីតិវិធី។ លោក​បញ្ជាក់​ថា ក្រសួង​ការពារជាតិ​មិន​ត្រឹមតែ​គ្មាន​វិធានការ​ដោះស្រាយ​រឿង​នេះ​ទេ បែរជា​ជំរុញ​ឱ្យ​ពលរដ្ឋ​ដក​ពាក្យ​បណ្ដឹង​សំណុំ​រឿង​នេះ​ទៅវិញ៖ «ពលរដ្ឋ​ស្លូតត្រង់ និង​ពលរដ្ឋ​រងគ្រោះ​ដាក់ពាក្យ​ប្តឹង​ទៅ ស្ថាប័ន​រដ្ឋ និង​ស្ថាប័ន គាត់​អត់​មាន​វិធានការ​ណាមួយ ផ្នែក​ច្បាប់​ទៅ​ហ្នឹង​ជនសង្ស័យ និង​ជន​ប្រព្រឹត្ត​បទល្មើស​ទេ​។ ជាក់ស្ដែង​ដូច​ករណី​នេះ​អ៊ីចឹង គឺ​ក្រសួងការពារជាតិ​មិន​បាន​យកចិត្តទុកដាក់​។ ពលរដ្ឋ​អស់​ជំនឿ​លើ​ស្ថាប័នរដ្ឋ»

មន្ត្រី​សង្គម​ស៊ីវិល​រូប​នេះ​សង្កេត​ឃើញ​ថា ការ​បាត់​ខ្លួន​ពលរដ្ឋ​ម្នាក់​គឺ​ស្រប​ពេល​ដែល​ក្រុម​យោធា​វារៈ​លេខ​២៦១ ចាប់ខ្លួន​កាលពី​ចុងខែ​មករា​កន្លង​ទៅ។ លោក​យល់​ថា តុលាការ​ខេត្ត​ព្រះវិហារ​គួរតែ​ដោះលែង​ពលរដ្ឋ​ទាំងនោះ​ឱ្យ​នៅ​ក្រៅ​ឃុំ​បណ្ដោះអាសន្ន ព្រោះ​វិបត្តិ​ដីធ្លី​នេះ​កើតឡើង​រវៀង​ពលរដ្ឋ និង​ក្រុមហ៊ុន​មេត្រីភាព​ពុំ​មែន​ពាក់ព័ន្ធ​ដែន​ជម្រក​សត្វព្រៃ​គូលែន​ព្រហ្ម​ទេព​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល