តុលាការខេត្តព្រះសីហនុនៅថ្ងៃពុធទី៣ តុលានេះ បានប្រកាសសាលក្រមដាក់ពន្ធនាគារ ប្រជាសហគមន៍អូរខ្សាច់បួននាក់ ឲ្យជាប់ពន្ធនាគាររយៈពេលមួយឆ្នាំ និងត្រូវពិន័យជាប្រាក់ចំនួន ២០លានរៀល ពាក់ព័ន្ធករណីជម្លោះដីធ្លី។ មេធាវីការពារក្តី មន្ដ្រីសង្គមស៊ីវិលនិងពលរដ្ឋមានបញ្ហាដីធ្លីថាការសម្រេចរបស់តុលាការគឺជារឿងអយុត្តិធម៌ ហើយពួកគាត់បានស្រែកទាមទាររកយុត្តិធម៌នៅមុខតុលាការ។
ពាក្យថា “តុលាការពុករលួយ និងអយុត្តិធម៌ណាស់” ត្រូវបានពលរដ្ឋមានជម្លោះ ដីធ្លីស្រែក និងទ្រហោយំនៅតុលាការសាលាដំបូងខេត្តព្រះសីហនុ។
ពលរដ្ឋរងការចោទប្រកាន់ម្នាក់ លោកស្រី ឡុច ទូច ដែលត្រូវឆ្មាំពន្ធនាគារបញ្ជូនទៅឃុំខ្លួនបន្ត នៅពន្ធនាគារបាននិយាយទាំងយំសោកថា "អយុត្តិធម៌ណាស់" ៖ «អយុត្តិធម៌ណាស់ អយុត្តិធម៌ណាស់ តុលាការពុករលួយ !!!»។
ទោះបីតុលាការកាត់ឲ្យអ្នកទាំងបួននាក់ជាប់ទោសម្នាក់ៗ មួយឆ្នាំ ប៉ុន្តែពួកគេត្រូវអនុវត្តទោសជាប់ពន្ធនាគាររយៈពេល ៧ខែទោស នៅសល់បីខែទៀតត្រូវព្យួរ ដូច្នេះពួកគេនឹងរួចទោសក្នុងរយៈពីរខែទៀត។
ករណីជម្លោះដីធ្លីនៅសហគមន៍អូរខ្សាច់ ភូមិ៤ ឃុំអូរត្រេះ ស្រុកស្ទឹងហាវ ក្រុមពលរដ្ឋបានចូលទៅរស់នៅក្នុងតំបន់នេះតាំងពីឆ្នាំ១៩៩២។ នៅឆ្នាំ២០០៧ទើបក្រុមឈ្មួញអ្នកមានលុយ និងអំណាចចោទប្រកាន់ក្រុមពលរដ្ឋថា ចូលរស់នៅលើដីកម្មសិទ្ធិរបស់ពួកគេដោយសម្អាងថា ពួកគេមានប្លង់កម្មសិទ្ធិ។ ពលរដ្ឋទាំងបួនរូបត្រូវបានដើមបណ្តឹងឈ្មោះ តាន់ តាត់ មានងារជា ឧកញ៉ា និងឈ្មួញរកស៊ីដីធ្លីម្នាក់ទៀតឈ្មោះ ឡុញ វណ្ណៈ ប្ដឹងពីបទ «ប្រើហិង្សាលើអ្នកកាន់កាប់អចលនវត្ថុដោយសុចរិត»។
ប្រជាសហគមន៍ចំនួន ១៣សហគមន៍នៅខេត្តព្រះសីហនុអះអាងថា ពួកគេនឹងនាំគ្នាទៅទាមទារនៅក្រុងភ្នំពេញបន្តទៀត ដើម្បីឲ្យមេដឹកនាំរបបក្រុងភ្នំពេញលោក ហ៊ុន សែន បានដឹងអំពីរឿងនេះ។
មេធាវីរបស់ពលរដ្ឋ លោកមេធាវី ពុធ ធាវី លើកឡើងថា លោកបដិសេធមិនទទួលយកសាលក្រមនេះទេ ដោយសារតែតុលាការមិនបានបង្ហាញភស្តុតាងគ្រប់គ្រាន់ដាក់បន្ទុកកូនក្តីរបស់លោក។ លោកមេធាវីលើកឡើងទៀតថា ការសម្អាងរបស់ដើមបណ្ដឹង ដែលថា មានប័ណ្ណកម្មសិទ្ធិលើដីធ្លីនោះ ក៏មិនសមហេតុផលដែរព្រោះប័ណ្ណកម្មសិទ្ធិនោះត្រូវ បានអាជ្ញាធរនិរាករណ៍បាត់ទៅហើយកាលពីឆ្នាំ២០០២ ហេតុអីបានជាភាគីដើមបណ្ដឹងមាន ប័ណ្ណកម្មសិទ្ធិនេះទៀត៖ «ចំពោះកូនក្តីខ្ញុំអយុត្តិធម៌ណាស់គាត់អត់បានទៅបំពានកម្មសិទ្ធិដីធ្លីលើដើមបណ្ដឹងទេ ចំពោះដីភាគីដើមបណ្ដឹងមានទំហំ ៨០ហិកតារឯណោះ តើបួននាក់នេះបំពានលើដីទំហំប៉ុន្មាន ចៅក្រមស៊ើបសួររកមិនទាន់ឃើញផង មកចោទគ្នា»។
សង្គមស៊ីវិលក្នុងខេត្តព្រះសីហនុ ដែលតាមដានដំណើររឿងនេះសង្កេតឃើញថា ករណីជម្លោះ ដីធ្លីនេះគឺជាការរំលោភដីធ្លីមកលើក្រុមពលរដ្ឋជាប្រព័ន្ធ ពីសំណាក់ឈ្មួញមានលុយនិងមន្ត្រីមានអំណាច ហើយពួកគេប្រើឥទ្ធិពលមកលើប្រព័ន្ធតុលាការ។ ពលរដ្ឋនិងអាជ្ញាធរមូលដ្ឋាន សហគមន៍អូរខ្សាច់អះអាងថា ការដែលភាគីដើមបណ្តឹងមានប្លង់កម្មសិទ្ធិលើដីធ្លី លើដីមានជម្លោះនេះមិនត្រឹមត្រូវតាមច្បាប់ទេ ព្រោះដីតំបន់នេះជាដីគម្របព្រៃឈើដែលអាជ្ញាធរមិនអាចចេញប្លង់កម្មសិទ្ធិបាននោះទេ។
អ្នកសម្របសម្រួលនៃសមាគមសម្ព័ន្ធសហគមន៍កសិករកម្ពុជាក្នុងខេត្តព្រះសីហនុ លោក ញិល ភាព ដែលតាមដានសវនាការនេះសង្កេតឃើញថា មេធាវីការពារឲ្យដើមបណ្ដឹងមានភស្តុតាងតែមួយគត់គឺប័ណ្ណកម្មសិទ្ធិដីធ្លីដែលពួកគេបានធ្វើកាលពីអំឡុងឆ្នាំ១៩៩៥។ ប៉ុន្តែលោកយល់ថា ការសម្អាងបែបនេះគឺខុសទៅទិដ្ឋភាពច្បាប់ និងទិដ្ឋភាពពិតប្រាកដនៃតំបន់អូរខ្សាច់កាលពីជំនាន់នោះ៖ «គឺមិនអាចទៅរួចទេ ជំនាន់ក្រសួងដែនដីក៏មិនទាន់បង្កើតដែរ ហើយតំបន់ជាកន្លែងប្រទាញប្រទង់រវាងកងទ័ពរដ្ឋខ្មែរក្រហម និងកងទ័ពរដ្ឋាភិបាលអ៊ីចឹងមិនអាចមានជំនាញទៅវាស់វែងលើដីនោះបានទេ»។
ចំណែកពលរដ្ឋមានបញ្ហាធ្លីម្នាក់ដែលមិនពេញចិត្តចំពោះការសម្រេចរបស់តុលាការ លោកស្រី ញ៉ាញ ស៊ន ស្នើទៅលោក ហ៊ុន សែន ឲ្យជួយអន្តរាគមន៍ដល់ពលរដ្ឋទាំងបួនរូបដែលរងការចោទប្រកាន់។ លោកស្រីព្រួយបារម្ភថា បើពេលតុលការសម្រេចឲ្យក្រុមឈ្មួញមានអំណាច ឈ្នះក្តីដូច្នេះ នឹងធ្វើឲ្យក្រុមឈ្មួញផ្សេងទៀតបន្តរំលោភដីធ្លីពលរដ្ឋបន្តទៀតព្រោះលោកស្រី សព្វថ្ងៃកំពុងរងការគំរាមកំហែងពីក្រុមឈ្មួញទាំងនោះ៖ «លោកពូនាំដំណឹងនេះទៅសម្ដេចឲ្យបានដឹងផង សូមសម្ដេចជួយផង លោកជំទាវ លោកជួយកូនចៅ បើលោកមិនជួយទេកូនចៅពិតជារងកម្ម រងទុក្ខ រងភ័យ ទឹកភ្នែកនេះក្លាយជាទឹកសមុទ្រ»។
មេធាវីការពារឲ្យពលរដ្ឋទាំងបួនថា នឹងប្ដឹងជំទាស់នឹងសេចក្ដីសម្រេចរបស់តុលាការ ខេត្តព្រះសីហនុ ទៅសាលាឧទ្ធរណ៍បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។